1-2. a) Eyunikɛ ndayalaka na, ko okakasano wɔkɔnge woyalaki lande etengo nyɔ? b) Pakisola ntshango djelá loposo.

 KAANGA Bible yopatepela nkambo djelendana la batisimo djɛ Timɔte, iso nkoka nkanela osasa woyalisa la nyɔ kɛnde Eyunikɛ, lofu lɔsɔ. (Woo. 23:25) Kokanela osasa woyalisa lande wina wɔ ndɛnyi Timɔte ambemala lá washi. Nde amonghamonghaka winá wɔ Loyisɛ, ndoyi kɛ Timɔte k’omoto, ndemala entshupa nyande. Eyunikɛ ahɛngaka ɔkɔkɛ ko akelenghanyɛka lohomo winá w’iyaluwe Timɔte lá washi. Winá wɔ Timɔte ndapose má washi l’elongi k’omonghamongho, nyɔ kɛnde akɛdjɛka wisɔyi w’osasa. Eyunikɛ alongelaka okakasano w’ekekete wɔ ndakanyɛ wɔnande wɔ mpame djɛ nde nkɔpa Yehova nya Wɔnande, Yeso Kristo. Ekakasano wɛkɔnge wepomanisa lande?

² Timɔte afulaka lá nkfumbo kɛ ambotshi watayalaki l’etolo kɛmɔ. Papa kɛnde ayalaki ose Ngirika, ko nyɔ kɛnde la ndoyi kɛnde k’omoto wayalaki ase Juda. (Ele. 16:1) Timɔte akokaka ndjala l’ɛnɔnyi djomi la ndjakfe winá wɔ Eyunikɛ nya Loyisɛ yakome Akristo. Koko papa kɛnde atakoma Okristo. Mboka kɛkɔnge kɛ Timɔte ndakoke nkilika? Mbala imɔtshi l’etena kɛsɔ ko nde ambokoka ndɔsa nkano djɛnde nyɔmɛlɛ. Ndakoke nde nkilika mboka kɛ papa kɛnde ketayalaki ondjawodji? Ndakoke nde nkilika nkfumbo dj’ase Juda dj’iyolakanyɛ winá wɔ ndayalaka ilɛngɛ? Ndo koko ndakoke nde nkoma ombeki wɔ Yeso Kristo?

3. Lá nkilika Woongo 1:8, 9, wopo wɔkɔnge Yehova ɔsande welo w’ilá wa nyɔ djɛ nkotshɛ́ wana wawɔ djɛ nkoma tolongo tɔnde?

³ Edjinge wa nyɔ y’Akristo yɛ lɔɔko kɛnɛ ndjokaka ankfumbo yɛwɔ ngandji. Lá lɛdji loleka nkete nkfumɔ, iwɔ nkɔpaka nkotshɛ́ wana wawɔ djɛ ndjala la djokanelo djɛ ma ma la Yehova. Edjinge Ndjambe kɛso ndɔsaka welo w’ilawɔ la ntshina efula. (Wala Woongo 1:8, 9.) Yehova ambokotshɛká wa nyɔ efula dj’iwɔ  nkotshɛ́ wana wawɔ djɛ ndjawola akambo wa nsɔsɔlɔ.

4. Okakasano wɔkɔnge wopomana la wa nyɔ yɛso lɔɔko kɛnɛ?

⁴ Etengo ewaso, wale w’omoto nkoka ndawopola lá winá ɛmɔtshi ntsha wana wande wangɔsɔna djɛ nkambela Yehova ngo ngete Timɔte ndananghe. Nkambo djeleka nde, ambotshi ndjewaka lodjimbo lɔ wolo lɔ wana wawɔ opomanawɔ l’andja wa Satana wanɛ. (1 Pɛ. 5:8) Lonkina, wa nyɔ efula wangoyalake l’okakasano wɔ mbongola wana wawɔ ntsha wapalekɔ la wame kana wame wapatɛmɔla Yehova. Ndjɔmbɔmba, nkaana k’etawɔ Christine * ntepelaka ante: “Womɛmi ayalaka papa edjinge owandji wɔ nkfumbo wɔ wɔlɔ, koko nde ananyɛki efula la atakɔpaki lemi nkotshɛ́ wana waso dj’iwɔ nkoma Ewakɛ wɛ Yehova. Lálelaki mbala efula l’ilá k’ɛnɔnyi, la ndawopolaki wopo wɔ wana wami yakoke ntɛmɔla Yehova.”

