Lá mbamba kɛ nghɔsɔ, otshumano wangɔsa bala djɛ ntondo ente djembovɔ winá wɔ mpame otshukande lonkina edjinge iwɔ nkoka ndɔsa bala djɛ bango djɛsɔ etengo bala djawolamá. Djɛ nsipisoyɛ lamo otepelaso nghɔsɔ, nyontshɔ tokoshishima kɛnɛ kɛ Yeso ndatepela lá nkambo djɛ ndjaka bala la ntshuka lonkina.

Etengo yafunama lá Mateo 19:9, Yeso ɛnyɛka elonga kɛmɔ k’awolama má Afunelo kɛ ndjaka bala. Nde atepelaka ante: ‘Onto onkfumɔ woyaka bala nya wadjɛnde, ipa l’elonga kɛ wayi wa mbindo wa ntshɛngi ko ntshukana nya omoto onkina ambonangha loseka.’ Má etepela wɛ Yeso wɛsɔ, iso mbaka elakanyelo wɛnɛ 1) wayi wa mbindo wa ntshɛngi ndeke elonga kawolama má Afunelo kɛ ndjaka bala 2) mpame keyaka bala nya wadjɛnde ipa l’elonga kɛ má Afunelo ko ntshuka omoto onkina ambonangha loseka. *

Etepela wɛ Yeso ɔkɔpawɔnde nsakisola ambɔ mpame kembonangha wayi wa mbindo wa ntshɛngi la kemboyaka bala nya wadjɛnde ambowa lotshungɔ lɔ má Afunelo lɔ ntshuka lonkina? Ape nghɔsɔ. Winá wɔ loseka onanghemawɔ lá bala, ontshukami wopananghisa nkambo ndɔsaka nkano djɛ nyimeyɛ womɛnde kana lako. Ntsha nde ambotona ndowimeyɛ ko amboyaka bala lá nkilika ɛlɛmbɛ, yape kɛkɔ wambowa lotshungɔ lɔ ntshukana lonkina ntsha wambonangha akambo ankfumɔ walendana l’oyakelo wɔ bala.

L’onkoko onkina, ntshukami kepalekɔ la lowo nkoka ndjala la mposɛ kɛ m’anse oloko kɛ nama bala djɛwɔ edjinge ndjawola djɛ nyimeyɛ womɛnde. Ko otepelasonge ntsha kaanga wadjɛnde awolande dowimɛyɛ, mpame kenanghisa loseka ambotona imeyelo kɛ wadjɛnde ko ambotoyaka bala láka lɛɛta ipa l’ɛkɔpa kɛ wadjɛnde? Ladjikɛnde wadji alekɔ entshupa djɛ ndowimeyɛ ko iwɔ nkindjɛ bala djɛwɔ, nde apangoyala la lotshungɔ lɔ ntshukana lonkina lá nkilika Afunelo. Ntsha nde ambotshinyinyala nangha akambo wapokana l’Afunelo ko ambotshuka omoto onkina winá wɔ ndopalekɔ la lotshungɔ lɔ má Afunelo lɔ nangha nkambo djɛsɔ, nde ambonangha loseka lonkina edjinge nkambo djɛsɔ djengoyala elonga kenkina kɛ ndowingeyɛ lá kɔmite kɛ dombo.​—1 Kɔ. 5:1, 2; 6:9, 10.

Winá wɔ mpame kepalekɔ la lotshungɔ lem’Afunelo lɔ ntshuka ambotshukana lonkina, ya wopo wɔkɔnge otshumano okokawɔ ndɔsa bala djɛ ntondo la djɛ bango? Lá nkilika Afunelo, bala djɛnde djɛ ntondo ngokindjɛ ndjawolama? Wadji kana wome wopalekɔ la nkambo nkoka ndɔsa nkano djɛ ntona kana nyimeyɛ womɛnde? Bala djɛnde djɛ bango nkoka ndɔsama etengo bala djɛ loseka?

L’etsho wɛ ntondo, otshumano ɔsaki bala djɛ nghɔsɔ etengo bala djɛ loseka l’ilá kenkfumɔ kɛ wadji kana wome wopalekɔ la nkambo oyɛnde la lowiko, ndotatshuke kana ntshukama la kɛ ndotananghe wayi wa bindo wa ntshɛngi. Koko, Yeso atalumola mpame kana omoto wopalekɔ la nkambo winá wɔ ndatepelaka nkambo djɛ ndjaka  bala la ntshukana lonkina. Koko nde asipisoyɛka ante, mpame keyaka bala ipa la donga djem’Afunelo ko masɔ ntshukana l’onto onkina, ambonangha loseka. Lá mbamba kɛ nghɔsɔ, ndjaka bala la ntshuka lonkina, etengo Yeso ndatepela alekɔ etengo ndomonanghande loseka, edjinge nkambo djɛsɔ ndeke lokomɛ bala djɛ ntondo.

