1. Kɛkɔnge kekoka ntokotshɛ́ djɛ ndjeka prɔfɛsi yɛ Bible l’osasa?

 WƆNANYƆ ɔmɔtshi w’olangala w’etawɔ Ben atepelaka ante: “Lemi nkɔpaka ndjeka prɔfɛsi yɛ Bible.” Wɛ olekɔ ikanyi imɔ nyande? Ndo koko ɔngɛnake ente prɔfɛsi yɛ Bible ilekɔ wolo nsipisoyɛ? Mbala imɔtshi ongokake kaanga ente wekelo wɔ prɔfɛsi yɛ Bible ndjalaka onunghu. Koko, winá wɔ ngongoleka nsipisoyɛ lamo Yehova ndile prɔfɛsi yɛkɔ l’Otepela wɔnde, okoka ntshikitanyɛ ikanyi yɛko.

2. Lá nkambo djɛkɔnge djamba djɛnɛ ndongopika nghɔmɔ ɛnsɔsɔ?

² Lá djamba djɛnɛ, tongotepela apengo lamo oyɛso ladjɛ ndjeka prɔfɛsi yɛ Bible toko, koko lonkina wopo w’okokaso ndjeka prɔfɛsi yɛkɔ. Masɔ tongoshishima prɔfɛsi ipe yel’onkanda wɔ Danyɛlɛ djɛ nyɛna wopo wɔ nsipisoyɛ prɔfɛsi yɛkɔ okokawɔ ntokotshɛ́ má winá wɔsɔ.

3. Kɛkɔnge k’oyɛso ladjɛ nangha ntsha tɔkɔpa nsipisoyɛ prɔfɛsi yɛ Bible?

³ Ntsha tɔkɔpa nsipisoyɛ prɔfɛsi yɛ Bible, iso ladjɛ mpona okotshɔ. Kolenda ndjɔmbɔmba kɛnɛ. Kɔsa djɛ otawembola idjena imɔtshi yɛ ngopalembetela wɔlɔ koko ilongo yetatshu lawɛ alembetela idjena yɛkɔ wɔlɔ. Nde ewa wɔlɔ edjena kɔɔ k’oyɛnyo la tá edjena kɛ mboka la mboka ɔtɔlande. Ape l’ehamo ongoyala l’osasa lá wopo wɔ ilongo yɛko ndawolaki ndjɛ la wɛ! Lá wopo wɔk’ɔmɔ, Yehova ndjewaka etsho weyaye wɔlɔ wɔlɔ edjinge nde ndjewaka kɛnɛ ketokongela lá ntondo. Djɛkondeke djɛ ndjoka prɔfɛsi yɛ Bible, iso ladjɛ ndɔmba Yehova okotshɔ l’okitshakitshɛ onkfumɔ.​—Dan. 2:28; 2 Pɛ. 1:19, 20.

4. Ladjikɛnge Yehova ndile prɔfɛsi l’Otepela wɔnde? (Jɛrɛmi 29:11) (Lenda edjinge ntshango.)

 ⁴ Ngo ngete ombotshi onkfumɔ wɔ wɔlɔ, Yehova nkɔpaka wana wande ndjala l’etsho weyaye w’osasa. (Wala Jɛrɛmi 29:11.) Koko lá lɛdji lotshikitanyi l’ambotshi wa wana w’anto, Yehova nkoka ntepela akambo wangonanghemá l’etsho weyaye lá lɛdji lɔ djɔ. Nde afunaka prɔfɛsi l’Otepela wɔnde dj’iso ndjewa akambo wa djonyi wanghonanghemá l’etsho weyaye lá ntondo k’iwɔ nanghema. (Iza. 46:10) Prɔfɛsi yɛ Bible oyɛwɔ nde epapɛyɛ wɛ ngandji w’ime Papa kɛso kel’olongo. Iya ko wopo wɔkɔnge w’okokɛ ndjala l’eshikikelo ente kɛnɛ kɛ Bible ndewoyɛ kengokotshama nsɔsɔlɔ?