5. Kɛkɔnge kɛ songoshishima lá djamba djɛnɛ?

⁵ Ntsha oyɛ nde nyɔ k’Okristo, wɛ nkoka ndonga etengo Eyunikɛ ndalonge. Lá djamba djɛnɛ, tongoshishima wopo w’okokɛ ndjokola ndjɔmbɔmba kɛnde má ndakanyɛ wana wako m’etepela wɛko la má nanghedji djɛko. Tɔngɛna lonkina wopo wɔ Yehova ndongokokotshɛ.

6. Etengo 2 Timɔte 3:14, 15 ɛnyɛwɔ, wopo wɔkɔnge Timɔte ndakome Okristo?

⁶ Winá wɔ Timɔte ndayalaka ilɛngɛ daambi, nyɔ kɛnde ananghaki la wolo djɛ ndoolakanyɛ ‘afunelo w’ekina’ etengo ase Juda yasipisoyɛka. Lá nsɔsɔlɔ, balo djɛnde djayalaki l’elelo ladjikɛnde, nde atewaki kaanga nkambo mɔ djelendana la Yeso Kristo. Koko, kɛnɛ kɛ Timɔte ndeeke má Afunelo kekoka ndookotshɛ́ djɛ nkoma Okristo. Iya nde angokoma Okristo wɔkɔ? Etengo ndayalaka olangala wɔ mpame, nde ayalaki la lotshungɔ lɔ nsɔna djɛ ndjala Okristo. Ape l’ehamo Timɔte ‘akotshamaka djɛ ndjawola’ akambo wa nsɔsɔlɔ walendana la Yeso lá lɛdji lɔmɔtshi, má welo wilisá nyɔ kɛnde. (Wala 2 Timɔte 3:14, 15.) Eyunikɛ ayalaka nsɔsɔlɔ l’osasa efula má wopo wɔ ndalonge ndakanyɛ wɔnande akambo wa Yehova kaanga nkambo djɛsɔ iyayalaka okakasano! Eyunikɛ awikaka nsɔsɔlɔ lá nkilika djiina djɛnde, djeyɛ má itepela yesakisola ‘ndjila otshumba.’

7. Wopo wɔkɔnge Eyunikɛ ndakoke nkotshɛ́ wɔnande djɛ mfula m’ɔkɔngɔ wɔ batisimo djɛnde?

⁷ Batisimo ayalaka djina djɛ djonyi efula lá lowiko lɔ Timɔte, koko okiyano w’Eyunikɛ w’otashila. Wopo wɔkɔnge wɔnande ndongokamba la lowiko lɔnde m’ɔkɔngɔ wɔ batisimo djɛnde? Nde angoyapɛyɛ te nkɛndɛlɔ djɛ pɔlɔ? Angotshɔ tingela nkalasa lá Atɛna ko ntawola elakanyelo wɛ filozofi w’ampanghano wel’eteyi? Nde angohetshɛ ɔlɛngɛ wɔnde, winá wɛnde, la wolo wɔnde ngo djɛ mpona okfudji? Eyunikɛ atakokaki ndɔsɛla Timɔte nkano, koko nde akokaki ndookotshɛ́. Lá wopo wɔkɔnge? Nde akokaka nkindjɛ nangha la wolo djɛ ndakanyɛ wɔnande djɛ nde nkɔpa Yehova efula la ndjala la djedjɛ te Wɔnande. Ape ngo ambotshi wapalekɔ la wame kana la wadji wapakambela Yehova toko ndeke lolekɔ l’okakasano wɔ nkotshɛ́ wana wawɔ djɛ nkɔpa Yehova. Kaanga ntsha ambotshi wakɔ ape walekɔ lá nsɔsɔlɔ, iwɔ nkoka ndjala l’okakasano wɔ nkota eloko wɛ dangala djɛwɔ dj’iwɔ ndjala enkambi wɛ nkɔmano wɛ Yehova. Olakanyelo wɔkɔnge ambotshi owawɔ má ndjɔmbɔmba k’Eyunikɛ?

