1. Eshikikelo kɛkɔnge k’okotshɛso, ko lamo?

 WINÁ w’ɛnɛ akambo waheta l’andja wanɛ, ongoyalake l’okakasano wɔ ndjawola ente akambo wangɔwɔnga lofu lɔmɔtshi? Djokanelo dj’ase nkfumbo djetatshitana. Anto wamboleka ndapɛyɛ lá wayi wa lopango, wamboleka ndjala lokaki edjinge enkonda. Efula k’anto walekɔ l’okakasano wɔ ndawɛkɛ te wanɛ walekɔ́ la lowandji. Koko akambo wasɔ nkoka nkoshikikɛ djɛ akambo wangɔwɔnga. Lamo? Ladjikɛnde anto wanangha ngo akambo wa prɔfɛsi kɛmɔtshi ndewoyɛ lá kɛnɛ kelendana ‘l’etsho w’ekomo.’ (2 Ti. 3:1-5) Ekotshamelo kɛ prɔfɛsi kɛsɔ kɛ onto onkfumɔ wolekɔ́ l’oloko wɔlɔ ndopakoke nyanghana ante kekotshama, kelekɔ ilembetelo yetoshikikɛ ente Kristo Yeso ambowanga ndɔndjɛ etengo Nkfumi k’Onkfumi wɔ Ndjambe. Koko ɔsɔ alekɔ ngo prɔfɛsi kɛmɔ l’anteyi kɛ prɔfɛsi efula yelendana l’Onkfumi. Tongokembɛ djawo djɛso efula má nshishima prɔfɛsi inkina yembokotshama l’ɛnɔnyi emangha wemboheta wɛnɛ.

2. Kɛkɔnge kɛ songoshishima lá djamba djɛnɛ, ko lamo? (Nsakiso kɛ ntshango djelá loposo.)

² Lá djamba djɛnɛ, tongoshishima nkambo djɛ ntondo 1) prɔfɛsi ketokotshɛ́ djɛ ndjewa winá wɔ Onkfumi iyatateyɛ ndɔndjɛ, 2) prɔfɛsi yetokotshɛ́ djɛ ndjawola ente Yeso ambotateyɛká ndɔndjɛ etengo Nkfumi k’Onfumi wɔ Ndjambe 3) prɔfɛsi yɛnyɛ wopo wɔ antonyi w’Onkfumi wɔ Ndjambe yongotshitana. Ngo ngete tayɛrɛ osanghanyɛkande ntatshi djɛ ntshendja djetshikitanyi djɛ mposɛ esendja kɛ sɔmbasɔmba, prɔfɛsi yetshikitanyi yɔkɔpaso nshishima yengotokotshɛ djɛ nsipisoyɛ papoo lampe oyɛso lá kɛnɛ kelendana la kalandriye kɛ Yehova.

3. Eshikikelo kɛkɔnge prɔfɛsi k’otanaso lá Danyɛlɛ 7:13, 14 ɔtɔpɛyɛnde lá kɛnɛ kelendana la Nkfumi k’Onkfumi wɔ Ndjambe?

³ Prɔfɛsi k’otanaso lá Danyɛlɛ 7:13, 14 ntoshikikɛka ante Kristo Yeso angoyala Ndɔndji kɛ wɔlɔ efula k’Onkfumi wɔ Ndjambe. Anto welá ewila enkfumɔ ‘wangookambela’ edjinge lako kaanga Ndɔndji kɛngɔhɛna. Prɔfɛsi kenkina kelá onkanda wɔ Danyɛlɛ kewoyɛka ante Yeso angɔlɔndjɛ l’Onkfumi wɔnde l’ekomo kɛ deko esambele djɛ prɔfɛsi. Iso nkokaka ndjewa winá wɔ nkambo dj’osasa djɛsɔ yananghema?

4. Kosipisoyɛ wopo wɔ Danyɛlɛ 4:10-17 otokotshɛnde djɛ ndjewa ɔnɔnyi wɔ Kristo ndakome Owandji. (Lenda nɔtɛ.)

⁴ Wala Danyɛlɛ 4:10-17. ‘Deko esambele’ alekɔ djingingi djɛ eleko kelekɔ́ l’ɛnɔnyi 2 520. Eleko kɛsɔ kewangaka lá 607 N.D.D. winá wɔ ase Babilɔnɛ iyimɛ nkfumi k’ekomo kelá Jerusalɛmɛ má yɛɛkɔ yɛ lowandji yɛ Yehova. Eleko kɛsɔ keshilaka lá 1914 D.D. winá wɔ Yehova ndile Yeso, ‘kanga lolekɔ́ la lotshungɔ lá nkilika ɛlɛmbɛ,’ Nkfumi kɛ Onkfumi wɔ Ndjambe. *​—Ezk. 21:25-27.

