1. Wopo wɔkɔnge w’oyɛso ladjɛ ndɔsa mbamba k’okotshɛso kɛ ndɔmbaka Yehova?

 TOWAKA mpeyi k’ekekete la kɛ wɔlɔ efula, kɛ ndasukanyɛka l’Ontongi w’olongo la looko má lɔlɔmbɔ. Kokanela nkambo djɛnɛ: Iso nkoka ndjipola Yehova oloko wɔso lá winá onkfumɔ, otepela onkfumɔ, ipa ndjala la djonyi djɛ ndjokana lande winá kana lofu. Iso nkoka ndɔɔlɔmba kaanga lá mbeto k’opitalo kana lá mvulu kɛ lokando, l’eshikikelo kenkfumɔ ente Papa kɛso kɛ ngandji angotoka. Iso ndɔsaka mpeyi kɛsɔ la ntshina efula.

2. Wopo wɔkɔnge Nkfumi Davidɛ ndɛɛnyɛ ante nde ɔsaki mpeyi k’okotshɛnde kɛ ndɔmba Yehova la ntshina efula?

² Nkfumi Davidɛ ɔsaki lɔlɔmbɔ la ntshina efula. Nde atshumbelaka Yehova ante: ‘Lɔlɔmbɔ lɔmi loyale etengo mbele kɛmbɔlɔngɔswamá lá ntondo kɛko.’ (Yee. 141:1, 2) L’etsho wɛ Davidɛ, mbele k’ekina kɛ ankfundji yakambaka la kɛkɔ l’ɔtɛmwɛlɔ wɔ nsɔsɔlɔ kalɔngɔswamaki wɔlɔ efula. (Epo. 30:34, 35) Wopo wɔ Davidɛ ndatepela nkambo djɛ mbele nyɛnyɛka ente nde akanelaki lá ntondo kɛnɛ kɛ ndakɔpaka nshimela Papa kɛnde kel’olongo, ngo ngete wanɛ walɔngɔsɔlaki mbele iyananghaka la nkɔmɛ nkfumɔ. Ɔsɔ ndeke nsaki kɛ m’anse k’oloko kelekɔ́ edjinge laso. Iso nkombolaka djɛ alɔmbɛlɔ waso nsasangɛ Yehova.

3. Enanghedji kɛkɔnge k’oyɛso ladjɛ ndjala la kɛkɔ winá w’osukanaso la Yehova má lɔlɔmbɔ, ko lamo?

³ Winá wɔlɔmbaso Yehova, iso ladjɛ ndjewɔ djokanelo dj’indeko iso lande. Koko, iso ladjɛ ndɔlɔmbaka la dilɛmɛlɔ dj’efula. Tokokanela ndambo lá wɛnɛlɔ wɛ nkamɔ wɛ Izaya, Ezekiyɛlɛ, Danyɛlɛ, la Djɔanɛ iyɛnyi. Wɛnɛlɔ wɛsɔ ntshikitana, koko welekɔ la nkambo mɔtshi djɛ fɛna. Wɛnɛlɔ wɛkɔ enkfumɔ nyɛnyɛka  ente Yehova alekɔ Nkfumi kɛ lomo efula. Izaya ‘ɛnaka Yehova ambintansɛ lá Yɛɛkɔ yɛ lowandji yelá djiko la yémbosangɔ́.’ (Iza. 6:1-3) Ezekiyɛlɛ ɛnaka Yehova ambintasɛ lá pusupusu kɛndɛ kel’olongo, kembodjinghamá la ‘nghayinghayi . . . etengo kɛ ngolo.’ (Ezk. 1:26-28) Danyɛlɛ ɛnaka ‘Nkɔlɔma k’Etsho’ ndɔta ntshendja djɛ mpɛmbɛ, edjinge ndjombe yɛ tɔyɛ yaposaki má yɛɛkɔ yɛnde. (Dan. 7:9, 10) Edjinge Djɔanɛ ɛnaka Yehova ambintansɛ lá yɛɛkɔ yɛ lowandji yembodjingamá l’ekete kɛmɔtshi kɛ wɔlɔ efula k’etengo ngolo kɛ washi w’iyɛshi k’etengo emerɔdɛ. (Ndj. 4:2-4) Winá w’okanelaso lá lomo lɔ Yehova lipa wɔs’ɔdjɔmba, iso mvungɔka mpɛyi ketshikitanyi k’okotshɛso kɛ ndasukanyɛ tende má lɔlɔmbɔ edjinge djonyi djɛ nangha nkambo djɛsɔ la dilɛmɛlɔ dj’efula. Ko akambo wakɔna w’oyɛso ladjɛ ndɔmbaka?

