1. Oye ɛkɔpa kɛ Yehova lɔɔko kɛnɛ?

 ƐKƆPA kɛ Ndjambe lɔɔko kɛnɛ nde, losango lɔ wɔlɔ l’Onkfumi mpoposanyema lá looko l’otondo. (Mar. 13:10; 1 Ti. 2:3, 4) Ɔsɔ alekɔ olemo wɔ Yehova, edjinge wopo wɔ ndasɔnɛ Wɔnande wɔ ngandji djɛ ndɔndjɛ olemo wɔkɔ nyɛnyɛka djɛ wolekɔ djonyi efula. Tolekɔ l’eshikikelo ente m’ɛlɔndjɛlɔ kɛ Yeso ndɔndji kɛso kelekɔ́ l’akoka, olemo w’ipoposanyɛ wongonanghema ngo ngete Yehova ɔkɔpande lá ntondo k’ekomo ndjɛ.​—Mat. 24:14.

2. Kɛkɔnge kɛ songoshishima lá djamba djɛnɛ?

² Lá djamba djɛnɛ, tɔngɛna wopo wɔ Yeso okambande la ‘mfumbe kɛnde kɛ nkɔmano la nkɛsɔ’ djɛ ntɔpɛyɛ nkete djɛ ndɛ djelá nyuma la wopo wolonghanyɛnde ambeki wande djɛ nkamba olemo w’ipoposanyɛ woleka ekekete l’ɔkɔndɔ wɔ wana w’anto. (Mat. 24:45) Tɔngɛna lonkina kɛnɛ kɛ onto onkfumɔ okokande nangha djɛ nsuka Yeso la mfumbe kɛ nkɔmano la nkɛsɔ.

3. Lowandji lɔkɔnge l’iyapɛyɛ Yeso?

³ Yeso alɔndjɛ olemo w’ipoposanyɛ. Wopo wɔkɔnge w’okokaso ndashikikɛ nkambo djɛsɔ? Ndambo daambi lá ntondo kɛ nde mpanda t’olongo, Yeso apomanaka nya ambeki wande amɔtshi wa nkɔmano l’onkoko ɔmɔtshi wɔ Ngalile. Nde áshimelaka ante: ‘Wampɛyɛka lowandji lonkfumɔ l’olongo la lá looko.’ Kolenda etepela wɛndɛ wɛ wɔlama wɛnɛ: ‘Djɛkondeke, nyotshu, nyokfumbe anto wal’ewila enkfumɔ ambeki.’  (Mat. 28:18, 19) Lonkina, wapɛyɛka Yeso lowandji lɔ ndɔndjɛ olemo w’ipoposanyɛ.

4. Lamo okokaso ndashikikɛ ente Yeso akindjɛ ndɔndjɛ olemo w’ipoposanyɛ?

⁴ Yeso atepelaka ante olemo w’ipoposanyɛ la wɔ nkfumba anto ambeki wongonanghema ‘l’ewila enkfumɔ’ edjinge angoyala nya ambeki wande ‘etsho enkfumɔ tii lá winá w’ekomo wɔ nkfumbo dj’akambo.’ (Mat. 28:20) Etepela wɛsɔ nyɛnyɛka papoo ente olemo w’ipoposanyɛ woyalaka ladjɛ nkindjɛ nanghema l’ɛlɔndjɛlɔ kɛ Yeso tii l’etsho wɛso.

5. Wopo wɔkɔnge w’osukaso ekotshamelo kɛ prɔfɛsi kelá Yeembo 110:3?

⁵ Yeso atayala la wɔma ante ankambi w’olemo wɔsɔ wapangooyala efula l’etsho w’ekomo wɛ nkfumbo dj’akambo. Nde ewaki ante etepela wɛ prɔfɛsi w’ontshumbi yeembo wɛnɛ wengokotshama: ‘Anto wako wangoyapɛyɛ l’ɛkɔpa lá lofu lɔ wolo l’angala wako.’ (Yee. 110:3) Ntsha ongonanghake olemo w’ipoposanyɛ, mbɔ koko osuka Yeso nya mfumbe kɛ nkɔmano la nkɛsɔ la okotshɛ́ djɛ prɔfɛsi kɛsɔ nkotshama. Olemo wɔsɔ wotakindjɛ nanghema, koko ekakasano ɛmɔtshi welekɔ.

