1. Nkambo djɛkɔnge djɛ nsɔsɔlɔ Nkfumi Salɔmɔ ndatepela lá Losanghanyɛ 7:20?

 NKFUMI Salɔmɔ afunaka ante: ‘Lako onto wɔ wɔlɔ lá looko wonanghaka mfu inkfumɔ ngo wɔlɔ ko apananghe mpekanto.’ (Los. 7:20) Nkambo djɛsɔ dekɔ nsɔsɔlɔ! Sankfumɔ nanghaka mpekanto. (1 Dj. 1:8) Djɛkondeke sankfumɔ ndjalaka la djonyi djɛ Ndjambe la winaso anto ntimeyɛ.

2. Wopo wɔkɔnge w’oyawokakaso ntsha ilongo yɛso yɛ ma ma ambotimeyɛ?

² Ape l’ehamo isankfumɔ mvungɔka mbala kɛmɔtshi k’isakiyanyɛ ilongo yɛso imɔtshi yɛ ma ma. Wɛ ɔkɔpaka nsembola akambo edjinge ndjala la djokanelo djɛ wɔlɔ lonkina nyande, ko ɔ́lɔmbaka imeyelo l’oloko ɔmɔ. Ngoke ngetemo winá wɔ ilongo yɛko yɛsɔ ndokimeyɛ l’oloko ɔmɔ? Ape oyawokaka wɔlɔ? Ee, oyalaka edjinge l’osasa!

3. Kɛkɔnge kɛ songoshishima lá djamba djɛnɛ?

³ Iso nkɔpaka Yehova ndjala ilongo yɛso yɛ ma ma, koko lá mbamba imɔtshi, iso ntepelaka kana nanghaka akambo wotshutshumadjɛ. Ko lamo okokaso ndjala l’eshikikelo ente Yehova nkɔpaka ntimeyɛ? Lá lɛdji lɔkɔnge imeyelo kɛ Yehova otshikitanawɔ la kɛ anto? Ya onto wɔkɔna Ndjambe imeyɛkande?

4. Lamo okokaso ndashikikɛ ente Yehova alekɔ entshupa djɛ nyimeyɛ?

⁴ Otepela wɔ Ndjambe ntoshikikɛka ante Yehova alekɔ entshupa djɛ nyimeyɛ. Winá wɔ Yehova ndoyawewanyɛka lé  Mɔsɛ lá Onkoko wɔ Sinayi, nde atepelaka má lotshimbo lɔ ondjelo ante: ‘Yehova, Yehova, Ndjambe kɛ nkɛtshi la kokanaka djandji, kepoke nkɛlɛ la nkeke la kembolola kfuu la ngandji kɛ nkɔmano la nsɔsɔlɔ, kɛnyɛka ngandji kɛnde kɛ nkɔmano te nunu djɛ nsɔkɛ, kimeyɛka evunga, nyɛtshi la mpekanto.’ (Epo. 34:6, 7) Yehova alekɔ wɔlɔ edjinge alekɔ Ndjambe k’okanaka nkɛtshi la keyalaka winá enkfumɔ entshupa djɛ nyimeyɛ ananghi y’evunga wayapɛla.​—Nɛh. 9:17; Yee. 86:15.

5. Lá nkilika Yeembo 103:13, 14, wopo wɔ Yehova otewakande wɔlɔwɔlɔ, ótshindakawɔ djɛ nangha nge?

⁵ Ngo ngete oyɛnde Ontongi wɔso, Yehova ndjewaka kenkfumɔ kelendana laso. Kokanela ndambo! Nde ndjewaka ikakambo inkfumɔ yelendana l’onto onkfumɔ wolekɔ lanɛ lá looko. (Yee. 139:15-17) Djɛkondeke nde nkoka nyɛna eyalelo kɛ ntshamba djɛ djɔ k’isakite me ambotshi waso. Nde ndjewaka lonkina akambo ankfumɔ watokomelisá lá lowiko wananghisá dj’iso nkoma wopo w’anto woyɛso. Yopo yɛ Yehova otewakande wɔlɔwɔlɔ nghɔsɔ, ótshindakawɔ djɛ nangha nge? Kɛsɔ ndotshindaka djɛ nde ntoka nkɛtshi.​—Yee. 78:39; wala Yeembo 103:13, 14.