4. Olakanyelo wɔkɔnge wowaso má etepela w’ewangelo welá lɔlɔmbɔ lɔ ndjɔmbɔmba lotanaso lá Mateo 6:9, 10?

⁴ Wala Mateo 6:9, 10. Lá Djamba djɛnde djel’Onkókó, Yeso alakanyɛka ambeki wande wopo wɔ ndɔmbaka lá yopo yesasangɛ Ndjambe. M’ɔkɔngɔ wɔ nde ntepela ante ‘nyɔngɔlɔmbake nghɔnɛ ente,’ Yeso awalaka akambo waleká djonyi walekɔ́ mbala kɛkɔ kɛmɔ la djokanelo l’ikanyi yɛ Yehova: Ekinyelo kɛ djiina djɛnde, oyelo w’Onkfumi wongotshitá antonyi wa Ndjambe ankfumɔ, la ɛtshɔkɔ wel’etsho weyaye wolamande lá wɔɔngɔ lá nkambo djɛ looko la djɛ anto. Má ndjilaka akambo wasɔ lá alɔmbɛlɔ waso, iso nyɛnyɛka ente ɛkɔpa kɛ Ndjambe kelekɔ djonyi leso.

5. Alekɔ wɔlɔ ndɔmbaka Yehova lá nkambo dj’ehomba wɛso isɔmɛlɛ?

⁵ L’etenyi kenkina kɛ lɔlɔmbɔ lɔkɔ, Yeso ɛnyɛka ante alekɔ djonyi ndɔmbaka lá nkambo dj’ehomba wɛso isɔmɛlɛ. Iso nkoka ndɔmba Yehova djɛ ntɔpɛyɛ nkete djɛ ndɛ djɛ lofu, ntimeyɛ evunga wɛso, ntolama m’ehemba, la ntotshungola me onto wɔ pɔlɔ. (Mat. 6:11-13) Winá w’ɔlɔmbaso Yehova nkete djɛsɔ, iso nyɛnyɛka ente owikaso ngo me nde la lonkina iso nyɛnyɛka ente tolekɔ́ la mposɛ kɛ ndjawolamá me nde.

6. Ngo akambo w’owalawɔ lá lɔlɔmbɔ lɔ ndjɔmbɔmba toko ndeke oyɛso ladjɛ ndɔmbaka? Pakisola.

⁶ Yeso atákɔpá djɛ ambeki wande ndjokola etepela welá lɔlɔmbɔ lɔsɔ ngo wopo w’oyɛwɔ.  Lá ndɔmbɔ inkina yɛ Yeso, nde atepelaka akambo ankina wayalisá djonyi lende lá winá wɔsɔ. (Mat. 26:39, 42; Dj. 17:1-26) Wopo wɔk’ɔmɔ ndeke, iso nkoka ndɔmba lá kɛnɛ kelendana la nkambo nkfumɔ djetokiyanyɛ. Winá wɔkɔpaso ndɔsa nkano, iso nkoka ndɔmba djɛ mba djanya la balo. (Yee. 119:33, 34) Winá w’ɔkɔpaso mbanga l’odjito ɔmɔtshi wɔ wolo, iso nkoka ndɔmba djɛ mba akoka wa ndjewa nkotshɛ odjito wɔkɔ. (Woo. 2:6) Ambotshi nkoka ndɔmbɛla wana wawɔ, wana nkoka ndɔmbɛla ambotshi wawɔ, edjinge isankfumɔ ladjɛ ndɔmbɛlaka ambeki waso wa Bible l’anto ankina w’opoposanyɛso lewɔ. Koko lá nsɔsɔlɔ, topakoke nkoma ngo lá ndɔmbaka Yehova okotshɔ toko.

