1-2. Ntsha otayale entshupa djɛ ndongola batisimo, lamo ngopakoke ndɛmba? (Lenda ntshango djelá loposo.)

 NTSHA olekɔ l’ikanyi yɛ ndongola batisimo, mbɔ omboyawilela okoma wɔ wɔlɔ efula. Omboyalɔngɔsɔla djɛ ndongola batisimo win’ɔsɔ? Ntsha oyashikikɛ ente omboyalɔngɔsɔla, la ntsha tokokolo wambawola nkambo djɛsɔ, mbɔ tokakandake djɛ ndongola batisimo lá losanghanyɛ l’ekekete loyaye. Ntsha wɛ nangha nghɔsɔ ongoyala l’osasa w’efula l’olemo wɔ Yehova.

² L’onkoko onkina, wambokoshimelá ambɔ wɛ ladjɛ nangha etshikitano ɛmɔtshi lá ntondo kɛ ndongola batisimo? Ndo koko wɛ nghɔmɛlɛ ɛna ente oyɛwɔ ngo nghɔsɔ? Ntsha oyɛwɔnde nghɔsɔ, mbɔ tɔlɛmbake. Wɛ nkoka nkotshɛ kɛnɛ kɛlɔmbamá djɛ ndongola batisimo, ayale oyɛ nde olangala kana ekokolo.

3. Ose olemo ɔmɔtshi w’owandji w’Etiyɔpiya ndopola Filipɛ nge, ko nkambo djɛsɔ oposɛwɔ woopó wɔkɔnge? (Elemo 8:36, 38)

³ Wala Elemo 8:36, 38. Ose olemo w’owandji ɔmɔtshi w’’Etiyɔpiya opolaka Filipɛ ante: ‘Kɛkɔnge kenshimba djɛ ndongola batisimo?’ Mpame k’ose Etiyɔpiya kɛsɔ ayalaka la mposɛ kɛ ndongola batisimo, iya nde ayalɔngɔsɔlaka nsɔsɔlɔ djɛ ntapola djina djɛ djonyi djɛsɔ?

4. Wopo wɔkɔnge ose Etiyɔpiya ndɛnyɛ ante ɔsaka nkano djɛ nkindjɛ ndjeka?

⁴ Mpame k’ose Etiyɔpiya kɛsɔ ‘ndaakalɔka nde má Jerusalɛmɛ má ntɔtɛmɔla.’ (Ele. 8:27) Djɛkondeke ndjokamaka ente, mbala imɔtshi nde awolaka olakanyelo w’ase Juda. Ape l’ehamo nde ekaka akambo walendana lá Yehova má Afunelo w’ekina wɛ Hebero. Koko, nde ayalaki la mposɛ kɛ ndjeka akambo ankina efula. Winá wɔ Filipɛ ndapomana nya mpame kɛsɔ l’ontayimbo, ndɔwɛnyi atananghe nge? Atawale ɔwɔmbɔ wɔ afunelo  w’ɔprɔfɛtɛ Izaya. (Ele. 8:28) Ɔsɔ ayalaka nkete djɛ ndɛ djɛ wolo djelá nyuma. Ose olemo w’ose Etiyɔpiya wɔsɔ atakoma ngo lá ndjeka elakanyelo wɛ wɔdju welá Bible, nde ayalaka la mposɛ kɛ nkindjɛ ndjeka akambo ankina efula.

5. Mpame k’ose Etiyɔpiya ndananghaka nge la kɛnɛ kɛ ndekaka?

⁵ Mpame kɛsɔ ayalaki onto w’ekekete wokambaki laka Kandakɛ nkfumi k’omoto k’Etiyɔpiya; nde ndeke ‘lolamaki ekfudji wɛnde enkfumɔ.’ (Ele. 8:27) Djɛkondeke nde ayalaka l’edjito edjinge l’akambo efula wa nangha. Kaanga yayele nghɔsɔ, nde ɔsaki winá djɛ ntɔtɛmɔla Yehova. Nde atakoma ngo lá ndjeka akambo wa nsɔsɔlɔ toko, koko nde akambaki la kɛnɛ kɛ ndekaka. Djɛkondeke ndananghe lɔkɛndɔ l’otale efula má Etiyɔpiya djɛ ntɔtɛmɔla Yehova lá tɛmpɛlɔ kelá Jerusalɛmɛ. Lɔkɛndɔ lɔsɔ lɔwɔsɛlaka winá la mfalanga efula, koko ayale kɛkɔnge kɛ nkambo djɛsɔ yɔɔlɔmbaka mpame kɛsɔ atshɔki ngo ntɔtɛmɛla Yehova.

