Papa kɛmi ayalaki ikokolo l’ɛkɛlɛsiya kɛ yetaka ambɔ Eglise Unie du Canada, djɛkondeke mbengo inkfumɔ nde atotomaki lemi isa nkaana kɛmi tá Nkalasa kɛ lofu lɔ lobengo kɛ yalakanyɛka dɛngɛ l’etolo kɛkɔ, ko m’ɔkɔngɔ, tatshɔki isande tá misa l’eshidji 11:00. La nkɔlɔ, tatshɔki isa nyɔ kɛso tá Mvulu k’Onkfumi. Takokaki nyɛna otshikitano wolekɔ́ l’atenyɛ ntolo mpe djɛsɔ.

Nyɔ kɛmi ashimelaki tolongo tɔnde tɔ wɔlɔ efula Bob nya Marion Hutcheson, akambo wa nsɔsɔlɔ wa ndeke, ko wayɛka ndokoma Ewakɛ wɛ Yehova. Lá 1958 Hutcheson nya wadjɛnde wantɔlaka lemi isa wana wawɔ w’ampame asato tá Losanghanyɛ l’ekekete l’Ewila efula lɔ etsho enanɛyi, loyalisá l’ɔtɛ wɔ djoyi ante: La Volonté Divine lá Ngando kɛ New York. Lambosipisoyɛ winá wɔsɔ welo wɛ yile djɛ ntɔla lemi tá losanghanyɛ l’ekekete lɔsɔ, koko losanghanyɛ lɔkɔ lolekɔ l’anteyi k’akambo waleká wɔlɔ wovungɔmi lá lowiko lɔmi.

L’ɛnɔnyi wɛ mayalaka l’ɛnɔnyi djomi l’ɛmɔtshi, tawikaki lá fɛrmɛ kɛmɔtshi kɛ masasangaka mbongola anyama. Ndɔsaka nkano djɛ nkoma veterinɛrɛ. Nyɔ kɛmi ashimelaka ikokolo imɔtshi yel’otshumano wɔso nkambo djɛsɔ. Nde amvungolaka la ngandji k’enkfumɔ ante towika ‘l’etsho w’ekomo’ edjinge andjopolaka wopo wɔ ndjingela nkalasa k’inivɛrsite l’ilá k’ɛnɔnyi efula yakoke ndjala l’eposelo ɛmɔtshi tá djokanelo djɛmi la Yehova. (2 Ti. 3:1) Eposelo weyalisá la nkambo djɛsɔ nde, ndɔsaka nkano dj’ipa ntshɔ t’inivɛrsite.

 Koko ndawopolaki kɛnɛ kɛmonghonangha ntsha lamboshiyɛ nkalasa k’imanite. Kaanga maposaka t’olemo w’ipoposanyɛ mfu yɛ mpɔsɔ la yɛ mbengo inkfumɔ, ntasasangaki l’olemo w’ipoposanyɛ, djɛkondeke motakɔpaki ndjala yat’ekalo. Lá winá wɔsɔ, papa kɛmi nya ankfunɛnde wátayalaki ewakɛ wɛ Yehova wankembɛki djɛ lemi nkamba lá kɔpanyi kɛmɔtshi kɛ lomo efula keyalaki lá Toronto. Papa kɛmi k’ilɛngɛ ayalaki onto w’ekekete lá kɔpanyi kɛsɔ, djɛkondeke mawola olemo wɔsɔ.

Lá Toronto, ndjɛka ndapɛyɛ efula l’olemo la ndjɛka ndoyala la djokanelo l’anto wapakambela Yehova, ko kɛsɔ ketampɛyɛki mbamba kɛ ndjingelaka nsanghanyɛ la mpoposanyɛka mbala la mbala. Má bango l’intasɛki isa ndoyi kɛmi kɛ mpami ketayalaki Owakɛ wɔ Yehova, koko m’ɔkɔngɔ wɔ nde mvɔ, ndjalaka la djonyi djɛ mpona edjena kenkina kɛ ntoyala.

