1-2. Lá lɛdji lɔkɔnge Okristo oyɛnde etengo mvulu k’ekekete kɛ etajɛ? (1 Kɔrɛtɔ 15:58)

 Lá 1970, wapikaka mvulu kɛmɔtshi k’ekekete kelekɔ́ l’etajɛ 60, lá Tokyo, lá Japon. Anto efula wayawopolaki wopo wɔ mvulu kɛsɔ yakoke ntshikala ndii lá ntondo k’efula k’atshikito wa looko wananghemaká lá ngando kɛsɔ. Kɛkɔnge kenanghisá ampiki djɛ mvulu kɛsɔ ntshikala ndii la ntondo k’atshikito wa looko wasɔ? Ampiki wapikaka mvulu kɛsɔ wɔlɔ efula la wananghaka djɛ kɛkɔ ntshikitaka lá winá w’onanghema atshikito wa looko dj’ipa nkfɔ. Akristo walekɔ etengo mvulu k’ekekete k’etajɛ kɛsɔ. Lá lɛdji lɔkɔnge?

² Okristo ladjɛ ndjala l’ikanyi yɛdje l’antenyɛ ntshikala ndii la ndjala entshupa djɛ ndjekesanela l’akambo. Nde ladjɛ mpikama ndii edjinge ndashikikɛ djɛ nɛmɛyɛ winá enkfumɔ ɛlɛmbɛ wɛ Yehova. (Wala 1 Kɔrɛtɔ 15:58.) Nde ndjalaka ‘entshupa djɛ nɛmɛyɛ’ edjinge apakakolaka ɛlɛmbɛ wɛ Yehova. L’onkoko onkina, nde ladjɛ ndjala ‘l’ekanedji kɛ wɔlɔ,’ kana ndjala entshupa djɛ ntshikitanyɛ ikanyi yɛnde ntsha ɔlɔmbamawɔ nde nghɔsɔ. (Dja. 3:17) Okristo wombeka djɛ ndjala l’ikanyi yɛdje nanghaka la wolo dj’ipa ndjala wayi wolo efula kana yawolawola. Lá djamba djɛnɛ tɔngɛna wopo wɔkɔnge w’okokaso mpikama ndii. Tɔngɛna lonkina topo 5 tɔ Satana ohonakande nkitshakitshɛ nkano djɛso la wopo w’okokaso mpikama lá welo wɛnde.

3. Ɛlɛmbɛ wɛkɔnge wɛ Ondjidji w’Ɛlɛmbɛ w’Ekekete w’otanaso lá Elemo 15:28, 29?

³ Etengo oyɛnde Ondjidji w’Ɛlɛmbɛ w’Ekekete, Yehova angɔpɛyɛke  winá enkfumɔ enkambi wɛnde ɛlɛmbɛ wokama papoo. (Iza. 33:22) Ndjɔmbɔmba, iloyi yɛ lɔndjɛ yɛ l’ɛtɛndɔ kɛ ntondo wɛnyɛka topo 3 tɔ Akristo oyɛwɔ ladjɛ ntshikala ndii: 1) má ntona ɔtɛmwɛlɔ wɔ tosakandole, ko ntɛmɔla ngo Yehova nyɔmɔlɛ, 2) má nɛmɛyɛ ekina kelekɔ́ la ekila, la 3) má nɛmɛyɛ ɛlɛmbɛ welá djiko welendana la nanghedji welá Bible. (Wala Elemo 15:28, 29.) Wopo wɔkɔnge lɔɔko kɛnɛ Akristo otshikalawɔ ndii l’akambo 3 wasɔ?

4. Wopo wɔkɔnge w’okokaso malema ngo Yehova toko? (Ndjiso 4:11)

⁴ Iso ntonaka ɔtɛmwɛlɔ wɔ tosakandole, ntɛmɔlaka ngo Yehova. Nde apɛyɛka ase Isariyɛlɛ ɔlɛmbɛ wɔ ndomalemaka ngo nde. (Mvu. 5:6-10) La koko winá wɔ ndahembama me Djabolo, Yeso ɛnyɛka ante iso ladjɛ ntɛmɔla ngo Yehova toko. (Mat. 4:8-10) Djɛkondeke, topakoke ntɛmɔla tosakandole. Topakoke lonkina ntɛmɔla anto, ayale ewandji wɛ ntolo, wɛ pɔlitikɛ, kana anto walekɔ́ la lomo l’andja wanɛ, ndjɔmbɔmba antayi yɛ bale kana y’etombo enkina, má ndawɔsa etengo tondjandjambe. Iso ntshikalaka ngo l’onkoko wɔ Yehova la ndɔtɛmɔlaka ngo Nde, ‘kanga lotongisá nkete nkfumɔ.’​—Wala Ndjiso 4:11.