6. Okakasano wɔkɔnge ɔmɔtshi wopomana l’ansakodji y’Onkfumi lɔɔko kɛnɛ?

⁶ Okakasano ɔmɔtshi w’opomana l’ansakodji y’Onkfumi nde, onanyelo. Wa apɔsta, ewandji wɛ ntolo la wɛ pɔlitikɛ wambokomɛ anto efula djɛ ndjala l’ikanyi yɛ nyɛtshi lá nkambo dj’olemo wɔso. Ntsha boto djɛso, anto ankina wewaso, la winaso w’olemo wambodjimbwama m’engolo wɛsɔ, iwɔ nkoka ntotshinda dj’iso ntshika nkambela Yehova la ntshika mpoposanyɛ. L’ewila ɛmɔtshi, iwɔ ntonanyɛka má ntɔpɛyɛ nsɔnyi, ntaaná, ntovunda la nkaanga ntilá lá lokando. Topakamɔ winá wɛnaso akambo wasɔ. Yeso atepelaka ante: ‘Anto wal’ewila enkfumɔ wangonyofulɔ l’ɔtɛ wɔ djiina djɛmi.’ (Mat. 24:9) Wopo w’ototonawɔ kana ntofulɔ, alekɔ ilembetelo yɛnyɛ ente iso djawolamaka me Yehova. (Mat. 5:11, 12) Djabolo ndeke ikɔkɔ y’onanyelo wɔsɔ. Koko Yeso ndoleka nkfulu otalée! Mpeyi l’okotshɔ wɔ Yeso, losango lɔ wɔlɔ lombokoma le anto w’ewila enkfumɔ. Tokoshishima tolembetelo tɔmɔtshi.

7. Tolembetelo tɔkɔnge tɔkɛnyɛ ente Ndjiso 14:6, 7 akotshama?

⁷ Etengo oyɛso ansakodji y’Onkfumi, tolekɔ lonkina l’okakasano wɔ ndongela onkeka wolendana l’otepela. Lá ɛnɛlɔ kɛ ndɛnyɛ ɔpɔstɔlɔ Djɔanɛ, Yeso atepelaka ante l’etsho wɛso wɛnɛ, losango lɔ wɔlɔ longovukola onkeka wɔsɔ. (Wala Ndjiso 14:6, 7.) Lá wopo wɔkɔnge? Iso mpɛyɛka doyi doyi dj’anto mpeyi kɛ ndjekameyɛ losango l’Onkfumi. Lɔɔko kɛnɛ, anto wel’andja w’otondo nkoka mbala enkanda wesakisola Bible lá sitɛ kɛso kɛ jw.org ladjikɛnde kelekɔ l’etepela ndekana 1000! Iloyi yɛlɔndjɛ awolaka djɛ onkanda Yala la lowiko l’osasa lotshinda lotshinda!, epeko kolekaso ndjeka l’ambeki etsho wɛnɛ nkadjimwama l’etepela ndekana 700! Nkete djɛ ndɛ djelá nyuma ntanema lonkina lá tovideo lá nkambo dj’ase liimi la l’enkanda lá nkambo djɛ wambowodjɛ wiso. Tɛɛna wopo watakotshama prɔfɛsi yelá Bible. Anto ‘wimá etepela enkfumɔ w’ewila’ weka ‘otepela wɔ piyɔɔ’ w’akambo wa nsɔsɔlɔ wemá Bible. (Zak. 8:23; Sef. 3:9) Akambo ankfumɔ wasɔ wakotshama má ɛlɔndjɛlɔ kɛ Ndɔndji kɛso kelekɔ́ l’akoka efula Yeso Kristo.

