1. Wɔma wɛkɔnge wokisá Ewakɛ wɛ Yehova ɛmɔtshi?

 TOKOSHISHIMA akambo amɔtshi wapomana la Ewakɛ wɛ Yehova ɛmɔtshi. Nestor nya wadjɛnde, María, nkombolaka ntshɔ ntokotshɛ́ l’edjena k’oyɛwɔ la djonyi efula dj’okotshɔ. * Koko djɛ nkotshɛ okoma wɔwɔ wɔsɔ, iwɔ ladjɛ nkomɛ mbiko yɛwɔ enghanghunya. Wayalaka la wɔma ambɔ ntsha wambokoma ngo la ndambo kɛ mfalanga daambi, wapangoyala l’osasa efula. Winá wɔ Biniam kanga lowika l’owila w’onanyɛwɔ olemo wɔso ndakome Owakɛ wɔ Yehova, nde asipisoyɛka ante etengo onkambi wɔ Ndjambe, wakoka ndɔwɛnyɛ ndjolo. Nkambo djɛsɔ dj’ɔpɛyɛka wɔma. Koko nde alekaka ndjala la wɔmá lá wopo wɔ nkfumbo kɛnde yongelola winá wɔ yongewa ambɔ nde ambokoma Owakɛ wɔ Yehova. Wavundaka Valérie l’olando wɔ kansɛrɛ kɛ wolo efula, edjinge ɛnaka ndjolo djɛ mba dɔktɛrɛ djekokisá ndokotshɛ́ ipa la ntshita ɛlɛmbɛ welendana la djawo djɛnde dj’imá Bible lá kɛnɛ kelendaná la ndjila ekila. Nde ayalaka la wɔma ante akoka ndovɔ.

2. Lamo oyɛso ladjɛ ndjila welo djɛ ndongela wɔma wɔso?

² Ombokaká wepo wɛ wɔma wɛ nghɔsɔ? Efula l’anteyi kɛso wambokaká. Ntsha topananghe la wolo djɛ ndjapamela wɔma wɔso, tokoka ndɔsa akano wa nyɛtshi wakoka ndoyala l’eposelo wɛ nyɛtshi tá djokanelo djɛso la Yehova. Kɛsɔ ndeke Satana okombolande. Nde nanghaka la wolo lonkina djɛ nkamba la wɔma wɔso djɛ ntotshinda dj’iso mpendola ɛlɛmbɛ wɛ Yehova, ndjila edjinge ɔlɛmbɛ wɔ mpoposanyɛ losango lɔ wɔlɔ. (Ndj. 12:17) Satana alekɔ onto wɔ pɔlɔ, wopokana nkɛtshi, nde alekɔ edjinge  la nkfulu efula. Koko wɛ nkoka ndalama mende. Ngetemo?

3. Kɛkɔnge kekoka ntokotshɛ́ djɛ ndongela wɔma wɛso?

³ Winá w’oyashikikɛso ente Yehova ntɔkɔpaka, ntepela ente alekɔ l’onkoko wɔso, Satana apangotokɛ wɔma. (Yee. 118:6) Ndjɔmbɔmba, onfunyi wɔ Yeembo 118 apomanaka l’akambo wa yɛnyi efula. Nde ayalaki l’antonyi efula, ndjila edjinge anto wa nkekete (vɛrse 9, 10). Lá mbamba imɔtshi, nde átshindamaki wolo efula (vɛrse 13). Endjinge nde awaka dilanyɛ djɛ wolo efula me Yehova (vɛrse 18). Koko kaanga oyɛwɔ nghɔsɔ, ontshumbi wɔ yeembo wɔsɔ atshindamaka djɛ ntshumba ante: ‘Mpangoka wɔma.’ Kɛkɔnge k’okotshisá djɛ nde ndawoka ante alamema? Nde ewaki ante kaanga Papa kɛnde kel’olongo Yehova ndɔmbɔpɛyɛ dilanyɛ, nde ndɔkɔpaka efula. Ontshumbi yeembo ayalaki l’eshikikelo ante ayale nkambo djɛkɔnge djepomana lande, Ndjambe kɛnde kɛ ngandji angoyalaka winá enkfumɔ entshupa djɛ ndokotshɛ́.​—Yee. 118:29.