5. Ladjikɛnge oyɛso ladjɛ nɛmɛyɛ ɔlɛmbɛ wɔ Yehova w’olendana la ekina kelekɔ́ la lowiko edjinge l’ekila?

⁵ Iso nɛmɛyɛka ɔlɛmbɛ wɔ Yehova w’olendana la ekina kelekɔ́ la lowiko edjinge l’ekila. Lamo? Ladjikɛnde Yehova ntepelaka ante ekila nde lowiko, opapɛyɛ wɔ ntshina efula w’imende. (Lew. 17:14) Winá wɔ Yehova ndapɛyɛ anto wa ntondo lotshungɔ lɔ ndɛ nyama, nde áshimelaka dj’ipa ndɛ ekila. (Ewa. 9:4) Nde ahetolaka ɔlɛmbɛ wɔsɔ winá wɔ ndapɛyɛ ase Isariyɛlɛ Ɛlɛmbɛ wɛ Mɔsɛ. (Lew. 17:10) Edjinge nde alɔndjɛka Akristo wal’ɛtɛndɔ kɛ ntondo djɛ nshimela Akristo ankfumɔ djɛ ‘ntona . . . ekila.’ (Ele. 15:28, 29) Iso ntshikalaka ndii má nɛmɛyɛ ɔlɛmbɛ wɔsɔ winá w’ɔsaso akano walendana la bɔki. b

6. Welo wɛkɔnge w’oyɛso ladjɛ ndjila djɛ nɛmɛyɛ ɛlɛmbɛ wɛ Yehova welá djiko welendana la nanghedji?

⁶ Iso nkilikaka la nkɔmano nkfumɔ ɛlɛmbɛ welá djiko wɛ Yehova welendana la nanghedji. (Heb. 13:4) Má nkamba l’etepela wɛ djingingi wekota oloko, ɔpɔstɔlɔ Poolo ntolakaka djɛ ‘ndjaka’ ntenyi djɛso dj’alemba, ntepela ente, ndɔsa akano wa wolo djɛ ndjaka mposɛ yɛ nyɛtshi yɛ demba. Iso ndjewɔka djɛ ndenda kana nangha ekete kenkfumɔ kekoka ntotshinda djɛ nangha wayi wa mbindo wa ntshɛngi. (Kɔl. 3:5; Djɔ. 31:1) Winá w’ohembamaso djɛ nangha nkambo mɔtshi djɛ nyɛtshi, iso ntonaka ikanyi kana ikakambo inkfumɔ yekoka ntshita djokanelo djɛso la Ndjambe.

7. Nkano djɛkɔnge dj’oyɛso ladjɛ ndɔsa, ko lamo?

⁷ Yehova ntɔlɔmbaka dj’iso ndjala la ‘dilɛmɛlɔ djɛ m’anse k’oloko.’ (Ɔrɔ. 6:17) Ɛlɔndjɛlɔ kɛnde kengoyalake winá enkfumɔ ngo lá wɔlɔ wɔso, la ɛlɛmbɛ wɛnde wepakakolama. (Iza. 48:17, 18; 1 Kɔ. 6:9, 10) Iso nanghaka la wolo djɛ nsasangɛ Yehova edjinge ndjala l’ikanyi imɔ la ondjombe, kanga lotepelisá ante: ‘Lemi ndɔsaka nkano djɛ nɛmɛyɛka ɛlɛmbɛ wɛko winá enkfumɔ, tii l’ekomo.’ (Yee. 119:112) Koko, Satana nanghaka la wolo djɛ ndɛmbɛ nkano djɛso. Topo tɔkɔnge tokambakande la tɔkɔ?