8. Wopo wɔkɔnge wale wɔ omoto okokande nkotshɛ́ womɛnde wolekɔ ondjawodji djɛ nde nseeyɛ wana wawɔ ehomba wɛwɔ welá nyuma?

⁸ Ekaka Bible nya wana wako. Ankaana, ntsha wame wanyo walekɔ Ewakɛ wɛ Yehova, mbɔ koko Yehova nkɔpaka djɛ nyo ndaakotshɛ́ djɛ iwɔ nseeyɛ wana wanyo ehomba wɛwɔ welá  nyuma. Yopo imɔtshi y’okokanyo nangha nkambo djɛsɔ nde má nsukaka mbala la mbala nonghanyi kɛ Wekelo wɔ nkfumbo. Nyotepelake wɔlɔ lá kɛnɛ kelendana la nonghanyi kɛsɔ, la nyokanelake kɛnɛ k’okokanyo nangha djɛ nonghanyi kɛsɔ ndjalaka winá wɔ wɔlɔ efula la w’osasa. Mbala imɔtshi wɛ nkoka nkotshɛ́ womɛko djɛ nonghanyɛ wekelo wɔ Bible kana nonghanyi kɛmɔtshi ketshikitanyi. Lonkina, ntsha wana wanyo amɔtshi wambokoma l’ɛnɔnyi w’okokawɔ mba wapɔ má ndjekaka lawɔ onto l’onto Bible l’onkanda Yala la lowiko l’osasa lotshinda lotshinda! mbala imɔtshi wɛ nkoka nkamba esanga nya womɛko djɛ mpɛyɛ osukɔ kana okotshɔ wolekɔ djonyi.

9. Lámpe wale wɔ omoto wolekɔ la wome wopalekɔ ondjawodji okokande mpona okotshɔ?

⁹ Wa nyɔ imɔtshi nkoka ndɔsa odjito wɔ ndjekɛ wana wawɔ Bible ntsha ngo iwɔ yɔmɛlɛ ndeke lowongola wana wawɔ kana wame wawɔ wapalekɔ andjawodji. Ntsha nghɔsɔ ndeke oyɛwɔ lá nkfumbo kɛko, mbɔ toyakiyanyɛke amboleka. Yehova angokokotshɛ́. Kamba la mpeko djɛ wɔlɔ dj’olakanyelo dj’ɔtɔpɛyɛnde má lotshimbo l’olonghanyelo djɛ ndjeka nya wana wako. Wɛ nkoka nsawola l’ambotshi wambopakisɔ dj’iwɔ nkɛnyɛ wopo w’okambawɔ la mpeko djɛsɔ lá wekelo wɔ nkfumbo. * (Woo. 11:14) Yehova nkoka lonkina nkokotshɛ́ djɛ wɛ ndjewa nsawolaka nya wana wako. Lɔmbande akokotshɛ́ djɛ wɛ nsipisoyɛ tokanyi tolekɔ lá wɛɛngɔ wɛwɔ la tel’eloko wɛwɔ. (Woo. 20:5) Ndjopola wɔna la wɔna woopó etengo wɔnɛ: ‘Okakasano wɔkɔnge woleka ekekete wopomanakɛ lá nkalasa?’ nkoka nkokotshɛ djɛ wɛ mbanga djamba djengokokotshɛ́ djɛ wɛ ndjewa akambo efula walekɔ l’eloko wɛwɔ.

