Elako alekɔ “etshibelo kelá ntshandjawala kɛ nkambo mɔtshi djɛ djonyi, kana daka djɛ nangha nkambo mɔtshi; mbala efula wangokambake lá djiina djɛ Ndjambe . . . etengo owakɛ.” Elako kɛkɔ nkoka nanghema m’ɔlɔmɔ kana lofuna.

Anto amɔtshi nkoka nkanela ambɔ alekɔ nyɛtshi nangha elako ladjikɛnde Yeso atepelaka ante: ‘Totshibake [kana nangha elako] lá nkambo nkfumɔ . . . Koko ‘Ee’ kɛnyo keyale ee, ‘Lako’ kɛnyo, lako, ladjikɛnde kɛnɛ keyɛ m’adjiko, ndjɛ me onto wɔ pɔlɔ.’ (Mat. 5:33-37) Lá nsɔsɔlɔ, Yeso ewaki ante Ɛlɛmbɛ wɛ Mɔsɛ walɔmbaki djɛ nangha elako, edjinge enkambi wɛ Ndjambe wɛ nkɔmano wananghaki elako. (Ewa. 14:22, 23; Epo. 22:10, 11) Nde ewaki lonkina ante Yehova nyɔmɛlɛ ananghaka elako. (Heb. 6:13-17) Djɛkondeke Yeso atakɔpá ntepela ante topakoke lotshinda nangha elako. Koko, ndewolaka nde anto dj’ipa nangha elako lá akambo amɔtshi wapalekɔ ntshina kana lá wopo ɔmɔtshi wopewama kɔɔ. Iso ladjɛ ndɔsaka enanghedji kɛ nkotshɛ etepela wɛso etengo nkambo dj’ekina. Iso ladjɛ nkotshɛka kɛnɛ k’otepelaso.

Lasɔ okokɛ nangha nge ntsha wambɔkɔlɔmba djɛ wɛ ntshiba kana nangha elako? Ntondontondo, yashikikɛ djɛ olekɔ l’akoka wa nangha kɛnɛ k’otshibɛ djɛ nangha. Ntsha opalekɔ l’eshikikelo, angoyala wɔlɔ dj’ipa wɛ ntshiba kana nangha elako. Otepela wɔ Ndjambe ntewolaka ante: ‘Ndeka wɔlɔ nsamba nangha elako, l’edjena kɛ nangha ko opakotshɛ.’ (Los. 5:5) M’asɔ, shishima tɔkfɔ t’Afunelo totepela nkambo djɛ elako, edjinge m’asɔ ɔsa nkano dj’okana la nkfumoloko kɛko kembokfumbamá. Tɔkfɔ tɔkɔnge tɔmɔtshi tɔ m’Afunelo?

Dakó mɔtshi ndjokanaka l’ɛkɔpa kɛ Ndjambe. Ndjɔmbɔmba, Ewakɛ wɛ Yehova nanghaka elako winá wotshukanawɔ. Elako kɛsɔ kelekɔ yopo imɔtshi yetshibelo. Lá ntondo kɛ Ndjambe la kɛ ewakɛ, wadji la wome nanghaka elako ambɔ wangɔkɔpanaka la wangɔlɛmɛyanaka l’anteyi kɛwɔ ‘tii lá nyɔyi kɛ ɔmɔtshi wɔ l’anteyi kɛwɔ.’ (Akoka ndjala wame la wadji amɔtshi wapatepela etepela wɛkɔ ɛmɔ winá wotshukanawɔ, koko lá ntondo kɛ Ndjambe wambonanghaka elako.) Má nangha nghɔsɔ iwɔ nkomaka wadji la wome edjinge iwɔ ladjɛ ndjala lá bala lowiko lɔwɔ l’otondo. (Ewa. 2:24; 1 Kɔ. 7:39) Elako kɛsɔ kelekɔ wɔlɔ, djɔ, la ndjokanaka l’ɛkɔpa kɛ Ndjambe.

Dakó mɔtshi mpokana l’ɛkɔpa kɛ Ndjambe. Akristo wa nsɔsɔlɔ wapakoke nangha ndakó djɛ nghɔsɔ, ndjɔmbɔmba nkamba l’eta djɛ nseela owila kana djɛ ntona djawo djɛso te Ndjambe. Nangha nghɔsɔ ntshitaka ɛlɛmbɛ wɛ Ndjambe. Akristo ‘wapalekɔ ase andja wanɛ,’ djɛkondeke topakoke ndjingela l’akambo w’ovungusano kana wa ntshamba djɛ djokanelo dj’andja wanɛ.​—Dj. 15:19; Iza. 2:4; Dja. 1:27.