8. Wopo wɔkɔnge Satana okambakande la lɔnyɔkɔ djɛ ndɛmbɛ nkano djɛso?

⁸ Lɔnyɔkɔ. Djabolo nkambaka la onanyelo wɔ lá ndemba la wɔ lá yimba djɛ ndɛmbɛ nkano djɛso. Okoma wɔnde nde wɔ ‘ntɔlɛ,’ ntepela ente ntshita djokanelo djɛso la Yehova.  (1 Pɛ. 5:8) Akristo wal’ɛtɛndɔ kɛ ntondo wɛnaka ndjolo, wakfusamaka, la wayakemaka ngo m’ɔtɛ wɔ nkano djɛwɔ djɛ mpikama ndii. (Ele. 5:27, 28, 40; 7:54-60) Satana akindjɛ nkamba la lɔnyɔkɔ tii lɔɔko kɛnɛ. Nkambo djɛsɔ djɛnama papoo má wopo w’onanghelawɔ wananyɔ l’ankaana yɛso yelá Russie la yelá ewila enkina akambo l’enkfukfulu la má wopo w’antonyi ɛnyɛwɔ wananyɔ l’ankaana ndjolo lá topo totshikitanyi.

9. Kɔpɛyɛ ndjɔmbɔmba kɛnyɛ djonyi djɛ ndjewɔ djanya dj’emfumfune.

⁹ Djanya dj’emfumfune. Má djiko djɛ onanyelo welá demba, Satana nkambaka edjinge la ‘topo tɔ mayɛlɛ’. (Ɛfɛ. 6:11) Tɔkɔsa ndjɔmbɔmba kɛ wɔnanyɔ wetawɔ Bob, kanga iyate epaso k’ekekete efula l’opitalo. Nde ashimelaka dɔktɛrɛ ante ayale nkambo djɛkɔnge djengoposá, nde apawolaki ndjila ekila. Dɔktɛrɛ djɛsɔ awolaka djɛ nɛmɛyɛ nkano djɛnde. Koko, lotsho lá ntondo k’iwɔ ndowata epaso, dɔktɛrɛ nkina ayɛka ndolenda Bob m’ɔkɔngɔ wɔ nkfumbo kɛnde nkalɔ tá mbandja. Nde ashimelaka Bob ante ɛnama etengo wapongokila ekila koko ngo ndjala la ekila entshupa ntsha wembooyala djonyi. Mbala imɔtshi dɔktɛrɛ djɛsɔ akanelaki ante Bob angotshikitanyɛ ikanyi yɛnde winá wɔ ase nkfumbo kɛnde yopalekɔ entshupa lande. Koko Bob atshikalaka ngo ndii, atepelaka ante apongawola ndjila ekila ayale nkambo djɛkɔnge djekoka mposa.

10. Ladjikɛnge ekanedji kɛ wana w’anto oyɛwɔ ilonga?(1 Kɔrɛtɔ 3:19, 20)

¹⁰ Tokanyi tɔ wana w’anto. Ntsha tɔmbɛna akambo etengo wana w’anto, tokoka ntona Yehova l’ɛlɛmbɛ wɛnde. (Wala 1 Kɔrɛtɔ 3:19, 20.) Mbala efula ‘balo djɛ andja wanɛ’ ntshindaka anto djɛ nsamba nɛmɛyɛ Ndjambe. Akristo amɔtshi wayalaki lá Pɛrgamɛ la lá Tiatirɛ wadjimbamaka me anto waadjingaki wananghaki wayi wa mbindo wa nsanga mbeto la watɛmɔlaki tosakandole. Yeso apɛyɛka ntshumano djɛkɔ mpe alako wa wolo lá wopo w’iyawolaka wayi wa mbindo wa nsanga mbeto. (Ndj. 2:14, 20) Edjinge lɔɔko kɛnɛ, tongotshindamake la wolo djɛ ndjawola tokanyi tɔ nyɛtshi. Boto la bɔndɔ djɛso nkoka nangha la wolo djɛ ntawoyɛ ambɔ tomboleka akambo wolo la nkoka ntotshinda djɛ mpendola ɛlɛmbɛ wɛ Ndjambe. Ndjɔmbɔmba, iwɔ nkoka ntoshimela ambɔ lako nyɛtshi sasangɛ mposɛ yɛso la ente ɛlɛmbɛ wɛ Bible welendana la nanghedji wembohetá lohowe.