4. Wɔma wɛkɔnge w’okokaso ndongela ntsha tomboyashikikɛ ente Ndjambe ntɔkɔpaka?

⁴ Iso ladjɛ ndashikikɛ ente Yehova nkɔpaka ɔmɔ ɔmɔ lanteyi kɛso. Ndjala l’eshikikelo kɛ nghɔsɔ angotokotshɛ djɛ ndongela wɔma esato, wɛnɛ: 1) wɔma wɔ nsamba ndjala l’akoka wa nkotshɛ ehomba w’ase nkfumbo kɛso, 2) wɔma w’onto, la 3) wɔma wɔ nyɔyi. Wananyɔ l’ankaana y’isotepelaki má totɛnyi t’ewangelo wayalaka l’akoka wa ndongela wɔma wɛwɔ ladjikɛnde wayashikikɛka ambɔ Ndjambe ndakɔpaka.

5. Akambo wakɔna wakoka ndeka nkiyanyɛ owandji wɔ nkfumbo? (Lenda ntshango djelá loposo.)

⁵ Owandji wɔ nkfumbo w’Okristo ndɔsaka odjito wɔnde wɔ nkotshɛ ehomba welá demba w’ase nkfumbo kɛnde la ntshina efula. (1 Ti. 5:8) Ntsha oyɛnde owandji wɔ nkfumbo, mbala imɔtshi oyalaka la wɔma wɔ ntshutshɛ olemo wɔko lá winá w’opela wotshanganisá. Okokaka ndjala la wɔma ente opangoyala l’akoka wa mbayela nkfumbo kɛko nkete djɛ ndɛ la edjena kɛ ndjetama. Okokaka lonkina ndjala la wɔma ente ntsha ombotshutshɛ olemo wɔko, opangoyala lakoka wa mba onkina. Kana ngo ngete Nestor nya María, ase sotepelaki má djiko, okoka ndjala l’okakando ente ntsha ombonangha etshikitano l’olemo wɔko wɔ demba kɛsɔ kengoyala l’eposelo wɛ nyɛtshi tá yopo yɛnyo yɛ lowiko. Satana ambolongaka nshimba anto efula djɛ nkambela Yehova má wɔma wɛ nghɔsɔ.

6. Kɛkɔnge kɛ Satana ohonande dj’iso ndjawola?

⁶ Satana mponaka dj’iso ndjawola ente Yehova apayakiyanyɛ lá nkambo djɛ onto l’onto la ente nde apangotokotshɛ́ djɛ nkotshɛ ehomba w’ase nkfumbo kɛso. Eposelo weyala la nkambo djɛsɔ nde, tokoka ndokanela ente iso ladjɛ nangha kenkfumɔ koyɛso ladjɛ nangha djɛ nama olemo wɔso, ayale kaanga kɛsɔ ndɔmbaka nyɔnyɔla tɔkfɔ tɔ Bible.

7. Akambo wakɔnge wa Yeso otoshikikɛnde?

⁷ Yeso kanga lewaka Papa kɛnde wɔlɔ ndeka onto onkfumɔ, ntoshikikɛka ante Ndjambe kɛso ‘ndjewaka kɛnɛ [k’oyɛso] la djonyi kaanga lá ntondo [k’iso] ndɔlɔmba.’ (Mat. 6:8) Edjinge Yeso ndjewaka ante Yehova alekɔ entshupa djɛ ntoseyɛ ehomba wɛso. Etengo oyɛso Akristo, tolekɔ ase nkfumbo kɛ Ndjambe. Iso nkoka ndashikikɛ ente etengo oyɛnde Owandji wɔ nkfumbo, Yehova angɔlɛmɛyɛ kɛnɛ kɛ ndashimela ewandji wɛ nkfumbo lá 1 Timɔte 5:8 dj’iwɔ nanghaka.

8. a) Kɛkɔnge kengotokotshɛ́ djɛ ndongela wɔma w’ente topangoyala l’akoka wa nkotshɛ ehomba w’ase nkfumbo kɛso? (Mateo 6:31-33) b) Wopo wɔkɔnge w’okokaso ndjokola wadji la wome welá ntshango womboyakala nkaana kɛmɔtshi nkete djɛ ndɛ?

