1. Lamo oyɛso la djedjɛ efula tá Bible?

 TOLEKƆ nsɔsɔlɔ la djedjɛ efula te Yehova Ndjambe lá nkambo djɛ Bible! Lá Bible, nde ntɔpɛyɛka alako wa balo wakoka ntokotshɛ́ djɛ ndongela ekakasano wepomana laso lɔɔko kɛnɛ. Nde ntɔpɛyɛka lonkina nkongi djɛ wɔlɔ lombombe djelendana l’etsho weyaye. Nkambo deka djonyi nde, Yehova nkambaka la Bible djɛ ntisola akambo efula walendana la lonto lɔnde. Winá w’ɔtɔnɔlaso lá wekeka wande wa wɔlɔ lombombe, eloko wɛso ndolaka kfu l’osasa edjinge iso nkɔpaka nkoma tolongo tɔnde.—Yee. 25:14.

2. Lá topo tɔkɔnge totshikitanyi Yehova ndoyawewanyɛ le anto?

² Yehova nkombolaka djɛ anto ndowewa. L’etsho wemboheta, nde ayawewanyɛka le anto má alɔ, wɛnɛlɔ, la má lotshimbo lɔ andjelo. (Ew. 12:6; Ele. 10:3, 4) Iya wopo wɔkɔnge w’otakokaso ndowala alɔ, wɛnɛlɔ, la nsango yɛ me andjelo yɛsɔ ntsha itafunamá? Djɛkondeke, Yehova ndakambe la ampame imɔtshi dj’iwɔ ‘mfuna l’onkanda’ akambo wa ndakɔpɛ iso ndjewa. (Jɛr. 30:2) Ladjikɛnde ‘mboka kɛ Ndjambe kɛ nsɔsɔlɔ kelekɔ djɔ,’ tolekɔ l’eshikikelo ente yopo yekamba lande djɛ nsawola laso yɛsɔ ndeka wɔlɔ la ingotoyakala wapɔ.—Yee. 18:30.

3. Wopo wɔkɔnge Yehova ndanghe djɛ Bible namema wɔlɔ wɔlɔ? (Izaya 40:8)

³ Wala Izaya 40:8. Otepela wɔ Ndjambe wɔmbɔ́pɛyɛ́ ampame la amato wa nkɔmano ɛlɔndjɛlɔ kɛ wɔlɔ efula l’ilá kɛ nunu dj’ɛnɔnyi. Wopo wɔkɔnge nkambo djɛsɔ okokawɔ nanghema? Afunelo wafunamaka ilá efula lá nkete djetshitanaka la nkeke, djɛkondeke lako efunelo wɛ ntondo wetanema lɔɔko kɛnɛ. Yehova ananghaka djɛ anto nsangola wa kɔpi y’efunelo w’ekina wɛsɔ. Kaanga ansangodji yayalaka anto wa ntshamba djɛ djɔ,  iwɔ wayalaki la nkɔmɛ efula. Ndjɔmbɔmba, lá kɛnɛ kelendana la Afunelo wa Hebero, ondjewi wɔ wayi ɔmɔtshi afunaka ante: “Tolekɔ l’eshikikelo ente, lako onkanda wɔ l’etsho wɛ ntondo wɔ yasangola la nkɔmɛ efula ndeka Afunelo w’ekina.” Djɛkondeke kaanga Bible ndombofunamá ilá efula edjinge ndasangwamá me anto wa ntshamba djɛ djɔ, tokoka ndjala l’eshikikelo ente, etepela w’owalaso lá Bible djɛso lɔɔko kɛnɛ oyɛwɔnde tokanyi tɔ Ikɔkɔ yɛnde, Yehova.