7. Lamo oyɛso ladjɛ numɛka Yehova lá ndɔmbɔ yɛso?

⁷ Iso ladjɛ mvungɔka djɛ numɛ Yehova lá alɔmbɛlɔ waso. Lako onto wɛlama mba lomo ko ndeka Ndjambe kɛso. Nde alekɔ ‘wɔlɔ la entshupa djɛ nyimeyɛ.’ Nde alekɔ lonkina ‘lokana djandji la lokana nkɛtshi, apomalaka la nkeke, ndola tɔɔ la ngandji kɛ nkɔmano edjinge la nkɔmano.’ (Yee. 86:5, 15) Tolekɔ nsɔsɔlɔ la donga djɛ wɔlɔ djɛ numɛ Yehova lá kɛnɛ k’oyɛnde la lá kɛnɛ k’onanghande.

8. Lá akambo amɔtshi wakɔnge w’okokaso nkawoyɛka Yehova lokasa? (Yeembo 104:12-15, 24)

⁸ Má djiko djɛ numɛ Yehova lá ndɔmbɔ yɛso, iso ntshindamaka lonkina djɛ ndokawoyɛ lokasa lá nkete djɛ wɔlɔ dj’indananghe. Ndjɔmbɔmba, iso nkokaka ndokawoyɛ lokasa lá nkambo djɛ wa kulɛrɛ yɛ wɔlɔ efula yɛnaso lá ansoso, djɛ efula kɛ nkete djɛ ndɛ djetshikitanyi djɛ wɔlɔ lomombe, la djɛ tolongo tɔso tɔ wɔlɔ efula tɔtɔpɛyɛka osasa. Papa kɛso kɛ ngandji ntɔpɛyɛka nkete djɛsɔ la nkete nkina efula, ngo dj’iso ndjala l’osasa. (Wala Yeembo 104:12-15, 24.) Nkambo deka djonyi nde, iso nkawoyɛka Yehova lokasa efula lá nkambo djɛ nkete djɛ ndɛ lombombe djelá nyuma dj’ɔtɔpɛyɛnde la nkambo djɛ nkongi djɛso djɛ wɔlɔ efula djelendana l’etsho weyaye.

9. Kɛkɔnge kekoka ntokotshɛ́ djɛ mvungɔka nkawoyɛka Yehova lokasa? (1 Tesalɔnikɛ 5:17, 18)

⁹ Nkoka ndjala wɔdju mvungɛ nkawoyɛ Yehova lokasa lá akambo ankfumɔ w’otonanghelande. Kɛkɔnge kekoka nkokotshɛ́ djɛ wɛ  mvungɔka? Wɛ nkoka nangha listɛ lɔ akambo amɔtshi wa djonyi wa ngalɔmbɛ Yehova edjinge ndendaka mbala la mbala wopo wɔ Yehova ndakokadjimola. Masɔ kawoyɛnde lokasa m’okotshɔ wɔnde. (Wala 1 Tesalɔnikɛ 5:17, 18.) Kɔtɔnɔla lá nkambo djɛnɛ: Iso ndjalaka l’osasa efula winá wɔ anto ankina ɛnyɛwɔ djedjɛ djɛwɔ teso lá kɛnɛ k’isananghela. Wopo wɔk’ɔmɔ ndeke winá w’ovungɔso djɛ nkawoyɛ Yehova lokasa lá nkambo djɛ ndɔmbɔ yɛso y’okadjimolande, nkambo djɛsɔ nsasangɛka oloko wɔnde. (Kɔl. 3:15) Nkambo nkina djɛkɔnge djɛ djonyi djoyɛso ladjɛ nkawoyɛka Ndjambe lokasa?