⁸ Winá w’oyɛso l’eshikikelo ente Yehova ntɔkɔpaka la nde nkɔpaka ase nkfumbo kɛso,  topangoyala l’okakasano wɔ ndjawola ente tongowa nkete dj’oyɛso la djonyi. (Wala Mateo 6:31-33.) Etengo oyɛnde kanga ngandji edjinge kanga lokapo, Yehova nkɔpaka ntoseyɛ ehomba wɛso! Winá wɔ ndatonge looko, nde atatɔpɛyɛ ngo nkete dj’oyɛso la djonyi djɛ mbika toko. La ngandji kenkfumɔ nde alodjɛka looko la nkete djekoka ntɔpɛyɛ osasa efula. (Ewa. 2:9) Kaanga ntsha lá winá ɛmɔtshi iso mbaka ngo nkete daambi toko, iso ladjɛ ndjala l’osasa lá wopo w’owaso daambi djɛkɔ ladjikɛnde Yehova ndeke lɔtɔpɛyɛ. (Mat. 6:11) Iso ladjɛ mvungɔka ente lako ekete kɛmɔtshi kelá demba k’oyɛso ladjɛ ndapekala má winá wɔsɔ lá nkambo djɛ Ndjambe kɛso kɛ ngandji kekoka ndjɛlama la kɛnɛ kɛ ndɔngɔtɔpɛyɛ ayale má winá wɔsɔ kana l’etsho weyaye. Kɛsɔ ndeke Nestor nya María iyosipisoyɛka.​—Iza. 65:21, 22.

9. Olakanyelo wɔkɔnge w’okokɛ mba má ndjɔmbɔmba kɛ Nestor nya María?

⁹ Nestor nya María wayalaki la mvulu kɛwɔ kɛ wɔlɔ edjinge l’olemo wɔ wɔlɔ efula lá Colombie. Iwɔ ntepelaka ambɔ: “Tokanelaka djɛ ntshika lowiko lɔso onghanghunya ko mfudjɛ olemo wɔso w’ipoposanyɛ, koko toyalaka la wɔma ente topangotoyala l’osasa ntsha tombotateyɛ mbika ngo má tofafalanga daambi.” Kɛkɔnge k’akotshisá djɛ ndongela wɔma wɔwɔ? Iwɔ watɔnɔlaka lá topo efula tɔ Yehova ndómbawɛnyɛ ngandji kɛnde. Má ndjala l’eshikikelo ambɔ nde angaasukaka winá enkfumɔ, iwɔ watshikaka elemo wɛwɔ w’iyafutamaka wɔlɔ. Wasadjɛka mvulu kɛwɔ ko wasɛkɔka t’onkoko ɔmɔtshi w’owila w’oyɛwɔ la djonyi efula dj’ansakodji y’Onkfumi. Oyawokawɔ ngete mo lá nkano dj’iyɔshi? Nestor ntepelaka ante: “Tɛnaka nsɔsɔlɔ k’etepela welá Mateo 6:33. Totasambá kaanga ekete kɛmɔ kelá demba. Edjinge winá wɔsɔ tolekɔ la lowiko l’osasa efula.”

10. Lamo anto amɔtshi okakawɔ winawɔ anto wɔma?

¹⁰ Anto walekɔ l’enkfumbo kɛ nanghelana nyɛtshi l’anteyi kɛwɔ. (Los. 8:9) Ndjɔmbɔmba, anto nkambaka la lowandji lɔwɔ lá yopo yɛ nyɛtshi, nanghaka akambo wa lopango, amɔtshi nyanaka, ntolaka, la nyɛnyɛka winawɔ welá nkalasa ndjolo edjinge amɔtshi lonkina nanghelaka kaanga ase nkfumbo yɛwɔ akambo l’onkonda. Djɛkondeke topakoke nkamɔ wopo w’anto okakawɔ winawɔ anto wɔma! Ko wopo wɔkɔnge Satana okambakande la wɔma w’onto wɔsɔ djɛ ntonanghela nyɛtshi?

11-12. Wopo wɔkɔnge Satana okambande la wɔma w’onto djɛ ntonanyɛ?

¹¹ Satana nkambaka la wɔma w’onto djɛ ntotshinda  dj’iso ntshika mpoposanyɛ la dj’ipa nangha akambo ankina wa Yehova ɔtɔlɔmbande djɛ nangha. Etengo otshindamawɔ me Satana, enkfumi wɛ wana w’anto nshimbaka olemo wɔso la ntɛnyɛka ndjolo. (Luka 21:12; Ndj. 2:10) Anto welá andja wa Satana nkambaka la nkete djetshikitanyi djɛ ntshanghanyɛ akambo w’ongolo lá nkambo dj’Ewakɛ wɛ Yehova. Anto wawola engolo wɛsɔ nkoka ntɔsɔka kana kaanga ntonanyɛokadjɛ. (Mat. 10:36) Iso nkamɔka wopo wɛnaso Satana akamba la topo tɔsɔ? Lako kaanga ndambo. Nde amboshiyɛka nkamba la topo tɔsɔ m’ɛtɛndɔ kɛ ntondo.​—Ele. 5:27, 28, 40.