5. Elangala l’eseka okokawɔ ndjeka nge má kɛnɛ kekomelisá Max?

⁵ Lá nkalasa, mbala efula, elangala l’eseka wɛso ndjingamaka l’anto wapalekɔ́ kana walekɔ́ ngo la ndambo kɛ dilɛmɛlɔ daambi tá Bible. Etepela wɛwɔ la nanghedji djɛwɔ nkoka ndjila ehamo lá ntimba tɔ elangala l’eseka wɛso welekɔ́ Ewakɛ wɛ Yehova. Kolenda kɛnɛ kekomelisá wɔnanyɔ w’etawɔ Max. Nde atepela ante: “Winá wɔ mayalaka l’ɛnɔnyi djomi la ndjape, ntateyɛka ndjila ehamo ente ambotshi wami wapandakanyɛ etolo kɛ nsɔsɔlɔ edjinge ente Bible djetayɛ́ me Ndjambe.” Ambotshi wande iyananghe mo? Nde ntepelaka ante: “Iwɔ wankadjimolaki ɔkɔkɛ ɔkɔkɛ, kaanga mewaka ente walekɔ la yɛnyi.” Amboshi wa Max w’okadjimolaka weepó wɛnde wemá Bible. Max ananghaka nkambo mɔtshi lonkina. Nde ntepelaka ante: “Ndjekaka prɔfɛsi yɛ Bible mɔmɛlɛ, edjinge lasawolaki la winami ankina kɛnɛ kɛ mekaka.” Eposelo wɛkɔnge weyalisá? Max atepela ante: “M’ɔkɔngɔ wɔ lasɔ, ndjɛka ndoyashikikɛ ente Bible nkfunamaka má ɛlɔndjɛlɔ kɛ nyuma kɛ Ndjambe!”

6. Kɛkɔnge koyɛ ladjɛ nangha ntsha olekɔ l’ehamo, ko ladjikɛnge?

⁶ Ntsha etengo Max, ombowanga ndjila ehamo ente Bible mpatepela nsɔsɔlɔ, tokake nsɔnyi. Koko ngo wɛ nangha nkambo mɔtshi. Ehamo welekɔ etengo akɛdji. Ntsha tombotshika akɛdji ngo nghonyi, wakoka ntátshite ekete kɛ ntshó ndambo ndambo. Djɛ ntateyɛ nyimɛ “akɛdji” má ndjawo djɛko, wɛ ladjɛ ndawopola ente: ‘Langawolake kɛnɛ kɛ Bible otepelande lá nkambo dj’etsho weyaye?’ Ntsha opalekɔ l’eshikikelo lá nkambo djɛsɔ, mbɔ wɛ ladjɛ ndjeka prɔfɛsi yɛ Bible yemboshiyɛka nkotshama. Okokɛ nangha nghɔsɔ ngete mo?

7. Ndjɔmbɔmba kɛkɔnge ketshikisá Danyɛlɛ lá kɛnɛ kelendana la wekelo wɔ prɔfɛsi? (Danyɛlɛ 12:10) (Lenda lonkina ntshango.)

⁷ Danyɛlɛ atotshikelaka isankfumɔ ndjɔmbɔmba kɛ wɔlɔ lá wopo wɔ ndjeka prɔfɛsi. Nde ekaki prɔfɛsi la donga djɛ wɔlɔ, djɛ ndjewa nsɔsɔlɔ. Danyɛlɛ ayalaki lonkina l’okitshakitshɛ, nde ewaki ante Yehova angokotshɛ́ anto w’owewa la walɛmɛyɛ ɛlɛmbɛ wɛnde wɛ piyɔ djɛ ndjoka prɔfɛsi. (Dan. 2:27, 28; wala Danyɛlɛ 12:10.) Danyɛlɛ ɛnyɛka djɛ alekɔ l’okitshakitshɛ má ndawɛkɛ te Yehova djɛ mpona okotshɔ. (Dan. 2:18) Danyɛlɛ ekaki lonkina la nkɔmɛ nkfumɔ. Nde ananghaka ehonelo lá Afunelo wayalaki l’etsho wɛnde wefunamisá má ɛlɔndjɛlɔ kɛ nyuma k’ekina. (Jɛr. 25:11, 12; Dan. 9:2) Wopo wɔkɔnge w’okokɛ ndjokola Danyɛlɛ?

8. Ladjikɛnge anto amɔtshi otonakawɔ ndjawola ambɔ prɔfɛsi yɛ Bible imboshiyɛká nkotshama, ko kɛkɔnge k’oyɛso ladjɛ nangha?