10. Lá nkilika 1 Pɛtɛlɔ 2:21, lamo oyɛso ladjɛ nkawoyɛka Yehova lokasa lá wopo wɔ ndatome Yeso lá looko?

¹⁰ Wala 1 Pɛtɛlɔ 2:21. Iso ladjɛ nkawoyɛka Yehova lokasa lá wopo wɔ ndatome Wɔnande wɔ ngandji djɛ ndotolakanyɛ. Iso ndjekaka akambo efula walendana la Yehova edjinge wopo wɔ ndoosasangɛ má ndjeka lowiko lɔ Yeso. Ntsha tomboyala la djawo t’olambo wɔ Kristo, iso nkoka ndjala la djokanelo djɛ wɔlɔ, la djɛ ma ma iso la Yehova Ndjambe la ndjala vu la nde.​—Ɔrɔ. 5:1.

11. Odjito wɔkɔnge wolekɔ́ la Yeso lá alɔmbɛlɔ waso te Yehova?

¹¹ Iso nkawoyɛka Yehova lokasa ladjikɛnde iso nkoka ndɔlɔmba má lotshimbo lɔ Wɔnande. Yeso alekɔ epeko kekambá la Yehova djɛ nkadjimola ndɔmbɔ yɛso. Yehova ndjekameyɛka la nkadjimolaka ndɔmbɔ y’ɔlɔmbaso lá djiina djɛ Yeso. Yeso apakisolaka ante: ‘Kenkfumɔ kɛ nyɔngɔlɔmbaka lá djiina djɛmi, lemi langonangha, djɛ Papa numɛma má lotshimbo lɔ Wɔna.’​—Dj. 14:13, 14.

12. Elonga kenkina kɛkɔnge k’oyɛso ladjɛ nkawoyɛ Yehova lokasa lá nkambo djɛ Wɔnande?

¹² Yehova ntimeyɛka mpekanto yɛso má olambo w’oshinga wɔ mbendo wɔ Yeso. Afunelo nyɛnyɛka djɛ Yeso alekɔ ‘nkfundji kɛso k’ekekete k’intasɛ lá womɛ lɔwɔ lɔ yɛɛkɔ yɛ lowandji yɛ Lapamela lel’olongo.’ (Heb. 8:1) Yeso alekɔ ‘okotshɔ wɔso wolekɔ́ esanga la Papa kɛso.’ (1 Dj. 2:1) Tolekɔ la djedjɛ efula te Yehova lá wopo wɔ ndatɔpɛyɛ Nkfundji k’Ekekete kokana nkɛtshi, kesipisoyɛ wɛdju wɛso la ‘kɛtɔlɔmbɛlaka’! (Ɔrɔ. 8:34; Heb. 4:15) Tolekɔ anto wa ntshamba djɛ djɔ, djɛkondeke ipa l’olambo wɔ Yeso totasamba ndjala l’akoka wa ndasukanyɛ la Yehova má lɔlɔmbɔ. Ape l’ehamo, wɛ ndjawolaka ente lako ekete k’okokaso mpɛyɛ Yehova djɛ ndɔwɛnyɛ djedjɛ djɛso kekoka ndjɛlama la opapɛyɛ wɔ ntshina efula wɔ ndatɔpɛyɛ, ntepela ente opapɛyɛ wɔ Wɔnande wɔ ngandji!

13. L’otsho wɔ lá ntondo kɛ nyɔyi kɛnde, wopo wɔkɔnge Yeso ndɛnyɛ ante nde nkɔpaka ambeki wande?

¹³ L’otsho wɔ lá ntondo kɛ nyɔyi kɛnde, Yeso alɔmbaka ilá efula lá nkambo dj’ambeki wande, djɛ Papa kɛnde ‘ndaalama me onto wɔ pɔlɔ.’ (Dj. 17:15) Ɔsɔngo ngandji kɛ Yeso ndawokaka! Kaanga ndewaka ante lak’ilá, nde akɔpa nyɛna ndjolo l’ohemba wɔ wolo efula, nde ayakiyanyɛka lá nkambo djɛ apɔstɔlɔ wande.

