1. Lá nkilika Hebero 12:1, kɛkɔnge k’oyɛso ladjɛ nangha djɛ nkoma l’oshidji w’ekomo wɔ lowango lɔso lɔ lowiko?

 BIBLE ndjɛdjɛka lowiko lɔso lɔ Okristo la lowango. Andotshi yɛ mbango yekomá tii l’oshidji w’ekomo wangowa lofuto lɔ lowiko l’etshinda. (2 Ti. 4:7, 8) Iso ladjɛ ndjila welo efula djɛ nkindjɛ ndota, pekapeka ladjikɛnde tomboleka nsukana l’oshidji w’ekomo. Ɔpɔstɔlɔ Poolo, kanga loshiyisá lowango lɔnde lá yopo yɛ wɔlɔ, atepelaka kɛnɛ kengotokotshɛ́ djɛ nshiyɛ lowango lɔsɔ. Nde atolakaka djɛ ‘ntshika edjito enkfumɔ . . . , edjinge ndota l’okfumedji okfumɔ lowango lolekɔ́ lá ntondo kɛso.’—Wala Hebero 12:1.

2. Kɛkɔnge kesakisola ‘ntshika edjito enkfumɔ’?

² Winá wɔ Poolo ndatepela ante iso ladjɛ ‘ntshika edjito enkfumɔ,’ ndakɔpɛ ntepela nde ante lako odjito wɔ Okristo oyɛnde ladjɛ mbɛmba? Lako, ikanyi yɛnde itayala nghɔsɔ. Koko, ndakɔpɛ ntepela nde ante iso ladjɛ ntshika edjito enkfumɔ wepalekɔ́ ntshina. Edjito wɛ nghɔsɔ nkoka ntokawoyɛ ɔkɔngɔ edjinge ntɔlɛmbɛ. Djɛ nkfulumeyɛ, iso ladjɛ nangha lankeke djɛ ndjisola edjito wepalekɔ́ la ntshina wɛsɔ la ndatshika mbala kɛkɔ kɛmɔ. Koko, lá winá wɔk’ɔmɔ, topakoke ntshika edjito w’oyɛso ladjɛ mbɛmba. Ntsha tombonangha nghɔsɔ, tokoka ndosamba nkotshɛ kɛnɛ kɛlɔmbama djɛ ndota lowango lɔsɔ. (2 Ti. 2:5) Iya edjito wɛkɔnge w’oyɛso ladjɛ mbɛmba?

3. a) Lá nkilika Ngalatiya 6:5, kɛkɔnge k’oyɛso ladjɛ mbɛmba? b) Kɛkɔnge kɛnaso lɔ lá djamba djɛnɛ, ko lamo?

³ Wala Ngalatiya 6:5. Poolo atepelaka ekete kɛmɔtshi k’oyɛso  ladjɛ mbɛmba. Nde afunaka ante ‘onto l’onto angɔwɛmba odjito wɔnde.’ Poolo atepelaka lanɛ djɛ odjito wolekɔ́ l’onto onkfumɔ lá ntondo kɛ Ndjambe, odjito w’onto oyɛnde ladjɛ mbɛmba. Lá djamba djɛnɛ, tongoshishima edjito w’onto l’onto wɔ l’anteyi kɛso la wopo w’oyɛnde ladjɛ mbɛmba. Lonkina, tɔngɛna edjito wepalekɔ́ la ntshina wɔwɛmbaso la tongeka wopo w’okokaso ndatshika. Mbɛmba edjito w’oyɛso ladjɛ mbɛmba edjinge ntshika edjito wepalekɔ́ la ntshina angotokotshɛ́ djɛ ndota lowango lɔso lɔ lowiko lá yopo yɛ wɔlɔ.