11. Dj’iso ntshikala ndii, kɛkɔnge k’oyɛso ladjɛ ndjewɔ?

¹¹ Lá winá ɛmɔtshi, tokoka ndɛna ente ɛlɔndjɛlɔ kɛ Yehova ɔtɔpɛyɛnde kepokama kɔɔ. Iso nkoka kaanga ndohembama djɛ ‘ntamba akambo wambofunamá.’ (1 Kɔ. 4:6) Ewandji wɛ ntolo weyalaki lá etsho wɛ Yeso wananghaki mpekanto kɛsɔ. Iwɔ wakfɛki ɛlɛmbɛ wɛwɔ yɔmɛlɛ l’ɛlɛmbɛ wɛ Ndjambe, ko kɛsɔ kekomɛka ɛlɛmbɛ edjito te anto. (Mat. 23:4) Yehova ntɔpɛyɛka ɛlɔndjɛlɔ kɛnama papoo má lotshimbo lɔ Otepela wɔnde la wɔ olonghanyelo wɔnde. Topalekɔ l’elonga kɛ ndjakfɛ ɛlɛmbɛ enkina lá djiko djɛ ɛlɛmbɛ w’ɔtɔpɛyɛnde. (Woo. 3:5-7) Djɛkondeke, topakoke ntamba kɛnɛ kembofunama lá Bible kana ndjilela winaso andjawodji ɛlɛmbɛ lá kɛnɛ kɛ Bible ndopatɔlɔmbɛ.

12. Wopo wɔkɔnge Satana okambakande la ‘wayi w’anyanya wa lodjimbo’?

¹² Lodjimbo. Satana nkambaka la ‘wayi w’anyanya wa lodjimbo’ la ‘akambo w’anyanya wel’andja wanɛ’ djɛ ndjimbola la nkampola anto. (Kɔl. 2:8) L’ɛtɛndɔ kɛ ntondo, wayi w’anyanya wa lodjimbo wasɔ iyayalaka nde wayi wa filozofi wapikamaki lá tokanyi tɔ wana w’anto, elakanyelo w’ase Juda wetaposakí má Afunelo la elakanyelo w’ɛnyɛki ente Akristo ladjɛ nɛmɛyɛ Ɛlɛmbɛ wɛ Mɔsɛ. Akambo wasɔ wayalaki lodjimbo ladjikɛnde wimɛki tokanyi t’anto me Ikɔkɔ  yɛ balo djɛ nsɔsɔlɔ, Yehova. Lɔɔko kɛnɛ, Satana akamba la nsango yemá radio la televisiɔ, edjinge la rɛso sosio djɛ ntshanghanyɛ akambo wapewama ɔtɛ l’ekolo la nsango y’engolo yɛ me ewandji wɛ pɔlitikɛ. Tokaka nsango efula y’engolo yɛ nghɔsɔ lá opela wɔ COVID-19. c Ewakɛ wɛ Yehova wekameyɛki ɛlɔndjɛlɔ kɛpɛyɛ olonghanyelo wɔso watayakiyanyɛki efula etengo anto wayapɛyɛ lá nsango y’engolo yɛ nghɔsɔ.​—Mat. 24:45.

13. Lamo oyɛso ladjɛ ndalama má akambo wɛkɔla yimba?

¹³ Akambo wɛkɔla yimba. Topakoke nyimɛ yimba má ‘akambo waleká djonyi.’ (Flp. 1:9, 10) Akambo wɛkɔla yimba nkoka ntɔsɛla winá efula w’okokaso nangha akambo w’akoka ntoyakala wapɔ. Akambo w’onanghakaso lá lowiko, ndjɔmbɔmba oleelo, ɔnwɛlɔ, etombo la elemo wela demba, nkoka ndokoma akambo w’ɛkɔla yimba leso, ntsha tombawola dj’iwɔ ndjala akambo waleka djonyi lá lowiko lɔso. (Luka 21:34, 35) Lonkina, mfu inkfumɔ tongokake nsango yelendaná l’evungusano wɛ mbandja la akambo wa pɔlitikɛ. Totawolake djɛ ndjɛkɔla yimba yɛso tá akambo wasɔ. Ntsha lako, tokoka ntateyɛ ndɔsa opiko lá wayi wasɔ lá yimba la l’oloko wɔso. Satana nkambaka la topo tonkfumɔ tɔ sotepelisá má djiko l’ikanyi yɛ ndɛmbɛ nkano djɛso djɛ nangha kɛnɛ kelekɔ́ sii. Nyontshɔ tokolenda wopo w’okokaso mpikama lá ntondo kɛ welo w’onanghande wɛsɔ la wopo w’okokaso mpikama ndii.

