1. Kɛkɔnge kɛ Yeso ndashimela ambeki wande lá nkambo djelendana la etsho w’ekomo, ko ndjewo kɛkɔnge kɛ ndaapɛyɛ?

 ETSHO emangha lá ntondo kɛ nyɔyi kɛ Yeso, ambeki wande anɛyi wowopolaka ambɔ: ‘Ilembetelo yɛkɔnge yɛngɛnyɛ winá w’ekomo wɔ nkfumbo dj’akambo djɛnɛ?’ (Mat. 24:3) Ambeki wasɔ wopolaki mbala imɔtshi djɛ ndjewa winá wɔ nkfumbo dj’akambo dj’ase Juda yongokoma. Lá nsakiso kɛ ndapɛyɛ, Yeso atatepela ngo nkambo djɛ ekomo kɛ nkfumbo dj’akambo dj’ase Juda toko koko atepelaka lonkina edjinge nkambo djɛ ‘ekomo kɛ nkfumbo dj’akambo’ dj’owikaso winá wɔsɔ. Yeso atepelaka lá nkambo djɛ winá w’ekomo yongoyɛ ante: ‘Lá nkambo djelendana la lofu kana winá wɔkɔ, lako onto wewa, ayale kaanga andjelo wel’olongo, kaanga Wɔna, koko ngo Papa.’ Masɔ nde ewolaka ambeki wande ankfumɔ dj’iwɔ ‘mbadjɛka.’—Mar. 13:32-37.

2. Lamo iyayale djonyi djɛ anto wawikaki lá nkfumbo dj’akambo dj’ase Juda mbadjɛka?

² Akristo w’ase Juda wal’ɛtɛndo kɛ ntondo wayalaka ladjɛ mbadjɛ; dj’iwɔ mbikɛ mbiko yɛwɔ. Yeso ashimelaka ambeki wande dj’iwɔ mpona djɛ ndjewa winá wɔ ekomo kɛ nkfumbo dj’akambo dj’ase Juda yongoyɛ. Nde atepelaka ante: ‘Winá wɔ nyɔnghɛna Jerusalɛmɛ mbodjingama la angala, nyewe ente etshitanelo kɛnde kemboyala entshupa.’ Lá winá wɔsɔ, iwɔ wayalaka ladjɛ nɛmɛyɛ ndjewo kɛ Yeso edjinge ‘ntateyɛ ndota tá enkókó.’ (Luka 21:20, 21) Anto wilisá yimba lá ndjewo kɛsɔ wawikaka winá wɔ ase Ɔrɔma yotshitaka Jerusalɛmɛ.

3. Kɛkɔnge k’ɔkɔpaso nshishima lá djamba djɛnɛ?

 ³ Lɔɔko kɛnɛ towika l’ekomo kɛ nkfumbo dj’akambo djɛnɛ. Djɛkondeke edjinge iso ladjɛ ndalama la mbadjɛka. Lá djamba djɛnɛ, tongoshishima wopo w’okokaso ndjala l’ikanyi y’ontanteyi winá wolendaso akambo waheta l’andja wanɛ, wopo w’okakaso ndalama, edjinge wopo w’okokaso nkamba la winá wɛso lá wopo wɔ wɔlɔ.

4. Lamo oyɛso ladjɛ ndapɛyɛ djɛ ndenda wopo wɔ akambo wahetá l’andja okotshɛwɔ prɔfɛsi yɛ Bible?

⁴ M’ɔtɛ wɔ donga djɛ wɔlɔ, iso ndapɛyɛka djɛ ndjewa wopo wɔ akambo waheta l’andja wanɛ okotshɛwɔ prɔfɛsi yɛ Bible. Ndjɔmbɔmba, Yeso atoshimelaka akambo wa kɔɔ wangonanghema djɛ ntokotshɛ́ dj’iso ndjewa winá wɔ ekomo kɛ nkfumbo dj’akambo djɛ Satana yongoyala entshupa. (Mat. 24:3-14) Ɔpɔstɔlɔ Pɛtɛlɔ atokembɛka dj’iso ndjila yimba l’ekotshamelo kɛ prɔfɛsi djɛ djawo djɛso nkindjɛ ndjala wolo. (2 Pɛ. 1:19-21) Onkanda w’ekomo welá Bible wowanga l’etepela wɛnɛ: ‘Ndjiso kɛ Yeso Kristo k’ɔpɛyisá Ndjambe djɛ nyɛnyɛ enkambi wɛnde akambo wakɔpa nanghemá lako ilá.’ (Ndj. 1:1) Djɛkondeke tolekɔ la mposɛ k’efula kɛ ndjewa akambo wahetá l’andja la wopo w’okokawɔ nkotshɛ prɔfɛsi yelá Bible. Edjinge iso nkɔpaka nsawola akambo wakɔ l’anto ankina.