4. Ladjikɛnge ɛlɔkɔ kɛ sananghe kɛ nkambela Yehova lotshinda lotshinda yopalekɔ́ odjito? (Lenda edjinge ntshango.)

⁴ Ɛlɔkɔ kɛso kɛ ndalambola. Winá woyalambolaso te Yehova, iso nanghaka ɛlɔkɔ kɛ ndɔtɛmɔla la nangha ɛkɔpa kɛnde. Iso ladjɛ nkindjɛ nɛmɛyɛ ɛlɔkɔ kɛsɔ. Nɛmɛyɛ ɛlɔkɔ kɛ sananghe djɛ nkambela Yehova alekɔ odjito w’ekekete koko wopalekɔ wolo mbɛmba kana nkotshɛ. Lá nsɔsɔlɔ, Yehova atotongaka djɛ nangha ɛkɔpa kɛnde. (Ndj. 4:11) Nde atotongaka la mposɛ kɛ ndowewa la ndɔtɛmɔla la  atotongaka l’ɛfɔ kɛnde. Eposelo weyɛ masɔ nde, tolekɔ l’akoka wa ndasukanyɛ lande la tolekɔ l’osasa wɔ nangha ɛkɔpa kɛnde. (Yee. 40:8) Lonkina, winá w’onanghaso ɛkɔpa kɛ Ndjambe la w’okilikaso Wɔnande, iso ‘mbaka lokembo.’—Mat. 11:28-30.

5. Kɛkɔnge kekoka nkokotshɛ́ djɛ nkotshɛ ɛlɔkɔ kɛko kɛ ndalambola? (1 Djɔanɛ 5:3)

⁵ Wopo wɔkɔnge w’okokɛ mbɛmba odjito wɔsɔ? Akambo ape wanɛ wakoka nkokotshɛ́. Ntondontondo, kindjɛ nkembɛ ngandji kɛko te Yehova. Wɛ nkoka nangha nkambo djɛsɔ má ntɔnɔlaka l’akambo wa wɔlɔ ankfumɔ wa Yehova ndombokonanghela la lá ɛtshɔkɔ wɛ ndombokowombela l’etsho w’eyaye. Winá wɔ ngandji kɛko yotaleke mfula te Yehova, ndeke yongoleka ndjala wɔdju lewɛ djɛ ndɔlɛmɛyɛ. (Wala 1 Djɔanɛ 5:3.) Dj’ape, okola Yeso. Nde alongaka djɛ nangha ɛkɔpa kɛ Ndjambe ladjikɛnde nde alɔmbaki Yehova okotshɔ la apikaki wiso lá lofuto lɔnde. (Heb. 5:7; 12:2) Etengo Yeso, lɔmbaka Yehova akɔpɛyɛ lokembo edjinge kindjɛ nama nkongi djɛko djɛ lowiko l’etshinda lá yimba. Winá wɔ ngotafudjɛ ngandji kɛko te Ndjambe la w’okolɛ Wɔnande, ongoyala l’akoka wa nkotshɛ ɛlɔkɔ kɛko.

6. Lamo oyɛso ladjɛ nkotshɛ ehomba w’ase nkfumbo kɛso? (Lenda edjinge ntshango.)

⁶ Ehomba w’ase nkfumbo kɛso. Lá lowango lɔso lɔ lowiko, iso ladjɛ nkɔpa Yehova nya Yeso ndeka wopo w’ɔkɔpaso boto djɛso. (Mat. 10:37) Koko, kɛsɔ kepasakisola ente iso ladjɛ nyimɛ yimba m’ehomba w’ase nkfumbo kɛso, má nkanela ente wetokawoyɛ ɔkɔngɔ djɛ sasangɛ Yehova nya Kristo. L’onkoko onkina, dj’iso ndjawolama me Ndjambe la Kristo, iso ladjɛ nkotshɛ edjito wɛso wɛ nkfumbo. (1 Ti. 5:4, 8) Winá w’onanghaso nghɔsɔ, tongoyala l’osasa. Kɛnɛ kelekɔ́ nsɔsɔlɔ nde, djɛ nkfumbo ndjala l’osasa, Yehova ananghaka djɛ wadji la wome nɛmɛyana la nkɔpana, ambotshi nkɔpa la nkfumba wana wawɔ edjinge wana nɛmɛyɛ ambotshi wawɔ.—Ɛfɛ. 5:33; 6:1, 4.