14. Nkambo djɛkɔnge djekoka ntokotshɛ́ djɛ ntshikala l’onkoko wɔ Yehova?

¹⁴ Kanela lamo ngalambola lowiko lɔko te Yehova la ngalongola batisimo. Wɛ otapolaka wina wasɔ ladjikɛnde okombolaki ntshikala l’onkoko wɔ Yehova. Tɔnɔla ndambo lá kɛnɛ kekokotshisá djɛ ndashikikɛ ente ombisola akambo wa nsɔsɔlɔ. Wɛ owaka balo djɛ djɔ djelendana la Yehova la ofudjɛka ngandji la dilɛmɛlɔ djɛko te nde etengo oyɛnde Papa kɛko kel’olongo. Wɛ oyalaka la djawo te nde ko kɛsɔ kekotshindaka djɛ ndapɛla má evunga wɛko. Oloko wɔko wokotshindaka djɛ ntshika nanghedji djɛ nyɛtshi ko nangha ɛkɔpa kɛ  Ndjambe. Oloko wɔko w’otshitshimaka winá wɔ ngewe ente Ndjambe ambokimeyɛ. (Yee. 32:1, 2) Wɛ otateyɛka ndjingela nsanghanyɛ y’Akristo la mpoposanyɛ akambo wa wɔlɔ wa ngeke le anto ankina. Etengo oyɛ Okristo wombolongolá batisimo winá wɔsɔ, otakɛndɛ lá mboka kɛ lowiko, la ɔmbɔsa nkano dj’ipa nyima má mboka kɛkɔ.​—Mat. 7:13, 14.

15. Lamo oyɛwɔ djonyi ndjekaka la ntɔnɔlaka?

¹⁵ Ekaka Otepela wɔ Ndjambe la tɔnɔlaka l’eteyi. Etengo otamba okokande mpikama la wolo ntsha esisa wɛnde wembopikamá la wolo, iso nkoka ntshikala ndii ntsha djawo djɛso mbopikama la wolo l’Otepela wɔ Ndjambe. Winá wɔ otamba yotafule, ndeke esisa wɛnde yotaleke mpikama la ntshanghana. Winá w’ekaso la w’ɔtɔnɔlaso, iso ndekaka nkɛmbe djawo djɛso la eshikikelo kɛso kɛ ente mboka yɛ Ndjambe ilekɔ wɔlɔ. (Kɔl. 2:6, 7) Tɔnɔlaka lá wopo wɔ alako, ɛlɔndjɛlɔ, la elamelo kɛ Yehova yakotshɛ́ enkámbi wɛnde wɛ l’etsho wɛ ntondo. Ndjɔmbɔmba, Ezɛkiyɛlɛ alendaka la nkɔmɛ nkfumɔ winá wɔ ondjelo ndɛdjɛka ntɛmpɛlɛ kɛ ndɛnyi lá ɛnɛlɔ. Ɛnɛlɔ kɛsɔ kekembɛka Ezɛkiyɛlɛ, la kɛtɔpɛyɛ elakanyelo wɛ wɔlɔ efula lá kɛnɛ kelendana la wopo w’okokaso nɛmɛyɛ ɛlɛmbɛ wɛ Yehova welendaná la etolo kɛ piyɔɔ. d (Ezk. 40:1-4; 43:10-12) Edjinge iso mbaka wapɔ winá w’ɔsaso winá djɛ ndjeka akambo walendaná la etolo kɛ Yehova la winá w’ɔtɔnɔlakaso lá akambo wa lotshimola walekɔ́ lá Otepela wɔ Ndjambe.

16. Wopo wɔkɔnge oloko wolo yalame Bob? (Yeembo 112:7)

¹⁶ Yala l’oloko wɔ ndii. Nkfumi Davidɛ atepelaka ante apatshutshɛki ngandji kɛnde te Yehova lotshinda winá wɔ ndatshumbe ante: ‘Ndjambe, oloko wɔmi wolekɔ ngo ndii.’ (Yee. 57:7) Ngo le iso tokoka ndjala l’oloko wɔ ndii, wɔmbɛkama te Yehova. (Wala Yeembo 112:7.) Kolenda wopo wɔ nkambo djɛsɔ yakotshɛ́ Bob, kanga sotepeliki má djiko. Winá w’iyoshimela ambɔ ngo ekila ndjala entshupa ntsha wengooyala djonyi, nde akadjimolaka mbala kɛkɔ kɛmɔ ante ntsha angɔlɔmbama ngo nde ndjila ekila, mbɔ angoposa mbala kɛkɔ kɛmɔ m’opitalo. M’ɔkɔngɔ, Bob ayɛka ndotepela ante: “Ntayala l’okakando la kaanga ndambo kɛ wɔma.”