6-7. Wopo wɔkɔnge ngandji k’ose Etiyɔpiya ndokaka Yehova yakindjɛ mfula?

⁶ Ose Etiyɔpiya wɔsɔ ekaka akambo wa nsɔsɔlɔ wa bango me Filipɛ, nkambo mɔtshi djɛ ndeeke nde, Yeso ndeke Mesiya. (Ele. 8:34, 35) Mpame kɛ lomo kɛsɔ ayalaka l’osasa wɔ ndjewa kɛnɛ kɛ Yeso ndananghe lá nkambo djɛnde. Iya ndananghe m’ɔkɔngɔ wɔ ndjeka akambo wasɔ? Nde akokaka ntshikala ngo wopo wɔ ndayalaka, ntepela ente ose Juda wɔ yalɛmɛyɛka efula. Koko, ngandji kɛnde te Yehova nya Wɔnande kefulaka. Ngandji kɛsɔ k’otshindaka djɛ ndɔsa nkano djɛ djonyi efula lá lowiko lɔnde, ntepela ente nkano djɛ ndongola batisimo la nkoma ombeki wɔ Yeso Kristo. Etengo ndɛnyi ante mpame kɛsɔ ambokoka ndongola batisimo, Filipɛ obatizɛka.

⁷ Ntsha wɛ nkilika ndjɔmbɔmba k’ose Etiyɔpiya kɛsɔ, mbɔ okoka ndjala entshupa djɛ ndongola batisimo. Edjinge wɛ nkoka ntepela l’eshikikelo k’enkfumɔ ente: ‘Kɛkɔnge kenshimba djɛ ndongola batisimo?’ Nyontshɔ tokoshishima wopo wokokɛ nkilika wiina watapolisá mpame k’ose Etiyɔpiya wanɛ: Nde akindjɛka ndjeka, akambaki l’akambo wa ndekaka, edjinge akindjɛka mfudjɛ ngandji kɛnde te Ndjambe.

8. Djɔanɛ 17:3 ɔkɔlɔmbande djɛ nangha nge?

⁸ Wala Djɔanɛ 17:3. Etepela wɛ Yeso wɛsɔ ndeke lokotshindisá djɛ wɛ ndjeka Bible? Nkambo djɛsɔ dekɔ nsɔsɔlɔ le anto efula wal’anteyi kɛso. Etepela wɛkɔ ɛmɔ wɛtɔlɔmba lonkina djɛ nkindjɛ ndjeka? Ee. Topatshikaki ‘ndjeka djɛ ndjewa . . . ɛtɔyi kɛ Ndjambe kɛ  nsɔsɔlɔ.’ (Los. 3:11) Tongokindjɛka ndjeka lotshinda lotshinda. Winá wɔ sotaleke ndjeka, ndeke songotalekaka ndasukanyɛ la Yehova.—Yee. 73:28.

9. Kɛkɔnge k’oyɛso ladjɛ nangha m’ɔkɔngɔ wɔ ndjeka elakanyelo w’ewangelo welá Bible?

⁹ Winá wowangaso ndjeka akambo walendana la Yehova, iso mbangaka l’elakanyelo wɛ bango. Lá onkanda wɔnde te ase Hebero, ɔpɔstɔlɔ Poolo etaka elakanyelo wɛsɔ ante ‘elakanyelo w’ewangelo.’ Kɛsɔ kepasakisola ente nde atɔsaki ‘elakanyelo w’ewangelo’ wɛsɔ la ntshina, koko nde áwɛdjɛka l’awɛlɛ walɔma dɛngɛ. (Heb. 5:12; 6:1) Nde akembɛka Akristo ankfumɔ dj’ipa nkomá ngo lá ndjeka elakanyelo w’ewangelo wɛsɔ toko, koko djɛ ndjeka edjinge elakanyelo wɛ lotshimola wel’Otepela wɔ Ndjambe. Ombofudjɛ mposɛ kɛko kɛ ndjeka elakanyelo wɛ lotshimola wemá Bible? Olekɔ la mposɛ kɛ mfula, kɛ nkindjɛ ndjeka akambo walendana la Yehova l’ikanyi yɛnde?