14. Wopo wɔkɔnge w’okokaso nyɛnyɛ ente iso nkɔpaka wananyɔ l’ankaana yɛso?

¹⁴ Lá ndjɔmbɔmba kɛ Yeso, topakoke ndakiyanyɛka ngo lá nkambo dj’ehomba wɛso toko. Koko, iso ladjɛ ndɔmbaka mbala la mbala lá nkambo djɛ wananyɔ l’ankaana yɛso. Winá wonanghaso nghɔsɔ, iso nɛmɛyɛka ɔlɛmbɛ wɔ Yeso wɔ nkɔpanaka l’anteyi kɛso, la nyɛnyɛka Yehova ente iso nkɔpaka wananyɔ l’ankaana yɛso efula. (Dj. 13:34) Ndɔmba lá nkambo djɛ  wananyɔ l’ankaana yɛso apalekɔ wetshelo wɔ winá. Otepela wɔ Ndjambe ntoshimelaka ante ‘ɔwɔndɔwɔndɔ w’onto wɔ wɔlɔ wolekɔ l’eposelo wɛ wolo.’​—Dja. 5:16.

15. Lamo winaso andjawodji oyɛwɔ la djonyi dj’iso ndalɔmbɛla?

¹⁵ Winaso andjawodji walekɔ la djonyi djɛ iso ndalɔmbɛla ladjikɛnde wapomana l’ekakasano efula. Iso nkoka ndɔmba Yehova djɛ ndakotshɛ́ djɛ nkfulumeyɛ elando, mbalaka yeyɛ má nkete dj’etongamisá, ambandji, onanyelo kana ekakasano enkina. Iso nkoka ndɔmba lonkina lá nkambo djɛ wananyɔ l’ankaana yɛso wayapɛyɛ l’ɛkɔpa djɛ ntosuká wanɛ walekɔ l’osambo. Mbala imɔtshi wɛ ndjewaka anto wapomana l’ekakasano wɛ nghɔsɔ. Lamo ngopalumola wiina wawɔ lá ndɔmbɔ yɛko? Iso nyɛnyɛka ngandji kɛ nsɔsɔlɔ te wananyɔ l’ankaana yɛso má ndɔmbaka Yehova djɛ ndaakotshɛ́ dj’iwɔ nkfulumeyɛ.

16. Lamo oyɛso ladjɛ ndɔmbɛlaka wanɛ watɔlɔndjɛ?

¹⁶ Wanɛ walɔndjɛ otshumano ndjalaka la djedjɛ efula winá w’anto ankina alɔmbɛlawɔ edjinge alɔmbɛlɔ wakɔ ndaakotshɛka efula. Nghɔsɔ ndeke yayale kaanga le ɔpɔstɔlɔ Poolo. Nde afunaka ante: ‘Nyɔlɔmbake edjinge lá nkambo djɛmi, djɛ lemi mba etepela winá w’odjipolami ɔlɔmɔ, djɛ lemi ndjala l’akoka wa ntepela l’oloko wolo winá w’ewoyɛmi iseke y’ekina yɛ losango lɔ wɔlɔ.’ (Ɛfɛ. 6:19) Lɔɔko kɛnɛ, tolekɔ la wananyɔ watɔlɔndjɛ, wakamba olemo wɔ wolo efula l’anteyi kɛso. Iso nyɛnyɛka ente iso ndaakɔpaka má ndɔmbaka Yehova djɛ nde ntshɔkɔla olemo wɔwɔ.

17-18. Lá mbamba imɔtshi yɛkɔnge okokawɔ ntɔlɔmba djɛ ndɔmba lá ntondo k’anto ankina, ko kɛkɔnge k’oyɛso ladjɛ namaka lá wɔɔngɔ?