6. Wopo wɔkɔnge Yehova ndɛnyɛ ante nde nkɔpaka nyimeyɛ?

⁶ Yehova amboshiyɛká nyɛnyɛ ante nde nkɔpaka nyimeyɛ. Nde nsipisoyɛka ante ladjikɛnde mpame kɛ ntondo Adama ananghaka mpekanto, isankfumɔ tombókitá doki djɛ mpekanto la nyɔyi. (Ɔrɔ. 5:12) Lako kaanga yopo yotakokaso nangha djɛ ndatshungola isɔmɛlɛ kana ntshungola anto ankina má dɔki djɛsɔ. (Yee. 49:7-9) Koko, Ndjambe kɛso kɛ ngandji atokaka djandji la ɔsaka nonghanyi djɛ ntotshungola. Ndananghe nge? Etengo Djɔanɛ 3:16 ɛnyɛwɔ, Yehova atomaka ɛtɔyi kɛ Wɔnande kewotshwisá djɛ ndotovwelá. (Mat. 20:28; Ɔrɔ. 5:19) Yeso ɔsaka edjena kɛso, ɛnaka ndjolo edjinge avɔka djɛ ntshungola onto onkfumɔ wolekɔ la djawo tende. (Heb. 2:9) Ɔsɔngo yɛnyi yeyalisá la Yehova winá wɔ ndɛnyi Wɔnande wɔ ngandji avɔ nyɔyi kɛ ndjolo la kɛ nsɔnyi! Lá nsɔsɔlɔ, Yehova atasamba ndjawola djɛ Wɔnande mvɔ ntsha Nde apakɔpɛ ntimeyɛ.

7. Ndjɔmbɔmba imɔtshi yɛkɔnge y’anto wotepelawɔ lá Bible yɛnyɛ wopo wɔ Yehova imeyɛnde l’oloko ɔmɔ?

⁷ Bible ndola kfu la ndjɔmbɔmba y’anto wa Yehova ndimeyɛ l’oloko ɔmɔ. (Ɛfɛ. 4:32) Onto wɔkɔna wokanelɛ? Mbala imɔtshi okanelɛ nde Nkfumi Manase. Mpame kɛ wayi nyɛtshi kɛsɔ  ananghelaka Yehova evunga lá lɛdji lɔ nyɛtshi efula. Nde atɛmɔlaka tondjandjambe t’engolo edjinge akembɛka anto ankina djɛ nangha ngete nde. Nde ayakaka wana wande djɛ ndaalambola le tondjandjambe t’engolo. Nde akomaka tii lá ndjila isakandole yɛ indjandjambe y’ongolo lá tɛmpɛlɔ k’ekina kɛ Yehova. Bible ntepelaka lá nkambo djɛnde ante: ‘Nde ananghaka kɛnɛ kelekɔ nyɛtshi lá wiso wa Yehova lá lɛdji l’efula djɛ ndowomadjɛ.’ (2 Ɛk. 33:2-7) Koko, winá wɔ Manase ndoyapɛlɛ lá lɛdji lɔ nsɔsɔlɔ, Yehova owimeyɛka l’oloko ɔmɔ. Ndjambe okawoyɛka lá lowandji lɔnde. (2 Ɛk. 33:12, 13) Okoka nkanela lonkina nkambo djɛ Nkfumi Davidɛ kanga lonanghelisá Yehova evunga wɛ nkekete ndjila edjinge loseka la ndjaka. Koko, winá wɔ Davidɛ ndawola evunga wɛnde la ndoyapɛla lá lɛdji lɔ nsɔsɔlɔ, Yehova owimeyɛka. (2 Sa. 12:9, 10, 13, 14) Ee, iso nkoka ndashikikɛ ente Yehova alekɔ entshupa djɛ nyimeyɛ. Ngo ngete isɔngɛna, nkoka djɛnde djɛ nyimeyɛ ntshikitana la djɛ wana w’anto.