8. Eposelo wɛkɔnge wemboposa m’olemo wɔso w’ipoposanyɛ?

⁸ Lɔɔko kɛnɛ, anto ndekana 8 000 000 wim’ewila 240 wambosanghana l’olonghanyelo wɔ Yehova edjinge ɔnɔnyi onkfumɔ anto akumi wa nunu walongola batisimo! Koko kambo djeleka lofulo lɔsɔ djonyi nde, wekeka welá  nyuma, ntepela ente wopo wɔ ambeki wa bango wasɔ yombɔlɔta ‘lonto lɔ bango.’ (Kɔl. 3:8-10) Efula watshikaka wayi wa mbindo, wa lopango, nkanelana nyɛtshi, la isɔnɔdji yelendana l’ewila. Prɔfɛsi kelekɔ́ lá Izaya 2:4 ketepela ante: Iwɔ ‘wapangeka mbandji lonkina,’ kekotshama. Winá wonanghaso la wolo djɛ ndɔta lonto lɔ bango, iso nsepaka anto l’olonghanyelo wɔ Ndjambe la nyɛnyɛka ente tokilika ndɔndji kɛso Kristo Yeso. (Dj. 13:35; 1 Pɛ. 2:12) Akambo ankfumɔ wasɔ wapananghema onanghemananghema. Yeso atɔpɛyɛ okotshɔ woyɛso la djonyi.

9. Lá nkilika Mateo 24:45-47, kɛkɔnge kɛ Yeso ndatepela lá kɛnɛ kelendana l’etsho w’ekomo?

⁹ Wala Mateo 24:45-47. Yeso atepelaka ante, l’etsho w’ekomo nde angɔsɔna ‘mfumbe kɛ nkɔmano la nkɛsɔ’ djɛ mpɛyɛka anto nkete djɛ ndɛ djelá nyuma. Djɛkondeke tokanela ente mfumbe kɛsɔ akamba olemo wɔ wolo l’etsho wɛso wɛnɛ. Oyɛwɔ ngo nghɔsɔ. Ndɔndji kɛso akamba la iloyi yɛ daambi y’ankfutami djɛ mpɛyɛ enkambi wɛ Ndjambe l’anto ankina wayapɛyɛ l’akambo wa nsɔsɔlɔ ‘nkete djɛ ndɛ djelá nyuma lá winá w’ɛdje.’ Ampame yɛsɔ wapapamela djawo dj’anto ankina. (2 Kɔ. 1:24) Koko, iwɔ nsipisoyɛka ambɔ Yeso Kristo ndeke ‘ndɔndji edjinge kɔmanda’ k’anto wande.​—Iza. 55:4.

10. Onkanda wɔkɔnge l’anteyi k’enkanda wiyɔmbɛnyɛ lá ntshango wokokotshisá djɛ ndjingela lá mboka kɛ lowiko l’etshinda?

¹⁰ Ntateyɛ má 1919, mfumbe kɛ nkɔmano la nkɛsɔ alɔngɔsɔlaka enkanda wetshikitanyi wɛpɛyisá anto wa bango mbamba k’iwɔ ndɛ nkete djelá nyuma mbala kɛwɔ kɛ ntondo. Lá 1921, mfumbe kɛ nkɔmano aposɛka onkanda La Harpe de Dieu djɛ nkotshɛ́ anto wayapɛyɛ l’akambo wa nsɔsɔlɔ dj’iwɔ ndjeka elakanyelo wɛ ntondo welá Bible. Etengo deko yotatshikitaná,  enkanda enkina weposaka. Onkanda wɔkɔnge wokokotshisá djɛ ndjewa la nkɔpa Papa kɛso kel’olongo? “Que Dieu soit reconnu pour vrai,” La verité qui conduit à la vie éternelle, Kokaka we monga la loseno la pondjo lo paradiso ka la kete, Ewo katɔla otsha lo lɔsɛnɔ la pondjo, Bible etshatɔ mɛtɛ?, Kakɔna kakoka Bible tetsha?, ndo koko Yala la lowiko l’osasa lotshinda lotshinda!, onkanda wɔso wɔ bango? Enkanda enkfumɔ wɛsɔ weposaka djɛ nkotshɛ okoma ɔmɔtshi wɔ kɔɔ lá winá wɔ yapose.