 Dakó mɔtshi ndendanaka la nkfumoloko k’onto. Lá mbamba imɔtshi nkoka ndjala ndjonyi ntɔnɔla la nkɔmɛ nkfumɔ m’okotshɔ w’Otepela wɔ Ndjambe, ndjɔmbɔmba lá dako djɛ Yeso ‘djɛ mpɛyɛ Kaisa nkete djɛ Kaisa la koko Ndjambe nkete djɛ Ndjambe.’​—Luka 20:25.

Ndjɔmbɔmba, kɔsa djɛ Okristo ɔmɔtshi ahona djɛ mba kartɛ k’owila woyɛnde kana pasepɔrɔ, ko wambɔlɔmba djɛ nde ntshika elako ante angotshikala la nkɔmano te owila. Ntsha l’owila wɔ nghɔsɔ, nangha elako kɛ nghɔsɔ nsakisolaka nangha akambo lá yopo imɔtshi yɛnamá papoo ente apokana l’ɛlɛmbɛ wɛ Ndjambe, nkfumoloko kɛnde kembokfumbamá má Bible kepangawola djɛ nde nangha elako kɛsɔ. Koko, ewandji welá djiko nkoka ndowawola djɛ ntshikitanyɛ totepela telá elako djɛ nde nɛmɛyɛ nkfumoloko kɛnde.

Nangha elako kɛ yombotshikitanyɛ ndambo k’ɛnyɛ djɛ kɛnɛ k’onto ndombotepela kelekɔ nsɔsɔlɔ, nkoka ndjokana l’ikfɔ yotanaso lá Ɔrɔma 13:1, yetepela ante: ‘Onto onkfumɔ alɛmɛyɛ ewandji welá djiko.’ Djɛkondeke Okristo nkoka ndɔsa nkano ante lako nyɛtshi nangha nkambo mɔtshi djɛ Ndjambe ndomboshiyɛká ntoshimela djɛ nangha.

Alekɔ lonkina djonyi nkamba la nkfumoloko kɛko kembokfumbamá má Bible ntsha wambokɔlɔmba djɛ nkamba l’ekete kɛmɔtshi kana ilembetelo imɔtshi winá wonanghɛ elako. Ase Ɔrɔma wa ntondo edjinge ase Skutiya wananghaki elako má nkamba la nkfula yɛwɔ yɛ mbandji djɛ nyɛnyɛ ambɔ iwɔ wakambaki la wolo wɔ indjandjambi yɛwɔ yɛ mbandji etengo onto w’okokawɔ ndjeela oloko. Ase Ngirika w’emadjɛki lɔwɔ t’olongo winá wɔ yananghaka elako. Má nangha nghɔsɔ iwɔ wɛnyɛki ambɔ Ndjambe kɛmɔtshi kɛ nkfulu ɛna kɛnɛ kotepelawɔ la k’onanghawɔ edjinge nde ndeke longoseeyɛ l’anto.

Lá nsɔsɔlɔ, enkambi wɛ Yehova wapakoke nangha elako má nkamba la dalapo djɛ owila onkfumɔ kana djingingi dj’ekete kɛmɔtshi kelekɔ la djokanelo l’etolo k’ongolo. Ko okokɛ nangha mo ntsha olekɔ lá dombo ko wambokɔlɔmba djɛ ndjakfɛ lɔwɔ lá Bible ko ntshimba djɛ nyɛnyɛ ente ombɔpɛyɛ owakɛ wɔ nsɔsɔlɔ winá wonanghɛ elako? Lá mbamba kɛ nghɔsɔ, wɛ nkoka ndɔsa nkano djɛ nangha nghɔsɔ, ladjikɛnde Afunelo ntepelaka ndjɔmbɔmba y’anto amɔtshi wakambisa la ilembetelo imɔtshi djɛ nangha elako. (Ewa. 24:2, 3, 9; 47:29-31) Alekɔ djonyi mvungɔka ente ntsha omonangha elako kɛ nghɔsɔ, otshibɛ nde lá ntondo kɛ Ndjambe ente kɛnɛ kɛngongotepela kelekɔ nsɔsɔlɔ. Wɛ ladjɛ ndalɔngɔsɔla djɛ ntepela nsɔsɔlɔ lá weepó enkfumɔ w’okokawɔ nkopola.

Ladjikɛnde iso ndɔsaka djokanelo djɛso la Yehova la ntshina, iso ladjɛ ndɔmba edjinge ntɔnɔla la nkɔmɛ nkfumɔ lá ntondo kɛ iso nangha elako kenkfumɔ kɔtɔlɔmbawɔ djɛ nangha, la ndashikikɛ ente topangonangha akambo lá wopo wopokana la nkfumoloko kɛso kana tɔkfɔ tɔ má Bible. Ntsha ɔmbɔsa nkano djɛ nangha elako, wɛ ladjɛ ndashikikɛ ente ongokotshɛ.​—1 Pɛ 2:12.