8. Wopo wɔkɔnge akoka watshikitanyi wa Yehova wa ndjala Isushi oyɛwɔ l’eposelo tá nkoka djɛnde djɛ nyimeyɛ?

⁸ Yehovah alekɔ ‘Isushi yɛ looko l’otondo.’ (Ewa. 18:25) Isushi yɛ wɔlɔ ladjɛ ndjala la looka lɔ wɔlɔ l’ɛlɛmbɛ. Nghɔsɔ ndeke oyɛwɔ lá nkambo djɛ Yehova, má djiko djɛ ndjala Isushi yɛso nde alekɔ lonkina Ondjidji wɔso w’Ɛlɛmbɛ. (Iza. 33:22) Lako onto wosipisoyɛ kɛnɛ kelekɔ́ wɔlɔ la kɛnɛ kelekɔ́ nyɛtshi ndeka Yehova. Kɛkɔnge kɛlɔmbama lonkina le isushi yɛ wɔlɔ? Nde ladjɛ ndjewa yoyoyi inkfumɔ yelendana la nkambo lá ntondo kɛnde ndɔsa nkano. Djɛkondeke, ngo Yehova toko ndeke Isushi yɛ wɔlɔ ladjikɛnde mbala inkfumɔ nde ndjewaka ikakambo inkfumɔ.

9. L’akambo wakɔnge Yehova ilakande yimba winá w’ɔkɔpande ndɔsa nkano djɛ nyimeyɛ kana lako?

⁹ Lá lɛdji l’otshikitanyi l’isushi yɛ wɔna onto, mbala inkfumɔ Yehova ndjewaka yoyoyi inkfumɔ yelendana la nkambo djeheta. (Ewa. 18:20, 21; Yee. 90:8) Nde apakome ngo lá kɛnɛ kɛ onto ɛnande la okande. Nde nsipisoyɛka wɔlɔwɔlɔ wopo wɔ nanghedji dj’onto ndokola me ambotshi wande, nkalasa yɛ ndingela, edjena k’oyalande la wopo woyawokande la wokanelande oyɛwɔ l’eposelo tende. Yehova ndjewaka lonkina kɛnɛ kelekɔ́ l’eteyi k’eloko w’anto. Nde nyɛnaka kɛnɛ ketshinda onto djɛ nangha nkambo mɔtshi, edjinge nsipisoyɛka tokanyi la mposɛ y’onto l’onto. Lako ekete kekoka ndjisama le Yehova. (Heb. 4:13) Djɛkondeke, kɛnɛ ketshinda Yehova djɛ nyimeyɛ nde wopo wewande ikakambo inkfumɔ.

10. Lamo okokaso ntepela ente dombwelo djɛ Yehova ndjalaka winá enkfumɔ ngo sii edjinge djɔ? (Mvungo K’ɛlɛmbɛ 32:4)

¹⁰ Dombwelo djɛ Yehova ngoyalake winá enkfumɔ sii edjinge djɔ. Nde apalekɔ l’isɔnɔdji kaanga ndambo daambi. Nde apimeyɛka onto má ndenda ɛnamelo kɛnde, okfudji wɔnde, kana akoka wande. (1 Sa. 16:7; Dja. 2:1-4) Lako onto wokoka ntshinda Yehova la wolo djɛ nangha nkambo mɔtshi kana ndɔpɛyɛ bɔndjɔ. (2 Ɛk. 19:7) Nde apɔsaka akano má wɔma kana má nkilika mposɛ yɛnde. (Epo. 34:7) Ape l’ehamo, Yehova alekɔ Isushi yɛ wɔlɔ ladjikɛnde nde nsipisoyɛka ikakambo inkfumɔ.​—Wala Mvungo K’ɛlɛmbɛ 32:4.