5. Kɛkɔnge k’oyɛso ladjɛ ndjewɔ, ko kɛkɔnge k’oyɛso ladjɛ nangha? (Lenda ntshango.)

⁵ Koko, winá wosawolaso lá nkambo djɛ prɔfɛsi yɛ Bible, iso ladjɛ ndjewɔ djɛ mfɛnyɛ akambo wangonanghemá. Lamo? Ladjikɛnde topakɔpɛ ntepela kaanga nkambo mɔ djekoka ndokapola otshumano. Ndjɔmbɔmba, tokoka ndjoka ewandji w’andja wanɛ watepela wopo w’okokawɔ nkandola ekakasano edjinge ndjila vu la lotoyi ntshitshi. L’edjena kɛ nkanela ente etepela wɛsɔ wembokotshɛ prɔfɛsi kelá 1 Tesalɔnikɛ 5:3, iso ladjɛ nkilika elembetshelo wɛ bango welendana la nkambo djɛsɔ. Winá w’otepelaso ngo akambo wa olonghanyelo wɔ Yehova otepelande, iso nkotshɛka djɛ otshumano ndjala l’osanga lá ‘tokanyi tɔkɔ tɔmɔ.’—1 Kɔ. 1:10; 4:6.

6. Olakanyelo wɔkɔnge w’okokaso mba má 2 Pɛtɛlɔ 3:11-13?

⁶ Wala 2 Pɛtɛlɔ 3:11-13. Ɔpɔstɔlɔ Pɛtɛlɔ ntokotshɛka djɛ ndjala l’ikanyi y’ontateyi winá w’oshishimaso prɔfɛsi yɛ Bible. Nde ntokembɛka djɛ ‘mvungɔka ɛnamelo kɛ lofu lɔ Yehova.’ Lamo? Ape ladjikɛnde tokombola djɛ ndjisola ‘lofu la winá’ wɔ Yehova ndongoyakala Armagɛdɔ, koko ladjikɛnde iso nkɔpaka nkamba la winá wombototshikalela djɛ nangha ‘akambo w’ekina la ndjala la nanghedji dj’ɛnyɛ ente tomalema Ndjambe.’ (Mat. 24:36; Luka 12:40) L’etepela enkina, iso nkɔpaka ndjala la nanghedji djɛ wɔlɔ edjinge ndashikikɛ ente ngandji k’okaso Yehova ndeke lototshinda djɛ ndjila welo l’olemo wɔnde. Djɛ nangha nkambo djɛsɔ, iso ladjɛ ndalama.

7. Wopo wɔkɔnge w’okokaso nyɛnyɛ ente toyalama? (Luka 21:34)

⁷ Yeso ashimelaka ambeki wande dj’iwɔ ndalama ape ngo lá nkambo dj’akambo wahetá l’andja toko koko edjinge lá nkambo djɛwɔ iyɔmɛlɛ. Nkambo djɛsɔ djɛnama papoo lá ndjewo k’otanaso lá Luka 21:34. (Wala.) Kolenda etepela wɛ Yeso: ‘Nyoyalame.’ Onto woyalama ndjilaka nyimba lá mbalaka inkfumɔ yekoka ntshita djokanelo djɛnde nya Yehova, edjinge nde nanghaká la wolo djɛ ndjewɔ akambo wakɔ. Má nangha nghɔsɔ, nde ntshikalaka lá ngandji kɛ Ndjambe.—Woo. 22:3; Yuda 20, 21.

8. Dako djɛkɔnge Poolo ndapɛyɛ Akrito?

 ⁸ Ɔpɔstɔlɔ Poolo alakaka Akristo dj’iwɔ ndalama. Ndjɔmbɔmba, nde ashimelaka Akristo wal’Ɛfɛsɛ ante: ‘Nyolendake wɔlɔ wopo wɔkɛndanyo, ape etengo ase nkesa koko etengo ase awalo.’ (Ɛfɛ. 5:15, 16) Satana ahona winá enkfumɔ djɛ ntshita lonyuma lɔso, djɛkondeke Bible otolakande dj’iso ‘nkindjɛ nsipisoyɛ kɛnɛ kelekɔ́ ɛkɔpa kɛ Yehova’ dj’iso ndalama má wepo enkfumɔ w’onanyelo wɔ Satana.—Ɛfɛ. 5:17.

