1. Kɛkɔnge kɛ Yehova ndananghe ngo ndambo daambi m’ɔkɔngɔ wɔ Adama nya Eva nangha mpekanto? (Ewangelo 3:15)

 NGO ndambo daambi m’ɔkɔngɔ wɔ Adama nya Eva nangha mpekanto, Yehova apɛyɛka tonkanola tɔwɔ nkongi má lotshimbo lɔ prɔfɛsi kɛmɔtshi kɛ djonyi. Kɛnɛ kɛ ndatepela ntanemaka lá Ewangelo 3:15.​—Wala.

2. Lamo prɔfɛsi kelá Ewangelo oyɛwɔ djonyi efula?

² Prɔfɛsi kɛsɔ ketanema lá onkanda wɔ ntondo welá Bible. Koko lá lɛdji lɔmɔtshi kana lonkina, enkanda enkina enkfumɔ welá Bible nkowama lá prɔfɛsi kɛkɔ. Etengo ikambo y’onkanda osanghanyɛkawɔ akishi ankfumɔ, etepela welekɔ́ lá Ewangelo 3:15 nsanghanyɛka efunelo enkfumɔ welá enkanda enkfumɔ welá Bible lá losango lɔmɔ, losango lɔkɔ nde, Ndjambe angotoma Ontshungodji djɛ ndotshita Djabolo nya anto wande ankfumɔ wokilika. * Ɔsɔngo ɔtshɔkɔ wongowa wanɛ wakɔpa Yehova!

3. Kɛkɔnge kɛ songoshishima lá djamba djɛnɛ?

³ Lá djamba djɛnɛ, tongokadjimola weepó esato wɛnɛ welendana la prɔfɛsi kɛ Ewangelo 3:15: Anto wakɔna w’otepelawɔ lá prɔfɛsi kɛsɔ? Wopo wɔkɔnge prɔfɛsi kɛsɔ okotshamawɔ? Edjinge wapɔ wɔkɔnge w’owaso má prɔfɛsi kɛsɔ?

4. Kange ‘ndjɔ’ na, ko wopo wɔkɔnge ewaso nghɔsɔ?

⁴ Ewangelo 3:14, 15 ntepelaka nkambo djɛ ‘ndjɔ,’ ‘inkanola’ yɛ ndjɔ, ‘omoto’ edjinge ‘inkanola’ yɛ omoto. Bible ntokotshɛ́ka djɛ ndembetela onto onkfumɔ wɔ l’anteyi kɛwɔ. * Nyontshɔ towange me ndjɔ. Ndjɔ kɛ nsɔsɔlɔ apakoke nsipisoyɛ kɛnɛ kɛ Yehova ndatepela lá bedji dj’Ɛdɛna. Djɛkondeke kanga Yehova olomboyɛnde lanɛ ladjɛ ndjala etongami kelekɔ́ la balo. Ya etongami kɛkɔnge? Ndjiso 12:9 nsipisoyɛka kɔɔ kanga lolekɔ́ ndjɔ kɛsɔ. L’eteyi wɛnyɛ papoo ambɔ ‘ndjɔ kɛ ntondo’ kɛsɔ oyɛnde nde Satana Djabolo. Ya koko kanga lolekɔ́ inkanola yɛ ndjɔ na?

5. Oye inkanola yɛ ndjɔ?

⁵ Mbala efula winá wɔ Bible okambande la itepela inkanola, nkambo djɛsɔ ndendanaka l’anto wakanela la wanangha akambo etengo papa kɛwɔ kɛ djingingi. Djɛkondeke inkanola yɛ ndjɔ, oyɛwɔ nde ntongami djelá nyuma la anto wananyɛ Yehova Ndjambe edjinge enkambi wɛnde, ngo ngete Satana. L’anteyi kɛwɔ ndeke otanaso edjinge andjelo watshikisá elemo wɛwɔ l’olongo l’etsho wɛ Noe, la anto wa pɔlɔ wa nangha akambo ngo ngete papa kɛwɔ Djabolo.—Ewa. 6:1, 2; Dj. 8:44; 1 Dj. 5:19; Yuda 6.