11. Lá wopo wɔkɔnge yopo yɛ Yehova yɛ nyimeyɛ otshikitanawɔ la yopo yɛ nyimeyɛ y’anto?

¹¹ Anfunyi y’Afunelo welá Hebero wasipisoyɛki ambɔ yopo yɛ Yehova yɛ nyimeyɛ ntshikitana la y’anto. Lá mbamba imɔtshi, wakambaka l’itepela imɔtshi yelá Hebero y’onkanda ɔmɔtshi opakisolande ante: ‘Wakambaki l’itepela yɛkɔ ngo djɛ nyɛnyɛ imeyelo kɛ Ndjambe  te anto wa pɔlɔ, edjinge watakambaki la yɛkɔ kaanga ndambo daambi djɛ ntepela imeyelo kɛ onto te winande onto.’ Ngo Yehova toko ndeke lolekɔ́ la nkfulu kɛ nyimeyɛ tshɛ tshɛ onanghi w’ovunga womboyapɛla. Eposelo wɛkɔnge weyalaka winá wɔ Yehova otimeyɛnde?

12-13. a) Ɛtshɔkɔ wɛkɔnge wewaka onto winá wɔ Yehova owimeyɛnde? b) Ɛtshɔkɔ weyɛ má imeyelo kɛ Yehova otshikalakawɔ l’ilá kɛ ngetenge?

¹² Winá w’awolaso ente Yehova ambotimeyɛ, iso mbaka ‘lokembo,’ ndjila edjinge vu djelá wɔɔngɔ la nkfum’oloko kɛ piyɔɔ. Imeyelo kɛ nghɔsɔ kepakoke ndjɛ mɛ onto koko ngo me ‘Yehova nyɔmɛlɛ.’ (Ele. 3:19) Winá wɔ Yehova otimeyɛnde, nde nkawoyɛka djokanelo djɛso lande lonkina ngo ngete totananghá ovunga.

¹³ M’ɔkɔngɔ wɔ Yehova ntimeyɛ, nde apangotovungola nkambo djɛkɔ lonkina kana ntɔpɛyɛ dilanyɛ lonkina m’ɔtɛ w’ovunga wɔkɔ. (Iza. 43:25; Jɛr. 31:34) Yehova ntowangoyɛka la evunga wɛso otale ‘ngo ngete eposelo la edjimbelo kɛ winá yombowangɔ otale.’ * (Yee. 103:12) Winá w’okanelaso lá wopo wɔ Yehova otimeyɛkande lá lɛdji l’efula, kɛsɔ ntotshindaka dj’iso ndjala la djedjɛ edjinge la dilɛmɛlɔ tende. (Yee. 130:4) Ko anto wɔkɔna wakoka nyimeyama me Yehova?

14. Tii lanɛ, kɛkɔnge kɛ sɔmbɛna lá kɛnɛ kelendana la nkano djɛ Yehova djɛ nyimeyɛ?

¹⁴ Etengo sɛnaki, Yehova apimeyɛka má ndenda ekekete kana daambi djɛ ovunga w’onto. Tɔmbɛnaka lonkina ente Yehova nkambaka la balo djɛnde dj’etengo Ontongi, Ondjidji w’ɛlɛmbɛ, la Isushi winá wolendande ntsha kana nkokaka nyimeyɛ onto. Iya akambo wakɔna Yehova olendakande lá ntondo kɛ ndɔsa nkano djɛ nyimeyɛ kana lako?