17. Olakanyelo wɔkɔnge w’okokaso mba má kɛnɛ kekomelisá Bob? (Lenda edjinge ntshango.)

 ¹⁷ Bob atshikalaka ndii ladjikɛnde nde ɔsaka nkano djɛ ntshikala ndii ilá efula lá ntondo kɛ nde ntshɔ tá opitalo. Nkambo djɛ ntondo, nde ayalaki la mposɛ kɛ nsasangɛ Yehova. Nkambo dj’ape, nde ekaka la nkɔmɛ nkfumɔ kɛnɛ kɛ Bible la enkanda wɛso wesakisola Bible otepelawɔ djɛ ekina kelekɔ́ la lowiko edjinge l’ekila. Nkambo dj’asato, nde ayalaki l’eshikikelo ante nkilika ɛlɔndjɛlɔ kɛ Yehova ndjakalaka wapɔ w’ipa l’ekomo. Edjinge iso tokoka ndjala l’oloko wɔ ndii ayale ohemba wɔkɔnge w’okoka mpomana laso.

18. Wopo wɔkɔnge ndjɔmbɔmba kɛ Barakɛ otolakanyɛwɔ djɛ ndjilela Yehova oloko? (Lenda ntshango djelá loposo.)

¹⁸ Ilela Yehova oloko. Tokolenda wopo wɔ Barakɛ ndalonge má ndawɛkɛ tá ɛlɔndjɛlɔ kɛ Yehova. Kaanga yotakokaki nyɛna nguwa l’owila w’otondo, Yehova ɔpɛyɛka alako djɛ ntshɔ ntonana la Sisɛra, owandji w’ase Kanana l’angala wande wayalaki la mpeko djɛ mbandji djɛ wolo efula. (Tos. 5:8) Ɔprɔfɛtɛ w’omoto Dɛbɔra, ashimelaka Barakɛ djɛ nkilimɔ tá looko lombalemá djɛ ntopomana la Sisera nya pusupusu yɛnde 900. Kaanga Barakɛ ndewaka ante angoyala okakasano djɛ nana la pusupusu yɛ Sisera lá looko lombalemá papoo, nde alɛmɛyɛka. Winá wɔ yotakitaka má onkókó wɔ Tabɔrɔ, Yehova atɔngɛka olumbe wɔ mvula m’olongo. Pusupusu yɛ Sisɛra yekfundamaka l’ɛtɔpi, ko Yehova apɛyɛka Barakɛ mpongo. (Tos. 4:1-7, 10, 13-16) Wopo wɔk’ɔmɔ ndeke, Yehova angɔtɔpɛyɛ mpongo ntsha iso ndawɛkɛ te nde la tá ɛlɔndjɛlɔ k’ɔpɛyɛnde má lotshimbo lɔ olonghanyelo wɔnde.​—Mvu. 31:6.

19. Ladjikɛnge okombolɛ ntshikala ndii?

¹⁹ Mbandji kɛso kɛ ntshikala ndii kengokindjɛ l’ilá k’owikaso lá nkfumbo dj’akambo djɛnɛ. (1 Ti. 6:11, 12; 2 Pɛ. 3:17) Nyontshɔ tɔshi nkano dj’ipa iso nsasoka m’ɔtɛ wɔ lɔnyɔkɔ, djanya dj’emfumfune, tokanyi tɔ wana w’anto, lodjimbo la akambo wɛkɔla yimba. (Ɛfɛ. 4:14) L’edjena kɛ nangha nghɔsɔ, nyontshɔ topikame ndii, l’onkoko wɔ Yehova la ipa nsasoka lá dilɛmɛlɔ djɛso t’ɛlɛmbɛ wɛnde. Lá winá wɔk’ɔmɔ, iso ladjɛ ndjala l’ekanedji kɛ wɔlɔ. Lá ndjamba djeyaye, tongoshishima wopo wɔ Yehova nya Yeso oyɛwɔ ndjɔmbɔmba yɛ djɔ yɛ ekanedji kɛ wɔlɔ.