¹² Wɔma w’onanyelo w’ime enkfumi wɛ wana w’anto wopalekɔ epeko kɛmɔ kekamba la Satana. Le anto amɔtshi, wɔma wɔ wopo w’ase nkfumbo kɛnde yongelola winá w’iyongewa ambɔ ambokoma Owakɛ wɔ Yehova ndekaka kaanga wɔma w’onanyelo welá demba. Iwɔ nkɔpaka boto djɛwɔ efula la nkombolaka dj’iwɔ ndjewa Yehova la ndɔkɔpa. Iwɔ nkiyanaka efula winá w’okawɔ ase nkfumbo kɛwɔ watepela nyɛtshi lá nkambo dj’akambo wa nsɔsɔlɔ wa Ndjambe la dj’enkambi wɛnde. Koko lá mbamba imɔtshi, boto djɛso djenanyɛki akambo wa nsɔsɔlɔ wayɛka ndɔkɔpa akambo wakɔ m’ɔkɔngɔ. Ko kɔsa djɛ ase nkfumbo waso wambopa dj’okanelo nkfumɔ laso ngo mande tombewa akambo wa nsɔsɔlɔ? Songonangha nge?

13. Wopo wɔkɔnge ndjewa ente Ndjambe ntɔkɔpaka okokawɔ ntokotshɛ́ winá w’ase nkfumbo kɛso otokadjɛwɔ? (Yee 27:10)

¹³ Iso nkoka mba lokembo má etepela wɛ wɔlɔ w’otanaso lá Yeembo 27:10. (Wala.) Winá w’okanelaso lá ekekete kɛ ngandji ketoka Yehova, topalekɔ la wɔma w’onanyelo. Lonkina tolekɔ l’eshikikelo ente nde angotofuta m’okfulumeyelo wɔso. Yehova angotoseyɛ ehomba wɛso welá demba, lá yimba, la welá nyuma ndeka kenkfumɔ kekoka onto onkina ntonanghela! Kɛsɔ ndeke Biniam, kanga sotepelaki má djiko ndoyisolaka.

14. Olakanyelo wɔkɔnge w’okokɛ mba má ndjɔmbɔmba kɛ Biniam?

¹⁴ Biniam akomaka Owakɛ wɔ Yehova kaanga ndewaka ante nde nkoka mpomana l’onanyelo w’efula. Tokolenda wopo wɔ ndjewa ente Yehova ndɔkɔpaka iyakotshɛ́ Biniam djɛ ndongela wɔma w’onto. Nde ntepelaka ante: “Mpomanaka l’onanyelo efula ndeka wopo wɔ makanelaka. Koko kɛnɛ kɛ malekaka ndjoka wɔma ndeka kaanga onanyelo w’ime ewandji wɛ lɛɛta nde, onanyelo wɔ me ase nkfumbo kɛmi. Layalaki la wɔma ente nkano djɛmi djɛ nkoma Owakɛ wɔ Yehova djepangosasangɛ papa kɛmi  ketayalaki ndjawodji edjinge ente ase nkfumbo kɛmi wangokanela ambɔ mpalongisa lá lowiko.” Koko, Biniam ayalaki l’eshikikelo ante Yehova ndakiyanyɛka winá enkfumɔ lá nkambo djɛ wanɛ wɔkɔpa. Biniam asipisoyɛ ante: “Ntɔnɔlaka lá wopo wɔ Yehova ndakotshɛ́ anto ankina dj’iwɔ nkfulumeyɛ ekakasano welendana la mfalanga, wɛngɛyɛ, l’onanyelo w’ime eloyi w’anto. Lewaki ente ntsha lambotshikala la nkɔmano té Yehova, nde angɔntshɔkɔla. Winá wɔ mavundama mbala efula la w’iyanyɛnyɛka ndjolo, nsipisoyɛka mbala kɛ ntondo wopo wɔ Yehova otokotshɛkande winá w’oyɛso la djonyi ntsha tombotshikala la nkɔmano.” Yehova akomaka Papa kɛ nsɔsɔlɔ le Biniam, edjinge enkambi wɛ Nde wɛnyɛka ambɔ walekɔ nkfumbo kɛnde kɛ nsɔsɔlɔ.

