• “Langoyawokake ngo ngete womɛmi anangha loseke mbala la mbala.”

• “Langokake nsɔnyi, etengo mpalekɔ ɛkɔpɛ, la mpalekɔ la ntshina.”

• “Mpakoke nshimela onto djoyi djɛsɔ. Langokfunghanake la ndjolo kɛkɔ ngo l’eteyi k’oloko.”

• “Langoyawokake etengo Yehova apandjile yimba.”

Etepela welá djiko wɛnɛ wɛnyɛ yɛnyi yeyalaka l’omoto wolekɔ́ la wome wolendaka asango wɛnyɛwɔ anto enghanghunya. Edjinge ntsha angonanghake nkambo djɛsɔ lá wisisa, mbala imɔtshi l’ilá k’angɔndɔ kana k’ɛnɔnyi, nde akoka ndawoka etengo apayawɛkɛki te nde kaanga lá nkambo mmɔ. Etengo omoto ɔmɔtshi ndatepela ante: “Langoyapolake ente, ‘womɛmi oyɛnde kɔɔ ngete mo? Angondjisake akambo amɔtshi?’”

Djamba djɛnɛ djɛlɔngɔswamaka lá nkambo djɛ omoto wolekɔ́ la wome wolendaka asango wɛnyɛwɔ anto enghanghunya. a Djengotepela tɔkfɔ tɔ Bible tɔngɔɔpɛyɛ lokembo, tongoshikikɛ ente Yehova angosuka, la tongokotshɛ́ djɛ nde mba lokembo lá yimba la lá nyuma. b

Kaanga ngopakoke nsɔnɛla womɛko akambo woyɛnde ladjɛ nangha kana lako, wɛ nkoka nkitshakitshɛ yɛnyi yɛko edjinge ndjala la vu dj’efula djelá yimba. Kolenda akambo walɔnda wanɛ.

Toyatshumolake. Omoto wolekɔ́ la wome wolendaka asango wɛnyɛwɔ anto enghanghunya nkoka nyɛna lá lɛdji lɔmɔtshi etengo ɛkɔmɔ oyɛwɔ nde me nde. Danielle c atepela ante, “Langoyawɛnake etengo omoto wɔ nyɛtshi wotshita bala djɛnde m’ɔtɛ wɔ nkɛlɛ k’indeko.” Alice angoyawokake etengo womɛnde apɔwɛnyi ɔwɔngi. Angoyawopolake ante, ‘Lamo womɛmi ndɔkɔpa ndenda amato ankina l’edjena kɛ ndenda lemi?’

Ntsha nghɔsɔ ndeke oyawokɛ, ewa ente Yehova apɔkɛkɛyɛ odjito wɔ nanghedji djɛ womɛko. Djakɔbɔ 1:14 ntepelaka ante: ‘Onto l’onto mpembamaka winá w’awolande nsepama la ndjimbama má nsaki kɛnde nyɔmɛlɛ.’ (Ɔrɔ. 14:12; Flp. 2:12) L’edjena kɛ nde nkɔpɛla, Yehova ndɔsaka nkɔmano djɛko la ntshina.​—2 Ɛk. 16:9.

Alekɔ lonkina nkambo djɛ djonyi ndjewa ente ntsha mpame kɛmɔtshi angolendake asango wɛnyɛwɔ anto  enghanghunya kɛsɔ kepasakisola ente wadjɛnde apalekɔ ɔwɔngi. Andjeyi yɛ wayi ntepelaka ambɔ asango wɛnyɛwɔ anto enghanghunya mbetsholaka mposɛ k’efula kɛ nsanga mbeto kɛ kaanga omoto ɔmɔ ndopakoke nshiyɛ.

