Lamo mpame ketawɔ ambɔ: ‘Kampanda’ ndatepela ante akoka ‘ndotshita’ etenyi kɛnde k’okitɔ ntsha nde ntshukana nya Oruta? (Oru. 4:1, 6)

L’etsho wefunamaki Bible, ntsha mpame kembotshuka ambovɔ ko apawotisa wana, anto wayawopolaki weepó ɛmɔtshi: Kɛkɔnge kengokomela etenyi kɛnde k’okitɔ? Djiina djɛnde ngodjimɔ lotshinda? Ɛlɛmbɛ wɛ Mɔsɛ wakadjimolaki weepó wɛ nghɔsɔ.

Kɛkɔnge kɛ yananghaka la etashi kɛ looko kɛ onto wombovɔ kana onto wombokoma ɔmvɔ ko ambosadjɛ etatshi kɛnde kɛ looko? Wɔna nyɛnghɛnde kana ose nkfumbo ɔmɔtshi w’entshupa akokaki nkita etatshi kɛ looko kɛsɔ, kana ntshungola ntsha ndasadjɛ nde nsadjɛ. Lá lɛdji lɔsɔ, etatshi kɛ looko katshikalaki ngo lá nkfumbo kɛwɔ.—Lew. 25:23-28; Ew. 27:8-11.

Wopo wɔkɔnge yananghaka dj’ipa djiina dj’onto wombovɔ ndjimɔ? Má lotshimbo lɔ bala dj’okitɔ, wopo wɔ bala djɛ Oruta ndatshukama. Mpame atshukaki wadjɛ wɔnanyɛnghɛnde wombovɔ dj’iwɔ mbota wɔna w’okoka ndokfundola djiina dj’odjo la nkita nkete djɛnde. Nonghanyi kɛ ngandji kɛsɔ k’akotshɛki edjinge wadj’odjo.—Mvu. 25:5-7; Mat. 22:23-28.

Tokoshishima ndjɔmbɔmba kɛ Naɔmi. Nde atshukamaka le mpame kɛmɔtshi kɛ yetaka Elimɛlɛkɛ. Winá wɔ Elemɛlɛkɛ nya wana wande ape w’ampame yavu, lako onto wokokisa nama Naɔmi. (Oru. 1:1-5) Winá wɔ yakalɔ tá Juda, Naɔmi ashimelaka okilo wɔnde Oruta djɛ ntoshimela Bɔazɛ djɛ nde ndootshungola. Nde ayalaka ewoto kɛ nsukensuke kɛ Elemɛlɛkɛ. (Oru. 2:1, 19, 20; 3:1-4) Koko Bɔazɛ ewaki ante ose nkfumbo kɛwɔ onkina wɔ Bible etande ante ‘Kampanda,’ ndeke loyalaki ewoto keleká entshupa. Nde ndeke onto wɔ ntondo wokokisá ntshungola looko lɔsɔ.—Oru. 3:9, 12, 13.

Má bango, ‘Kampanda’ awolaka nkotshɛ́. (Oru. 4:1-4) Nde ewaki ante angɔlɔmbama mfalanga efula djɛ nangha nkambo djɛsɔ, koko nde asipisoyɛki ante Naɔmi ambotshunda la apookoka mbota lonkina wɔna wongokita looko lɔ Elimɛlɛkɛ. Lasɔ, Kampanda akokaka nkita looko lɔ Elimɛlɛkɛ edjinge mba wapɔ efula m’eteyi.

Koko Kampanda atshikitanyɛka ikanyi winá wɔ ndeewaka ante nde ladjɛ ntshuka Oruta. Nde atepelaka ante: ‘Lemi mpalekɔ l’akoka wa ntshungola looko lɔsɔ, ladjikɛnde nkoka ndotshita etenyi kɛmi k’okitɔ.’ (Oru. 4:5, 6) Lamo ndotshikitanyɛka ikanyi yɛnde?

Ntsha Kampanda kana onto onkina ntshuka Oruta ko nde ndoowotela wɔna mpame, wɔna wɔsɔ akokaki nkita looko lɔ Elimɛlɛkɛ. Wopo wɔkɔnge nkambo djɛsɔ yakoke ‘ndotshita’ ‘okitɔ’ wɔ Kampanda? Bible apatepela nkambo djɛsɔ, koko akokaka ndjala má topo tɔnɛ.

• Yɛ ntondo, nde akokaka ntshutshɛ mfalanga efula djɛ nsomba looko lɔ Elimɛlɛkɛ, koko ekomo ekomo looko lɔsɔ lopangoyala lɔnde. Lotayɛ ndoyala lɔ wɔna Oruta.

• Y’ape, nde akokaka ndoyala l’odjito wɔ ndesɛ la nama Naɔmi nya Oruta.

• Y’asato, ntsha Oruta amboowotela wana ankina, wana wasɔ watayɛ ndokapana looko la wana ankina wa ndawote ntondo.

• Y’anɛyi, ntsha Kampanda atayalá la wana ankina, wɔna Oruta wɔsɔ ndeke lotayala la lotshungɔ lɔ ndɔsa ayale looko lɔ Elimɛlɛkɛ la lɔ kampanda. Ko nde atayɛ ndotshutshɛ looko lɔnde te wɔna wetamaki lá djiina djɛ Elimɛlɛkɛ, koko ape djɛnde. Kampanda atakɔpá ndjila okitɔ wɔnde lá mbalaka djɛ nkotshɛ́ Naɔmi. L’edjena kɛ nangha nghɔsɔ, nde awolaka mpɛyɛ Bɔazɛ lotshungɔ lɔ somba looko lɔsɔ la ndɔsa odjito wɔwɔ. Bɔazɛ awolaka nangha nghɔsɔ ladjikɛnde nde akɔpaka ‘nkfundola djiina djɛ djɛmɔ lá etenyi kɛnde k’okitɔ.’—Oru. 4:10.

Nyɛnamaka papoo ente Kampanda alekaki ndakiyanyɛ efula ngo lá nkambo djɛ djiina djɛnde la dj’okitɔ wɔnde. Nde ayalaka la lolemba. Koko l’edjena kɛ nama djiina djɛnde, lɔɔko kɛnɛ djiina djɛ Kampanda mpewama kaanga ndjewama. Nde asambaka edjinge mpeyi k’ekekete efula kɛ Bɔazɛ ndawa, kɛ mbalemá l’ɔlɔndji wɔtɔla tá Mesiya, Yeso Kristo. Ɔsɔngo eposelo wɛ nyɛtshi wewisá Kampanda m’ɔtɛ wɔ ndatone nkotshɛ́ onto woyalisá lá djonyi!—Mat. 1:5; Luka 3:23, 32.