Hutcheson nya wadjɛnde, wanɛ wantɔlisá tá losanghanyɛ l’ekekete lá 1958, wayalaki etengo ambotshi wami. Iwɔ wandjetaka djɛ lemi t’intansɛ lawɔ lákawɔ, edjinge wankotshɛka djɛ lemi mfula lá nyuma. Ndongolaka batisimo lá 1960, esanga isa wɔnawɔ John. John awangaka nkamba etengo yat’ekalo, ko kɛsɔ kenkembɛka djɛ lemi ndapɛyɛ l’olemo w’ipoposanyɛ. Wananyɔ wel’otshumano wɛnaka efulelo wɛ mananghe, ko wayɛka ndɔnsɔna etengo ilɔndjɛ yɛ Nkalasa k’Olemo wɔ Teokrasi. a

Lá 1966, ntshukanaka isa Randi Berge, yat’ekalo y’osasalo yeyalaki entshupa djɛ ntokamba l’edjena k’oyɛwɔ la djonyi dj’okotshɔ. Onami wɔso w’edjingadjinga atilaki yimba efula, atokembɛka dj’iso ntokotshɛ́ l’otshumano wɔ Orillia, lá Ontario. Djɛkondeke tɔsɛkɔka t’eteyi.

Ngo isakome lá Orillia, nkomaka yat’ekalo yɛ lotshinda etengo Randi. Osasalo wɔnde wɔmpɛyɛka nsɔsɔlɔ mposɛ kɛ ndjala etengo nde! Ladjikɛnde ndapɛyɛka l’oloko ɔmɔ l’olemo wɔ yat’ekalo, mbaka osasa woyɛka má nkamba la Bible la ma nyɛna wopo wɔ anto awolawɔ akambo wa nsɔsɔlɔ. Ɔsɔngo osasa wɔ sawa má nkotshɛ́ wadji la wome ɔmɔtshi wayalaki lá Orillia dj’iwɔ nangha etshikitano lá mbiko yɛwɔ edjinge nkoma enkambi wɛ Yehova.

Winá wɔ satshu tá mbembo kɛmɔtshi lá Toronto, nyɛnanaka isa Arnold MacNamara, ɔmɔtshi l’anteyi kɛ wananyɔ walɔndjɛki Betɛlɛ. Nde andjopolaka ntsha tɔngɔkɔpa nkamba etengo tat’ekalo totshikitanyi. Nkadjimolaka mbala kɛkɔ kɛmɔ ente: “Ee! Tongawola ntshɔ edjena k’enkfumɔ k’ototomanyo nyime ngo tá Québec!” Ntshindamaka má tokanyi tɔ nyɛtshi toyalaki l’ase Canada watepelaki Anglɛ lá nkambo djɛ ovungusano woyalaki lá Quebec, lá prɔvinsɛ k’iyatepelaka Falase. L’etsho wɛsɔ, anto watɔmbɔkwelaki ewandji wɛ mbandja edjinge wahonaki djɛ owila wɔ Québec mba lotshungɔ mé ase Canada.

Arnold akadjimolaka ante: “L’etsho wɛnɛ, ngo lá Québec toko ndeke Betɛlɛ otomande t’at’ekalo totshikiyanyi.” Ndjawolaka mbala kɛkɔ kɛmɔ djɛ ntshɔ t’eteyi. Lashiyɛki ndjewa ente Randi ayalaki la mposɛ k’iso ntokamba l’eteyi. M’ɔkɔngɔ, ndjɛka ndosipisoyɛ ente ɔsɔ ayalaka nkano mɔtshi djelekisá wɔlɔ lá lowiko lɔso!

M’ɔkɔngɔ wɔ iso nshiyɛ ndjeka Falase l’ilá kɛ mbengo itano, lemi isa Randi la wɔnanyɔ onkina nya wadjɛnde totshɔka tá Rimouski, tá kilɔmɛtrɛ 540 lá Nord-est kɛ Montreal. Koko toyalaka ngo l’akambo efula wa ndjeka, kɛsɔ kɛnamaka papoo lá losanghanyɛ lɔmɔtshi winá wɔ mawalaka ndjewo imɔtshi. Ntepelaka ente lá losanganyɛ lɔso l’ekekete loyaye, tongoyala la “wa delege efula y’autruche” l’edjena kɛ ntepela ente “wa delege yemá Autruche.”