6. Lamo ‘omoto’ w’otepelawɔ lá prɔfɛsi kɛnɛ ndotákoká ndjala Eva?

⁶ Masɔ, nyontshɔ tohonake djɛ ndjewa olekɔ́ ‘omoto.’ Nde atákoká ndjala Eva. Lamo? Tokoshishima ngo elonga kɛmɔ. Prɔfɛsi kɛsɔ nshikikɛka ante inkanola yɛ omoto ‘angɔsɛpɛtanyɛ’ ɔtɛ wɔ ndjɔ. Etengo sotepelaki, ndjɔ alekɔ etongami kelá nyuma Satana, edjinge lako onto wɔ ntshamba djɛ djɔ wolekɔ́ ikanola  y’Eva wokoka ndɔɔsɛpɛtanyɛ. Lasɔ wopo wɔkɔnge Satana ndakoke ntshitanyema?

7. Etengo otepelawɔ lá Ndjiso 12:1, 2, 5, 10, omoto w’otepelawɔ lá Ewangelo 3:15 oyɛnde na?

⁷ Onkanda w’ekomo wɔ Bible ntoshimelaka kanga lolekɔ́ omoto w’otepelawɔ lá Ewangelo 3:15. (Wala Ndjiso 12:1, 2, 5, 10.) Apalekɔ omoto wɔ nsɔsɔlɔ! Nde ayalaki la ngɔndɔ l’ekolo wɛnde edjinge alɔtaka imbandjo yɛ nkoso yeyalaki la tɔɔtɔ 12 l’ɔtɛ wɔnde. Nde awotaka wɔna wotshikitanyi la wana ankina, Onkfumi wɔ Ndjambe. Onkfumi wɔsɔ wolekɔ l’olongo, djɛkondeke omoto wɔsɔ ladjɛ ndjala edjinge nde l’olongo. Nde alekɔ djigingi djɛ etenyi k’olonghanyelo wɔ Yehova wel’olongo wombokfumbama l’andjelo wande wa nkɔmano.​—Nga. 4:26.

8. Etenyi kɛ ntondo kɛ inkanola yɛ omoto oyɛnde na, ko lá winá wɔkɔnge ndookomaka nghɔsɔ? (Ewangelo 22:15-18)

⁸ Otepela wɔ Ndjambe ntokotshɛ́ka djɛ ndjewa etenyi kɛ ntondo kɛ inkanola yɛ omoto. Inkanola yɛsɔ ayalaka ladjɛ mposa m’ɔlɔndji w’Abrahama. (Wala Ewangelo 22:15-18.) Etengo prɔfɛsi yewoyɛ, Yeso ayalaka inkanola yɛ mpame kɛ nkɔmano kɛsɔ. (Luka 3:23, 34) Koko inkanola yɛsɔ ayalaka ladjɛ ndjala la nkfulu k’efula keleka kɛ wɔn’onto ladjikɛnde nde ladjɛ nsɛpɛtanyɛ Satana Djabolo. Djɛkondeke, winá wɔ Yeso ndakome l’ɛnɔnyi 30, nde akfutamaka avuta lá nyuma djɛ nkoma Wɔna ɛtɔyi wɔ Ndjambe wɔ nyuma. Winá wɔ ndakfutama avuta lá nyuma, Yeso akomaka etenyi kɛ ntondo kɛ inkanola yɛ omoto. (Nga. 3:16) M’ɔkɔngɔ wɔ nyɔyi l’ekfundwelo kɛ Yeso, Ndjambe ‘ɔlɔtshɛka lomo la lonkfunda’ la ɔpɛyɛka ‘lowandji lonkfumɔ . . . l’olongo la lá looko,’ ndjila edjinge lowandji ‘lɔ ntshita elemo wɛ Djabolo.’​—Heb. 2:7; Mat. 28:18; 1 Dj. 3:8.

9-10. a) Anto ankina wakɔna wakfumba inkanola yɛ omoto, ko lá winá wɔkɔnge w’okomawɔ nghsɔsɔ? b) Kɛkɔnge k’ɔkɔpaso nshishima lonkina?

