Weepó w’antangi
Wopo wɔkɔnge djamba djelekɔ́ l’Etange k’Olami kɛ Ngɔndɔ k’asamalo 2020 djelekɔ́ l’ɔtɛ wɔ djoyi ante: “Djiina djɛko djale enkina” ɛnyɛwɔ papoo kɛnɛ k’awo-laso lá kɛnɛ kelendana la djiina djɛ Yehova la lowandji lɔnde?
Lá djamba djɛsɔ, tekaka ente nkambo djeleka djonyi djelendana l’anto ankfumɔ edjinge l’andjelo nde ekinyelo kɛ djiina dj’ekeke djɛ Yehova. Nkambo djelendana la lowandji, ntepela ente wopo wɔ ndɔndjɛ wɔ Yehova ndeke loleka wɔlɔ, alekɔ etenyi k’ekekete kɛ nkambo djeleká djonyi. Wopo wɔk’ɔmɔ ndeke, nkambo djelendana la nkɔmano dj’anto alekɔ etenyi kenkina kɛ nkambo djɛkɔ djeleka djonyi djɛsɔ.
Iya lamo winá wɔsɔ opikaso nghɔmɔ ɛnsɔsɔ ente nkambo djeleká ekekete djɛsɔ ndendanaka la djiina djɛ Yehova edjinge l’ekinyelo kɛnde? Nyontshɔ tokoshishima donga ntshato.
Ntateyɛ má ɔtɔmbɔkwɛlɔ wɔ bedji djɛ Ɛdɛna, Satana akindjɛ ntonghanyeyɛ djiina djɛ Ndjambe
Kɛ ntondo, Satana atepelaka nyɛtshi lá nkambo djɛ djiina djɛ Yehova, kana lokumu lɔnde, lá bedji dj’Ɛdɛna. Nkambo dj’ongolo djɛ Satana ndashimela Eva nde ante Yehova alekɔ Ndjambe kepalekɔ́ la lokapo, la ndjilelaka anto wɔlɔndjɛnde ɛlɛmbɛ wepalekɔ́ l’ekanedji kɛ wɔlɔ. Lá nsɔsɔlɔ, Satana etaka Ndjambe kanga ongolo, má ntepela etepela w’etshikitanyi la wɛ Yehova. Lá lɛdji lɔsɔ nde atonghanyeyɛka djiina djɛ Yehova akambo. Nde akomaka ‘Djabolo,’ djiina djesakisola ente ‘kanga omamanyɛ.’ (Dj. 8:44) Ladjikɛnde Eva awolaka engolo wɛ Satana, nde apendolaka Ndjambe, la watɔmbɔkwɛlaka lowandji lɔnde. (Ewa. 3:1-6) Tii lɔɔko kɛnɛ, Satana atonghanyeyɛ djiina djɛ Ndjambe akambo má ntshanghanyɛ engolo lá nkambo djɛ Lonto lɔ Yehova. Anto wawola engolo wɛsɔ mpendolaka Yehova. Djɛkondeke le enkambi wɛ Ndjambe, ntonghanyeyɛ djiina dj’ekina djɛ Yehova akambo alekɔ nkambo djɛ nyɛtshi efula. Ɔsɔ ndeke elonga k’ekekete k’ɛnaso ndjolo l’akambo wapɔlɔ l’andja.
K’epe, lá wapɔ wɛ ntongami nkfumɔ, Yehova ɔsaka nkano djɛ nsela djiina djɛnde, la djɛ ndɔwɛdjɛ piyɔɔ má emamanyɛ enkfumɔ. Ɔsɔ ndeke nkambo djeleká djonyi le Yehova. Djɛkondeke ndatepela ante: ‘Langokinyɛ djiina djɛmi dj’ekekete.’ (Ezk. 36:23) Edjinge Yeso ɛnyɛka papoo nkambo djeleká djonyi djɛ enkambi wɛ Yehova wɛ nkɔmano enkfumɔ oyɛwɔ ladjɛ ndjilaka lá ndɔmbɔ yɛwɔ winá wɔ ndatepela ante: ‘Djiina djɛko djale ekina.’ (Mat. 6:9) Bible mpikaka nghɔmɔ ɛnsɔsɔ mbala la mbala lá djonyi djɛ numɛ djiina djɛ Yehova. Kolenda ndjɔmbɔmba imangha yɛnɛ: ‘Nyɔpɛyɛ Yehova lomo lɛlama lande.’ (1 Ɛk. 16:29; Yee. 96:8) ‘Nyotshumbe teembo tɔ lomo lá nkambo djɛ djiina djɛnde djɛ lomo. (Yee. 66:2) ‘Lemi langolumɛka djiina djɛko lotshinda lotshinda.’ (Yee. 86:12) Mbala kɛmɔtshi kɛ Yehova ndatepela nyɔmɛlɛ m’olongo, yayalende lá ntɛmpɛlɔ kɛ Jerusalɛmɛ winá wɔ Yeso ndatepela ante: Papa, lumɛ djiina djɛko.’ Ko Yehova akadjimolaka ante: ‘Lemi ndoolumɛka edjinge langoolumɛ lonkina.’—Dj. 12:28. a