7. Wopo wɔkɔnge w’okokɛ nkotshɛ edjito welekɔ́ la wɛ lá nkfumbo?

⁷ Wopo wɔkɔnge w’okokɛ mbɛmba odjito wɔsɔ? Ayale odjito wɔkɔnge wolekɔ́ lawɛ lá nkfumbo, yawɛkɛ tá balo dj’otanaso lá Bible l’edjena kɛ ndawɛkɛ tá tokanyi tɔko nghɔmɛlɛ, nkfumbo djɛ mbandja kana tá kɛnɛ kɛ ase lomo wel’andja wanɛ okokawɔ ntepela. (Woo. 24:3, 4) Kamba wɔlɔ l’enkanda wɛso wesakisola Bible. Enkanda wɛsɔ welekɔ l’alako wa nsɔsɔlɔ wɛnyɛ wopo wɔ nkamba la tɔkfɔ tɔ Bible. Ndjɔmbɔmba, wamba walekɔ́ l’ɔtɛ wɔ djoyi: “Okotshɔ le nkfumbo” walekɔ l’alako walendana l’ekakasano wepomana l’antshukami, ambotshi, edjinge elangala l’eseka lɔɔko kɛnɛ. b Ɔsa nkano djɛ nkamba la kɛnɛ kɛ Bible otepelande, kaanga ntsha ase nkfumbo ankina wapananghe. Winá w’onanghɛ nghɔsɔ, nkfumbo kɛko kengowa wapɔ edjinge nyongowa ɛtshɔkɔ wɛ Yehova.—1 Pɛ. 3:1, 2.

8. Eposelo wɛkɔnge welekɔ́ l’akano waso leso?

⁸ Odjito welekɔ́ laso m’akano wɔsaso. Yehova atɔpɛyɛka lotshungɔ lɔ nsɔna kɛnɛ k’ɔkɔpaso, la koko nde nkɔpaka iso nsasanga la wapɔ weyɛká má ndɔsa akano wa wɔlɔ. Koko nde apatolamaka m’eposelo weyɛká m’akano wa nyɛtshi. (Nga. 6:7, 8) Djɛkondeke, iso ndjawolaka eposelo weyɛ m’akano wa nyɛtshi, etepela w’ipa la nkanela, la má nanghedji djɛ lopopa lopopa. Má ndenda kɛnɛ kɛ sananghe, tokoka ntshimba yimba ladjikɛnde  nkfum’oloko kɛso kɛtɔwɛmbɛ lowo. Koko, ndjewa ente iso mbɛmbaka odjito w’akano waso nkoka ntotshinda djɛ ndjisola mpekanto yɛso, ndɔngɔsɔla evunga wɛso la ndjewɔ dj’ipa nkalɔ l’evunga wɛkɔ lonkina. Nangha akambo etengo wasɔ nkoka ntokotshɛ́ dj’iso ntshikala lá lowango losɔ lɔ lowiko.