¹⁷ Lá mbamba imɔtshi, iwɔ ntɔlɔmbaka djɛ ndɔmba lá ntondo k’anto ankina. Ndjɔmbɔmba, nkaana kɛmɔtshi keka ny’ombeki wɔ Bible nkoka nshimela nkaana ketshwisa nyande djɛ ndɔmba. Mbala imɔtshi nkaana ketshwisa nyande kɛsɔ, apalembetela ombeki wɔlɔwɔlɔ djɛkondeke nde nkoka nkombola djɛ ndɔlɔmba l’ekomo kɛ wekelo. Lá lɛdji lɔsɔ, nkoka ndjala wɔdju lende djɛ ndjokanyɛ ehomba w’ombeki la lɔlɔmbɔ lɔnde.

¹⁸ Iwɔ nkoka ndɔmba wɔnanyɔ ɔmɔtshi djɛ ndɔmba lá losanghanyɛ l’olemo w’ipoposanyɛ  kana lá losanghanyɛ l’otshumano. Wɔnanyɔ wombowá mpeyi kɛsɔ ladjɛ nama lá wɔɔngɔ okoma wɔ losanghanyɛ. Lɔlɔmbɔ apalekɔ mbamba kɛ mpɛyɛ otshumano alako kana kɛ ndjewoyɛ akambo amɔtshi. Lá nsanghanyɛ efula y’otshumano ngo minitɛ itano ndeke ɔpɛyɛkawɔ lá nkambo djɛ yeembo la djɛ lɔlɔmbɔ, djɛkondeke wɔnanyɔ wɔpɛyɛwɔ odjito wɔ ndɔmba, apakoke nkamba ‘l’etepela efula,’ pekapeka má bango djɛ losanghanyɛ.​—Mat. 6:7.

19. Kɛkɔnge kengotokotshɛ́ djɛ ndjala entshupa lá lofu lɔ dombo djɛ Yehova?

¹⁹ Iso ladjɛ ndɔsa dɔmbɛlɔ etengo ekete keleka djonyi lá lowiko lɔso winá wɔ sotasukana tá lofu lɔ dombo djɛ Yehova. Lá nkambo djɛsɔ, Yeso atepelaka ante: ‘Djɛkondeke, nyowadjɛke la nyɔlɔmbake l’ɔwɔndɔwɔndɔ winá enkfumɔ djɛ nyo ndowa ewiko l’akambo ankfumɔ wasɔ wangonanghemá.’ (Luka 21:36) Ee, ndɔmbɔ yɛ l’entete ingotokotshɛ djɛ nkindjɛ mbadjɛ lá nyuma dj’ipa lofu lɔ Ndjambe ndotokomela l’isasimoyɛ.

20. Wopo wɔkɔnge alɔmbɛlɔ waso okokawɔ ndjala etengo mbele kɛ nsolo mpimbo?

²⁰ Sombeka nge? Iso ndɔsaka mpeyi kɛso kɛ ndɔmba la ntshina efula. Akambo waleká djonyi w’oyɛso ladjɛ ndɔmbaka nde akambo walekɔ́ la djokanelo mbala kɛkɔ kɛmɔ la ikanyi yɛ Yehova. Iso nkawoyɛka Ndjambe lokasa lonkina lá nkambo djɛ Wɔnande, djɛ Onkfumi wɔnde wɔlɔndjɛ la iso ndɔmbɛlaka winaso andjawodji. Edjinge ape l’ehamo, iso nkokaka ndɔmba lá nkambo dj’ehomba wɛso welá demba la welá nyuma. Winá wɔtɔnɔlaso la nkɔmɛ nkfumɔ lá kɛnɛ k’ɔkɔpaso ntepela lá ndɔmbɔ yɛso, iso nyɛnyɛka ente iso ndɔsaka mpeyi kɛ lɔlɔmbɔ la ntshina efula. Etepela wɛso wengoyala etengo mbele kɛ nsolo mpimbo lá ntondo kɛ Yehova, ntepela ente ‘wengoosasangɛ.’​—Woo. 15:8.