11. Lamo oyɛwɔ djonyi isankfumɔ mbaka nkete djɛ ndɛ djelá nyuma?

¹¹ Apengo anto wa bango toko ndeke lolekɔ́ la djonyi djɛ nkete djɛ wolo djɛ nyuma. Isankfumɔ tolekɔ la djonyi. Ɔpɔstɔlɔ Poolo afunaka ante: ‘Nkete djɛ ndɛ djɛ wolo oyɛwɔnde lá nkambo dj’anto wambotshunda.’ Poolo akotshɛka ante nkamba la nkete djɛ nyuma djɛsɔ angotokotshɛ́ djɛ ndjewa ‘ntshikitanyɛ wɔlɔ l’owe.’ (Heb. 5:14) Akoka ndjala wolo efula nɛmɛyɛ ɛlɛmbɛ wɛ Yehova. Koko Yeso ananghaka dj’iso mbaka nkete djɛ ndɛ djelá nyuma dj’oyɛso la djonyi dj’iso nkembɛ djawo djɛso. Nkete djɛ ndɛ djɛsɔ mposaka m’Otepela wɔ Ndjambe, Bible. Mfumbe kɛ nkɔmano la nkɛsɔ ndɔngɔsɔlaka la nkapanyɛka nkete djɛ ndɛ djɛsɔ má ɛlɔndjɛlɔ kɛ Yeso.

12. Lá ndjɔmbɔmba kɛ Yeso, wopo wɔkɔnge wolumɛso djiina djɛ Ndjambe?

¹² Lá ndjɔmbɔmba kɛ Yeso, iso mpɛyɛka djiina djɛ Ndjambe lomo lɛlama la nde. (Dj. 17:6, 26) Ndjɔmbɔmba, lá 1931 tɔsaka djiina djemá Afunelo djɛ Ewakɛ wɛ Yehova, má nangha nghɔsɔ iso nyɛnyɛka ente djiina djɛ Ndjambe dekɔ la ntshina efula leso edjinge iso nkɔpaka ndjewama má djiina djɛ Papa kɛso kel’olongo. (Iza. 43:10-12) Ngo má Ngɔndɔ kɛ djomi k’ɔnɔnyi wɔsɔ, djiina djɛ Ndjambe ntateyɛka mposa lá loposo lɔ numelo kenkfumɔ kɛ periodikɛ kɛnɛ. Lonkina, Bible—Ekadimwelo k’andja w’oyoyo kekawoyɛka djiina djɛ Ndjambe  lá djena nkfumɔ dj’otanemawɔ l’Otepela wɔnde. Nkambo djɛsɔ ntotshikitanyɛka la ntolo djɛ Lokristokristo djimisá djiina djɛ Yehova má nkadjimwelo efula djɛ Bible yɛwɔ!

13. Kɛkɔnge ketoshikikɛ djɛ Yeso akamba la ‘mfumbe kɛ nkɔmano la nkɛsɔ’ lɔɔko kɛnɛ? (Djɔanɛ 6:68)

¹³ Má lotshimbo lɔ ‘mfumbe kɛ kɔmano la nkɛsɔ,’ Yeso ambokfumba olonghanyelo w’ekekete lanɛ lá looko djɛ nsuka etolo kɛ nsɔsɔlɔ. Oyawokɛ ngetemo lá nkambo dj’olonghanyelo wɔsɔ? Mbala imɔtshi, oyawoka ngete ɔpɔstɔlɔ Pɛtɛlɔ, kanga loshimelisá Yeso ante: ‘Tená otshɔso? Wɛ ndeke la etepela wɛ lowiko l’etshinda.’ (Dj. 6:68) Otasambaso ndjala la djokanelo l’olonghanyelo wɔ Yehova, lampe onto onkfumɔ wɔl’anteyi kɛso otayalande lɔɔko kɛnɛ? Má lotshimbo l’olonghanyelo wɔkɔ, Kristo ndashikikɛka djɛ tolekɔ la kenkfumɔ koyɛso la djonyi lá nyuma. Nde ntokfumbaka lonkina djɛ nkotshɛ olemo wɔso lá yopo yɛ wɔlɔ. Má djiko djɛ lasɔ, nde ntokotshɛka dj’iso ‘ndɔta lonto lɔ bango,’ dj’iso ndjewa nsasangɛ Yehova.​—Ɛfɛ. 4:24.