15. Lamo yopalekɔ́ nyɛtshi ndjala la wɔma wɔ nyɔyi?

¹⁵ Bible ntepelaka ante nyɔyi alekɔ ontonyi. (1 Kɔ. 15:25, 26) Iso nkoka ndjala l’okiyano w’efula winá w’okanelaso nkambo djɛ nyɔyi, pekapeka ntsha iso kana onto ɔmɔtshi w’ɔkɔpaso alekɔ l’olando wɔ wolo efula. Lamo okakaso nyɔyi wɔma? Ladjikɛnde Yehova atotongaka la mposɛ kɛ mbika lotshinda lotshinda. (Los. 3:11) Koko ndjala la wɔma wɔ nyɔyi wɔ lɛdji nkoka mbikɛ mbiko Yeso. Ndjɔmbɔmba, wokoka ntotshinda djɛ ndɔsa akano wa wɔlɔ, lá kɛnɛ kelendana la olelo wɔso la etombo wɛso, mpona okotshɔ wɔ dɔktɛrɛ, la mpona ekanga winá wɔ nkambo djɛsɔ oyɛwɔ djonyi edjinge ndjewɔ akambo wakoka ndjila lowiko lɔso lá mbalaka.

16. Wopo wɔkɔnge Satana okambakande la wɔma wɔso wɔ nyɔyi?

¹⁶ Satana ndjewaka ante iso ndɔsaka lowiko lɔso la ntshina. Koko, nde mfunaka ante, iso nkoka ndambola kenkfumɔ k’okotshɛso, ayale kaanga djokanelo djɛso la Yehova ngo djɛ nama lowiko lɔso. (Djɔ. 2:4, 5) Ɔsɔngo Satana ongolo! Ladjikɛnde nde alekɔ ‘l’akoka wa ndjaka,’ Satana mponaka nkamba la wɔma wɔso wɔ nyɔyi djɛ ntotshinda dj’iso ntshika nkambela Yehova. (Heb. 2:14, 15) Lá mbamba imɔtshi, wanɛ wakiliká Satana nyanaka enkambi wɛ Yehova djɛ ndaayaka ntsha wapakɔpɛ ntshika djawo djɛwɔ. Lá mbamba inkina, Satana nkokaka nkamba la mbamba k’oyɛso la djonyi djɛ mba bɔki djɛ lankekelankeke djɛ ntotshinda dj’iso ntshita ɛlɛmbɛ wɛ Ndjambe. Dɔktɛrɛ kana ase nkfumbo yɛso wapalekɔ́ andjawodji nkokaka ntotshinda djɛ pendola ɔlɛmbɛ wɔ Ndjambe má ndjawola ndjila ekila. Kana onto ɔmɔtshi nkoka ntonkfumbola djɛ ndjawola yopo inkina y’esakelo yepokana la tɔkfɔ tɔ Bible.

17. Lá nkilika Ɔrɔma 8:37-39, lamo sopakoke ndjoka nyɔyi wɔma?

¹⁷ Kaanga sopakombola mvɔ, iso ndjewaka ente Yehova apangotshika ntɔkɔpa kaanga ntsha tombovɔ. (Wala Ɔrɔma 8:37-39.) Winá wɔ tolongo tɔ Yehova ovɔwɔ, nde ndalamaka lá wɔɔngɔ wɔnde etengo oyɛwɔnde la lowiko. (Luka 20:37, 38) Nde akongela l’oloko lukuluku djɛ ndakfundola. (Djɔ. 14:15) Yehova afutaka oshinga wɔ wolo efula dj’iso ‘mba lowiko l’etshinda.’ (Djɔanɛ 3:16) Iso ndjewaka djɛ Yehova ntɔkɔpaka efula la ndakiyanyɛka lombombe lá nkambo djɛso. Djɛkondeke l’edjena kɛ iso ndjɛkɔ Yehova winá w’oyɛso l’olando, kana wotanawɔ djɛ ntoyaka, iso ndawɛkɛka tende djɛ mpona osukɔ, balo, la wolo. Nghɔsɔ ndeke Valérie nya womɛnde yananghe.​—Yee. 41:3.