10. Lamo anto amɔtshi oyalakawɔ l’okakasano wɔ ndjeka?

¹⁰ Koko anto efula l’anteyi kɛso wangoyalake l’okakasano djɛ ndjeka. Ya wɛ? Ekaka djɛ mbala la tanga wɔlɔ má nkalasa? Ɔngɔpake ndjeka la ɔngɛnake ente wekelo wɔkɔ nkoyakalaka wapɔ? Ndo koko, olekɔ l’eshikikelo ente opekela ndjeka enkanda? Ntsha oyawokɛ nde nghɔsɔ, ewa ente opalekɔ nghɔmɛlɛ. Yehova nkoka nkokotshɛ́. Nde alekɔ Wetsha wɔ djɔ woleka wetsha enkina enkfumɔ.

11. Wopo wɔkɔnge Yehova ɛnyɛnde ante alekɔ ‘Wetsha w’ekekete’?

¹¹ Yehova ndawetaka ante ‘Wetsha wɔko w’ekekete.’ (Iza. 30:20, 21) Nde alekɔ Wetsha wolekɔ la balentshitshi, wɔ wɔlɔ, la woyawila l’edjena kɛ ambeki wande. Nde mponaka ngo wɔlɔ w’ambeki wande. (Yee. 130:3) Edjinge apɔtɔlɔmbɛ dj’iso nangha kɛnɛ kɛsopalekɔ l’akoka wa nangha. Vungɔ ente, nde ndeke lonanghisa wɔɔngɔ wɔko, opapɛyɛ wɔ wɔlɔ lombombe. (Yee. 139:14) Totongamaka la mposɛ kɛ ndjeka. Ontongi wɔso nkɔpaka dj’iso nkindjɛ ndjeka lotshinda lotshinda la mbaka osasa má wekelo wɔkɔ. Djɛkondeke alekɔ nkambo djɛ balo ‘ndjala la mposɛ k’efula’ k’akambo wa nsɔsɔlɔ wemá Bible má winá wɔsɔ. (1 Pɛ. 2:2) Yawilela ekoma wokokɛ nkotshɛ edjinge walaka la ekaka Bible mbala la mbala. (Yos. 1:8) M’okotshɔ wɔ Yehova, ongoyala la mposɛ k’efula kɛ mbalaka la kɛ ndjekaka akambo efula walendana lande.

12. Lamo oyɛso la djɛ ndjeka lowiko edjinge olemo wɔ Yeso?

¹² Ɔsaka winá djɛ ntɔnɔlaka mbala la mbala lá lowiko edjinge l’olemo wɔ Yeso. Alekɔ djonyi iso ndjokola wina wa Yeso wɔlɔwɔlɔ ntsha iso nkɔpaka nkambela Yehova, pekapeka lá deko djɛ wolo djɛnɛ. (1 Pɛ. 2:21) Yeso atepelaka papoo ante ambeki wande wangopomana l’ekakasano. (Luka 14:27, 28) Koko, nde ayalaka l’eshikikelo ante ambeki wande wa nsɔsɔlɔ wangolonga etengo nde ndalonge. (Dj. 16:33) Ekaka ɛkɔndɔ welendana la lowiko lɔ Yeso, edjinge yawilela okoma wɔ ndjokola ndjɔmbɔmba kɛnde lá lowiko lɔko lɔ lofu la lofu.