⁹ Koko etenyi k’ape k’inkanola ayalaka ladjɛ ndjala. Ɔpɔstɔlɔ Poolo atepelaka nkambo djɛ wanɛ wakfumba etenyi k’ape kɛ inkanola yɛsɔ winá wɔ ndashimela Akristo w’ankfutami w’avuta w’ase Juda la w’ase Ewila ante: ‘Ntsha nyolekɔ anto wa Kristo, mbɔ nsɔsɔlɔ nyolekɔ inkanola yɛ Abrahama, ekitshɔ lá kɛnɛ kelendana la daka.’ (Nga. 3:28, 29) Winá wɔ Yehova ɔsɔnande Okristo la nyuma kɛnde k’ekina, onto wɔsɔ ndjingelaka l’etenyi k’ape k’inkanola yɛ omoto. Djɛkondeke inkanola yɛ omoto nkfumbama la Yeso Kristo edjinge l’anto 144000 wangɔlɔndjɛ esanga lande. (Ndj. 14:1) Yankfumɔ nkanelaka la nanghaka akambo etengo Papa kɛwɔ, Yehova Ndjambe.

¹⁰ Etengo sombewa anto w’otepelawɔ lá Ewangelo 3:15, nyontshɔke tolende lá yopasɛ wopo wɔ Yehova ndotakotshɛ prɔfɛsi kɛsɔ ndambo ndambo la wopo wowaso wapɔ m’eteyi.

11. Lá wopo wɔkɔnge yalamata inkanola yɛ omoto ‘lá ntshindji’?

¹¹ Lá nkilika prɔfɛsi kelá Ewangelo 3:15, ndjɔ ayalaka ladjɛ namata inkanola yɛ omoto ‘lá ntshindji.’ Nkambo djɛsɔ nkotshamaka winá wɔ Satana ndatshinde ase Juda la ase Ɔrɔma djɛ ndjaka Wɔna Ndjambe. (Luka 23:13, 20-24) Ngo ngete mpota kelá ntshindji okokawɔ nshimba onto djɛ nkɛnda l’ilá kɛ winá ɛmɔtshi, nyɔyi kɛ Yeso koshimbaka djɛ nangha nkambo nkfumɔ l’ilá k’etsho esato wɛ ndayale lá nketa.​—Mat. 16:21.

12. Wopo wɔkɔnge edjinge winá wɔkɔnge yɔngɔsɛpɛtanyɛ ɔtɛ wɔ ndjɔ?

 ¹² Prɔfɛsi kelá Ewangelo 3:15 nyɛnyɛka djɛ, Yeso atakoká ntshikala ilá lá nketa. Lamo otepelaso nghɔsɔ? Ladjikɛnde lá nkilika prɔfɛsi kɛkɔ, inkanola ladjɛ nsɛpɛtanyɛ ɔtɛ wɔ ndjɔ. Kɛsɔ nsakisolaka ante Yeso ayalaka ladjɛ nkɔnɔ má mpota kɛnde kelá ntshindji. Ee nde akɔnɔka! Lofu l’asato m’ɔkɔngɔ wɔ nyɔyi kɛnde, Yeso akfundɔka etengo etongami kelá nyuma. Lá winá wɔ Ndjambe ndashikikɛ, Yeso angɔsɛpɛtanyɛ Satana. (Heb. 2:14) Wanɛ wangɔlɔndjɛ esanga la Kristo wangokotshɛ djɛ ntshita antonyi ankfumɔ wa Ndjambe, ntepela ente inkanola yɛ ndjɔ má looko.​—Ndj. 17:14; 20:4, 10. *

