Yeso apoposanyɛki losango lɔ vu. Koko, lá mbamba kɛmɔtshi, nde ashimelaka apɔstɔlɔ wande ante: ‘Nyotakanelake ente ndjɛka ndila vu lá looko, lemi ndjɛka ape ndila vu, koko ndjakalaka lokfula lɔ mbandji. Ladjikɛnde ndjɛka ndila djatɔnelo l’antenyɛ wɔna mpame nya papa kɛnde, wɔn’omoto la nyɔ kɛnde edjinge l’antenyɛ omoto wombotshukama l’okilo wɔnde w’omoto.’ (Mat. 10:34, 35) Yeso ndakɔpɛ ntepela ante nge?

Yeso atakɔpá nkakitola ase nkfumbo, koko nde ewaki ante elakanyelo wɛnde wengila djatɔnelo l’ankfumbo imɔtshi. Djɛkondeke wanɛ wakombola nkoma ambeki wa Kristo la ndongola batisimo ladjɛ nsipisoyɛ ambɔ lá mbamba imɔtshi ankfumbo yɛwɔ nkoka ndaatona. Ntsha wambopomana l’onanyelo me wome kana wadji kana koko me ase nkfumbo ankina, iwɔ nkoka ndjala l’okakasano wɔ ntshikala la nkɔmano t’elakanyelo wɛ Kristo.

Bible nkembɛka Akristo djɛ ‘ndjintasɛ vu l’anto ankfumɔ.’ (Ɔrɔ. 12:18) Koko elakanyelo wɛ Yeso nkoka ndjala etengo ‘lokfula lɔ mbandji’ lá nkfumbo imɔtshi. Kɛsɔ nanghemaka winá wɔ ose nkfumbo ɔmɔtshi awolande elakanyelo wɛ Yeso ko ase nkfumbo ankina wambootona kana wambotateyɛ ndoonanyɛ. Lá mbamba kɛ nghɔsɔ, boto, ntepela ente anto welá mvulu kɛkɔ nkomaka ‘antonyi’ wa kanga lombeka akambo wa nsɔsɔlɔ.​—Mat. 10:36.

Ambeki wa Kristo wa wiká l’ankfumbo yembokakitɔná lá wayi wa ntolo wangopomanake mbala imɔtshi l’akambo w’ila ngandji kɛwɔ te Yehova la te Yeso l’ohemba. Ndjɔmbɔmba, boto mɔtshi djepalekɔ́ andjawodji nkoka ndaatshinda la wolo djɛ nangha fɛtɛ imɔtshi y’ɛtɛmwɛlɔ. Winá wohembamawɔ, onto wɔkɔna w’oyɛwɔ ladjɛ nsasangɛ? Yeso atepelaka ante: ‘Onto onkfumɔ woka papa kɛnde kana nyɔ kɛnde ngandji ndeka k’ondjokande apɛdje le lemi.’ (Mat. 10:37) Lá nsɔsɔlɔ, Yeso atakɔpa ntepela ante djɛ ndjawolama me nde, ambeki wande wapakoke nkɔpa ambotshi wawɔ efula. Koko, ndaalakanyɛka nde wopo wɔ nshikikɛ kɛnɛ keleka ndjonyi lá mbiko yɛwɔ. Ntsha ose nkfumbo ɔmɔtshi wopalekɔ ondjawodji ananyɛ welo w’ilaso djɛ ntɛmɔla Yehova, tongokindjɛ ndɔɔkɔpa, koko iso nsipisoyɛka ente ngandji k’okaso Ndjambe ndeke lolekɔ́ l’edjena kɛ ntondo.

Ape l’ehamo, onanyelo wɔ me nkfumbo nkoka ntokiyanyɛ efula. Koko, ambeki wa Yeso ladjɛ mvungɔka etepala wɛnde wɛnɛ: ‘Onto onkfumɔ wopawola mbɛmba otamba wɔnde wɔ ndjolo la wopankilika apɛdje le lemi.’ (Mat. 10:38) Lá etepela enkina, Akristo ndɔsaka onanyelo wɔ me ase nkfumbo etengo etenyi kɛ ndjolo kɛ Akristo oyɛwɔ ladjɛ nkfulumeyɛ l’ɛkɔpa. Lá winá wɔk’ɔmɔ, iwɔ ndjalaka la nkongi ambɔ nanghedji djɛwɔ djɛ wɔlɔ nkoka ndotshinda ase nkfumbo yɛwɔ djɛ ntshikitanyɛ ikanyi edjinge ndjawola losango lɔ Bible.—1 Pɛ. 3:1, 2.