4. Kɛkɔnge kɛ songoshishima lá djamba djɛnɛ?

⁴ Yehova ndeke Ikɔkɔ ‘y’opapɛyɛ onkfumɔ wɔ wɔlɔ la wɔ djɔ.’ (Dja. 1:17) Bible dekɔ opapɛyɛ ɔmɔtshi l’anteyi k’epapɛyɛ wɛ wɔlɔ efula wɛ Yehova ndatɔpɛyɛ. Opapɛyɛ ntɛnyɛka ente onto wɔmbɔtɔpɛyɛ opapɛyɛ wɔkɔ ntolembetelaka la ndjewaka ehomba wɛso. Oyɛwɔ ngo nghɔsɔ lá nkambo djɛ Kanga lɔtɔpɛyisa Bible. Winá w’oshishimaso opapɛyɛ wɔsɔ, iso ndjekaka akambo efula lá nkambo djɛ Yehova. Iso ndjekaka ente nde ntolembetelaka wɔlɔ efula la ndjewaka ehomba wɛso. Lá djamba djɛnɛ, tongoshishima wopo wɔ Biblɛ ɔtɛnyɛnde wekeka asato wa Yehova wanɛ: Balo djɛnde, sii kɛnde, la ngandji kɛnde. Nyontshɔ tokoshishima ntondo ntondo wopo wɔ Bible ɛnyɛwɔ balo djɛ Ndjambe.

5. Lá yopo imɔtshi yɛkɔnge Bible ɛnyɛwɔ balo djelekɔ́ la Ndjambe?

⁵ Yehova ndjewaka ante tolekɔ la djonyi dj’alako wande wa balo. Edjinge Bible, opapɛyɛ wɔ ndatɔpɛyɛ ndola kfu la balo djɛnde. Alako wemá Bible ndjalaka l’eposelo wɛ wɔlɔ le anto. Bible ntshikitanyɛka mbiko. Winá wɔ enkanda wɛ ntondo welá Bible yafunama, Mosɛ ashimelaka ase Isariyɛlɛ, enkambi wɛ Ndjambe ante: ‘Ɔnɛ apalekɔ otepela w’anyanya lenyo, koko wosakisola lowiko lɔnyo.’ (Mvu. 32:47) Waalɛmɛyisá Afunelo wakokaka ndonga lá lowiko la ndjala l’osasa. (Yee. 1:2, 3) Kaanga Otepela wɔ Ndjambe yombofunamá ilá efula, wolekɔ tii lɔɔko kɛnɛ la nkfulu kɛ mbɔngɛ mbiko y’anto. Ndjɔmbɔmba, lá jw.org, lá wamba walekɔ́ l’ɔtɛ wɔ djoyi ante: “ Bible ntshikitanyɛka mbiko,” ongotana ndjɔmbɔmba yɛl’etsho wɛso wɛnɛ ndekana 50 yɛnyɛ wopo wɔ Bible oyɛwɔ la nkfulu lá wopo w’okambande ‘olemo le andjawodji’ yɛnde lɔɔko kɛnɛ.—1 Te. 2:13.

6. Lamo okokaso ntepela ente Bible mpɛlama l’enkanda enkina enkfumɔ?

⁶ Lako onkanda wɛlama l’Otepela wɔ Ndjambe. Lamo nghɔsɔ? Ladjikɛnde Ikɔkɔ y’onkanda wɔsɔ, Yehova Ndjambe, alekɔ kanga nkfulu inkfumɔ, alekɔ lotshinda lotshinda, edjinge alekɔ la balo dj’ipa wɔs’ɔdjɔmba. Wangokindjɛke mbala enkanda efula kaanga m’ɔkɔngɔ wɔ nyɔyi k’anto wafunisá koko alako wal’eteyi mpetaka lohoyi. Lá lɛdji konkina, balo dj’otanaso lá Bible dekɔ djɛ lotshinda lotshinda, mbokotshɛ anto wawika lá deko djetshikitanyi. Winá w’owalaso onkanda w’ekina wɔsɔ, la w’ɔtɔnɔlaso lá kɛnɛ k’ekaso m’eteyi, Ikɔkɔ yɛnde nkambaka la nkfulu kɛnde kɛ nyuma k’ekina djɛ ntokotshɛ́ dj’iso nyɛna wopo w’okokaso nkamba l’alako wemá Bible lá lowiko lɔso. (Yee. 119:27; Mal. 3:16; Heb. 4:12) Ee, Ikɔkɔ yewika yɛ Bible alekɔ la mposɛ kɛ ntokotshɛ́. Ɔsɔngo nkambo djɛsɔ ototshindawɔ djɛ mbalaka Bible mbala la mbala!