Lá Rimouski, isanɛyi kɛkɔ tayalaki esanga l’ankaana inɛyi y’osasalo efula ndjila edjinge wɔnanyɔ Huberdeaus nya wadjɛnde la wana wawɔ w’amato ape. Wɔnanyɔ Huberdeaus nya wadjɛnde wafutelaka mvulu k’ekekete efula, ko tat’ekalo esambele t’intasɛki l’eteyi wawɛkaki nkfuta djɛ mfutela mvulu kɛsɔ. Tetaki mvulu kɛkɔ ente mvulu kɛ mpɛmbɛ ladjikɛnde k’ayalaki la mokubu wɔ mpɛmbɛ. Mbala efula tayalaki anto 12 kana 14 lá mvulu kɛsɔ. Etengo isayalaka t’atekalo totshikitanyi, lemi isa Randi tapoposanyɛki la nkɛsɛ, m’ɔkɔngɔ wɔ midi, edjinge l’akɔlɔ, djɛkondeke tayalaki l’osasa wɔ ndjala l’onto ɔmɔtshi wototshindjeyɛ t’olemo w’ipoposanyɛ, ayale kaanga la nkɔlɔ djɛ ntshitshi efula.

Toyɛka ndoyala la djokanelo djɛ ma ma la tat’ekalo tɔ nkɔmano tɔsɔ ko wakomaka etengo nkfumbo kɛso. Mbala efula t’intasɛki esanga tombodjinga iyɛ kana tayalaki la “lofu l’isalɛka bɛndɛ,” lofu lɔ sakatshɛka la sayakalaka nkete djɛkɔ djɛ ndɛ esanga. Wɔnanyɔ ɔmɔtshi l’anteyi kɛso ayalaki ondjomba, djɛkondeke la nkɔlɔ djɛ lofu lɔ mpɔsɔ tatshumbaki teembo la taminaki esanga.

Anto efula welá Rimouski wakɔpaki ndjeka Bible efula! L’ɛnɔnyi etano, toyalaka l’osasa wɔ nyɛna efula k’ambeki wa Bible wambolongola batisimo. Otshumano wɔso wokomaka l’ansakodji 35.

Lá Quebec, towaka okfumbelo wɔ wɔlɔ efula etengo ansakodji. Tɛnaka wopo wɔ Yehova ndatokotshɛ́ l’olemo w’ipoposanyɛ edjinge lá ehomba wɛso wɛ demba. Má djiko djɛ lasɔ, tekaka djɛ nkɔpa anto efula watepelaki otepela wɔ Falase, otepela wɔwɔ, la nkfumbo djɛwɔ, ko kɛsɔ ketokotshɛ́ka djɛ nkɔpa edjinge nkfumbo nkina.​—2 Kɔ. 6:13.

Ipa la nkanela, Betɛlɛ atɔlɔmbaka dj’iso nsɛkɔ tá ngando kɛ Tracadie, lá onkoko wɔ ɛstɛ kɛ Neauveau Brunswick. Nkambo djɛsɔ djalaka okakasano ladjikɛnde iso má mfuta mfalanga yɛ mvulu ngo bango edjinge ndjokanaka l’anse nkalasa kɛmɔtshi djɛ ndakanyɛka lá winá ɛmɔtshi. Má djiko djɛ lasɔ, ambeki wa Bible amɔtshi wakomaka ansakodji ngo bango ko toyalaka entshupa djɛ mpika Mvulu k’Onkfumi.

Tɔlɔmbaka lobengo l’otondo lá nkambo dj’ɔsɛkwɛlɔ wɔso ko totshɔka ntowembola mbandja kɛkɔ kɛ Tracadie, koko tɛnaka ente ketshikitana otale la Rimouski. Koko tɔsaka nkano ente tongotshɔ, ladjikɛnde Yehova ɔkɔpande nde iso ntshɔ t’eteyi. Tilaka Yehova l’ohemba ko tɛnaka wopo wɔ ndatimeyɛ enkeka  enkfumɔ. (Mal. 3:10) Ladjikɛnde Randi ayalaki la lonyuma lɔ wolo, ikanyi yɛ ndasambɛ, edjinge akɔpaki akambo w’atɔla, totayala l’okakasano wɔ ntshɔ.

Ikokolo imɔ yeyalaki l’otshumano wɔso wɔsɔ nde Robert Ross. Nde nya wadjɛnde Linda yayalaka nde tat’ekalo l’eteyi, ko wɔsaka nkano djɛ ntshikala l’eteyi m’ɔkɔngɔ wɔ botshɔ djɛ wɔnawɔ wɔ ntondo. Kaanga yayalaka la wɔna wɔ daambi l’ɛwɔ, iwɔ watokembɛka efula lemi isa Randi má wopo wolongolawɔ anto, otshilo wɔwɔ, la entete kɛwɔ l’olemo w’ipoposanyɛ.