13. Kɛkɔnge koyɛ ladjɛ nkindjɛ ndɔmba Yehova, ko lamo?

¹³ Ndjala ngo la balo toko apakoke. Balo ngokokotshɛ djɛ wɛ ndjeka akambo wa djonyi walendana la Yehova edjinge mfudjɛ ngandji la djawo djɛko tende. (1 Kɔ. 8:1-3) Winá wɔ ngongokindjɛka ndjeka, lɔmbaka Yehova akokotshɛ́ djɛ wɛ mfudjɛ djawo djɛko tende. (Luka 17:5) Nde nkadjimolaka ndɔmbɔ yɛ nghɔsɔ la lokapo l’onkfumɔ. Djawo djɛ nsɔsɔlɔ djembopikamá má balo djɛ djɔ djɛ Ndjambe kɛso ngokokotshɛ djɛ wɛ mfula lá nyuma.—Dja. 2:26.

14. Wopo wɔkɔnge ɔpɔstɔlɔ Pɛtɛlɔ ndɛnyɛ djonyi djɛ nkamba la kɛnɛ k’ekaso? (Lenda edjinge ntshango.)

¹⁴ Ɔpɔstɔlɔ Pɛtɛlɔ ɛnyɛka ladjikɛnge oyɛwɔ djonyi Akristo nkindjɛ nkamba l’akambo w’ekawɔ. Nde atepelaka nkambo dj’ɔkɔndɔ welá Bible wolendana la Nɔa. Yehova ashimelaka Nɔa ante angotshita anto ankfumɔ wapɔlɔ wa l’etsho wɛsɔ la mvula k’elola. Ndjewa toko ente mvula k’elola kɛkɔpa ntɔnga, atakoká mbikɛ Nɔa nya nkfumbo kɛnde. Tovungɛke ente, Pɛtɛlɔ ndatepela nde eleko kɛ lá ntondo kɛ Mvula k’elola ntɔnga, ‘wina wɔ wato yapikamaka.’ (1 Pɛ. 3:20) Ee, Nɔa nya nkfumbo kɛnde wakambaka la kɛnɛ k’iyeke me Ndjambe má mpika wato w’ekekete lombombe. (Heb. 11:7) Masɔ Pɛtɛlɔ ɛdjɛka kɛnɛ kɛ Nɔa ndananghe la batisimo, nde afunaka ante: ‘Batisimo djokaná la djoyi djɛsɔ, nyowikɛ.’ (1 Pɛ. 3:21) Lá lɛdji lɔmɔtshi, iso nkoka ndjɛdjɛ olemo wonanghɛ winá wɔsɔ djɛ ndalɔngɔsɔla tá batisimo la olemo wonaghisá Nɔa nya nkfumbo kɛnde l’ilá k’ɛnɔnyi efula djɛ mpika wato. Olemo wɔkɔnge woyɛ ladjɛ nangha djɛ ndalɔngɔsɔla tá batisimo?

15. Ndapɛla kɛ nsɔsɔlɔ osakisolawɔ nge?

¹⁵ Nkambo mɔtshi djɛ ntondo dj’oyɛso ladjɛ nangha nde, ndapɛla má mpekanto yɛso. (Ele. 2:37, 38) Ndapɛla kɛ nsɔsɔlɔ, totshindaka djɛ ntshikitana lá lɛdji lɔ nsɔsɔlɔ. Ombóshiyɛká ntshika nanghedji djɛpɔlɔ dj’ipasasangɛ Yehova, ndjɔmbɔmba lowiko lɔ mbindo, okambelo wɔ la nnɔnnɔ djɛ wolo kana wɔ la etepela wɛ nyɛtshi? (1 Kɔ. 6:9, 10; 2 Kɔ. 7:1; Ɛfɛ. 4:29) Ntsha otananghe nkambo djɛsɔ, mbɔ nangha la wolo djɛ nangha etshikitano. Sawola nya onto wokekɛ Bible, kana lɔmba tokokolo tɔl’otshumano wakokotshɛ́ la wakɛnyɛ kɛnɛ k’okokɛ nangha. Ntsha oyɛ nde olangala edjinge intasɛ ngo lakanyo, lɔmba ambotshi wako wakokotshɛ́ djɛ ntshika nanghedji djɛpɔlɔ djekoka nkoshimba djɛ wɛ ndongola batisimo.