7. Wopo wɔkɔnge Bible yakotshɛ́ enkambi wɛ Ndjambe wɛ ntondo djɛ ndjala l’osanga?

⁷ Yopo inkina yɛ wɔlɔ yɛ Bible ɛnyɛnde balo djɛ Ndjambe nde wopo w’okotshɛnde enkambi wɛ Ndjambe djɛ ndjala iwoke imɔ. Winá wɔ ase Isariyɛlɛ yingela lá Looko lɔ Daka, iwɔ w’intasɛka lá etatshi kɛ looko k’ekekete efula. Wamɔtshi wakomaka ansaki ndjale,  ankina wawongolaki anyama, edjinge ankina wayalaki ankambi y’awedji. Atayala okakasano djɛ ase Isariyɛlɛ wawikaki l’owila ɔmɔtshi nyimɛ ase Isariyɛlɛ wawikaki l’ewila enkina yimba. Koko Yehova alonghanyɛka djɛ ase Isariyɛlɛ nsanghanaka esanga lá mbamba yetshikitanyi dj’iwɔ ndjekameyɛka badji la nsakiso k’Otepela wɔnde. (Mvu. 31:10-13; Nɛh. 8:2, 8, 18) Kokanela wopo wɔ ose Isariyɛlɛ wɔ nkɔmano ndoyawokaka winá wɔ ndakomaka lá Jerusalɛmɛ ko ambɛna miliyɔ yɛ winande antɛmɔdji yemá atshuku ankina w’ewila! Má lɛdji lɔsɔ, Yehova akotshɛki enkambi wɛnde dj’iwɔ ntshikala l’osanga. M’ɔkɔngɔ, winá wɔ otshumano w’Akristo yookfumbamaka, woyalaka l’ampame edjinge amato watepelaki etepela efula la yeyisá má djena djetshikitanyi, wamɔtshi wayalaki l’okfudji ko ankina ɛmvɔ. Koko ladjikɛnde iwɔ wakɔpaki Afunelo, iwɔ wayalaki iwoke imɔ l’etolo kɛ Ndjambe kɛ nsɔsɔlɔ. Anto wakomisá andjawodji wakokaki nsipisoyɛ Otepela wɔ Ndjambe ngo m’okotshɔ wɔ winawɔ andjawodji la má nsanghanaka esanga lawɔ.—Ele. 2:42; 8:30, 31.

8. Wopo wɔkɔnge Bible okotshɛwɔ enkambi wɛ Yehova dj’iwɔ ndjala iwoke imɔ lɔɔko kɛnɛ?

⁸ Ndjambe kɛso kɛ Balo akindjɛ ndakanyɛ la nsanghanyɛ enkambi wɛnde má lotshimbo lɔ Bible. Bible dekɔ ikɔkɔ yɛ nkete djɛndɛ djelá nyuma dj’ɔkɔpakaso efula. Iso nsanghanaka  mbala la mbala lá nsanghanyɛ yɛso y’otshumano, nsanghanyɛ yɛso yɛ djingadjinga, la lá nsanghanyɛ yɛso yɛ nkekete djɛ ndjekameyɛ badji la nsakiso kɛ Afunelo. Djɛkondeke Bible dekɔ epeko kɛ djonyi efula kɛ Yehova okambande la kɛkɔ djɛ nkotshɛ́ enkambi wɛnde dj’iwɔ ‘ndookambela mpɛka la mpɛka.’—Sef. 3:9.