18. Olakanyelo wɔkɔnge w’okokɛ mba má ndjɔmbɔmba kɛ Valérie?

¹⁸ Winá wɔ ndayalaka l’ɛnɔnyi 35, wavundaka Valérie la yopo imɔtshi yɛ kansɛrɛ kepalekaka nyɛnama edjinge kɛ wolo efula. Tokolenda wopo wɔ ngandji ndokotshɛ́ djɛ ndongela wɔma woyalaki lande wɔ nyɔyi. Nde akɔndɔla ante: “Winá wɔ mewe ente ndekɔ la kansɛrɛ, toyalaka la yɛnyi y’efula lemi isa womɛmi. Alɔmbamaka djɛ lemi ndjata epaso k’ekekete efula djɛ ntshikala la lowiko. Nsawolaka isa wa dɔktɛrɛ  efula, koko iyankfumɔ watonaka ndjata lemi ipa la ndjila ekila. Ndjokaka wɔma efula, koko má ndenda ɛlɛmbɛ wɛ Ndjambe, ntakoká ndjawola djɛ lemi ndjila ekila! Lá lowiko lɔmi l’otondo, Yehova amɔnyɛnyɛ ngandji kɛnde efula. Winá wɔsɔ lambowa mbamba kɛ lemi ndɔwɛnyɛ ngandji kɛmi. Winá enkfumɔ wowami nsango ipɔlɔ, lemi ndɔsaka nkano djɛ nsasangɛ Yehova koko ape ntshika Satana ndjila otshumba. Ekomo ekomo, ndjɛka ndata epaso ipa la ndjila ekila. Kaanga demba djɛmi okindjɛwɔ nyɛnyɛ ndjolo, Yehova angɔtɔpɛyɛke winá enkfumɔ kɛnɛ koyɛso la djonyi. Ndjɔmbɔmba, lá losanghanyɛ lɔmɔtshi l’otshumano l’isingela, lá ntondo kɛ lobenob lɔ yontonvunda l’olando, tekaka djamba djelekɔ l’ɔtɛ wɔ djoyi ante: ‘Tolongele ekakasano wɛ lɔɔko kɛnɛ l’oloko wolo.’ * Djamba djɛsɔ djenkembɛka efula. Tongowalake mbala la mbala. Wamba etengo wasɔ la ndjala la nonghanyi kɛ wɔlɔ k’akambo welá nyuma ntɔpɛyɛka isa womɛmi vu djel’oloko la ntokotshɛka djɛ ndjala l’ikanyi yɛdje la djɛ ndɔsa akano wa wɔlɔ.”

19. Kɛkɔnge kɛkɔpa nanghema lak’ilá?

¹⁹ Má okotshɔ wɔ Yehova, Akristo welá looko l’otondo walongelaka ekakasano wɛwɔ edjinge wapikamaka lá ntondo kɛ Djabolo. (1 Pɛ. 5:8, 9) Kaanga wɛ nkoka ndonga. Lak’ilá, Yehova angɔpɛyɛ Yeso nya anto wangɔlɔndjɛ esanga lande lotshungɔ lɔ ‘ntshita elemo enkfumɔ wɛ Djabolo.’ (1 Dj. 3:8) M’ɔkɔngɔ w’akambo wasɔ, enkambi wɛ Ndjambe w’okambelá lanɛ lá looko ‘wapangoka kaanga ekete wɔma edjinge lako ekete kengasasoyɛ.’ (Iza. 54:14; Mik. 4:4) Koko ntateyɛ má winá wɔsɔ, iso ladjɛ ndjila welo, djɛ ndongela wɔma wɛso.

20. Kɛkɔnge kengotokotshɛ́ djɛ ndongela wɔma wɛso?

²⁰ Iso ladjɛ nkindjɛ nkembɛ djawo djɛso dj’ente Yehova ntɔkɔpaka la namaka enkambi wɛnde. Ekete kengotokotshɛ́ djɛ nangha nkambo djɛsɔ nde ntɔnɔlaka edjinge nsawolaka l’anto lá wopo wɔ Yehova ndalame enkambi wɛnde wɛ l’etsho wɛ ntondo. Edjinge iso nkoka mvungɔka wopo wɔ Yehova ndatokotshɛ́ dj’iso ndongela ekakasano wepomanisá laso. Má okotshɔ wɔ Yehova, iso nkoka ndongela wɔma wɛso!​—Yee. 34:4.