5. Wapɔ wɔkɔnge w’okokaso mba má nsipisoyɛ prɔfɛsi kɛ ‘deko esambele’?

⁵ Wapɔ wɔkɔnge w’okokaso mba má nsipisoyɛ prɔfɛsi kɛsɔ? Nsipisoyɛ prɔfɛsi kɛ ‘deko esambele’ ntokotshɛka djɛ ndjala l’eshikikelo ente Yehova nkotshɛka alaka wande ngo lá winá wɔ wɔlɔ. Ngo ngete ndashikikɛ eleko kɛ kɔɔ kɛ Onkfumi wɔnde yayale ladjɛ ndɔndjɛ, nde anghonangha lonkina djɛ prɔfɛsi inkina nkotshama ngo lá winá wɔ ndashikikɛ. Ee, lofu lɔ Yehova ‘lopangotshatshimba!’​—Aba. 2:3.

6. a) Tolembetelo tɔkɔnge tɛnyɛ ente Kristo alɔndjɛ l’olongo? b) Wopo wɔkɔnge prɔfɛsi k’otanaso lá Ndjiso 6:2-8 oshikikɛwɔ akambo wasɔ?

⁶ T’ekomo k’olemo wɔnde lanɛ lá looko, Yeso ewoyɛka akambo amɔtshi wanghonanghemá l’andja w’otondo wangokotshɛ́ ambeki wande djɛ ndjewa ntsha nde ambotateyɛ ndɔndjɛ l’olongo. Akambo amɔtshi wa ndatepela nde, ndjala, ambandji edjinge atshikito wa looko. Nde ewoyɛka lonkina ante elando kana epela wengoyala ‘lá ndjena la ndjena,’ opela wɔ COVID-19 alekɔ ndjɔmbɔmba kɛmɔtshi. Akambo wasɔ walekɔ l’anteyi kɛ ‘ilembetelo’ yɛ Bible etande ante ɛnamelo kɛ Kristo. (Mat. 24:3, 7; Luka 21:7, 10, 11) Ɛnɔnyi ndekana 60 m’ɔkɔngɔ wɔ nyɔyi kɛnde la okalo wɔnde t’olongo, Yeso apɛyɛka ɔpɔstɔlɔ Djɔanɛ eshikikelo k’ɛnyɛ ente akambo wasɔ wangokotshama. (Wala Ndjiso 6:2-8.) Akambo ankfumɔ wasɔ wakotshamaka winá wɔ Yeso ndakome Nkfumi lá 1914.

7. Lamo ndjolo yayale efula lá looko winá wɔ Yeso ndakome Nkfumi?

⁷ Lamo akambo wel’andja wanɛ yaleke ntshitana winá wɔ Yeso ndakome Nkfumi? Ndjiso 6:2 nyɛnyɛka nkambo mɔtshi djɛ ndjonyi. Nkambo djɛ ntondo djɛ Yeso ndananghe winá wɔ ndakome Nkfumi nde, nana mbandji. Ndanane nyana? Nya Djabolo la ɛdjɛngɛ wɛnde. Lá nkilika Ndjiso shapitrɛ 12, Satana atalonga lá mbandji, lasɔ nde nya ɛdjɛngɛ wɛnde wahɔnywamaka tá looko. Eposelo weyalisá nde, ‘ndjolo yeyalaka lá looko’ ladjikɛnde Satana ayalaka la nkɛlɛ k’efula edjinge atateyɛka nyɛnyɛ anto ndjolo.​—Ndj. 12:7-12.

8. Wapɔ wɔkɔnge w’okokaso mba winá w’ɛnaso prɔfɛsi yelendana l’Onkfumi yekotshama?

⁸ Wapɔ wɔkɔnge w’okokaso mba má prɔfɛsi yɛsɔ? Etengo sɛnaki má djiko, nyɛna  otshikitano wɔ djalelo dj’anto atokotshɛ́ka djɛ ndjewa ente Yeso ambokoma Nkfumi. Djɛkondeke, l’edjena kɛ ndakiyanyɛ winá w’ɛnaso anto wanangha akambo la lokaki edjinge la lopango, iso mvungɔka ente nanghedji djɛwɔ okotshɛwɔ nde prɔfɛsi yelá Bible. Onkfumi wɔlɔndjɛ! (Yee. 37:1) Edjinge tewe ente akambo wa pɔlɔ wel’andja wanɛ wangoleka mfula winá wɔ Armangɛdɔ yotaleke ndjala entshupa. (Mar. 13:8; 2 Ti. 3:13) Opalekɔ la djedjɛ te Papa kɛso kɛ ngandji kel’olongo lá wopo wotokotshɛ́nde djɛ nsipisoyɛ lamo ekakasano oyɛwɔ efula l’andja?