10. Lá topo tonkina tɔkɔnge t’okokɛ nkotshɛ́ wana wako djɛ ndjeka akambo walendana la Yehova?

¹⁰ Honaka mbamba yɛ ndakanyɛka wana wako akambo walendana la Yehova. Sawolaka nyawɔ wayi walendana la Yehova edjinge akambo wa wɔlɔ efula wa ndombokonanghelá. (Mvu. 6:6, 7; Iza. 63:7) Kɛsɔ kelekɔ djonyi efula pekapeka ntsha opalekɔ la winá wɔ ndjekaka nya wana wako mbala la mbala lá mvulu. Christine, kanga sotepelaki má djiko ntepelaka, ante: “Mbamba yɛ nsawola akambo welá nyuma isa wana wami yetáyalaki efula, djɛkondeke lakámbáki la mbamba kenkfumɔ kɛ mawaka. Tásembolaki ekolo kana ntshɔka la wato wɔ mɔtɛrɛ edjinge tasɛmɛlaki ndambo t’anteyi kɛ ndjale djɛ ntaluke waato edjinge tásawolaki akambo walendana l’etongelo kɛ nkamɔ kɛ Yehova la nkete efula djelá nyuma. Winá wɔ wana wami yafule ndambo daambi, ndakembɛka dj’iwɔ ndjekaka Bible iyɔmɛlɛ.” Lá djiko djɛ lasɔ, tepelaka wɔlɔ lá nkambo djɛ Yehova la djɛ wananyɔ l’ankaana yɛko. Tɔnyɔlake tokokolo. Kɛnɛ k’otepelɛ lá nkambo djɛwɔ nkoka nyɛnyɛ ntsha wana wako nkoka ndawɛkɛ tewɔ lá winá woyɛwɔ la djonyi.

11. Lá nkilika Djakɔbɔ 3:18, lamo oyɛwɔ djonyi ndjilaka vu lá nkfumbo?

¹¹ Nangha djɛ vu ndjala lá nkfumbo. Mbala la mbala ɛnyɛka ngandji k’okɛ womɛko la wana wako. Tepelaka wɔlɔ edjinge la dilɛmɛlɔ dj’efula lá nkambo djɛ womɛko edjinge nkfumbaka wana wako djɛ nanghaka wopo wɔk’ɔmɔ. Winá w’onanghɛ nghɔsɔ, ongila vu lá nkfumbo kɛko, edjinge angoyala wɔdju djɛ wana wako ndjeka akambo walendana la Yehova. (Wala Djakɔbɔ 3:18.) Tokolenda ndjɔmbɔmba kɛ Jozsef, kanga lokamba etengo yat’ekalo yetshikitanyi lá Roumanie. Winá wɔ ndaafulaka, papa kɛwɔ ɔwɛnyɛka nde, nyɔ kɛnde, mama kɛnde k’omoto, la wankfune wande ndjolo dj’ipa iwɔ nkambela Yehova. Jozsef ntepelaka ante: “Nyɔ  kɛmi ánanghaki la wolo djɛ ndjila vu lá mvulu kɛso. Winá enkfumɔ wɔ papa kɛso ndotalekaka ndjala akambo wolo, ndeke nyɔ kɛso ndotalekaka ndonanghela akambo la ngandji. Winá wɔ nyɔ ndɛnaka ante tomboyala l’okakasano wɔ nɛmɛyɛ papa kɛso, nde asawolaki laso lá Ɛfɛsɛ 6:1-3. Masɔ nde atovungolaki wekeka wa wɔlɔ wa Papa kɛso la atosipisoyɛki lamo oyɛso ladjɛ ndɔkɔpa. Má nangha nghɔsɔ nde akotshɛki djɛ vu ndjala lá nkfumbo kɛso.”