 ⁸ Shishima ekoma wɛko. Ekɛ prɔfɛsi yɛ Bible nde má mposɛ k’efula kelekɔ́ lawɛ kɛ ndjewa akambo wa nsɔsɔlɔ? Ntsha oyɛwɔ nde nghɔsɔ, mbɔ Yehova angokokotshɛ. (Dj. 4:23, 24; 14:16, 17) Ladjikɛnge anto amɔtshi yekaka prɔfɛsi yɛ Bible? Amɔtshi nkoka nangha nkambo djɛsɔ l’ikanyi yɛ mba tolembetelo tɛnyɛ ente Bible ntafunamá má ɛlɔndjɛlɔ kɛ nyuma kɛ Ndjambe. Lá lɛdji lɔsɔ, iwɔ mfɛnyɛka ambɔ iwɔ nkoka ndawilela ɛlɛmbɛ wɛwɔ yɔmɛlɛ la nɛmɛyɛ ɛlɛmbɛ wɛkɔ. Koko, iso ladjɛ ndjala l’ekoma wɛ wɔlɔ. Má djiko djɛ lasɔ, dj’iso nsipisoyɛ prɔfɛsi yɛ Bible ngo ndjala la djekeka mɔtshi djɛ djonyi.

9. Djekeka djɛkɔnge dj’oyɛso la djonyi ntsha tɔkɔpa nsipisoyɛ prɔfɛsi yɛ Bible? Pakisola.

⁹ Yala l’okitshakitshɛ. Yehova ndakaka djɛ nkotshɛ́ kanga okitshakitshɛ. (Dja. 4:6) Djɛkondeke iso ladjɛ ndɔmba okotshɔ wɔnde djɛ nsipisoyɛ prɔfɛsi yɛ Bible. Iso ladjɛ ndjewa lonkina ente tolekɔ la djonyi dj’okotshɔ wɔ epeko k’okambande la kɛkɔ djɛ ntɔpɛyɛ oleelo welá nyuma lá winá wɔ wɔlɔ. (Luka 12:42) Yehova alekɔ Ndjambe kepalekɔ́ l’ofutano, djɛkondeke tolekɔ l’elonga kɛ ntepela ente nde nkambaka ngo l’epeko kɛmɔ djɛ ntokotshɛ́ dj’iso nsipisoyɛ Otepela wɔnde.​—1 Kɔ. 14:33; Ɛfɛ. 4:4-6.

10. Olakanyelo wɔkɔnge ngombowa má kɛnɛ kekomelisá Esther?

¹⁰ Eka la nkɔmɛ nkfumɔ. Sɔna prɔfɛsi k’ɔkɔpɛ edjinge masɔ nangha ehonelo l’eteyi. Kɛsɔ ndeke nkaana kɛmɔtshi ketawɔ Esther ndananghe. Nde akɔpaki prɔfɛsi yetepelaki oyelo wɔ Mesiya. Nde ntepelaka ante: “Winá wɔ mayalaka l’ɛnɔnyi 15, mbangaka mpona tolembetelo tɛnyɛ ente prɔfɛsi yɛsɔ yefunamaka nsɔsɔlɔ lá ntondo kɛ Yeso ndjɛ.” Kɛnɛ kɛ ndeke má badji djɛ Ɛwɔmbɔ wemá Ndjale Kembovɔ́ k’oshikikɛka. “Nde ɛnaka ante: Ɛwɔmbɔ ɛmɔtshi l’anteyi kɛwɔ wefunamaka lá ntondo kɛ Kristo ndjɛ, djɛkondeke prɔfɛsi yefunamisá l’eteyi iyalaka ladjɛ ndjɛ me Ndjambe.” Esther awola ante: “Ndjalaka ladjɛ mbala nkete ilá efula djɛ ndosipisoyɛ.” Koko nde alekɔ l’osasa lá welo wɛ ndile. M’ɔkɔngɔ wɔ nde ndjeka efula kɛ prɔfɛsi yemá Bible la nkɔmɛ nkfumɔ, nde atepelaka ante: “Nyɛnaka mɔmɛlɛ papoo ente Bible ntepelaka nsɔsɔlɔ!”