9. Prɔfɛsi kelekɔ́ la Danyɛlɛ 2:28, 31-35 otepelande nge lá nkambo dj’Onkfumi w’ekomo wel’andja w’otondo, ko winá wɔkɔnge yayale ladjɛ nyɛnama?

⁹ Wala Danyɛlɛ 2:28, 31-35. Tɛna prɔfɛsi kɛnɛ yotakotshamá lɔɔko kɛnɛ. Dɔ djɛ Nɛbukadinezara dj’ɛnyɛki kɛnɛ kengonanghemá ‘l’etenyi k’ekomo kɛ mfu,’ m’ɔkɔngɔ wɔ Kristo ntateyɛ ndɔndjɛ. L’anteyi kɛ atonyi wa Yeso welá looko, ndeke lolekɔ́ edjinge onkfumi w’ekomo woleka wolo l’andja w’otondo wɔ Bible ndewoyɛ, wolekɔ́ djingingi djɛ akaka w’isakandole wakfumbamisá ‘ndambo la lowolo ndambo la bomba.’ Onkfumi wɔlɔndjɛ andja w’otondo wɔsɔ womboshiyɛká nyɛnama. Wotateyɛka ndɔndjɛ lá Mbandji kɛ ntondo kel’andja w’otondo winá wɔ Grande-Brétagne l’États-Unis yananghe isambi djɛ mposɛ osanga wɔ Amɛrikɛ l’Anglɛtɛrɛ. Isakandole yɛ Nɛbukadinezara ndɛnyi lá dɔ yɛsɔ yewoyɛki lonkina akambo ape watshikitanyɛ onkfumi wɔlɔndjɛ l’andja w’otondo wɔsɔ la enkfumi enkina wɛlɔndjisá ntondo.

10. a) Akambo wakɔnge wa Danyɛlɛ ndewoyɛ wɛnaso le onkfumi wɔlɔndjɛ l’andja w’otondo ntepela ente Anglɛtɛrɛ la Amɛrikɛ? b) Lá nkambo djɛkɔnge dj’oyɛso ladjɛ mbadjɛ? (Lenda ipapango “ Wadjɛ lá kɛnɛ kelendana la bomba!”)

 ¹⁰ Ntondontondo, otshikitanyi la enkfumi w’otepelawɔ lá ɛnɛlɔ kɛnɛ, wɛlɔndjisá andja w’otondo ntondo, osanga wɔ Anglɛtɛrɛ la Amɛrikɛ apalekɔ djingingi djɛ lowolo lɔ wolo etengo mpawonyi la mfɛsa, koko djɛ osanga wɔ lowolo la bomba. Bomba alekɔ djingingi djɛ ‘wana w’anto,’ ntepela ente anto ng’anto. (Dan. 2:43, nɔtɛ) Etengo ɛnamawɔ papoo lɔɔko kɛnɛ, ndjimbo kelekɔ́ l’anto lá wayi wa vɔtɛ, kampanyɛ yonanghawɔ djɛ nseela lotshungɔ lolekɔ́ l’anto, wopo wonanghawɔ enkilimbo djɛ ntona wayi amɔtshi wanangha ewandji la wa syndicats, ntepela ente wanɛ wa nseela ase elemo, nkitshakitshɛka wolo wolekɔ́ la lowandji lɔlɔndjɛ l’andja w’otondo lɔsɔ djɛ nangha akambo lá wopo w’ɔkɔpawɔ.

11. Wopo wɔkɔnge ɛlɔndjɛlɔ kɛ onkfumi wɔ l’andja w’otondo wɔ Anglɛtɛrɛ la Amɛrikɛ okembɛwɔ djawo djɛso dj’ente towika l’etsho w’ekomo?

¹¹ Dj’epe, etengo oyɛnde djingingi djɛ akaka wa isekandole y’ekekete, Anglɛtɛrɛ la Amɛrikɛ ndeke onkfumi w’ekomo wɔlɔndjɛ l’andja w’otondo wɔ Bible ndewoyɛ. Lako onkfumi onkina wɔ pɔlitikɛ wongookita. Koko, wongotshitana lá mayimo djɛ tsho winá wɔ Onkfumi wɔ Ndjambe ndɔngɔɔsɛpɛtanyɛ esanga l’enkfumi enkina wɛ wana w’anto lá Armagɛdɔ. *​—Ndj. 16:13, 14, 16; 19:19, 20.