12. Lá nkilika 2 Timɔte 1:5, eposelo wɛkɔnge weyalisá la ndjɔmbɔmba k’Eyunikɛ te Timɔte?

¹² Wala 2 Timɔte 1:5. Eyunikɛ apɛyɛka Timɔte ndjɔmbɔmba kɛ wɔlɔ efula. Nde olakanyɛka ante djawo djɛ nsɔsɔlɔ nyɛnamaka má nanghedji. (Dja. 2:26) Ape l’ehamo, Timɔte ɛnaki djɛ nanghedji djɛ nyɔ kɛnde djatshindamaki má ngandji k’efula kɛ ndokaka Yehova. Timɔte ɛnaka nsɔsɔlɔ djɛ nkambela Yehova akotshɛki nyɔ kɛnde djɛ ndjala l’osasa. Eposelo wɛkɔnge weyalisá la ndjɔmbɔmba k’Eyunikɛ te Timɔte? Etengo ɔpɔstɔlɔ Poolo ndatepela, Timɔte ayalaka la djawo djɛ wolo etengo djɛ nyɔ kɛnde. Timɔte atayalá la djawo djɛ wolo oyala yala. Timɔte akɔmɛka ndjɔmbɔmba kɛ nyɔ kɛnde ko atshindamaka djɛ ndoowokola. Wopo wɔk’ɔmɔ ndeke, wa nyɔ efula lɔɔko kɛnɛ wakotshɛ́ ase nkfumbo yɛwɔ djɛ nkambela Yehova ‘ipa la ndaashimela kaanga otepela.’ (1 Pɛ. 3:1, 2) Wɛ nkoka nangha wopo wɔk’ɔmɔ. Lá wopo wɔkɔnge?

13. Lamo wale w’omoto oyɛnde ladjɛ ndjila djokanelo djɛnde nya Yehova l’edjena kɛ ntondo?

¹³ Hetshɛ djokanelo djɛko nya Yehova l’edjena kɛ ntondo. (Mvu. 6:5, 6) Lá ndjɔmbɔmba kɛ wa nyɔ efula, wɛ ndapekalaka akambo efula. Wɛ ntshutshɛka winá wɛko, mfalanga yɛko, ilɔ yɛko, la nkete nkina djɛ nkotshɛ ehomba welá demba wɛ wana wako. Koko opakoke ndapɛyɛ ngo lá nkotshɛ ehomba wɛsɔ, ko mvungɛ djokanelo djɛko nya Yehova. Mbala la mbala yawombelaka winá djɛ wɛ ndɔmbaka, nanghaka wekelo wɔ Bible w’onto nyɔmɛlɛ, la ndjingelaka lá nsanghanyɛ y’otshumano. Má nangha nghɔsɔ, ongokembɛ lonyuma lɔko edjinge ɔngɔpɛyɛ nkfumbo kɛko l’anto ankina ndjɔmbɔmba kɛ wɔlɔ.

14-15. Olakanyelo wɔkɔnge wɔ ngombowa má ndjɔmbɔmba kɛ Leanne, Maria, la João?

¹⁴ Tokoshishima ndjɔmbɔmba imangha yɛ dangala mɔtshi dj’ekisá djɛ nkɔpa Yehova la djɛ ndawɛkɛ tende má nkɔmɛ ndjɔmbɔmba yɛ wa nyɔ yɛwɔ. Wɔna Christine w’omoto le Leanne ntepelaka ante: “Totakokaki ndjeka Bible winá wɔ papa ndayalaka l’edjena. Koko Nyɔ kɛso ingelaki nsanghanyɛ y’otshumano winá enkfumɔ. Kaanga sotewaki akambo efula walendana la Bible, nanghedji djɛnde djetokotshɛka djɛ ndjala la djawo djɛ wolo. Tewaka ente Ewakɛ wɛ Yehova ndakanyɛka nsɔsɔlɔ ilá efula lá ntondo k’iso ndowanga ndjingela nsanghanyɛ.”