13. Wapɔ wɔkɔnge w’owaso má ekotshamelo kɛ prɔfɛsi kɛnɛ?

¹³ Ntsha olekɔ onkambi wɔ Ndjambe womboyalambola tende, mbɔkoko owá wapɔ má prɔfɛsi kɛsɔ. Yeso ayɛka lá looko etengo onto. Nde okolaka Papa kɛnde lá lɛdji lɔ djɔ. (Dj. 14:9) Má lotshimbo lɔnde ndeke sombewa la sɔmbɔkɔpa Yehova Ndjambe. Iso mbaka lonkina wapɔ má elakanyelo wɛ Yeso la má ɛlɔndjɛlɔ k’ɔpɛyɛnde otshumano w’Akristo lɔɔko kɛnɛ. Nde ntolakanyɛka wopo wɔ mbika lá yopo yengotokotshɛ́ djɛ ndjawolama me Yehova. Edjinge isankfumɔ nkoka mba wapɔ má nyɔyi kɛ Yeso, ntepela ente má wopo wɔ yolamatá lá ntshindji. Lá wopo wɔkɔnge? Winá wɔ Yeso ndakfundɔ, nde afutaka oshinga w’olambo wɔnde etengo olambo wɔ djɔ ‘wɔtɛdjɛ piyɔɔ má mpekanto inkfumɔ.’​—1 Dj. 1:7.

14. Wopo wɔkɔnge ewaso ente prɔfɛsi kɛ Yehova ndatepela l’Ɛdɛna ketakoká nkotshama mbala kɛkɔ kɛmɔ winá wɔ ndatepela?

¹⁴ Etepela wɛ Yehova ndatepela lá bedji dj’Ɛdɛna wɛnyɛka ente prɔfɛsi kɛsɔ kepangokotshama ngo lá winá wɔ ndatepela. Eleko k’otale keyalaka la djɛ mpeta djɛ omoto ndoposɛ inkanola yelakemisá, djɛ Djabolo ndotshumanyɛ anto wande la djɛ lotono (kana osambo wɔ djokanelo) ndoyala l’antenyɛ eloyi epe wɛsɔ. Iso mbaka wapɔ má nsipisoyɛ prɔfɛsi kɛsɔ ladjikɛnde ketewola djɛ andja wanɛ walɔndjɛmá me Satana wangotona enkambi wɛ Yehova. Ndambo m’ɔkɔngɔ, Yeso apɛyɛka ambeki wande ndjewo kɛkɔ kɛmɔ. (Mar. 13:13; Dj. 17:14) Ape l’ehamo tɔmbɛna ekotshamelo k’etenyi kɛ prɔfɛsi kɛsɔ, pekapeka lá ɛnɔnyi 100 wemboheta wɛnɛ. Lá wopo wɔkɔnge?

15. Lamo lotono l’andja wanɛ te enkambi wɛ Ndjambe yotafule ngo mfula, ko lamo sopakoke ndjoka Satana wɔma?

¹⁵ Ndambo daambi m’ɔkɔngɔ wɔ Yeso nkoma Nkfumi Mɛsiya lá 1914, wahɔnyɔlaka Satana m’olongo. Winá wɔsɔ nde ambodjipama l’emamo wɛ looko akonga ngo etshitanelo kɛnde. (Ndj. 12:9, 12) Koko nde apakonge etshitanelo kɛsɔ lɔkɔma ɛwɔ. Satana alekɔ la nkɛlɛ k’efula edjinge ananyɛ enkambi wɛ Ndjambe. (Ndj. 12:13, 17) Djɛkondeke, lotono l’andja wanɛ te enkambi wɛ Ndjambe yotafule ngo mfula. Koko topalekɔ nkaanga l’elonga kɛ ndjoka Satana nya anto wande wɔma. L’edjena kɛ ndjoka wɔma, iso ladjɛ ndjala l’eshikikelo etengo ɔpɔstɔlɔ Poolo kanga lofunisá ante: ‘Ntsha Ndjambe alekɔ l’ompandju wɔso, kangokoka ntonanyɛ na?’ (Ɔrɔ. 8:31) Iso nkoka ndawɛkɛ tshɛ te Yehova ladjikɛnde, etengo sɛnaki, etenyi k’ekekete kɛ prɔfɛsi kɛ Ewangelo 3:15 kemboshiyɛká nkotshama.

16-18. Wopo wɔkɔnge Curtis, Ursula, la Jessica yawa wapɔ má nsipisoyɛ Ewangelo 3:15?