12. Tolembetelo tonkina tɔkɔnge totokembɛ la tɔtɔpɛyɛ nkongi prɔfɛsi kɛ Danyɛlɛ ɔtɔpɛyɛnde?

¹² Wapɔ wɔkɔnge w’okokaso mba má prɔfɛsi kɛsɔ? Prɔfɛsi kɛ Danyɛlɛ atɔpɛyɛ tolembetelo tonkina tɛnyɛ ente towika l’etsho w’ekomo. Ntondo k’ɛnɔnyi ndekana 2500, Danyɛlɛ ewoyɛka ante m’ɔkɔngɔ wɔ Babilɔnɛ, enkfumi enkina ɛnɛyi wɛngɔlɔndjɛ́ l’andja w’otondo wengoyala l’eposelo wɛ wolo te enkambi wɛ Ndjambe. Lá djiko djɛ lasɔ, nde ɛnyɛka ante onkfumi wɔlɔndjɛ l’andja w’otondo wɔ Anglɛtɛrɛ la Amɛrikɛ ndeke longoyala onkfumi w’ekomo l’anteyi kɛwɔ. Nkambo djɛsɔ ntokembɛka la ntɔpɛyɛka nkongi ente lako ilá Onkfumi wɔ Ndjambe wongotshita enkfumi wɛ wana w’anto enkfumɔ ko wɔngɔlɔndjɛ looko l’otondo.​—Dan. 2:44.

13. ‘Nkfumi k’enanɛyi’ la ‘nkfumi yɛ nkanga djomi,’ y’otepelawɔ lá Ndjiso 17:9-12, oyɛwɔ djingingi djɛ na, ko wopo wɔkɔnge prɔfɛsi kɛsɔ yakotshama?

¹³ Wala Ndjiso 17:9-12. Ladjikɛnde mbandji kɛ ntondo kel’Andja w’Otondo ketshitaka nkete efula, kɛsɔ kekotshɛka prɔfɛsi kenkina kɛ Bible kelendana l’etsho w’ekomo. Enkfumi wel’andja wanɛ wakɔpaka ndjila vu l’andja w’otondo. Djɛkondeke lá Ngɔndɔ kɛ ntondo 1920, waposɛka olonghanyelo ɔmɔtshi w’etawɔ Société de nations, olonghanyelo wɔ yɔɔhɛnyɛka la Nations-Unies lá Ngɔndɔ kɛ djomi 1945. Wangetake olonghanyelo wɔsɔ ambɔ ‘nkfumi k’enanɛyi.’ Koko wopalekɔ onkfumi wɔlɔndjɛ l’andja w’otondo. Wolo wɔnde la lomo lɔnde ndjɛka me enkfumi wɛ pɔlitikɛ w’osuka. Lá lɛdji lɔ djingingi, Bible ndjetaka enkfumi wɛsɔ ante ‘nkfumi yɛ nkanga djomi.’

14-15. a) Kɛkɔnge kɛ Ndjiso 17:3-5 ɛnyɛnde lá kɛnɛ kelendana la ‘Babilɔnɛ dj’ekekete’? b) Kɛkɔnge kekomela wanɛ wasuka ntolo dj’engolo?

¹⁴ Wala Ndjiso 17:3-5. Má wolo wɔ nyuma k’ekina, ɔpɔstɔlɔ Djɔanɛ enaka omoto wɔ ndumba, ntepela ente ‘Babilɔnɛ dj’ekekete’ kanga lolekɔ́ djingingi djɛ osanga wɔ ntolo dj’engolo djel’andja w’otondo. Wopo wɔkɔnge prɔfɛsi kɛsɔ yakotshama? Amboyala ilá efula kɛ osanga wɔ ntolo dj’engolo  osukawɔ edjinge oyalawɔ la djokanelo djɛ ma ma la enkfumi wɛ pɔlitikɛ weleka nkfulu l’andja w’otondo. Koko, lako ilá, Yehova angila l’eloko w’ewandji wɛ pɔlitikɛ wɛsɔ ikanyi yɛ iwɔ ‘nkotshɛ ikanyi yɛnde.’ Eposelo wɛkɔnge wengoyala la nkambo djɛsɔ? Enkfumi wɛ pɔlitikɛ wɛsɔ, ntepela ente ‘nkfumi yɛ nkanga djomi,’ wangokadjimɔ te osanga wɔ ntolo dj’engolo ko wangaatshita.​—Ndj. 17:1, 2, 16, 17.