15. Lá nkilika Luka 12:47, 48, nkambo mɔtshi djɛkɔnge djɛ Yehova olendakande?

¹⁵ Nkambo mɔtshi djɛ Yehova olendakande nde ndjewa ntsha onanghi w’ovunga ewaka ante nkambo djɛ ndananghe dekɔ nyɛtshi. Yeso apakisolaka nkambo djɛsɔ papoo lá Luka 12:47, 48. (Wala.) Onto wolonghanyɛ djɛ nangha nkambo mɔtshi djɛ nyɛtshi dj’ewande ante ngokiyanyɛ Yehova, ambonangha mpekanto k’ekekete. Onto wɔ nghɔsɔ nkoka nsamba imeyelo. (Mar. 3:29; Dj. 9:41) Koko iso ladjɛ ndjawola ente, lá mbamba imɔtshi, iso ndjewaka ente kɛnɛ k’onanghaso kepalekɔ  wɔlɔ. Lá mbamba kɛ nghɔsɔ, iso nkoka nkongela ente tongimeyama? Ee! Edjinge nkambo djɛsɔ ntokomɛka lá nkambo nkina djɛ Yehova olendakande winá w’ɔsande nkano djɛ nyimeyɛ kana lako.

16. Ndapɛla osakisolande nge, ko lamo oyɛwɔ djonyi ntsha tɔkɔpa djɛ Yehova ntimeyɛ?

¹⁶ Nkambo nkina djɛ Yehova olendakande nde ndjewa ntsha onanghi w’ovunga amboyapɛla lá lɛdji lɔ nsɔsɔlɔ. Kɛkɔnge kesakisola ndapɛla? Ndapela nsakisolaka ‘ntshikitanyɛ ikanyi yɛso, eyalelo kɛso, kana okoma wɔso.’ Mpɛyɛka lonkina ikanyi yɛ onto woyala la yɛnyi edjinge l’otshutshumalo w’efula lá nkambo djɛ nyɛtshi djɛ ndombonangha kana lá wopo wɔ ndotanangha akambo wa wɔlɔ wa ndayale ladjɛ nangha. Onto womboyapɛla apayakiyanyɛ ngo lá nkambo djɛ pɔlɔ djɛ ndombonangha toko, koko nde ndakiyanyɛka lonkina má wopo wɔ ndatshike djɛ lonyuma lɔnde ndjala wɔdju ko kɛsɔ ndókomɛ djɛ nde nangha mpekanto. Tovungɔ ente Nkfumi Manase nya Davidɛ wananghaka evunga wɛ nkekete, koko, Yehova awimeyɛka mande iwɔ wayapelaka lá lɛdji lɔ nsɔsɔlɔ. (1 Nk. 14:8) Ee, ngo ntsha Yehova ambɛna tolembetelo tɛnyɛ ente tomboyapɛla ko nde ndotimeyɛ. Koko topakoke nkoma ndakiyanyɛ ngo l’ovunga w’isananghe toko. Iso ladjɛ ndjala entshupa dje nangha nkambo nkina. * Kɛsɔ kengotokomɛ lá nkambo nkina djɛ Yehova olendakande lá ntondo kɛ nyimeyɛ.

17. Nkadjimola oloko osakisolawɔ nge, ko lamo oyɛwɔ djonyi ntsha topakɔpɛ nkalɔ l’evunga wɛ ntondo? (Izaya 55:7)

¹⁷ Nkambo nkina djɛ djonyi djɛ Yehova ilakande yimba nde ndjewa ntsha onto ambokadjimola oloko. Nkadjimola oloko nsakisolaka ‘mpɛyɛ ɔkɔngɔ.’ L’etepela enkina, onto ladjɛ ntshikitana má ntshika yopo yɛ lowiko lɔnde lɔ mbindo ko ntateyɛ mbika lá yopo yɛ Yehova awolande. (Wala Izaya 55:7.) Onto wɔsɔ ladjɛ ntshikitanyɛ ekanedji kɛnde djɛ nde ndɔndjama má tokanyi tɔ Yehova. (Ɔrɔ. 12:2; Ɛfɛ. 4:23) Nde ladjɛ ndɔsa nkano djɛ ntshika tokanyi la nanghedji djɛnde djɛ mbindo. (Kɔl. 3:7-10) Lá nsɔsɔlɔ, oyɛwɔnde djawo djɛso tá olambo wɔ Kristo ndapɛyɛ ndeke lolekaka ntshinda Yehova djɛ ntimeyɛ la ntɛɛdjɛ piyɔɔ má evunga  wɛso. Yehova angokamba l’oshinga wɔ olambo wɔsɔ djɛ nde ntimeyɛ ngo ntsha nde ɛna ante tila welo wɛ l’oloko ɔmɔ djɛ ntshikitanyɛ enanghedji kɛso.​—1 Dj. 1:7.