9. Kɛkɔnge k’oyɛ ladjɛ nangha ntsha ɔmbɔsa nkano djɛ nyɛtshi? (Lenda edjinge ntshango.)

⁹ Wopo wɔkɔnge w’oyɛ ladjɛ mbɛmba odjito? Ntsha opakoke ntshikitanyɛ nkano djɛ nyɛtshi djɛ ngɔshi, awola eposelo wembokokomela. Awola ente opatshikitanyɛki akambo wambohetá. Tɔtɛkake ntshutshɛ winá la mpona donga edjinge ndapɛla nghɔmɛlɛ kana mpɛla anto ankina m’ɔtɛ wɔ akano wako wa nyɛtshi. L’edjena kɛ nangha nghɔsɔ, awola evunga wɛko la nangha la wolo djɛ ndjawola akambo wambokokomela winá wɔsɔ. Ntsha nkfum’oloko kɛko kekotshumola m’ɔtɛ w’ovunga ɔmɔtshi wɔ ngananghe, kadjimɔ l’okitshakitshɛ onkfumɔ te Yehova lá lɔlɔmbɔ, awola ovunga wɔko edjinge lɔmbande akimeyɛ. (Yee. 25:11; 51:3, 4) Lɔmba imeyelo le anto wa ngananghela nyɛtshi, la hona okotshɔ wɔ tokokolo kana nkokaka. (Dja. 5:14, 15) Waka elakanyelo má evunga wɛ ngananghe, la nangha la wolo dj’ipa nkfɔ lonkina. Má nangha nghɔsɔ, okoka ndjala l’eshikikelo ente Yehova angokóka nkɛtshi la angɔkɔpɛyɛ osukɔ w’oyɛ la djonyi.—Yee. 103:8-13.

10. Lamo akambo wa sopalekɔ́ l’akoka wa nangha oyɛwɔ odjito w’ekekete? (Ngalatiya 6:4)

¹⁰ Akambo wa sopalekɔ́ l’akoka wa nangha. Iso nkoka ndawɛmbɛ odjito wɔ sopalekɔ́ l’akoka wa mbɛmba winá w’oyawɛdjɛso l’anto ankina. (Wala Ngalatiya 6:4.) Ntsha mbala la mbala iso ndawɛdjɛka l’anto ankina, tokoka ndoyala la leele edjinge la yimba yɛ yamano. (Nga. 5:26) Ntsha tila welo djɛ nangha kɛnɛ kɛ anto ankina yomboshiyɛka nangha, tokoka ndoyatshinda djɛ nangha kɛnɛ kɛ sopalekɔ́ l’akoka wa nangha la kɛpɛlamá la lowiko lɔso. Ntsha ‘nkongi djepakotshama mpɛyɛka paa l’oloko,’ ɔsɔngo songoleka ndɛmba ntsha tohona djɛ nangha akambo wa sopayalaki l’akoka wa nangha lotshinda! (Woo. 13:12) Nangha nghɔsɔ nkoka nkitshakitshɛ wolo wɔso la ntɔlɛmbɛ djɛ ndota lowango lɔso lɔ lowiko.—Woo. 24:10.

11. Kɛkɔnge kekoka nkokotshɛ djɛ ndjewɔ nkanela akambo wa ngopalekɔ́ l’akoka wa nangha?

¹¹ Wopo wɔkɔnge w’okokɛ ntshika odjito wɔsɔ? Tohonake djɛ nangha akambo efula ndeka kɛnɛ kɛ Yehova ɔkɔlɔmbande. Nde apakɔlɔmbaki lotshinda djɛ wɛ mpɛyɛ kɛnɛ kɛ ngopakotshi. (2 Kɔ. 8:12) Yala l’eshikikelo ente Yehova apɛdjɛ kɛnɛ k’onanghɛ la kɛ anto ankina onanghawɔ. (Mat. 25:20-23) Nde angɔsake olemo w’okambelɛ l’anima wako ankfumɔ, nkomano djɛko, l’okfumedji wɔko la ntshina. L’okitshakitshɛ onkfumɔ awola ente ɛnɔnyi wɛko, demba, l’akambo wakokomela nkoka nkilela elelo lá kɛnɛ k’okokɛ nangha winá wɔsɔ. Ngo ngete Barazilai, yala entshupa djɛ ntona edjito ɛmɔtshi ntsha demba kana ɛnɔnyi wɛko wekilela elelo. (2 Sa. 19:35, 36) Ngo ngete Mɔsɛ, awola okotshɔ la pɛyɛ anto ankina edjito ntsha nkokaka. (Epo. 18:21, 22) Okitshakitshɛ wɔ nghɔsɔ wongokoshimba dj’ipa wɛ nkanela akambo wa ngopalekɔ́ l’akoka wa nangha wakoka nkɔlɛmbɛ lá lowango lɔko lɔ lowiko.