11. Wapɔ wɛkɔnge songowa isɔmɛlɛ má ndashikikɛ ente Bible dekɔ nsɔsɔlɔ?

¹¹ Winá wɛnaso wopo wɔ prɔfɛsi imɔtshi yel’Otepela wɔ Ndjambe yomboshiyɛká nkotshama, tongoyala la djawo djɛ wolo te Yehova la tá ɛlɔndjɛlɔ kɔtɔpɛyɛnde. Má djiko djɛ lasɔ, prɔfɛsi yɛ Bible ntokotshɛ́ká djɛ nkindjɛ ndjala la nkongi djɛ wɔlɔ djɛ l’etsho weyaye, ayale wepo w’ekakasano wepomana laso má winá wɔsɔ. Nyontshɔ tokolenda lá yopasɛ, prɔfɛsi ipe yɛ Danyɛlɛ yetákotshama winá wɔsɔ. Nsipisoyɛ prɔfɛsi yɛsɔ nkoka ntokotshɛ́ djɛ ndɔsa akano wa balo.

12. Akaka wa ‘ndambo la lowolo ndambo la bomba’ oyɛwɔ djingingi djɛ nge? (Danyɛlɛ 2:41-43)

¹² Wala Danyɛlɛ 2:41-43. Lá dɔ djɛ Danyɛlɛ ndasakisola Nkfumi Nebukadenezara, akaka wa  isakandole yɛ nkfumi ndɛnyi ‘wananghemaka ndambo la bomba ndambo la lowolo.’ Má ndjɛdjɛ prɔfɛsi kɛsɔ la inkina y’otanaso l’onkanda wɔ Danyɛlɛ la wɔ Ndjiso, tokoka ntepela ente akaka wasɔ oyɛwɔ nde osanga wɔ Anglo-Américain, onkfumi wapamela l’andja w’otondo lɔɔko kɛnɛ. Lá kɛnɛ kelendana la onkfumi wɔkɔ wapamela l’andja w’otondo wɔsɔ, Danyɛlɛ atepelaka ante, ‘onkfumi wɔkɔ wongoyala ndambo wolo ndambo wɔdju.’ Ladjikɛnge ndambo wɔdju? Ladjikɛnde anto walekɔ́ djingingi djɛ bomba, walɛmbɛ akoka wande wa nangha akambo la nkfulu kɛ ngete kɛ lowolo. b

13. Akambo wa djonyi wakɔnge wasombisola má nsipisoyɛ prɔfɛsi kɛsɔ?

¹³ Iso ndjekaka elakanyelo wɛ ndjonyi efula má kɛnɛ kɛ Danyɛlɛ ndatepela lá nkambo djɛ dɔ dj’isakandole, pekapeka lá nkambo dj’ekolo wɛnde. Ntondontondo, Onkfumi wɔ Anglo-Américain, wapamelá l’andja w’otondo wɛnyɛka wolo wɔnde lá topo totshikitanyi. Ndjɔmbɔmba, woyalaka l’anteyi k’ewila w’owisá mpongo má Mbandji kɛ I la II kel’andja w’otondo. Koko, onkfumi wapamelá l’andja w’otondo wɔsɔ woyalaka wɔdju edjinge wongokindjɛ ndjala wɔdju má ntshamba djɛ djokanelo djɛ wana mbandja wande. Dj’ape, osanga wɔsɔ wongoyala onkfumi w’ekomo wapamela l’andja w’otondo lá ntondo kɛ Onkfumi wɔ Ndjambe ndila ekomo kɛ enkfumi enkfumɔ wɛ wana w’anto. Kaanga ewila enkina okokawɔ nanyɛ Onkfumi wɔ Anglo-Américain wapamela l’andja w’otondo, wapɔhɛnaki lotshinda. Ewaso nghɔsɔ nde, ‘ve’ djelekɔ́ djingingi dj’Onkfumi wɔ Ndjambe djengɔsɛpɛtanyɛ akaka, etenyi kɛ isakandole kelekɔ djingingi djɛ osanga wɔ Anglo-Américain.​—Dan. 2:34, 35, 44, 45.

14. Wopo wɔkɔnge nsipisoyɛ prɔfɛsi kɛ akaka wa ndambo la lowolo ndambo la bomba okokawɔ ntokotshɛ́ djɛ ndɔsa akano wa balo?