M’ɔkɔngɔ wɔ iso nkamba ɛnɔnyi epe lá Tracadie, towaka lonkina leeta lɔ sotakanelaki kaanga ndambo, leeta lɔ ntokamba l’olemo w’edjingadjinga. Tokambaka l’edjingadjinga kɛ Anglɛ l’ilá k’ɛnɔnyi esambele, ko masɔ watotomaka t’edjingadjinga kɛ Falase lá Quebec. Onami wɔ distristrikɛ welá Quebec, Léonce Crépeault, ambandolaki efula winá wɔ mapɛyɛka wamba. Koko masɔ nde andjompolaki winá enkfumɔ ente: “Wopo wɔkɔnge wamba wako okokawɔ ndeka nkota eloko?” b Wopo wɔ ndandjilaka yimba nghɔsɔ w’onkotshɛka djɛ wamba wami ndjalaka wɔdju la nkotaka eloko.

Odjito ɔmɔtshi wɔ mawa wovungɔkami winá enkfumɔ nde, odjito wɔ mawa lá Losanghanyɛ l’ekekete l’ewila efula loyalaki l’ɔtɛ wɔ djoyi ante: “Victorieux de la Foi” lonanghemisá 1978 lá Montreal. Nkambaka lá Departɛma djelendaki wayi w’oleelo. Takongelaki djɛ ndongola anto 80 000, la wananghaka nonghanyi kɛ bango kelendana la wayi w’oleelo lá lɛdji lotshikitanyi la wopo wɔ yananghaka ntondo. Akambo ankfumɔ wayalaka ngo wa bango: nkete djɛ nkfuko, nkete djɛngɔlɛmaka lofu la lofu edjinge yopo yɛ nkatshɛ. Tayalaki la frigo yɛ nkekete etengo 20 yetakambaki wɔlɔ lá winá ɛmɔtshi. Lá ntondo kɛ lofu lɔ ntondo lɔ losanghanyɛ nkoka, totawa kaanga mbamba kɛ ndjingela lá stadɛ tii la midi k’otsho, m’ɔtɛ wɔ etombo ɛmɔtshi wenanghemisá l’eteyi. Edjinge toyalaka ladjɛ mbanga nkatshɛ lá ntondo kɛ winá nkɛ! Tɔlɛmbaka efula, koko mbaka olakanyelo me winami wakambaki la lemi má wopo wɔ yakambaka l’entete, wɔ yombopakisɔ́ akambo, la wɔ yewaka mposɛ akambo w’atɔla. Eposelo weyalisá má nkambo djɛsɔ nde, toyɛka ndoyala tolongo tɔ ma ma tii lɔɔko kɛnɛ. Ɔsɔngo osasa woyalisá laso djɛ nangha losanghanyɛ lɔ djonyi lɔsɔ lá Quebec, ngando kelekaki lɔnyɔkɔ l’ɛnɔnyi wɛ 1940 la 1950!

Mbaka elakanyelo efula mé winami tɔlɔndjɛ lá losanghanyɛ l’ekekete lonanghemisá lá Montreal. Ɔnɔnyi ɔmɔtshi, David Splane, kanga lolekɔ́ winá wɔsɔ ose Iloyi yɛ lɔndjɛ, ayalaka ilɔndjɛ yɛ losanghanyɛ lɔmɔtshi  l’ekekete. Lá losanghanyɛ l’ekekete lɔwɔlamisá, wandɔmbaka djɛ nkamba ngo olemo wɔkɔ, David ansukaka efula.

Lá 2011, m’ɔkɔngɔ w’iso nangha ɛnɔnyi 36 l’olemo w’edjingadjinga, wandjetaka djɛ ntokamba etengo wetsha lá Nkalasa kɛ Tokoko tel’Otshumano. Ngo l’ɛnɔnyi epe toko, lemi isa Randi tetamaka l’ambeto yetshikitanyi 75. L’ekomo kɛ mbengo inkfumɔ, tokokolo wayalaki la djedjɛ lombombe ladjikɛnde wɛnaki wopo wɔ Iloyi yɛlɔndjɛ ndaseyɛka ehomba wɛwɔ welá nyuma.