Tolekake ndakiyanyɛ. Catherine atepela ante ayalaka la yɛnyi lowiko lɔnde l’otondo m’ɔtɛ wɔ womɛnde ndalendaka asango wɛnyɛwɔ anto enghanghunya. Frances atepela ante: “langoyalake la yɛnyi y’efula winá enkfumɔ wɛ mopewe idjena yɛ womɛmi oyalande. Langoyalake ɛnkɛnkɛlɛ etsho enkfumɔ.” Amato amɔtshi watepelaka ambɔ wangoyalake la nsɔnyi efula winá w’oyɛwɔ lá ntondo kɛ Akristo ankina wakoka ndjewa akambo wanangha wame wawɔ. Koko ankina wangosuyɛke wopo w’oyawokakawɔ olengedji ladjikɛnde wangokanelake ambɔ lako onto w’okoka nsipisoyɛ nkambo djepomana lawɔ.

Ndawoka nghɔsɔ lako nyɛtshi. Koko, nkanelaka winá enkfumɔ lá akambo wasɔ angoleka ngo mfudjɛ okiyano wɔko. L’edjena kɛ nangha nghɔsɔ, nangha la wolo djɛ ndapɛyɛ lá djokanelo djɛko nya Yehova. Nangha nghɔsɔ angokokotshɛ́ djɛ wɛ nkfulumeyɛ.​—Yee. 62:2; Ɛfɛ. 6:10.

Okoka nyɛna ente alekɔ nkambo djɛ djonyi efula mbala la ntɔnɔla l’ɛkɔndɔ welá Bible welendana l’amato wawisá lokembo má nkadjimɔ te Yehova lá lɔlɔmbɔ. Nde atatshikitanyɛki winá enkfumɔ akambo wakomelaki, koko apɛyɛki vu. Ndjɔmbɔmba, Ana ayalaki la ‘yɛnyɛ y’efula’ m’ɔtɛ wɔ nkambo djeyalaki lande. Kaanga yayale nghɔsɔ, m’ɔkɔngɔ wɔnde ‘nangha dɔmbɛlɔ dj’otale efula lá ntondo kɛ Yehova,’ nde awaka vu, kaanga ndotewaki wopo wɔ nkambo djɛnde okokawɔ ntshikitana.​—1 Sa. 1:10, 12, 18; 2 Kɔ. 1:3, 4.

Hona okotshɔ wɔ tokokolo tel’otshumano. Iwɔ wangoyala “edjena kɛ djisa lá winá wɔ lompopo la edjena k’elamelo lá winá wɔ olumbe wɔ mvula.” (Iza. 32:2, nɔtɛ.) Iwɔ wakoka nkotomela kaanga nkaana kɛmɔtshi k’okokɛ ndawɛkɛ te nde djɛ nde nkokembɛ.​—Woo. 17:17.

Wɛ okoka nkotshɛ́ womɛko djɛ ndongela enkfumbo kɛ ndenda asango wɛnyɛwɔ anto enghanghunya? Ee okoka. Bible ɛnyɛ ante djɛ nkandola okakasano ɔmɔtshi kana djɛ ndongela ontonyi ɔmɔtshi wɔ nkfulu, ‘anto ape ndeka onto ɔmɔ.’ (Los. 4:9-12) Wánangha ehonelo wɛ lotshimola wɛnyɛ ambɔ mbala efula eposelo wɛ wɔlɔ ndjalaka winá wɔ antshukami okambawɔ esanga djɛ ndongela ekfumbo kɛ ndenda asango wɛnyɛwɔ anto enghanghunya edjinge dj’iwɔ nkalɔ ndjilelana eloko lá bala djɛwɔ.

Lá nsɔsɔlɔ, nkambo djɛsɔ okokawɔ nanghema ngo ntsha womɛko awola l’oloko ɔmɔ la ntsha ambɔsá  nkano djɛ ndongela ekfumbo kɛnde kɛ ndenda asango wɛnyɛwɔ anto enghanghunya. Nde ambɔlɔmbá djɛ Yehova ndɔpɛyɛ lokembo edjinge ambohona okotshɔ wɔ tokokolo? (2 Kɔ. 4:7; Dja. 5:14, 15) Nde ambowanga nkamba la topo tɔmɔtshi tɔ mayɛlɛ, tokoka ndowangoyɛ m’ohemba, ndjɔmbɔmba, nkitshakitshɛ okambelo wɔnde wɔ l’aparɛyi la ndjewɔ akambo wakoka ndɔkfɛyɛ lonkina l’ohemba wɔsɔ? (Woo. 27:12) Nde alekɔ entshupa djɛ ndjawola okotshɔ wɔko la alekɔ la nkɔmano l’akambo ankfumɔ? Ntsha nghɔsɔ, okoka ndokotshɛ.