12. Tongoyalake ikɔkɔ yɛ akano wa nyɛtshi w’anto ankina ɔsakawɔ? Pakisola.

¹² Mbɛmba odjito w’akano w’anto ankina. Topakoke ndɔsɛla anto ankina akano kana ndalamaka má eposelo wɛ nyɛtshi weyɛ má akano w’ɔsawɔ. Ndjɔmbɔmba, wɔna nkoka ndɔsa nkano djɛ ntshika nkambela Yehova.  Nkano djɛ nghɔsɔ nkoka nkiyanyɛ ambotshi efula. Koko, ambotshi wayapɛlaká m’ɔtɛ wɔ akano wa nyɛtshi wɔsa wana wawɔ ndawɛmbɛká odjito. Ɔsɔ apalekɔ odjito wɔ Yehova alɔmbande dj’iwɔ mbɛmba.—Ɔrɔ. 14:12.

13. Wopo wɔkɔnge ombotshi okokande nkfulumeyɛ nkano djɛ nyɛtshi djɛ wɔnande?

¹³ Wopo w’ɔkɔnge w’okokɛ ntshika odjito wɔsɔ? Ewa ente Yehova atɔpɛyɛka isankfumɔ lotshungɔ lɔ nsɔna kɛnɛ k’ɔkɔpaso. Nde ntshikaka djɛ onto onkfumɔ ndɔsa nkano dj’ɔkɔpande. Ayale kaanga nkano djɛ ndokambela. Yehova ndjewaka ante opalekɔ ombotshi wɔ djɔ, nde nkɔpaka wɛ nangha ngo kɛnɛ k’oyɛ l’akoka wa nangha. Nkano djɛ wɔnako ɔsande oyɛwɔ nde odjito wɔnde, ape wɔko. (Woo. 20:11) Koko, etengo oyɛ ombotshi, okoka nkiyana l’evunga wɛ nghananghe. Ntsha nghɔsɔ, nshimela Yehova wopo woyawokɛ la lɔmbande akimeyɛ. Nde ndjewaka ante opakoke nkawoyɛ etsho wembohetá djɛ ntotshikitanyɛ akambo wananghemisá. Lá winá wɔk’ɔmɔ, nde apakɔlɔmbɛ djɛ nshimba wɔnako dj’ipa nde mvuka kɛnɛ kɛ ndakone. Vungɔka ente ntsha wɔnako ambonangha la wolo djɛ nkalɔ te Yehova, Nde angoyala entshupa djɛ ndolongola.—Luka 15:18-20.

14. Ladjikɛnge ndawɛmbɛ lowo l’indeko oyɛwɔ odjito w’oyɛso ladjɛ ntshika?

¹⁴ Ndawɛmbɛ lowo l’indeko. Winá w’onanghaso mpekanto, lako nyɛtshi iso nkiyana. Koko, ape iso ndawɛmbɛ lowo l’indeko ladjikɛnde ɔsɔ oyɛwɔ nde odjito wɔ sopakoke mbɛmba. Oyɛwɔ nde odjito w’oyɛso ladjɛ ntshika. Wopo wɔkɔnge ewaso ente tomboyawɛmbɛ lowo l’indeko kana tokiyana lá lɛdji l’efula? Ntsha iso nsuyɛ mpekanto yɛso, ndapɛla la nangha kenkfumɔ k’oyɛso ladjɛ nangha dj’ipa nkalɔ lá mpekanto yɛkɔ lonkina, iso nkoka ndjala l’eshikikelo ente Yehova ambotimeyɛ. (Ele. 3:19) M’ɔkɔngɔ w’iso nangha akambo wasɔ, Yehova apakɔpɛ iso nkindjɛ ndawɛmbɛ lowo. Nde ndjewaka ante ntsha tombokindjɛ ndawɛmbɛ lowo tokoka  ndananghela nyɛtshi. (Yee. 31:10) Ntsha tomboleka ndakiyanyɛ, tokoka mpekɔ lowango lɔso lɔ lowiko.—2 Kɔ. 2:7.

