LISA atepelaka ante: “Wɔlɔ w’oloko wɔ wananyɔ l’ankaana y’Akristo ndeke lolekisá nkota oloko wɔmi.” * Ndatepelaka nde ekete kɛ ntondo k’osepisá l’akambo wa nsɔsɔlɔ. Nghɔsɔ ndeke yayale kaanga le Anne, kanga lotepelisá ante: “Wɔlɔ wɔwɔ w’oloko ndeke lolekisá nsepa lemi ndeka kaanga elakanyelo wɛwɔ.” Winá wɔsɔ nkaana yɛkɔ ipe yɛsɔ nsasangaka mbala Bible, ntɔnɔla l’eteyi, koko akambo wa wɔlɔ w’iyananghela ndeke lolekisá ndaakfumbola.

Wopo wɔkɔnge w’okokaso nyɛnyɛ wɔlɔ wokota eloko wɛ wanɛ watodjingi? Nyontshɔ tokoshishima topo tope: má etepela wɛso la má nanghedji djɛso. Masɔ tongolenda te wa na okokaso ndjala la wɔlɔ w’oloko.

Omoto wɔ wɔlɔ w’otepelawɔ lá Woongo shapitrɛ 31 alekɔ ‘l’ɛlɛmbɛ wɛ wɔlɔ w’oloko’ lá lolemi lɔnde. (Woo. 31:26) Nde ntshikaka djɛ ‘ɔlɛmbɛ’ wɔsɔ ndɔndjɛ kɛnɛ k’otepelande la wopo w’otepelande. Kaanga ambotshi w’ampame ladjɛ ndjala ‘l’ɔlɛmbɛ’ wɔsɔ lá nemi yɛwɔ. Ambotshi efula ndjewaka ambɔ etepela wɛ lopango nkoka ndjala l’eposelo wɛ nyɛtshi te wana wawɔ. Ntsha ambotshi ntepelaka la lopango, wana wawɔ wapangelola wɔlɔ lá kɛnɛ k’ashimelawɔ. Winá wɔ ambotshi otepelawɔ lá yopo yɛ wɔlɔ, nkoka ndjala wɔdju te wana wawɔ djɛ ndawekameyɛ la ndalɛmɛyɛ.

Ayale olekɔ ombotshi kana lako, wopo wɔkɔnge etepela wɛ wɔlɔ okokawɔ ndɔndjɛ lolemi lɔkɔ? Iso ntanaka ikanyi imɔtshi lá Woongo 31:26: ‘Nde ndjipolaka ɔlɔmɔ wɔnde la balo.’ Kɛsɔ nsakisolaka nsɔna etepela wɛso la yopo yɛso yɛ ntepela la balo. Kɛnɛ kekoka ntokotshɛ́ nde ndawopolaka mbala la mbala ente: ‘Kɛnɛ k’ɔkɔpami ntepela, kengofudjɛ nkɛlɛ k’onto w’oshimelami ndo kengokakitshɛ nkɛlɛ?’ (Woo. 15:1) Ee, alekɔ nkambo djɛ balo ntɔnɔlaka lá ntondo kɛ ntepela.

Djongo nkina ntepelaka ante: ‘Etepela w’oposaposɛ wengohotadjɛke etengo lokfula.’ (Woo. 12:18) Winá w’okanelaso lá eposelo wekoka ndjala l’etepela wɛso, edjinge la yopo yɛso yɛ ntepela te anto ankina, kɛsɔ nkoka ntotshinda djɛ nsɔna kɛnɛ k’ɔkɔpaso ntepela. Ee, nkamba ‘l’ɛlɛmbɛ wɛ wɔlɔ w’oloko’ agotokotshɛ dj’ipa ntepela lá yopo yɛ nyɛtshi kana mposɛ etepela wehotadjɛ. (Ɛfɛ. 4:31, 32) Tɔngɔhɛnyɛ tokanyi edjinge etepela wɛ nyɛtshi la etepela w’osasa edjinge wɛ wɔlɔ. Yehova apɛyɛka ndjɔmbɔmba kɛ wɔlɔ lá nkambo djɛsɔ winá wɔ ndakembɛka Elidja onkambi wɔnde woyalisá la wɔma efula. Ondjelo woyisá lá djiina djɛ Yehova atepelaka ‘la djoyi djɛ vu, la djel’anse.’ (1 Nk. 19:12) Koko, ndjala onto wɔ wɔlɔ apasakisola ngo ntepela lá yopo yɛ wɔlɔ. Iso ladjɛ ndjala wɔlɔ edjinge má nanghedji djɛso. Ngete mo?