14. Wopo wɔkɔnge ngawa wapɔ má olonghanyelo wɔ Yehova lá winá wɔ opela wɔ COVID-19?

¹⁴ Yeso ntɔpɛyɛka ɛlɔndjɛlɔ kɛ balo lá deko djɛ ndjolo djɛnɛ. Wapɔ w’owaso m’ɛlɔndjɛlɔ kɛsɔ wɛnamaka papoo winá w’opela wɔ COVID-19 iyatshanghana l’andja w’otondo. Winá w’anto efula welá andja w’otondo iyotewaki kɛnɛ kɛ nangha, Yeso ananghaka dj’iso mba ɛlɔndjɛlɔ k’okama papoo dj’iso ndalama. Watokembɛka dj’iso ndɔtaka maskɛ winá woyɛso l’oloyi w’anto, edjinge ndjalaka imbango l’anto ankina. Tokokolo wakeketshamaka djɛ nsawolaka mbala la mbala l’anto ankfumɔ wel’otshumano ladjɛ ndjewa ehomba wɛwɔ welá demba la welá nyuma. (Iza. 32:1, 2) Towaka  lonkina ɛlɔndjɛlɔ la ekeketshelo má lotshimbo lɔ nsango yɛ bango yime Iloyi yɛ lɔndjɛ.

15. Ɛlɔndjɛlɔ kɛkɔnge k’iyatɔpɛyɛ lá kɛnɛ kelendana la wingelo wɔ nsanghanyɛ la olemo w’ipoposanyɛ lá winá w’opela, ko eposelo wɛkɔnge weyalisá?

¹⁵ Lá winá w’opela wotshanghanisá wɔsɔ, towaka lonkina ɛlɔndjɛlɔ k’okama papoo lá wopo wɔ ndjingela nsanghanyɛ yɛso y’otshumano la mpoposanyɛ. Mbala kɛkɔ kɛmɔ, totateyɛka ndjingela nsanghanyɛ yɛso y’Akristo, nsanghanyɛ yɛ nkekete la yɛ rɛjɔ má lotshimbo lɔ video kɔnfɛransɛ. Totateyɛka lonkina mpoposanyɛ má enkanda la má telefɔnɛ. Yehova atshɔkɔlaka welo wɛso w’isile. Wa filialɛ efula watomaka alapɔlɔ wa wɔlɔ efula wɛnyɛ djɛ lofulo l’ansakodji lohandaka. Lá nsɔsɔlɔ, anto efula wapomanaka l’akambo wakɛmbɛ efula l’eleko kɛsɔ.—Lenda ipapango “ Yehova atshɔkɔlaka olemo wɔso w’ipoposanyɛ.”

16. Nkambo djɛkɔnge dj’okokaso ndashikikɛ?

¹⁶ Anto amɔtshi wakoka nkanela ambɔ olonghanyelo woyalaka l’okoso wombotamba elelo lá winá w’opela. Koko mbala la mbala angɛnamake papoo ente, ɛlɔndjɛlɔ k’owaso kelekɔ kɛ balo. (Mat. 11:19) Edjinge winá w’ɔtɔnɔlaso lá yopo yɛ la ngandji yɛ Yeso ɔlɔndjɛnde enkambi wɛnde, iso ndashikikɛka ente ayale kɛkɔnge kekoka ntokomelá l’etsho weyaye, Yehova nya Wɔnande wɔ ngandji wangoyala esanga laso.​—Wala Hebero 13:5, 6.

17. Oyawokɛ ngetemo lá wopo w’okambɛ l’ɛlɔndjɛlɔ kɛ Yeso?

¹⁷ Ɔsɔngo mpeyi k’okotshɛso kɛ nkamba l’ɛlɔndjɛlɔ kɛ Ndɔndji kɛso Yeso! Tolekɔ l’olonghanyelo wombovukola enkeka enkfumɔ welendana la etepela, tɔkɔlɛ, la engidji. Tolesama lá nyuma wɔlɔ efula edjinge tolekɔ la mpeko djɛ wɔlɔ efula djetokotshɛ́ djɛ nkotshɛ olemo wɔso w’ipoposanyɛ. Onto onkfumɔ wɔ l’anteyi kɛso alakanyema djɛ ndɔta lonto lɔ bango la djɛ nkɔpana l’anteyi kɛso. Tolekɔ la donga nkfumɔ djɛ ndjala l’onfuno lá wopo wɔ Yeso oyɛnde ndɔndji kɛso!