¹⁵ Maria, kanga papa kɛnde apɛyɛki nkfumbo k’otongo dilanyɛ lá mbamba imɔtshi ngo mande wambotshɔka tá nsanghanyɛ ntepelaka ante: “Nyɔ kɛmi alekɔ l’anteyi kɛ ankaana yeleka eloko wolo y’ewami. Winá wɔ mayalaka ilɛngɛ, látonaki nangha akambo amɔtshi ngo ladjikɛnde layalaki la wɔma wɔ kɛnɛ k’anto yongotepela. Koko ndenda wopo wɔ nyɔ ndayalaka l’oloko wolo la wopo wɔ ndahetshɛka Yehova l’edjena kɛ ntondo winá enkfumɔ lá lowiko lɔnde ankotshɛka djɛ lemi ntshika ndjoka anto wɔma.” João, kanga papa kɛnde áshimbaka dj’ipa ntepela akambo walendana la Yehova kana la Bible lá nkfumbo kɛwɔ, ntepelaka ante: “Mbala imɔtshi kɛnɛ kekotaki oloko wɔmi efula nde, Nyɔ kɛmi ayalaki entshupa djɛ ntshika nkambo nkfumɔ djɛ nsasangɛ papa kɛmi, nyimɛ ngo ngandji kɛnde te Yehova.”

16. Eposelo wɛkɔnge wekoka ndjala la ndjɔmbɔmba kɛ wale w’omoto te anto ankina?

¹⁶ Wa nyɔ, nyovungɔke ente ndjɔmbɔmba yɛnyo ndjalaka l’eposelo ɛmɔtshi te anto ankina.  Lá wopo wɔkɔnge? Tokolenda eposelo weyalisa la ndjɔmbɔmba k’Eyunikɛ te ɔpɔstɔlɔ Poolo. Nde asipisoyɛka ante djawo dj’ipa la dongi mpe djeyalaki la Timɔte ‘djeyalaka ntondo le . . . Eyunikɛ.’ (2 Ti. 1:5) Winá wɔkɔnge Poolo ndɛnyi mbala kɛ ntondo djawo djeyalaki la Eyunikɛ djɛsɔ? Akoka ndjala lá lɔkɛndɔ lɔnde lɔ ntondo lɔ misiɔnɛrɛ ndeke ndapomana nya Loyisɛ la Eyunikɛ lá Lustɛra, edjinge akoka ndjala nde ndeke lákotshisa djɛ nkoma Akristo. (Ele. 14:4-18) Kokanela ndambo: Winá wɔ Poolo ndafunela Timɔte, ɛnɔnyi etengo 15 m’ɔkɔngɔ, Poolo akindjɛka nkanela ngo nanghedji djɛ wɔlɔ djɛ Eyunikɛ edjinge akambaka lande etengo ndjɔmbɔmba k’ɛdje djɛ ndjokola! Nyɛnamaka papoo ente ndjɔmbɔmba kɛnde kekembɛka ɔpɔstɔlɔ efula edjinge mbala imɔtshi kaanga Akristo ankina efula wawikaki l’etsho wɛnde. Ntsha owongolɛ wana wako nde nghɔmɛlɛ, kana la wome kana wadji wopalekɔ Owakɛ wɔ Yehova, yashikikɛ ente ndjɔmbɔmba kɛko kɛ nkɔmano nkembɛka la ntshindaka anto wakodjingi.