Iso ndjokolaka Yehova má mposɛka etepela wɛ wɔlɔ la má ndjala la nanghedji djɛ wɔlɔ. (Ɛfɛ. 4:32; 5:1, 2) Lisa, kanga sotepelaki má djiko, ntepelaka wopo wɔ Ewakɛ wɛ Yehova yayale la wɔlɔ w’oloko te nde. Nde ntepelaka ante: “Winá wɔ nkfumbo kɛso yatshindama djɛ nsɛkɔ l’isasimoyɛ, wananyɔ ape m’otshumano wɔso la wadji wawɔ wɔsaka kɔnje m’elemo wɛwɔ djɛ ndotokotshɛ́ djɛ ndɔnga nkete. L’etsho  wɛsɔ, ko ntatateyɛ kaanga ndjeka Bible!” Nanghedji djɛ wɔlɔ djɛsɔ djetshindaka Lisa djɛ ndjeka akambo wa nsɔsɔlɔ la nkɔmɛ nkfumɔ.

Anne, kaanga sotepelaki má bango djɛ djamba djɛnɛ, ayalaka lonkina la djedjɛ efula má wɔlɔ w’onanghelisá Ewakɛ wɛ Yehova. Nde ntepelaka ante: “Má wopo wɔ akambo onanghemawɔ l’andja wanɛ, ndjɛka ndokoma kanga wayi wolo efula. Layalaki l’okakasano wɔ ndaawɛkɛ te onto.” Nde akotshɛ ante: “Winá wɔ mapomana l’Ewakɛ wɛ Yehova, ntayawɛkɛ te wɔ. Ndawopolaka ente: ‘Lamo ondjilawɔ yimba nghɔnɛ?’ Koko wɔlɔ w’oloko wɔ wetsha wɔmi wɔ Bible ndeke lontshindisá djɛ lemi ndawɛkɛ te nde.” Lɔla lɔkɔnge loposisá má djoyi djɛsɔ? “M’ɔkɔngɔ, ntateyɛka ndjila yimba lá kɛnɛ kɛ mekaka.”

Tokote ente Lisa nya Anne wasepamaka má nanghedji djɛ ngandji la djɛ wɔlɔ dj’anto wal’otshumano, ko kɛsɔ kakotshɛka dj’iwɔ ndjala la mposɛ kɛ ndjeka akambo wa nsɔsɔlɔ. Wɛlɔ wananghelisá ase otshumano ndeke lakotshisá dj’iwɔ ndjipola eloko wɛwɔ.

Anto amɔtshi nkoka ndjala l’ekfumbo kɛ nkambaka l’etepela wɛ wɔlɔ la w’omonghamongho má djena djɛ yafule. Alekɔ nkambo djɛ wɔlɔ lá wopo wɔ anto amɔtshi oyalawɔ la loshilambo má nkfumbo djɛwɔ kana má nanghedji djɛwɔ djɛ lowotshɔ. Koko ntsha iso ntshindama má nkfumbo djɛso kana má nanghedji djɛso djɛ lowotshɔ, mbɔ tokoka nsamba ndjokola wɔlɔ wɔ Ndjambe.​—Ɛdjɛ la Elemo 28:2.

Wɔlɔ wɔ Ndjambe alekɔ djekeka mɔtshi djɛ lowambo lɔ nyuma k’ekina kɛ Ndjambe. (Nga. 5:22, 23) Djɛkondeke djɛ ndjala la wɔlɔ w’oloko wɔ nsɔsɔlɔ ngo nyuma kɛ Ndjambe ntokotshɛ́. Nkambo djɛsɔ ndjokanaka la mposɛ kelekɔ́ laso kɛ ndjokola Yehova nya Yeso. Edjinge, etengo oyɛso Akristo iso ndakiyanyɛka efula lá nkambo dj’anto ankina. Djɛkondeke, iso ntshindamaka má ngandji k’okaso Yehova Ndjambe la winaso anto. Lá lɛdji lɔsɔ wɔlɔ wɔso nkomaka djekeka djɛ nkfulu efula djeyɛ m’oloko la djɛ Ndjambe awolande.