K’asato, ikanyi yɛ Yehova ilekɔ la djokanelo la djiina djɛnde, kana lokumu lɔnde. Kokanela: M’ɔkɔngɔ wɔ ohemba w’ekomo wɔngɔlɔndá ɛlɛndjɛlɔ k’ɛnɔnyi kinunu kɛ Kristo, kɛkɔnge kengoheta m’ɔkɔngɔ? Wopo wɔkɔnge andjelo l’anto ankfumɔ yongoka lá kɛnɛ kelendana la djiina djɛ Yehova lá winá wɔsɔ? Djɛ ntokotshɛ́ djɛ nkadjimola lá wopo wɔsɔ, nyontshɔ tokovungola akambo ape walekɔ́ la djokanelo, ntepela ente nkɔmano djɛ anto edjinge lowandji lɔ andja w’otondo. Anto wamboshiyɛka nyɛnyɛ nkɔmano djɛwɔ wangokindjɛ mpomana l’ekakasano w’ilá nkɔmano djɛwɔ l’ohemba? Lako. Iwɔ wangoyala anto wa djɔ wamboshiyɛka mpembama. Wangowa lowiko l’etshinda. Lonkina, apangoyala djonyi djɛ ndjala la tolembetelo tɔngɛnyɛ ntsha yopo yɛ ndɔndjɛ yɛ Yehova ndeke loleka wɔlɔ kana lako. Ladjikɛnde lá winá wɔsɔ, ntongami nkfumɔ djel’olongo la djelá looko wangoyala iwoke imɔ edjinge wangawola lowandji lɔ Yehova. Iya otepelaso mo lá nkambo djɛ djiina djɛ Yehova?
Lá winá wɔsɔ anto wangewa nsɔsɔlɔ lá nkambo djɛ Yehova la djiina djɛnde ngoyala ekina lotshinda lotshinda. Koko, djiina djɛ Yehova ngokindjɛ ndjala nkambo djeleká djonyi le enkambi wɛnde enkfumɔ wel’olongo la welá looko. Lamo? Ladjikɛnde wangɛna Yehova akindjɛ nangha akambo wa nkamɔ. Tokolenda nkambo djɛnɛ: ladjikɛnde l’okitshakitshɛ onkfumɔ Yeso angokawoyɛ lowandji lonkfumɔ te Yehova, Yehova ‘angoyala lá djiko djɛ nkete nkfumɔ.’ (1 Kɔ. 15:28) M’ɔkɔngɔ wɔ lasɔ, anto welá looko wangosasanga la ‘lotshungɔ lɔ lomo lɔ wana wa Ndjambe.’ (Ɔrɔ. 8:21) Edjinge Yehova angokotshɛ daka djɛnde djɛ mandɛlɛ la ndɛdji djɛ nsanghanyɛ ntongami nkfumɔ djɛ balo djel’olongo la djelá looko etengo oloyi ɔmɔ w’ekekete, ntepela ente nkfumbo k’osanga.—Ɛfɛ. 1:10.
Wopo wɔkɔnge nkfumbo kɛ Yehova kel’olongo la kelá looko yongoyawoka m’ɔkɔngɔ wɔ akambo wasɔ nkotshama? Tolekɔ l’elonga kɛ ntepela ente tongoyala la mposɛ k’efula kɛ nkindjɛ numɛ djiina djɛ wɔlɔ efula djɛ Yehova. Ondjombe Davidɛ atshindamaka má nyuma k’ekina djɛ mfuna ante: ‘Yehova Ndjambe alumame . . . Djiina djɛnde djɛ lomo djelumame lotshinda lotshinda.’ (Yee. 72:18, 19) Tongokindjɛ mba donga djɛ bango la djɛ wɔlɔ efula djɛ nangha nkambo djɛsɔ lotshinda lotshinda.
Lá djiko djɛ lasɔ, djiina djɛ Yehova ngɛnyɛka ekete k’enkfumɔ lá nkambo djɛnde. Djiina djɛnde ntovungolaka pekapeka ngandji kɛnde. (1 Dj. 4:8) Tongovungɔka winá enkfumɔ ente Yehova atotongaka má ngandji, afutaka oshinga wɔ mbendo má ngandji, la ɛnyɛka ante wopo wɔnde wɔ ndɔndjɛ wolekɔ sii má ngandji. Koko tongokindjɛ nyɛna wopo wɔ Yehova ɛnyɛnde ntongami djɛnde ngandji. Tongotshindamaka djɛ ndeka ndasukanyɛ lande etengo oyɛnde Papa kɛso la djɛ tshumbelaka djiina djɛnde djɛ lomo teembo tɔ lomo etshinda etshinda.—Yee. 73:28.