17. Kɛkɔnge k’oyɛ ladjɛ nangha ntsha ɛnama etengo wana wako wapakɔpɛ nkambela Yehova kaanga ilɛ welo efula?

¹⁷ Okokɛ nangha mo ntsha ɛnama etengo wana wako wapakɔpɛ nkambela Yehova kaanga ilɛ welo wɛkɔnge? Vungɔ ente nkfumba wɔna ndɔsaka winá efula. Etengo iyɔmbɛnyɛ lá ntshango, winá w’okonɛ ekonakona kɛmɔtshi, okoka ndawopola mbala la mbala ntsha kengoposa ko ndokoma otamba woposɛ mbambo. Kaanga ngopalekɔ l’eshikikelo ente otamba wonyi nkoka ndoposɛ mbambo, wɛ ongokindjɛ  ndovutela washi djɛ ndɔpɛyɛ mbamba kɛnde mfula. (Mar. 4:26-29) Wopo wɔk’ɔmɔ ndeke, etengo wale w’omoto, wɛ nkoka ndawopola mbala la mbala ntsha okota eloko wɛ wana wako. Opakoke ntshinda wana wako djɛ ndɔsa nkano. Koko ntsha wɛ nkindjɛ nangha kenkfumɔ kokokɛ nangha djɛ wɛ ndakfumba, ongapɛyɛ mbamba kɛ wɔlɔ k’iwɔ mfula lá nyuma.​—Woo. 22:6.

18. Wopo wɔkɔnge Yehova okokande nkotshɛ́ wana wako dj’iwɔ mfula lá nyuma?

¹⁸ Ntateyɛ m’etsho wefunamaki Bible, Yehova ambokotshɛ́ dangala efula dj’iwɔ nkoma tolongo tɔnde. (Yee. 22:9, 10) Nde nkoka nkotshɛ́ edjinge wana wako dj’iwɔ mfula lá nyuma, ntsha kɛsɔ ndek’okombolawɔ. (1 Kɔ. 3:6, 7) Kaanga ntsha ambɛnama etengo wana wako wambovunga mboka, Yehova angokindjɛ ndawoka ngandji. (Yee. 11:4) Winá w’iyɔngɛnyɛ kaanga ilembetelo imɔ yɛnyɛ ente ‘wamboyala entshupa djɛ ndjawola akambo wa nsɔsɔlɔ,’ nde angoyala entshupa djɛ ndaakotshɛ́ dj’iwɔ ndjala tolongo tɔnde. (Ele. 13:48; 2 Ɛk. 16:9) Nde nkoka nkokotshɛ́ djɛ wɛ ntepela nkambo mɔtshi djɛ wɔlɔ lá winá wɔ wɔlɔ ntepela ente, winá wɔ wana wako oyɛwɔ la djonyi djɛ ndjoka nkambo djɛkɔ. (Woo. 15:23) Kana nde nkoka ntshinda wɔnanyɔ kana nkaana kɛmɔtshi k’oloko wɔlɔ kel’otshumano djɛ nde ndawila yimba lá lɛdji lotshikitanyi. Kaanga ntsha wana wako wambokoma nkokolo, Yehova nkoka ndaavungola nkambo mɔtshi djɛ ngaalakanyɛ l’etsho wemboheta. (Dj. 14:26) Ɔngɔpɛyɛ Yehova mbamba efula yɛ nde nkɔtshɔkɔla ntsha wɛ nkindjɛ nkfumba wana wako má etepela la má ndjɔmbɔmba kɛko.

19. Lamo okokɛ ndashikikɛ ente wɛ ongawolama me Yehova?

¹⁹ Ngandji kenyoka Yehova kepalendana l’ɛsɔnɛlɔ wɛ wana wanyo onanghawɔ. Nde nyɔkɔpaka ladjikɛnde nyo ndɔɔkɔpaka. Ntsha oyɛ nde wale wowongola wana nghɔmɛlɛ, Yehova nkolakaka djɛ ndjala Papa kɛ wana wako edjinge Onami wɔko. (Yee. 68:5) Opakoke ntshinda wana wako djɛ ndɔsa akano wa wɔlɔ kana lako. Koko ntsha wɛ nkindjɛ ndawɛkɛ t’okotshɔ wɔ Yehova, la nangha kɛnɛ k’oyɛ l’akoka wa nangha, wɛ ongawolama me nde.