Nkoka ndjala nkambo djɛ wɔdju djɛ nyɛnyɛ wɔlɔ te anto watonanghelaka akambo wa wɔlɔ kana anto w’ewaso. (2 Sa. 2:6) Ɔsɔ alekɔ yopo imɔtshi yɛ ndakawoyɛ lokasa. (Kɔl. 3:15) Ya otepelaso mo ntsha tɛɛna etengo onto ɔmɔtshi apɛlama djɛ ndonanghela wɔlɔ?

Kolenda nkambo djɛnɛ: Yehova ntɔpɛyɛka ndjɔmbɔmba keleka wɔlɔ má ntɛnyɛ wɔlɔ w’ipa wɔsɔdjɔmba, edjinge Otepela wɔnde ntolakanyɛka djonyi djɛ ndjala la djekeka djɛsɔ. Itepela ‘wɔlɔ w’ipa wɔsɔdjɔmba’ ntanemaka mbala efula lá Afunelo w’Akristo welá Grɛkɛ. Wopo wɔkɔnge Ndjambe ndɛnyɛ wɔlɔ wɔnde?

Kokanela wopo wɔ Yehova onanghelande miliyɔ y’anto wɔlɔ má ndaapɛyɛka kɛnɛ k’oyɛwɔ la djonyi djɛ mbika. (Mat. 5:45) Lá nsɔsɔlɔ, kaanga lá ntondo k’anto djewa Yehova, nde ndawɛnyɛka wɔlɔ wɔnde. (Ɛfɛ. 2:4, 5, 8) Djɔmbɔmba, nde ananghaka kɛnɛ keleka wɔlɔ má mpɛyɛ ɛtɔyi kɛ Wɔnande kewotshwisá lá nkambo dj’anto ankfumɔ. Ɔpɔstɔlɔ Poolo afunaka ante, Yehova atofutelaka oshinga wɔ mbendo ‘lá nkilika okfudji wɔ wɔlɔ wɔnde w’ipa wɔsɔdjɔmba.’ (Ɛfɛ. 1:7) Lonkina, kaanga onanghaso mpekanto la okiyanyɛso Yehova, nde akindjɛ ngo ntɔlɔndjɛ la ntolakanyɛ. Elakanyelo l’etepela wɛnde welekɔ etengo ‘ivavula yɛ wɔlɔ.’ (Mvu. 32:2) Lá nsɔsɔlɔ topakokaki ndoofuta lá wɔlɔ onkfumɔ w’otonanghelande. Edjinge kɛnɛ kelekɔ́ nsɔsɔlɔ nde, Yehova otasambande ntɛɛnyɛ wɔlɔ wɔnde w’ipa wɔsɔdjɔmba ntshimi topalekɔ la nkongi djelendana l’etsho weyaye.​—Ɛdjɛ la 1 Pɛtɛlɔ 1:13.

Ape l’ehamo, wɔlɔ w’oloko wɔ Yehova ntosepaka te nde la ntotshindaka djɛ ndoowokola. Lɔla lolekɔ́ la nkambo djɛsɔ nde, l’edjena k’iso nsɔna anto w’oyɛso ladjɛ nanghela wɔlɔ, iso ladjɛ nangha la wolo djɛ ndjokola Yehova má nanghelaka anto ankfumɔ wɔlɔ mfu inkfumɔ. (1 Te. 5:15) Ntsha iso nanghelaka anto wɔlɔ mbala la mbala, tongoyala etengo iyɛ yesalanganyɛ demba lofu lɔ ntshitshi. Tongoyala ekembelo te ase nkfumbo yɛso, winaso Akristo, winaso w’olemo, winaso welá nkalasa la ansukanyi waso.

Kokanela ase nkfumbo kɛko kana ase otshumano wɔnyo wakoka mba wapɔ má etepela la nanghedji djɛko djɛ wɔlɔ. Nkoka ndjala onto ɔmɔtshi wel’otshumano wɔnyo alekɔ la djonyi dj’okotshɔ wotshikitanyi djɛ ndonanghela elemo welá mbandja, lá jardɛ kana ntoonanghela tolelemo tonanghema lofu la lofu, ndjɔmbɔmba, ntosombela nkete. Lonkina, winá w’opomanɛ l’onto ɔmɔtshi l’olemo w’ipoposanyɛ wolekɔ́ la djonyi dj’okotshɔ, opakoke ndookotshɛ́ lá yopo yɛnama papoo?

Má ndjɔmbɔmba kɛ Yehova, nyontshɔ tɔlɔndjɛke etepela wɛso la nanghedji djɛso winá enkfumɔ ‘l’ɛlɛmbɛ wɛ wɔlɔ w’oloko.’