 ¹⁶ Daka djɛ Yehova dj’otanaso lɛ Ewangelo 3:15 nkoka ntokotshɛ́ djɛ nkfulumeyɛ wopo w’ohemba onkfumɔ wokoka ntokomela. Curtis, kanga lokamba lá Guam etengo misiɔnɛrɛ, ntepelaka ante: “Lá mbamba imɔtshi, langopomanake l’ekakasano ɛmɔtshi w’ilaká nkɔmano djɛmi te Yehova l’ohemba. Koko ntɔnɔla lá prɔfɛsi kɛ Ewangelo 3:15 nkotshɛka lemi djɛ nkindjɛ ndawɛkɛ te Papa kɛmi kel’olongo.” Curtis akongela l’oloko lukuluku lofu lɔ Yehova ndongimɛ ekakasano wɛso enkfumɔ.

¹⁷ Nkaana kɛmɔtshi kelá Bavaria ketawɔ Ursula ntepelaka ante wopo wɔ ndasipisoyɛ Ewangelo 3:15 okotshɛka djɛ ndashikikɛ ante Bible dekɔ Otepela wɔ Ndjambe. Nde ɛnaka wopo wɔ prɔfɛsi inkina inkfumɔ oyɛwɔ la djokanelo la prɔfɛsi kɛsɔ, edjinge nkambo djɛsɔ dj’okamoyɛka efula. Nde ntepelaka lonkina ante: “Ndekaka nkɔpa Yehova efula winá wɔ mewe ente nde ananghaka akambo ipa la ntshatshimba djɛ ntɔpɛyɛ nkongi.”

¹⁸ Jessica, nkaana kɛmɔtshi kemá Micronésie, ntepelaka ante: “Langokindjɛke nkanela wopo wɔ moyawoke winá wɔ masipisoyɛ mbala kɛ ntondo ente lambisola akambo wa nsɔsɔlɔ! Prɔfɛsi kelá Ewangelo 3:15 ketákotshamá. Kɛsɔ kenkotshɛka djɛ mvungɔ ente ape Yehova ndeke ikɔkɔ yɛ ndjolo yɛnaso lɔɔko kɛnɛ. Prɔfɛsi kɛsɔ kekembɛka lonkina djawo djɛmi dj’ente nkambela Yehova nkotshɛká djɛ ndjala la lowiko loleká wɔlɔ má winá wɔsɔ edjinge kaanga l’etsho weyaye.”

19. Lamo oyɛso ladjɛ ndaashikikɛ ente etenyi k’ekomo kɛ prɔfɛsi kɛnɛ kengokotshama?

¹⁹ Etengo sɛnaki, prɔfɛsi kelá Ewangelo 3:15 ketákotshamá winá wɔsɔ. Tombolembetela wɔlɔwɔlɔ inkanola yɛ omoto l’inkanola yɛ ndjɔ. Yeso kanga lolekɔ etenyi kɛ ntondo kɛ inkanola yɛ omoto amboshiyɛká nkɔnɔ má mpota kɛnde kelá ntshindji edjinge winá wɔsɔ nde alekɔ Nkfumi kɛ nkfulu efula kepavɔki lotshinda. Ɔsɔnwɛlɔ wɔ wanɛ wakfumba etenyi k’ape kɛ inkanola yɛ omoto wɔkɔpa nkoma. Ladjikɛnde etenyi kɛ ntondo kɛ prɔfɛsi kɛnɛ kemboshiyɛká nkotshamá, tolekɔ la elonga kɛ wɔlɔ kɛ ndjawola ente etenyi k’ekomo kelendana lá ɔsɛpɛtanyelo w’ɔtɛ wɔ ndjɔ, kengokotshama. Ɔsɔngo osasa wongoyala l’anto wa nkɔmano winá wɔ Satana ndongotshitana! Djɛkondeke, totapekɔke. Tilele Ndjambe kɛso oloko. Má lotshimbo lɔ inkanola yɛ omoto, nde angoyakala ‘ewila enkfumɔ welá looko’ ɛtshɔkɔ wepa l’ekomo.​—Ewa. 22:18.