Iwɔ wɛnaka ngandji má nanghedji
YOMARA nya ankfune wande, Marcelo la Hiver, w’intasɛ l’iwawandja imɔtshi y’etawɔ Guatemala. Yomara awangaka ndjeka Bible nya Ewakɛ wɛ Yehova, ko masɔ ankfune wande watateyɛka ndjeka edjinge iwɔ. Koko okakasano ɔmɔtshi woyalaka. Yasato kɛkɔ wambowodjɛ́ wiso, edjinge watewaki ntanga onkanda wɔ waambowodjɛ wiso. Djɛkondeke wetsha wɔwɔ wɔ Bible awalelaki wa paragrafɛ la avɛrse.
Wayalaki l’onkina l’okakasano dj’iwɔ ntshɔ tá nsanghanyɛ y’otshumano. Watayalaki l’akoka wa nkɛnda minitɛ 40 tii tá Mvulu k’Onkfumi kelekisá ndjala entshupa lawɔ. Koko wananyɔ wal’otshumano walonghanyɛka dj’iwɔ ntawɔsaka iyankfumɔ tá nsanghanyɛ. Edjinge winá w’iyatateyɛ mpɛyɛ asawo w’ambeki lá losanghanyɛ lɔ l’anteyi kɛ lobengo, wananyɔ w’akotshɛki dj’iwɔ nkota asawo wawɔ l’ɔtɛ.
Lá Ngɔndɔ k’atano 2019, otshumano wɔwɔ wowangaka nangha nsanghanyɛ l’iwawandja yɛwɔ. Masɔ, wadji la wome ɔmɔtshi wayalaki tat’ekalo tɔ lotshinda wasɛkɔka t’iwawandja yɛsɔ. Iwɔ wayawilelaka okoma wɔ ndakanyɛ wananyɔ asato wa nkfundu mmɔ wasɔ wopo wɔ mbala la mfuna onkanda wɔ waambowodjɛ wiso kaanga iwɔ iyɔmɛlɛ yotewaki wopo wɔ nangha nkambo djɛsɔ. Iwɔ watshɔka tá bibliyɔtɛkɛ edjinge wɔsaka enkanda w’anto wambowodjɛ wiso dj’iwɔ ndjeka wopo wɔ ndakanyɛ anto ankina djɛ nkamba la wɛkɔ.
Marcelo apɛyɛ kɔmantɛrɛ lá losanghanyɛ l’otshumano
M’ɔkɔngɔ wɔ ngɔndɔ imangha, wananyɔ asato wa nkfundu mɔ wambowodjɛ wiso wasɔ wewaka mbala onkanda wɔ waambowodjɛ wiso ipa l’okakasano, ko kɛsɔ k’akotshɛka dj’iwɔ nkindjɛ mfula lá nyuma. a Winá wɔsɔ, Yomara, Marcelo, la Hiver wakamba etengo tat’ekalo tɔ lotshinda. Marcelo ambokoma onkambi wokotshɛ́. Mbengo inkfumɔ, wangoyalake l’akambo efula wa nangha l’elemo wɛ nyuma. Walekɔ l’entete l’olemo wɔ Yehova edjinge wasambeyɛ anto wadjingi entete kɛkɔ.
Wananyɔ asato wa nkfundu mɔ wasɔ walekɔ la djedjɛ tá osukɔ wɔ la ngandji w’ase otshumano. Yomara atepela ante: “Ngo má mbala kɛ ntondo k’isapomana lawɔ, Ewakɛ wɛ Yehova watɛnyɛka ngandji k’Akristo wa nsɔsɔlɔ.” Marcelo akotshɛ ante: “Tolekɔ la tolongo tɔ wɔlɔ lombombe l’otshumano wɔso, la tolekɔ lá nkfumbo kɛ wananyɔ wel’andja w’otondo kembosanghanyemá má ngandji.” Yomara nya wankfune wande ape wakongela l’eloko lukuluku lofu l’iyɔngɛna looko l’otondo lombokadjimɔ paradiso.—Yee. 37:10, 11; Iza. 35:5.
a Inkankanda yelekɔ́ l’ɔtɛ wɔ djoyi ante Eka wopo wɔ mbala onkanda wɔ waambowodjɛ wiso wonanghemaka djɛ nkotshɛ́ anto wambowodjɛ wiso kana wapɛnyi wɔlɔ dj’iwɔ ndjeka wopo wɔ mbala la mfuna onkanda wɔ waambowodjɛ wiso.