¹⁵ Wopo wɔkɔnge w’ewaso ente ekomo kɛ Babilɔna dj’ekekete kemboyala entshupa? Djɛ nkadjimola lá woopó wɔsɔ, alekɔ ndjonyi iso mvungɔ ente ngando kɛ Babilɔnɛ djɛ ntondo kalamemaki ndambo má ndjale k’ekete kɛ Efrata. Onkanda wɔ Ndjiso ndjɛdjɛka miliyɔ y’anto wasuka Babilɔnɛ dj’ekekete la ‘washi’ wa lama. (Ndj. 17:15) Koko w’ɛnyɛ lonkina ambɔ washi wasɔ ‘wangoma,’ kɛsɔ nyɛnyɛka ente osanga wɔ ntolo dj’engolo djel’andja w’otondo wongotshutshɛ efula k’anto woosukaka. (Ndj. 16:12) Lɔɔko kɛnɛ, prɔfɛsi kɛsɔ kekotshama ladjikɛnde efula k’anto wapoyapɛyɛ lá wayi wa ntolo dj’engolo edjinge wambotateyɛ mpona djena nkina djɛ mba nkando l’ekakasano wɛwɔ.

16. Wapɔ wɔkɔnge w’okokaso mba má nsipisoyɛ prɔfɛsi yelendana la ɛnamelo kɛ Nations-Unies la ekomo kɛ Babilɔnɛ dj’ekekete?

 ¹⁶ Wapɔ wɔkɔnge w’okokaso mba má prɔfɛsi yɛsɔ? Ɛnamelo kɛ Nations-Unies la wopo wɔ anto efula yombotshika nsuka ntolo dj’engolo ntoshikikɛka lonkina ente towika l’etsho w’ekomo. Kaanga anto efula yombotshika nsuka Babilɔnɛ dj’ekekete, etshitanelo kɛ osanga wɔ ntolo dj’engolo kengoyɛ lá wopo onkina wotshikitanyi. Etengo sotepelaki ndambo má djiko, Yehova angila ikanyi yɛnde l’eloko wɛ ‘nkfumi yɛ nkanga djomi,’ ntepela ente enkfumi wɛ pɔlɔtikɛ wesuka Nations-Unies, ‘dj’iwɔ nkotshɛ ikanyi yɛnde.’ Ewila wɛsɔ wengotshita Babilɔnɛ dj’ekekete l’isasimoyɛ ko nkambo djɛsɔ djengokashimola andja w’otondo. * (Ndj. 18:8-10) Etshitanelo kɛ Babilɔnɛ dj’ekekete kengotshikitshɛ andja w’otondo la kengoyakala ekakasano efula, koko enkambi wɛ Ndjambe wangoyala la donga mpe djɛ nsasanga. Ntolo dj’engolo djemboyalaká antonyi wa Ndjambe w’il’ilá, djengotshitana lotshinda lotshinda edjinge lako ilá tongotshungɔ m’andja wa pɔlɔ wanɛ!—Luka 21:28.

17-18. a) Wopo wɔkɔnge w’okokaso nkindjɛ nkembɛ djawo djɛso? b) Kɛkɔnge kɛ songoshishima lá djamba djeyaye?

¹⁷ Danyɛlɛ ewoyɛka ante ‘balo djɛ nsɔsɔlɔ djengoyala efula.’ Ee djemboyala nsɔsɔlɔ efula! Winá wɔsɔ tombosipisoyɛ prɔfɛsi yelendana l’etsho wɛso wɛnɛ. (Dan. 12:4, 9, 10) Ekotshamelo kɛ prɔfɛsi yɛsɔ yembofudjɛ dilɛmɛlɔ djɛso te Yehova la t’Otepela wɔnde w’ekina. (Iza. 46:10; 55:11) Djɛkondeke kindjɛ nkembɛ djawo djɛko má ndjekaka Afunelo l’entete kenkfumɔ la má nkotshɛ́ anto ankina dj’iwɔ ndjala la djokanelo djɛ wɔlɔ la Yehova. Nde angolama anto ankfumɔ wayawɛkɛ tende, la angapɛyɛ ‘vu djepashile.’​—Iza. 26:3.

¹⁸ Lá djamba djeyaye, tongoshishima prɔfɛsi yelendana la otshumano w’Akristo wal’etsho w’ekomo. Etengo songeka, prɔfɛsi yɛsɔ mpɛyɛka lonkina eshikikelo k’ɛnyɛ ente towika l’etsho w’ekomo. Tɔngɛna lonkina tolembetelo t’ɛnyɛ ente Yeso kanga lolekɔ́ winá wɔsɔ Nkfumi kɛso alɔndjɛ ambeki wande wa nkɔmano.