Winá wɔ mpame oyakande bala nya wadjɛnde ko ambotshuka lonkina, wadjɛnde wɔ ntondo wopalekɔ la nkambo apokokaka ndoowimeyɛ kana ndotona. Djɛkondeke, nde apalekɔ lonkina l’odjito w’ekekete wɔ ndɔsa nkano djɛ ndjewa ntsha nde nkoka nyimeyɛ womende kana ndotona. Lonkina, ntsha kaanga wome kana wadji wopalekɔ la nkambo ambovɔ, ambotshukana lonkina, kana ambonangha wayi wa mbindo wa ntshɛngi, nkambo djɛsɔ mpatshikitanyɛ wopo w’otshumano ɔsawɔ bala djɛ bango djɛsɔ. *

Má djiko tomboshishimaka ndjɔmbɔmba kɛ wome wombonangha loseka, ko nkambo djɛsɔ mbakomɛ djɛ ndjaka bala. Ya otepelaso mo ntsha wome atananghá loseka koko amboyaka bala ko ambotshukana lonkina? Kana otepelaso nge ntsha wome atananghá loseka lá ntondo kɛ nde ndjaka bala koko ambonangha nkambo djɛsɔ m’ɔkɔngɔ wɔ nde ndjaka bala ko masɔ ambotshukana kaanga wadjɛnde awolande ndowimeyɛ? Lá ndjɔmbɔmba inkfumɔ yɛsɔ, ndjaka bala la ntshuka lonkina alekɔ loseka, edjinge nkambo djɛsɔ ngokomɛ bala djɛ ntondo. Bala djɛ bango djɛsɔ dekɔ djokanelo djawolama me lɛɛta. Etengo yatepela l’Etange k’Olami kɛ Ngɔndɔ k‘ape 15, 1980, nkishi 32 lá falase, “winá wɔ ndombotshukana lonkina, nde apokokaka ntshikitanyɛ akambo waboheta, bala djɛnde djɛ ntondo djekomaka winá wɔ yayake bala, wɔ ndananghe loseka la wɔ ndatshuke lonkina.”

Otshikitano wɔ looka lɔso lɔ ntondo lɔsɔ wopasakisola ente Akristo wapɔɔsaka bala etengo ekete k’ekina kana loseka apalekɔ lonkina ovunga w’ekekete. Mpame keyaka bala nya wadjɛnde ipa la ndonga djemá Afunelo, ko masɔ ntshukana l’onto onkina ipa ndjala la lotshungɔ limá Afunelo lɔ nangha nkambo djɛsɔ, nde ladjɛ ndjingela lá kɔmite má loseka lɔnde. (Ntsha omoto wɔ ndombotshuka bango alekɔ Okristo, edjinge nde ladjɛ ndjingela lá kɔmite ladjikɛnde ambonangha loseka.) Kaanga bala djɛ bango djɛsɔ yɔpangɔsama etengo bala djɛ loseka, djelekɔ nsɔsɔlɔ bala djepawolamá má Afunelo, edjinge mpame apangokoka mbɛmba edjito wɛ elemo wetshikitanyi l’otshumano l’ilá k’ɛnɔnyi efula edjinge lá ntondo kɛ anto ntshika ndakiyanyɛ má akambo wa nyɛtshi wa ndananghe kana ndɔwɔsa etengo nde apakoke ndɔsama la dilɛmɛlɔ. Lá ntondo kɛ ndɔpɛyɛ edjito l’otshumano, tokokolo ladjɛ nshishima lonkina lowiko lowika wadji kana wome wɔ ntondo wɔ mbala imɔtshi nde onaghelaka akambo la tshamba djɛ djɔ la lɔ wana wa dɛngɛ wa mbala imɔtshi wadji kana wome wonanghisa nyɛtshi ndakadjɛ.​—Mal. 2:14-16.

Má ndenda efula k’eposelo wɛ nyɛtshi weyɛ má oyakelo wɔ bala wopawolama má Afunelo la otshukanelo wɔ lonkina, alekɔ nkambo djɛ balo djɛ Akristo ndjokolaka Yehova má ndɔsa bala etengo ekete k’ekina.​—Los. 5:4, 5; Heb. 13:4.