16. Kɛkɔnge kesakisola ndjala la nkfumbo djɛ wɔlɔ djelá nyuma?

¹⁶ Alekɔ lonkina djonyi efula ndjala la nkfumbo djelá nyuma. L’anteyi kɛ nkfumbo djɛsɔ ndeke, ndjingelaka lá nsanghanyɛ y’Akristo la mpɛyɛka kɔmantɛrɛ. (Heb. 10:24, 25) Edjinge winá wɔ ngongokotshɛ kɛnɛ kɛlɔmbamá djɛ ntateyɛ mpoposanyɛ, nangha la wolo  djɛ nanghaka nkambo djɛsɔ mbala la mbala. Winá wɔ ngongolekaka ndapɛyɛ l’olemo wowikɛ mbiko wɔsɔ, ndeke ngongoleka nkɔpa olemo wɔkɔ. (2 Ti. 4:5) Ntsha oyɛ nde olangala edjinge oyalɛ nde lakanyo, yawopola ente: ‘Langohonake ngo ambotshi wami mvungola lemi djɛ ntshɔ tá nsanganyɛ kana t’olemo w’ipoposanyɛ? Ndo koko langonanghake akambo wasɔ mɔmɛlɛ ipa l’onto ntshinda lemi la wolo?’ Ntsha wɛ nanghaka akambo wasɔ nghɔmɛlɛ ipa l’onto nkotshinda, ɔngɛnyɛ ente olekɔ la djawo, ndjokaka Yehova Ndjambe ngandji la olekɔ la djedjɛ tende. Akambo wasɔ walekɔ ‘nanghedji djɛnyɛ ente olekɔ imama la Ndjambe,’ epapɛyɛ wɔpɛyɛ. (2 Pɛ. 3:11; Heb. 13:15) Epapɛyɛ wɔpɛyɛso l’ɛkɔpa ipa l’onto ntotshinda la wolo, nsasangɛka Ndjambe. (Ɛdjɛ la 2 Kɔrɛtɔ 9:7.) Iso nanghaka akambo wasɔ ladjikɛnde iso ndjalaka l’osasa winá wɔpɛyɛso Yehova kɛnɛ keleka wɔlɔ leso.

17-18. Djekeka djɛkɔnge djɛ djonyi efula djengokokotshɛ́ djɛ wɛ mfula tá batisimo, ko lamo? (Woongo 3:3-6)

¹⁷ Winá wɔ ngotakindjɛ mfula tá batisimo, ongopomana l’ehemba. Anto amɔtshi nkoka nkɔnyɔla m’ɔtɛ wɔ djawo djɛko djɛ bango, iwɔ nkoka kaanga nkonanyɛ kana nkɛnyɛ ndjolo. (2 Ti. 3:12) Winá wonanghɛ la wolo djɛ ndongela nkfumbo mɔtshi djɛpɔlɔ, okoka nkfɔ lonkina l’evunga wɛkɔ. Kana mbala imɔtshi okoka nsamba bale ntshitshi kana ndɛmba ladjikɛnde opakotshɛ okoma wɔko. Kɛkɔnge kengokokotshɛ́ djɛ wɛ nkfulumeyɛ? Djekeka mɔtshi djɛ djonyi efula, ntepela ente ngandji kɛko te Yehova.

¹⁸ Ngandji kɛko te Yehova alekɔ djekeka djɛ wɔlɔ lombombe, djeleka ekete k’enkfumɔ k’okotshɛ́ ntshina. (Wala Woongo 3:3-6.) Ntsha olekɔ la ngandji k’efula te Ndjambe opangotshika ndookambela kaanga opomanɛ l’ekakasano wɛkɔnge. Bible ntepelaka mbala efula ngandji kɛ nkɔmano kelekɔ la Yehova te enkambi wɛndɛ. Kɛsɔ nyɛnyɛka ente nde apakadjɛki enkambi wɛnde la apatshikaki ndaakɔpa. (Yee. 100:5) Wɛ otongamaka l’ɛfɔ kɛ Ndjambe. (Ewa. 1:26) Okokɛ nyɛnyɛ wopo wɔ ngandji kɛ nghɔsɔ ngetemo?