9. Wopo wɔkɔnge w’osipisoyɛso ɛkɔpa kɛ Yehova leso?

⁹ Bible apatoshimela ikakambo inkfumɔ yekoka ntshita djokanelo djɛso la Yehova. Mbala efula ndɔmbamaka dj’iso ndɔsa akano lá akambo wapokamá papoo lá Afunelo. Djɛ ndɔsa akano wa wɔlɔ, iso ladjɛ nsipisoyɛ, kana ndembetela ‘ɛkɔpa kɛ Yehova.’ Iso nkoka nangha nkambo djɛsɔ má ndjekaka Otepela wɔ Ndjambe mbala la mbala edjinge ntɔnɔlaka l’eteyi. Winá wɔ sotaleke nsipisoyɛ ɛkɔpa kɛ Yehova edjinge wonanghaso la wolo djɛ ndjala la ‘yimba yɛ Kristo,’ ndeke songoleka nangha akambo ‘etengo ase awalo,’ kaanga ntsha lako ɔlɛmbɛ wɔ kɔɔ wotoshimela kɛnɛ k’okokaso nangha kana lako. (1 Kɔ. 2:14-16) Apayalaka winá enkfumɔ wɔdju ndjewa akambo w’oyɛso ladjɛ ndjewɔ.

10. Akambo amɔtshi wakɔnge wapɔlɔ w’oyɛso ladjɛ ndjewɔ?

¹⁰ Akambo amɔtshi w’okokaso ndjewɔ walekɔ, ndjɔmbɔmba: Nyemola mposɛ y’onto w’opalekɔ wadji kana wome wɔso, nɔyi dj’indeko, deyi, etepela wɛkɔta anto ankina, ndenda etombo wɛ lopango, asango wɛnyɛwɔ anto enghanghunya, edjinge akambo ankina wa nghɔsɔ. (Yee. 101:3) Ontonyi wɔso, Satana Djabolo akindjɛ mpona mbamba yɛ ntshita djokanelo djɛso la Yehova. (1 Pɛ. 5:8) Ntsha topawadjisa, Satana nkoka ndokona lolemba, nshamba djɛ sii, ankombola, lotono, otako, edjinge enanghedji kɛ mbombelana onkomba lá timba la l’eloko wɛso. (Nga. 5:19-21) Má bango, nanghedji djɛsɔ djekoka nyɛnama etengo djepalekɔ wolo. Koko ntsha topananghisa kenkfumɔ k’okokaso nangha la nkeke djɛ mpikola wekeka wa wapɔlɔ wasɔ, wangokindjɛ mfula etengo wilo wa nyɛtshi edjinge ndotohonela ekakasano.—Dja. 1:14, 15.

11. Mbalaka kɛmɔtshi kɛkɔnge kepalekaka nyɛnama papoo k’oyɛso ladjɛ ndjewɔ, ko lamo?

¹¹ Mbalaka kɛmɔtshi kepalekaka nyɛnama oyɛwɔ nde, tolongo tɔ nyɛtshi. Kokanela nkambo djɛnɛ. Okamba olemo nya onto ɔmɔtshi wopalekɔ Owakɛ wɔ Yehova. Wɛ nkombolaka djɛ winako w’olemo ndjala la ikanyi yɛ wɔlɔ lá nkambo djɛ Ewakɛ wɛ Yehova, djɛkondeke ongonanghelake akambo wa wɔlɔ edjinge ongokotshɛké. Lá winá ɛmɔtshi ongawolake ndɛ nya onto wɔsɔ. M’ɔkɔngɔ w’etsho efula, ombotateyɛ ndɛɛka nyande mbala la mbala. Lá mbamba imɔtshi, onto wɔkɔ angotepelake akambo wa mbindo, wangotakɔpaki ndjekameyɛ má bango. Koko m’ɔkɔngɔ, omboyekasanela la wamba wakɔ, ko opɛnaka nyɛtshi ndaawekameyɛ. Masɔ lofu lɔmɔtshi, winako w’olemo amboketa djɛ nyo ntɔnɔ nkɔpɔ m’ɔkɔngɔ w’olemo, ko ombawola. Ekomo ekomo, ombootateyɛ nkanela ngo ngete winako w’olemo. Lá winá wɔsɔ, apangoyala lonkina ilá djɛ wɛ ntateyɛ nangha akambo etengo nde. Lá nsɔsɔlɔ, iso nɛmɛyɛka la nanghelaka onto onkfumɔ akambo wa wɔlɔ, koko iso ladjɛ mvungɔka ente iso nkoka ndokoma etengo anto wɔsɔnaso djɛ ndjekesanela isawɔ. (1 Kɔ. 15:33) Ntsha iso mbadjɛ ngo ngete Yeso ndatoshimela djɛ nangha, topangawola ndjekesanela l’anto wapakilika ɛlɛmbɛ wɛ Yehova.  (2 Kɔ. 6:15) Tɔngɛna mbalaka m’otale, ko tongopengɔ.