¹⁴ Olekɔ l’eshikikelo ente prɔfɛsi kɛ Danyɛlɛ kɛ ndambo lowolo ndambo la bomba kelekɔ nsɔsɔlɔ? Ntsha oyɛwɔ nde nghɔsɔ, mbɔ kengoyala l’eposelo tá wopo w’owikɛ lowiko lɔko. Opongohona djɛ mba ewombelo má nkete djelá demba djel’andja wanɛ wakɔpa ntshitana lako ilá. (Luka 12:16-21; 1 Dj. 2:15-17) Nsipisoyɛ prɔfɛsi kɛsɔ angokokotshɛ́ lonkina djɛ wɛ nyɛna ntshina kelekɔ́ l’olemo w’ipoposanyɛ la wɔ ndakanyɛ. (Mat. 6:33; 28:18-20) M’ɔkɔngɔ wɔ ndjeka prɔfɛsi kɛnɛ, ladjikɛnge ngopoyawopola woopó wɔnɛ: ‘Akano w’ɔsami, wɛnyɛ ente ndekɔ l’eshikikelo ente lako ilá Onkfumi wɔ Ndjambe wotshita enkfumi enkfumɔ wɛ wana w’anto?’

15. Olekɔ́ ‘nkfumi kɛ nɔrɔ’ la ‘nkfumi kɛ sidɛ’ lɔɔko kɛnɛ na? (Danyɛlɛ 11:40)

¹⁵ Wala Danyɛlɛ 11:40. Danyɛlɛ shapitrɛ 11 ntepelaka nkambo djɛ nkfumi ipe, kana enkfumi wɛ pɔlitikɛ weyananyɛ l’anteyi kɛwɔ l’ikanyi yɛ ndjapamela andja w’otondo. Má ndjɛdjɛ prɔfɛsi kɛnɛ la inkina yelá Bible, tokoka ntepela ente ‘nkfumi kɛ nɔrɔ’ nde Russie l’anto w’osuka edjinge ‘nkfumi kɛ sidɛ’ nde Onkfumi wɔ Anglo-Américain w’apamela l’andja w’ontondo. c

16. Ekakasano wɛkɔnge wepomana l’anto wawika l’onkfumi wɔ ‘nkfumi kɛ nɔrɔ’?

¹⁶ Enkambi wɛ Ndjambe wewiká l’ɛlɔndjɛlɔ kɛ ‘nkfumi kɛ nɔrɔ’ wanyɔkwama me nkfumi kɛsɔ. Ewakɛ wɛ Yehova ɛmɔtshi wakfusama la wingela lá nkando m’ɔtɛ wɔ djawo djɛwɔ. L’edjena kɛ ndjokɛ wananyɔ waso wɔma, nanghedji djɛ ‘nkfumi kɛ nɔrɔ’ djekembɛ djawo djɛwɔ. Ladjikɛnge? Ladjikɛnde wananyɔ waso  wewa ambɔ lɔnyɔkɔ lopomana l’enkambi wɛ Ndjambe okotshɛwɔ nde prɔfɛsi yefunamisá me Danyɛlɛ. d (Dan. 11:41) Ndjewa nghɔsɔ nkoka ntokotshɛ́ djɛ nkembɛ nkongi djɛso la nkɔmano djɛso.