18. Kɛkɔnge kɛ somboshishima lá kɛnɛ kelendana la nkoka djɛ Yehova djɛ nyimeyɛ?

¹⁸ Nyontshɔ tokovungola lá yopasɛ akambo amɔtshi wa djonyi wasomboshiyɛ nshishima. Yehova alekɔ nsɔsɔlɔ Onto woleka anto ankfumɔ welá andja w’otondo nyimeyɛ. Kɛkɔnge ketotshinda djɛ ntepela nghɔsɔ? Ntondontondo, nde angoyalake winá enkfumɔ entshupa djɛ nyimeyɛ. Nkambo dj’ape, nde ntewaka má winga wɔ mvo tii l’isɔdji yɛ lɔkɔla. Nde ndjewaka lá lɛdji lɔ djɔ ikakambo inkfumɔ yelendana laso, edjinge nde ndeke onto woleka ndjewa ntsha tomboyapɛla lá lɛdji lɔ nsɔsɔlɔ. La nkambo dj’asato nde, winá wɔ Yehova otimeyɛnde, nde mvungɛka lotshindalotshinda ngo ngete totananghá kaanga nkambo. Kɛsɔ ntokotshɛka djɛ ndjala la nkfumoloko kɛ piyɔɔ la ndjawolama me nde lonkina.

19. Kaanga oyɛso anto wa ntshamba djɛ djɔ la songokindjɛka nangha evunga, lamo okokaso ndjala l’osasa?

¹⁹ Lá nsɔsɔlɔ, l’ilá kenkfumɔ kɛ sopalekɔ djɔ, tongonanghaka mpekanto. Koko, iso nkoka mba ekembelo m’etepela w’otanaso lá Étude perspicace, Vɔlimɛ 2, nki 764-765, wɛnɛ: ‘Yehova alekɔ lokana nkɛtshi edjinge nde ndjewaka ante enkambi wɛnde walekɔ wɔdju, djɛkondeke wapakoke ndakiyanyɛka winá enkfumɔ má wopo wɔ yopalekɔ djɔ la wonanghawɔ evunga. (Yee. 103:8-14; 130:3) Ntsha wanangha la wolo djɛ mbika lá nkilika amboka yɛ Ndjambe, iwɔ nkoka ndjala l’osasa.’ (Flp. 4:4-6; 1 Dj. 3:19-22) Ɔsɔ alekɔ nsɔsɔlɔ ikanyi yekembɛ!

20. Kɛkɔnge kɛ songoshishima lá djamba djeyaye?

²⁰ Tolekɔ la djedjɛ efula te Yehova lá wopo w’oyɛnde entshupa djɛ ntimeyɛ winá w’oyapɛlaso lá lɛdji lɔ nsɔsɔlɔ má evunga w’isananghe. Iya wopo wɔkɔnge, w’okokaso ndjokola Yehova djɛ nyimeyɛ? Lá lɛdji lɔkɔnge yopo yɛso yɛ nyimeyɛ, ɔfɛnawɔ la yɛ Yehova yɛ nyimeyɛ ko lá lɛdji lɔkɔnge otshikitanawɔ? Lamo oyɛwɔ djonyi nsipisoyɛ otshikitano wɔsɔ? Djamba djeyaye ngokadjimola lá weepó wɛsɔ.