12. Kɛkɔnge kɛ ambeki wa Yeso yananghaka winá wɔ yakongaka ekomo kɛ nkfumbo dj’akambo?

¹² Yeso nya ambeki wande watakɔmá ɛwɔ winá wɔ yakongaka ekomo kɛ nkfumbo dj’akambo. Yeso aapɛyɛka olemo wɔ nangha. Nde ashimelaka dj’iwɔ mpoposanyɛ losango lɔ wɔlɔ ‘lá Jerusalɛmɛ, lá Judeya dj’otondo, lá Samariya, tii lá ndjena djeleka otale djelá looko.’ (Ele. 1:6-8) Ɔsɔngo odjito w’ekekete ambeki wa Yeso yawa! Má nangha kenkfumɔ kɛ yakoke nangha djɛ mpoposanyɛ losango lɔ wɔlɔ lɔsɔ, iwɔ wakambaka la winá wɛwɔ lá wopo woleká wɔlɔ.

13. Lamo oyɛso ladjɛ nkamba la winá wɛso lá wopo woleká wɔlɔ? (Kɔlɔsɛ 4:5)

¹³ Wala Kɔlɔsɛ 4:5. Dj’iso ndalama, iso ladjɛ ntɔnɔla efula lá wopo w’okokaso nkamba la winá wɛso lá yopo yeleka wɔlɔ. ‘Akambo w’isasimoyɛ’ nkoka ntokomela isankfumɔ. (Los. 9:11) Iso nkoka mvɔ l’isasimoyɛ.

14-15. Wopo wɔkɔnge w’okokaso nkamba la winá wɛso lá wopo woleká wɔlɔ? (Hebero 6:11, 12) (Lenda ntshango.)

¹⁴ Iso nkoka nkamba la winá wɛso lá wopo woleká wɔlɔ má nangha ɛkɔpa kɛ Yehova edjinge má nkembɛ djokanelo djɛso lande. (Dj. 14:21) Iso ladjɛ ‘ntshikala ndi, mpikama,  edjinge ndjalaka mfu inkfumɔ l’akambo efula wa nangha l’olemo wɔ Nkfumi.’ (1 Kɔ. 15:58) Másɔ winá wɔ ekomo yongoyɛ, ayale ekomo kɛ lowiko lɔso kana kɛ nkfumbo dj’akambo wanɛ, topangoyala kaanga l’okiyano ɔmɔ.—Mat. 24:13; Ɔrɔ. 14:8.

¹⁵ Lɔɔko kɛnɛ, Yeso akindjɛ ndɔndjɛ enkambi wɛnde winá w’opoposanyɛwɔ Onkfumi wɔ Ndjambe lá looko l’otondo. Nde akotshɛka alaka wande. Má lotshimbo l’olonghanyelo wɔ Yehova, Yeso atonkfumba wopo wɔ mpoposanyɛ edjinge atɔpɛyɛ mpeko dj’oyɛso la djonyi djɛ ntshanghanyɛ losango lɔ wɔlɔ. (Mat. 28:18-20) Tongonanghaka kɛnɛ kɛ Yeso ɔtɔlɔmbande má ndjilaka welo djɛ mpoposanyɛ la ndakanyɛ anto ankina edjinge má mbadjɛká winá w’okongaso Yehova djɛ ndjakala ekomo kɛ nkfumbo dj’akambo djɛnɛ. Má nkambaka la dako dj’otanaso lá Hebero 6:11, 12, tongovunda nkongi djɛso mpidji ‘tii l’ekomo.’—Wala.

16. Nkano djɛkɔnge sɔmbɔsa djɛ nangha?

¹⁶ Yehova amboshikikɛká lofu la winá wɔ ndongoyakala ekomo kɛ nkfumbo dj’akambo djɛ Satana. Winá wɔ lofu lɔsɔ yongokoka, Yehova angokotshɛ profɛsi inkfumɔ yɛ ndafune l’Otepela wɔnde. Tokoka nkanela mbala imɔtshi ente ekomo kɛ nkfumbo dj’akambo djɛnɛ ketaye winá wɔsɔ. Koko, lofu lɔ Yehova ‘lopangotshatshimba!’ (Aba. 2:3) Djɛkondeke nyontshɔ tɔshi nkano djɛ ‘nkindjɛ ndenda me Yehova,’ la nyɛnyɛ ente ‘tokongela Ndjambe kɛ ewiko’ kɛso.—Mik. 7:7.