19. Wopo wɔkɔnge wokokɛ mfudjɛ djedjɛ djɛko tá kenkfumɔ kɛ Yehova okonanghelande? (Ngalatiya 2:20)

¹⁹ Tateyɛ la djedjɛ. (1 Te. 5:18) Lofu la lofu, yawopolaka ente, ‘Wopo wɔkɔnge Yehova ndɔnyɛnyɛki ngandji kɛnde?’ Masɔ nangha  la wolo djɛ nkawoyɛ Yehova lokasa má lɔlɔmbɔ, lumola akambo wa ndokonanghelaki. Awola ente Yehova nkonanghelaka wɛ nghɔmɛlɛ wɔlɔ, etengo ɔpɔstɔlɔ Poolo ndawola lá nkambo djɛ Yehova. (Wala Ngalatiya 2:20.) Yawopola ente: ‘Lemi nkɔpaka ndɔwɛnyɛ ngandji k’owokami edjinge lemi?’ Ngandji k’okɛ Yehova kengokokotshɛ djɛ wɛ nkindjɛ mpikamá lá ntondo k’ehemba la nkfulumeyɛ ekakasano wepomana lawɛ lá yopo yɛ wɔlɔ. Kengokotshinda djɛ wɛ nkindjɛ la nonghanyi yɛko yelá nyuma, má nyɛnyɛ Papa kɛko ente wɛ ndɔkɔpaka mfu inkfumɔ.

20. Kɛkɔnge k’oyɛ ladjɛ nangha djɛ ndambola lowiko lɔko te Yehova, ko tii lá lɛdji lɔkɔnge nkano djɛsɔ oyɛwɔ djonyi?

²⁰ L’ilá k’etsho, ngandji kɛko te Yehova kengokotshinda djɛ wɛ nangha lɔlɔmbɔ lotshikitanyi. Ongoyalambola nghɔmɛlɛ te Ndjambe. Mvungɔ ente winá woyalambolɛ te Yehova, ongoyala la nkongi djɛ wɔlɔ lombombe djɛnɛ: Ongoyala onto wɔnde lotshinda lotshinda. Winá woyalambolɛ te Yehova, wɛ ndolakaka ente ongookambela ayale lá deko djɛ ndjolo kana djɛ wɔlɔ. Apangoyala djonyi kalɔ nangha ɛlɔkɔ kɛkɔ lonkina. Djɛkondeke, winá wonanghelaso Yehova ɛlɔkɔ kɛ ndalambola, iso ndɔsaka nkano djɛ djonyi efula. Koko, tovungɛke nkambo djɛnɛ: Ɔngɔsa akano efula lá lowiko lɔko, wamɔtshi wangoyala wɔlɔ efula, koko lako nkano djengoleká nkano djɛ ndambola lowiko lɔko te Yehova wɔlɔ. (Yee. 50:14) Satana angohona djɛ nkitshakitshɛ ngandji k’okɛ Papa kɛko, má nkotshinda djɛ wɛ nkanela ente opangokoka ntshikala la nkɔmano tende. Totshikake djɛ Satana nkolongela! (Djɔ. 27:5) Ngandji k’efula k’okɛ Yehova kengokokotshɛ djɛ wɛ nɛmɛyɛ ɛlɔkɔ kɛko la djɛ ndeka ndasukanyɛ la Papa kɛko kel’olongo.

21. Lamo okokaso ntepela ente batisimo apalekɔ ekomo koko ewangelo?

²¹ Mɔkɔngɔ wɔ wɛ ndalambola te Yehova, shimela tokokolo tel’otshumano wɔko djɛ ntapola djina nkina djɛ djonyi djɛwɔlamá. Koko, ongovungɔke winá enkfumɔ ente, batisimo apalekɔ ekomo, koko ewangelo. Ewangelo kɛ lowiko l’ipa l’ekomo l’olemo wɔ Yehova. Djɛkondeke nkembɛ ngandji kɛko te Papa kɛko má winá wɔsɔ. Yawilela okoma wɔ ntafudjɛka ngandji kɛko lofu la lofu. Nangha nghɔsɔ angokotshinda djɛ wɛ ndongola batisimo. Ɔsɔ angoyala lofu lɔ wɔlɔ efula. Koko ɔsɔ oyɛwɔ ngo ewangelo. Djɛkondeke tshika ngandji kɛko te Yehova la te Wɔnande ketafulaká ngo mfula lotshinda lotshinda!