9. Djekeka djɛkɔnge dj’oyɛso la djonyi djɛ nsipisoyɛ losango lelá Bible? (Luka 10:21)

⁹ Toshishime nkambo nkina dj’ɛnyɛ balo djɛ Yehova. Nde ananghaka djɛ ntenyi mɔtshi dj’Afunelo mfunamá lá yopo yɛ ngo anto w’okitshakitshɛ ndeke lokoka nsipisoyɛ. (Wala Luka 10:21.) Anto wimá djena nkfumɔ, mbalaka Bible. Ngo ngete ondjewi wɔ wayi ɔmɔtshi ndatepela ante: “Bible mpalekɔ ngo onkanda woleka mbalema ndeka enkanda enkina enkfumɔ, koko wolekɔ lonkina onkanda woleka mbalema la nkɔmɛ nkfumɔ.” Koko ngo anto walekɔ́ l’okitshakitshɛ ndeke losipisoyɛka la lokambaka la kɛnɛ k’otepelande.—2 Kɔ. 3:15, 16.

10. Lá yopo inkina yɛkɔnge Bible ɛnyɛwɔ balo djelekɔ́ la Yehova?

¹⁰ Iso nyɛnaka balo djɛ Yehova má Bible lá yopo inkina lonkina. Yehova apakambe l’Afunelo djɛ ntolakanyɛ etengo oloyi toko koko lonkina djɛ ndakanyɛ la nsuka onto l’onto wɔ l’anteyi kɛso. Djɛkondeke, winá w’owalaso Otepela wɔ Ndjambe iso nkoka nyɛna ente Yehova ndakiyanyɛka lá nkambo dj’onto l’onto wɔ l’anteyi kɛso. (Iza. 30:21) Winá w’opomanɛ l’ekakasano, mbala imangha y’ofolakɛ Afunelo la y’owalɛkɛ vɛrse dj’ɛnama etengo yakofunelande wɛ? Koko, Bible mfunamaka lá nkambo djɛ miliyɔ y’anto. Ya lamo Bible ndopahete lohoyi la oyɛnde la alako w’oyɛ la djonyi? Alekɔ nghɔsɔ ladjikɛnde Ikɔkɔ yɛ Bible alekɔ onto woleka balo l’andja w’otondo.—2 Ti. 3:16, 17.

11. Wopo wɔkɔnge Ndjambe ndɛnyɛ djɛ nde apasɔnaka dongi winá wɔ Bible yafunamaka?

¹¹ Sii alekɔ djekeka nkina djɛ Yehova. (Mvu. 32:4) Mbala efula onto wolekɔ́ sii apasɔnaka dongi, edjinge Yehova apasɔnaka dongi. (Ele. 10:34, 35; Ɔrɔ. 2:11) Iso nkoka nyɛna ente Yehova apasɔnaka dongi má wopo wɔ Bible yafunama l’etepela efula w’anto yatepalaka ntondo. Enkanda wɛ ntondo 39 welá Bible wefunamaka nsuke la enkfumɔ lá Hebero, otepela wɔ enkambi wɛ Ndjambe efula yewaka l’etsho wɛsɔ. Koko, tá ɛtɔndɔ kɛ ntondo lá D.D., otepela wɔ Grɛkɛ ndeke lolekaki ntepelama, djɛkondeke, enkanda 27 w’ekomo wɛ Bible wefunamaka l’ɛwɔ l’otepela wɔsɔ. Yehova atɔsa nkano ante Otepela wɔnde ladjɛ mfunama ngo l’otepela ɔmɔ. Lɔɔko kɛnɛ anto nsuke la miliyara enanɛyi yelá looko watepela etepela efula wetshikitanyi. Wopo wɔkɔnge efula k’anto kɛsɔ okokawɔ ndjeka djɛ ndjewa Yehova?