15. Kɛkɔnge kengokokotshɛ́ dj’ipa nkindjɛ ndawɛmbɛ lowo l’indeko? (1 Djɔanɛ 3:19, 20) (Lenda edjinge ntshango.)

¹⁵ Wopo wɔkɔnge w’okokɛ ntshika odjito wɔsɔ? Ntsha okindjɛ ndawɛmbɛ lowo, mbɔ ila yimba la ‘imeyelo kɛ nsɔsɔlɔ’ kɛ Ndjambe ɔpɛyɛnde. (Yee. 130:4) Winá w’imeyɛnde onto womboyapɛla lá lɛdji lɔ nsɔsɔlɔ, nde ndakaka ante: ‘Lemi mpangovungɔ mpekanto yɛwɔ lonkina.’ (Jɛr. 31:34) Kɛsɔ nsakisolaka ente Yehova apakanelaka lonkina mpekanto yɛ ndomboshiyɛka nkimeyɛ. Djɛkondeke, tokanelake ente eposelo wɛ nyɛtshi wemá evunga wɛko oyɛwɔ nde ilembelo yɛnyɛ ente Yehova atakimeyɛ. Edjinge toyawomadjɛke ladjikɛnde evunga wɛko wembohetá wekilela elelo lá kɛnɛ k’okokɛ nangha winá wɔsɔ l’olemo wɔ Yehova. Yehova apakindjɛ nkanela evunga wɛko, edjinge wɛ tokanelake.—Wala 1 Djɔanɛ 3:19, 20.

16. Etengo oyɛso andotshi mbango, kɛkɔnge k’oyɛso ladjɛ ndjewa?

¹⁶ Winá wɔ sotalote lowango lɔso lɔ lowiko, iso ladjɛ ‘ndota lá yopo y’okokaso mba lofuto.’ (1 Kɔ. 9:24) Tokoka nangha nghɔsɔ ntsha tombewa otshikitano w’olekɔ́ l’antenyɛ edjito w’oyɛso ladjɛ mbɛmba la w’oyɛso ladjɛ ntshika. Lá djamba djɛnɛ, tombotepelaka ngo ndjɔmbɔmba imangha yɛ edjito w’oyɛso ladjɛ mbɛmba la w’oyɛso ladjɛ ntshika. Koko edjito enkina welekɔ. Yeso atepelaka ante tokoka ‘ndoyala l’odjito má deyi la má nɔyi dj’indeko la má ekiyano welá lowiko.’ (Luka 21:34) Vɛrse djɛnɛ l’ankina nkoka ntokotshɛ́ djɛ ndjewa etshikitano w’okokaso nangha winá wɔ sotalote lowango lɔso lɔ lowiko.

17. Ladjikɛnge okokaso ndjala l’eshikikelo ente tongolonga lá lowango lɔso lɔ lowiko?

¹⁷ Iso nkoka ndjala l’eshikikelo ente tongolonga lá lowango lɔso lɔ lowiko ladjikɛnde Yehova angɔtɔpɛyɛ wolo w’oyɛso la djonyi. (Iza. 40:29-31) Djɛkondeke, tɔlɛmbake! Okola ɔpɔstɔlɔ Poolo, kanga lonanghisá la wolo djɛ mba lofuto loyalaki lá ntondo kɛnde. (Flp. 3:13, 14) Lako onto wongokolotela lowango lɔsɔ, koko m’okotshɔ wɔ Yehova okoka ndonga. Yehova nkoka nkokotshɛ́ djɛ wɛ mbɛmba edjito wɛko edjinge ntshika wɛnɛ wepalekɔ́ la ntshina. (Yee. 68:19) Lá Yehova l’ompandju wɔko, ongoyala l’akoka wa ndota l’onkfumedji onkfumɔ edjinge ndonga!