M’ɔkɔngɔ, ndakanyɛka lá Nkalasa kɛ Ansakodji y’Onkfumi. Ambeki walɛmbaki efula m’ɔtɛ wɔ akambo efula wayalaki lá nonghanyi kɛsɔ: w’intasɛki lá nkalasa etengo winá esambele lofu l’otondo, wananghaki wa devoire winá esato akɔlɔ ankfumɔ, edjinge onto l’onto ayalaki l’edjito esato kana ɛnɛyi wɛ nangha lá lombengo la lombengo. Lemi la wetsha enkina tasipisoyɛka ente wapangokoka nangha akambo ankfumɔ wasɔ ipa l’okotshɔ wɔ Yehova. Langovungɔke winá enkfumɔ wopo wɔ ambeki yakamɔka winá wɔ yɛnaka ambɔ má ndawɛkɛ te Yehova, wayaIaki l’akoka wa nkotshɛ akambo efula ndeka wopo wɔ yakanelaka.

Wopo wɔ nyɔ kɛmi ndilaka anto ankina yimba akotshɛka ambeki wande wa Bible djɛ mfula lá nyuma edjinge akotshɛka kaanga papa kɛmi djɛ ntshikitanyɛ ikanyi yeyalaki lande tá akambo wa nsɔsɔlɔ. Etsho esato m’ɔkɔngɔ wɔ nyɔ kɛmi mvɔ, papa atokamoyɛka má ndjɛ ndekameyɛ djamba djelá ntshandjawala lá Mvulu k’Onkfumi, edjinge nde akindjɛka ndjingela nsanghanyɛ ɛnɔnyi 26 wɛwɔlamisá. Kaanga papa kɛmi ndotalongola batisimo, tokokolo wanshimelaka ambɔ nde ayalaki winá enkfumɔ onto wokomaki ntondo lá nsanghanyɛ mbengo inkfumɔ winá enkfumɔ.

Nyɔ kɛmi ayalaka lonkina ndjɔmbɔmba kɛ wɔlɔ efula te wana wande. Ankaana yɛmi isato yankfumɔ kɛkɔ wakambela Yehova la nkɔmano nkfumɔ esanga la wame wawɔ. Ipe wankamba lá Betɛlɛ, ɔnɛ lá Portugal, ɔnɛ lá Haïti.

Winá wɔsɔ lemi isa Randi tokamba etengo tat’ekalo totshikatanyi lá Hamilton, l’Ontario. Winá wɔ sakambaka l’olemo w’edjingadjinga, tasasangaki ntshindjeyɛ anto ankina djɛ ntolenda mbembo yɛwɔ yɛ bango l’ambeki wawɔ wa Bible. Koko winá wɔsɔ tolekɔ l’osasa wɔ nyɛna efulelo w’ambeki waso isɔmɛlɛ. Edjinge winá wɔ sombokoma tolongo la wananyɔ l’ankaana yɛso yɛl’otshumano wɔso wɔ bango, iso mbaka lokembo má nyɛna wopo wɔ Yehova akotshɛ́nde lá deko djɛ wɔlɔ la lá deko djɛ ndjolo.

Winá wokanelaso akambo ankfumɔ wasɔ, iso ndjalaka la djedjɛ efula lá wopo wɔ anto yatilaka yimba efula. Iso koko l’onkoko wɔsɔ, tonangha la wolo djɛ nyɛnyɛ ente iso ‘ndakiyanyɛka l’oloko ɔmɔ’ lá nkambo dj’anto ankina, má ndakembɛ dj’iwɔ nkambela Yehova lá lɛdji lokokawɔ. (2 Kɔ. 7:6, 7) Ndjɔmbɔmba, lá nkfumbo kɛmɔtshi, nyɔ, wɔnande wɔ mpame la w’omoto wayalaka yankfumɔ l’olemo wɔ winá enkfumɔ. Ndjopolaka wome ntsha nde angokanelake ante akoka ndɔsa olemo wɔ yat’ekalo. Nde akadjimolaka ante nde asuka tat’ekalo tosato telá nkfumbo kɛnde. Ko ndowopolaka ente: “Wɛ nkoka ndaasuka ndeka wopo wɔ Yehova asukande?” Ndokembɛka djɛ nde ndɛta osasa wɔ nkfumbo kɛnde owawɔ. Ko masɔ nde akomaka yat’ekalo m’ɔkɔngɔ wɔ ngɔndɔ isamalo.

Lemi isa Randi tongokindjɛ ‘nshimela lɔlɔnga loyaye akambo wa nkamɔ’ walendana la Yehova, edjinge tolekɔ la nkongi ente wangosasanga nkambela Yehova etengo iso okambelaso.​—Yee. 71:17, 18.