12. Lá wopo wɔkɔnge Danyɛlɛ 12:4 yombokotshama l’etsho w’ekomo?

¹² Má lotshimbo l’ɔprɔfɛtɛ Danyɛlɛ, Yehova alakaka ante l’etsho w’ekomo, ‘balo djɛ nsɔsɔlɔ’ dj’otanaso lá Bible ‘ngoyala efula.’ Anto efula wangosipisoyɛ akambo wakɔ. (Wala Danyɛlɛ 12:4.) Yopo imɔtshi yɛ balo djɛ nsɔsɔlɔ djɛsɔ yombokoma efula nde má wopo w’okadjimolawɔ, w’oposɛwɔ, la wokapanyɛwɔ Bible edjinge enkanda wesakisola Bible. Bible mbokoma onkanda womboleká nkadjimwama la nkapanyemá l’andja w’otondo. Nkadjimwelo djɛ Bible djeposá me anto wanangha opoto ndjalaka oshinga efula. Enkambi wɛ Yehova wakadjimola Otepela wɔ Ndjambe, ayale otondo kana itenyi l’etepela ndekana 240, edjinge onto onkfumɔ  nkoka mba Bible ofele. Eposelo welekɔ́ la nkambo djɛsɔ nde, anto wimá ewila enkfumɔ wekameyɛ ‘losango lɔ wɔlɔ l’Onkfumi’ lá ntondo k’ekomo ndjɛ. (Mat. 24:14) Ndjambe kɛso kɛ sii nkɔpaka mpɛyɛ anto efula mbamba k’iwɔ ndowewa má mbalaka Bible. Nde anangha nghɔsɔ ladjikɛnde, nde ntɔkɔpaka isankfumɔ lombombe.

13. Lamo okokaso ntepela ente Bible nyɛnyɛka ngandji kelekɔ́ la Yehova? (Djɔanɛ 21:25)

¹³ Bible ntokotshɛka dj’iso nsipisoyɛ ente djekeka djɛ Yehova djeleka ekekete nde, ngandji. (1 Dj. 4:8) Koshishima kɛnɛ kɛ Yehova ndafune l’Otepela wɔnde la kɛnɛ kɛ ndotafuna. Nde afunaka ngo kɛnɛ k’oyɛso la djonyi djɛ ntokotshɛ dj’iso ndjala la djokanelo djɛ wɔlɔ lande, ntɔpɛyɛ lowiko l’osasa má winá wɔsɔ, la iso ndowa lowiko l’etshinda lá mfu yeyaye. Koko, ladjikɛnde Yehova ntɔkɔpaka, nde atatɔlɔmbá akambo efula wasopalekɔ́ l’akoka wa nkotshɛ.—Wala Djɔanɛ 21:25.

14. Má wopo onkina wɔkɔnge elakanyelo welekɔ́ lá Bible ɔtɛnyɛwɔ ente Ndjambe ntokaka ngandji?

¹⁴ Yehova ntɛnyɛka ngandji kɛnde lonkina má nsawola laso lá yopo yɛtɔpɛyɛ lomo. Lá Bible, nde atatɔpɛyɛ listɛ lɔ nkete djepalekɔ l’ekomo, kana ntoshimela kenkfumɔ k’oyɛso ladjɛ nangha la kɛsopakoke nangha l’ikakambo inkfumɔ yelendana la lowiko lɔso. Koko, nde akambaka la ndjɔmbɔmba yɛ nsɔsɔlɔ, prɔfɛsi yɛ nkamɔ, edjinge alako wa wɔlɔ djɛ ntokotshɛ́ dj’iso ndɔsa akano wa wɔlɔ. Má lɛdji lɔsɔ, Otepela wɔ Ndjambe ntotshindaka dj’iso ndɔɔkɔpa la ndɔɔlɛmɛyɛ l’oloko ɔmɔ.

15. a) Wopo wɔkɔnge Yehova ɛnyɛnde ante nde ndakiyanyɛka lá nkambo djɛ antangi y’Otepela wɔnde? b) Anto wɔkɔna w’otepelawɔ lá Bible, wɔna w’omoto, wɔnanyɔ w’olangala, la nkaana k’ekokolo ɔtɔnɔlawɔ l’eteyi? (Ewa. 39:1, 10-12; 2 Nk. 5:1-3; Luka 2:25-38)

 ¹⁵ Bible ntoshimelaka ante Yehova ndakiyanyɛka efula lá nkambo djɛso. Lá wopo wɔkɔnge? Otepela wɔnde ndola kfu l’ɛkɔndɔ wɛnyɛ wopo w’anto okawɔ. Iso nkoka ndembetela wopo wɔ anto w’otepelawɔ lá Bible yoyawokaká ladjikɛnde iwɔ wayalaka anto ‘etengo iso.’ (Dja. 5:17) Nkambo deka djonyi nde, má nshishima wopo wɔ ndananghelaka anto w’etengo iso akambo, tolekɔ l’akoka wa nyɛna papoo ente ‘Yehova alekɔ la ngandji k’efula edjinge la nkɛtshi.’—Dja. 5:11.