Lá wopo wɔkɔnge? Kolenda ndjɔmbɔmba kɛnɛ. Felicia apɛtshɛka bala nya Ethan, kanga loyalaki l’enkfumbo kɛ ndenda asango wɛnyɛwɔ anto enghanghunya ngo má ɔlɛngɛ wɔnde. Felicia ánanghaka djɛ womɛnde ndoshimela ipa l’okakasano winá wɔ ndayalaka la mposɛ kɛ nkalɔ ndenda asango wɛnyɛwɔ anto enghanghunya. Ethan apakisola ante: “Nsawolaka la wadjɛmi la nkɔmano nkfumɔ la ndɔwɛnyɛka akambo ankfumɔ papoo. La ngandji k’enkfumɔ nde ankotshɛ́ka djɛ lemi ndawilela elelo la ankɔmɛki mbala la mbala. La ankotshɛ́ka djɛ lemi nkitshakitshɛ okambelo wɔmi wɔ la ɛntɛrnɛtɛ.” Lá nsɔsɔlɔ, Felicia ayalaki la yɛnyi y’efula winá wɔ Ethan ndayalaka la mposɛ kɛ nkalɔ ndenda asango wɛnyɛwɔ anto enghanghunya. Nde ntepelaka ante “Nkɛlɛ la yɛnyi yeyalaki la lemi yetasamba ndokotshɛ́ djɛ ndjewɔ ekfumbo kɛ nyɛtshi kɛsɔ. M’ɔkɔngɔ wɔ nde ntɔnɔla lá nkambo djɛnde, nde ayalaka entshupa djɛ nkotshɛ́ lemi djɛ ndongela yɛnyi yeyalaki la lemi.”

Asawo wa nghɔsɔ wapakotshɛ́ ngo mpame kelekɔ́ l’enkfumbo kɛ ndenda asango wɛnyɛwɔ anto enghanghunya koko nkoka nkotshɛ́ edjinge wadjɛnde djɛ nde nkalɔ ndowilela oloko. Lá djiko djɛ lasɔ, ntsha wome alekɔ entshupa djɛ nshimela wadjɛnde mposɛ yɛnde, todjena totshɔnde, la kɛnɛ konanghande, angoyala wɔdju djɛ wadjɛnde ndowilela oloko.

Wɛ ɛna ente okoka nkotshɛ́ womɛko lá yopo imɔtshi yɛ fɛna? Ntsha oyɛwɔ nde nghɔsɔ, lamo nyopawale djambe djɛnɛ ko nyo nsawola esanga? Ekoma wɛnde wengoyala wɛ nde ntshika ndenda asango wɛnyɛwɔ anto enghanghunya la nkɔpɛyɛ donga dj’okokɛ ndowilela oloko. L’edjena kɛnde nyomala winá wɔkɔpanyo ntepela nkambo djɛsɔ, nde ladjɛ nangha la wolo djɛ ndjoka wopo wɔ nkambo djɛsɔ ɔkɔpɛyɛwɔ yɛnyi. Ekoma wɛko nde wɛ nkembɛ welo wilande la wɛ ndɔpɛyɛ mbamba kɛnde nkɛnyɛ ante okoka ndowilela oloko. Nyo ape kɛkɔ ladjɛ ndjeka akambo watɔlaka anto ntɔkfɔ lá olendelo w’asango wɛnyɛwɔ anto enghanghunya la wopo w’okokanyo ndongela nkambo djɛsɔ. d