17. Ekakasano wɛkɔnge wepomaná l’enkambi wɛ Ndjambe wewika l’ɛlɔndjɛlɔ kɛ ‘nkfumi kɛ sidɛ’?

¹⁷ Edjinge ‘nkfumi kɛ sidɛ’ ɛnyɛki enkambi wɛ Yehova ndjolo, l’etsho wemboheta. Ndjɔmbɔmba, l’etenyi kɛ ntondo kɛ ɛtɛndɔ 20, wananyɔ efula wavundamaka nkando ngo mande watakɔpa ndɔsa opiko lá wayi wa pɔlitikɛ edjinge wakilikaki wana w’Ewakɛ wɛ Yehova amɔtshi má nkalasa ngo m’elonga kɛkɔ kɛmɔ. Koko, lá ɛnɔnyi emangha wemboheta, enkambi wɛ Yehova wewiká l’ɛlɔndjɛlɔ kɛ nkfumi kɛsɔ wapomanaka l’ekakasano ɛmɔtshi wilisá nkɔmano djɛwɔ t’Onkfumi wɔ Ndjambe l’ohemba. Ndjɔmbɔmba, lá winá wɔ prɔpagadɛ, Okristo nkoka mpembama djɛ nsuka iloyi imɔtshi yɛ pɔlitikɛ kana onto ɔmɔtshi wilisá elongi. Mbala imɔtshi nde apangokoma  tii lá ntɔvɔtɛ, koko akoka ndɔsa opiko lá yimba la l’oloko wɔnde. Ɔsɔngo oyɛwɔ djonyi iso nsamba ndɔsa opiko lá wayi wa pɔlitikɛ apengo lá nanghedji djɛso koko edjinge lá yimba yɛso la l’oloko wɔso!​—Dj. 15:18, 19; 18:36.

18. Wopo wɔkɔnge welolakaso lá ntshamba djɛ djokanelo djelekɔ́ l’antenyɛ ‘nkfumi kɛ nɔrɔ’ l’otonyi wɔnde? (Lenda edjinge ntshango.)

¹⁸ Anto wapalekɔ́ la djawo tá prɔfɛsi yɛ Bible wakoka ndoyala l’okiyano w’efula winá wɔ yɔngɛna ‘nkfumi kɛ sidɛ’ anana nya ‘nkfumi kɛ nɔrɔ.’ (Dan. 11:40, nɔtɛ.) Ewandji epe wɛsɔ walekɔ l’abɔmbɛ wa wolo wakoka ntshita mbiko inkfumɔ yelá looko. Koko tewa ente Yehova apangawola nkambo djɛsɔ nanghema. (Iza. 45:18) L’edjena kɛ lotono lolekɔ́ l’atenyɛ ‘nkfumi kɛ nɔrɔ’ la ‘nkfumi kɛ sidɛ’ ntotshimbɛ yimba, okembɛwɔ nde djawo djɛso. Ɛnyɛwɔ nde ente ekomo kɛ nkfumbo dj’akambo djɛnɛ kemboyala entshupa.

19. Kɛkɔnge k’oyɛso ladjɛ ndjewa lá nkambo djɛ prɔfɛsi yɛ Bible?

¹⁹ Topewe wopo wɔ prɔfɛsi imɔtshi yɛ Bible yongokotshama. Kaanga ɔprɔfɛtɛ Danyɛlɛ atasipisoyɛki akambo ankfumɔ wa ndafunaka. (Dan. 12:8, 9) Koko ape ladjikɛnde topewe wɔlɔ wɔlɔ wopo wɔ prɔfɛsi kɛmɔtshi yongokotshama ndeke yopongokotshama. Ape l’ehamo, iso nkoka ndjala l’eshikikelo ente Yehova angotisola lá winá wɔ wɔlɔ kɛnɛ k’oyɛso la djonyi djɛ ndjewa, ngo ngete ndananghe l’etsho wɛ ntondo.​—Amɔ. 3:7.

20. Prɔfɛsi yɛkɔnge yɛ wɔlɔ efula yɛkɔpa nkotshama lako ilá?

²⁰ Etepela wɛ ente ‘vu la lotoyi ntshitshi’ wɛkɔpa ntepelama lako ilá. (1 Te. 5:3) Masɔ enkfumi wɛ pɔlitikɛ wel’andja wanɛ wangɔtɔmbɔkwɛla ntolo dj’engolo ko wagaatshita. (Ndj. 17:16, 17) Iwɔ wangonanyɛ enkambi wɛ Ndjambe. (Ezk. 38:18, 19) Akambo wasɔ wangɔtɔla mbala kɛkɔ kɛmɔ tá mbandji k’ekomo kɛ Armagɛdɔ. (Ndj. 16:14, 16) Tokoka ndjala l’eshikikelo ente akambo wasɔ wakɔpa nanghemá lako ilá. Koko má winá wɔsɔ, nyontshɔ tokindjɛ nyɛnyɛ ndjedjɛ djɛso te Papa kɛso kel’olongo má ndjekaka prɔfɛsi yɛ Bible la nkɔmɛ nkfumɔ la má nkotshɛ́ka anto ankina djɛ nangha wopo wɔk’ɔmɔ.