16. Olakanyelo wɔkɔnge w’owaso lá nkambo djɛ Yehova winá w’owalaso lá Biblɛ ɛkɔndɔ w’anto w’onanghelaki evunga? (Izaya 55:7)

¹⁶ Bible nyɛnyɛka ngandji kɛ Yehova otokande lá yopo inkina. Afunelo ntoshikikɛka ante, Ndjambe kɛso apangotokadjɛ winá w’onanghaso evunga. Ase Isariyɛlɛ wananghelaka Yehova mpekanto mbala la mbala, koko winá w’iyoyapɛlaka lá lɛdji lɔ nsɔsɔlɔ, Ndjambe awimeyɛki. (Wala Izaya 55:7.) Akristo wal’ɛtɛndɔ kɛ ntondo wɛnaka edjinge iwɔ ngandji kɛ Ndjambe. Má ɛlɔndjɛlɔ kɛ nyuma k’ekina, ɔpɔstɔlɔ Poolo ‘akembɛka’ winande andjawodji dj’iwɔ nyimeyɛ la nsuka onto wonanghisá ovunga w’ekekete koko ayɛka ndoyapɛla. (2 Kɔ. 2:6, 7; 1 Kɔ. 5:1-5) Kɛsɔ nyɛnyɛka papoo ente Yehova apangokadjɛ enkambi wɛnde ngo ladjikɛnde wambonanghela ovunga! Koko, la ngandji kenkfumɔ nde ndaakotshɛka, ndapɛyɛka dilanyɛ, edjinge ndalɔmbaka dj’iwɔ nkalɔ ndjala tolongo tɔnde lonkina. Nde ndakaka djɛ nanghela ananghi y’evunga inkfumɔ yeyapɛla lɔɔko kɛnɛ wopo wɔk’ɔmɔ.—Dja. 4:8-10.

17. Lamo Bible oyɛwɔ opapɛyɛ wɔ wɔlɔ lombombe?

¹⁷ Yehova atɔpɛyɛka opapɛyɛ wɔ wɔlɔ lombombe. Lamo Otepela wɔnde oyɛwɔ wɔlɔ nghɔsɔ? Etengo sombeka, Bible nyɛnyɛka balo djelekɔ́ la Ndjambe, sii kɛnde, la ngandji kɛnde. Onkanda wɔsɔ ntɛnyɛka ente Yehova nkɔpaka djɛ anto ndowewa. Nde nkɔpaka dj’iso ndjala tolongo tɔnde.

18. Wopo wɔkɔnge w’okokaso nyɛnyɛ ente tolekɔ la djɛdjɛ ta Bible ‘opapɛyɛ wɔ wɔlɔ’ wɔ Yehova ndatɔpɛyɛ?

¹⁸ Topakombola ndɔsa ‘opapɛyɛ wɔ wɔlɔ’ w’Otepela wɔ Ndjambe etengo ekete k’anyanya. (Dja. 1:17) Djɛkondeke nyontshɔ tokindjɛke nyɛnyɛ djedjɛ djɛso t’eteyi. Iso nkoka nanghaka nkambo djɛsɔ, má mbalaka Otepela wɔnde w’ekina la ntɔnɔlaka l’eteyi. Winá wonanghaso nghɔsɔ, tokoka ndjala l’eshikikelo ente Ikɔkɔ yɛnde angɔtshɔkɔla welo wɛso la tongowa ‘balo djɛ Ndjambe.’—Woo. 2:5.