Ntsha oka wɔma ente wamba wanyo wangoleka ntɔla nkambo tá nyɛtshi, lɔmba ikokolo imɔtshi yɛ nyo ape kɛkɔ okokanyo nsawola wɔlɔ, edjigne djɛ nde ndɔndjɛ asawo wanyo. Ewa ente m’ɔkɔngɔ wɔ wadji kana  womɛko ndongela ekfumbo kɛ ndenda asango wɛnyɛwɔ anto enghanghunya, akoka ndɔsa ndambo k’etsho djɛ nde ndawɛkɛ te wɛ. Topekɔke. Hona tokakambo tɔmɔtshi tɔ daambi tombosembɔ lá djokanelo djɛnyo. Yala l’eshikikelo ente l’ilá k’etsho ntsha nyo ape kɛkɔ nyolekɔ la balentshitshi, bala djɛnyo djengokalɔ nkemba lonkina.​—Los. 7:8; 1 Kɔ. 13:4.

Ntsha womɛko ambokalɔ nkfɔ, kɛsɔ kesakisolawɔ nde ente nde apatshikaki ekfumbo kɛnde kɛsɔ? Lako ape nghɔsɔ. Pekapeka ntsha ambekela, akoka ndjala l’okakasano wɔ ntshika ekfumbo kɛnde kɛsɔ lowiko lɔnde l’otondo. Akoka nkalɔ ndɔkfɔ kaanga m’ɔkɔngɔ w’ɛnɔnyi efula. Djɛ ndjewɔ dj’ipa nde nkfɔ lonkina, nde ladjɛ ndjila elelo wɛ wolo, mbala imɔtshi má nkindjɛ nɛmɛyɛ topo tɔ mayɛlɛ tɔ ndoyawilela kaanga ntsha ɛna ngo ngete amboshiyɛ ndonga nkambo djɛkɔ. (Woo. 28:14; Mat. 5:29; 1 Kɔ. 10:12) Nde ladjɛ ndjala la ‘wolo wɔlɔmbɔla yimba’ wɔ bango edjinge ‘ntona kɛnɛ kelekɔ́ nyɛtshi,’ ntepela ente olendelo w’asango wɛnyɛwɔ anto enghanghunya la nkfumbo nkfumɔ djɛ mbindo djɛfɛna, ndjɔmbɔmba ɔmɔnghɔnywɛlɔ wɔ ntenyi djɛ demba djɛ botshi. (Ɛfɛ. 4:23; Yee. 97:10; Ɔrɔ. 12:9) Nde alekɔ entshupa djɛ ndjila welo wɛsɔ? Ntsha oyɛwɔ nde nghɔsɔ, mbɔ koko angoyala l’akoka wa ntshika ekfumbo kɛsɔ lotshinda lotshinda. e

Iya koko onanghɛ mo, ntsha womɛko apɛnyɛ mposɛ kɛ nanyɛ okakasano wɔnde? Ndjokamaka ente, mbala efula okoka ndjala la yɛnyi, la nkɛlɛ edjinge okoka ndawoka etengo ambokofunga. Hona vu djelá yimba má ntshika nkambo l’ɛwɔ wɛ Yehova. (1 Pɛ. 5:7) Kindjɛ ndasukanyɛ la Yehova má ndjekaka, ntɔnɔlaka, la ndɔmbaka. Ntsha ombonangha nghɔsɔ, yala l’eshikikelo ente Yehova koko angoyasukanyɛ lawɛ. Etengo Izaya 57:15 otepelande, nde ndjalaka esanga l’anto ‘wambotshimba yimba,’ la waalekɔ́ la yimba y’okitshakitshɛ djɛ nkembɛ timba tɔwɔ. Nangha la wolo djɛ ndjala Okristo wɔ wɔlɔ w’okokɛ ndjala. Hona osukɔ wɔ tokokolo. La yala l’eshikikelo ente l’etsho w’eyaye, womɛko akoka nangha etshikitano wɛ nsɔsɔlɔ.​—Ɔrɔ. 2:4; 2 Pɛ. 3:9.