1. Lá wopo wɔkɔnge Akristo okokawɔ ndjala etengo otamba? (Lenda edjinge ntshango.)

 “LOMPOPO lopawɛngɛka otamba wolekɔ́ l’akoka wa munama.” Djoongo djɛsɔ nyɛnyɛka djekaka mɔtshi djɛ djonyi djekotshɛ́ká etamba djɛ mfula: Nkoka djɛ ndjala entshupa djɛ ndjekela. Djɛ nkemba la nyuma, Akristo ladjɛ ndjala entshupa djɛ ndjekela l’etshikitano. Lá wopo wɔkɔnge? Iso ladjɛ ndjala entshupa djɛ ndjekela winá wɔ akambo wa lowiko lɔso otshikitanawɔ la má nɛmɛyɛ tokanyi la akano w’anto ankina.

2. Wekeka wakɔnge wangotokotshɛ́ djɛ ndjekela l’etshikitano wengotokomela lá lowiko, edjinge kɛkɔnge k’ɔkɔpaso nshishima lá djamba djɛnɛ?

² Etengo oyɛso enkambi wɛ Yehova, iso nkombolaka ndjala l’ekanedji kɛ wɔlɔ. Iso nkombolaka lonkina ndjala l’okitshakitshɛ edjinge la nkɛtshi. Lá djamba djɛnɛ, tɔngɛna wopo wɔ wekeka wasɔ yakotshɛ́ Akristo amɔtshi wapomanisá l’etshikitano ɛmɔtshi lá mbiko yɛwɔ. Tɔngɛna lonkina wopo wɔ wekeka wasɔ okokawɔ ntokotshɛ́. Koko ntondo, nyontshɔ tokolenda olakanyelo w’okokaso mba me Yehova nya Yeso, andjɔmbɔmba yɛ djɔ y’ekanedji kɛ wɔlɔ.

3. Tolembetelo tɔkɔnge t’ɛnyɛ ente Yehova alekɔ l’ekanedji kɛ wɔlɔ?

³ Bible ndjetaka Yehova ante: ‘Mve’ ladjikɛnde nde mpikama ndii, apasasokaka. (Mvu. 32:4) Koko, nde alekɔ lonkina l’ekanedji kɛ wɔlɔ. Winá w’akambo amɔtshi oposawɔ, Ndjambe kɛso nkindjɛka ndjekela l’akambo wakɔ djɛ nkotshɛ ikanyi yɛnde. Yehova atongaka anto l’ɛfɔ kɛnde l’akoka wa ndjekela etshikitano welá lowiko. Nde ambɔtɔpɛyɛ tɔkfɔ tɔ papoo t’imá Bible totokotshɛ́ djɛ ndɔsa akano wa wɔlɔ ayale ekakasano wɛkɔnge wepomana laso. Ndjɔmbɔmba kɛ Yehova nyɔmɛlɛ la tɔkfɔ tɔtɔpɛyɛnde  ntɛnyɛka ente kaanga oyɛnde ‘Mve’ Yehova alekɔ lonkina l’ekanedji kɛ wɔlɔ.

4. Kɔpɛyɛ ndjɔmbɔmba kɛmɔtshi k’ɛnyɛ ekanendji kɛ wɔlɔ kelekɔ́ la Yehova. (Ase lewi 5:7, 11)

⁴ Mboka yɛ Yehova yelekɔ djɔ edjinge ekanedji kɛ wɔlɔ. Nde apayalaka wayi wolo lá djokanelo djɛnde nya anto. Ndjɔmbɔmba, kolenda wopo wɔ Yehova ndɛnyɛ ekanedji kɛnde kɛ wɔlɔ te ase Isariyɛlɛ. Nde atalɔmba olambo wɔ wopo wɔk’ɔmɔ me ase okfudji kana me ase ɔmvɔ. Lá akambo amɔtshi, nde apɛyɛki onto l’onto lotshungɔ lɔ mpɛyɛ olambo lá nkilika akoka wande.​—Wala Ase lewi 5:7, 11.

5. Kɔpɛyɛ ndjɔmbɔmba k’ɛnyɛ okitshakitshɛ la nkɛtshi kɛ Yehova.

⁵ Okitshakitshɛ la nkɛtshi kɛ Yehova ndootshindaka djɛ ndjala l’ekanedji kɛ wɔlɔ. Ndjɔmbɔmba, okitshakitshɛ wɔ Yehova wɛnamaka papoo winá wɔ ndayale entshupa djɛ ntotshita anto wa nyɛtshi wayalaki lá Sɔdɔmɔ. Má lotshimbo lɔ andjelo wande, Yehova ashimelaka Lɔta, onto wɔ wɔlɔ djɛ ndota tá ewila w’enkókó. Lɔta okaka wɔma djɛ ntshɔ t’eteyi. Djɛkondeke ndalɔmbɛ djɛ ndota tá Zɔarɛ nde nya nkfumbo kɛnde, ngando kɛmɔtshi kɛ daambi keyalisá l’ɔnɔnghɔ w’angando yeyalisá ladjɛ ntshitana. Yehova akokaka nshimela Lɔta djɛ nangha ngo kɛnɛ kɛ ndɔɔlɔmbɛ djɛ nangha. Koko, nde awolaka lɔlɔmbɔ lɔ Lɔta kaanga nkambo djɛsɔ yalɔmbaka dj’ipa ntshita ngando kɛ Zɔarɛ. (Ewa. 19:18-22) Ɛnɔnyi nkama m’ɔkɔngɔ wɔ lasɔ, Yehova ɛnyɛka nkɛtshi kɛnde lonkina te anto w’intasɛki lá Ninivɛ. Nde atomaka ɔprɔfɛtɛ Yɔna djɛ ntewoyɛ losango lɔ etshitanelo kɛ ngando kɛsɔ la kɛ anto wawikaki l’eteyi. Koko winá wɔ ase Ninivɛ yoyapɛla, Yehova awokaka nkɛtshi ko awikɛka ngando kɛsɔ.​—Yɔna 3:1, 10; 4:10, 11.

6. Kɔpɛyɛ ndjɔmbɔmba kɛ wɔlɔ k’ɛnyɛ wopo wɔ Yeso ndokola ekanedji kɛ wɔlɔ kɛ Yehova.

⁶ Yeso okolaka ekanedji kɛ wɔlɔ kɛ Yehova. Nde atomamaka lá looko djɛ ndopoposanyɛ le ‘ɛnkɔkɔ wembovunga welá mvulu k’Isariyɛlɛ.’ Koko nde ɛnyɛka ekanedji kɛ wɔlɔ winá wɔ ndakotshɛka odjito wɔnde. Lá mbamba kɛmɔtshi, omoto ɔmɔtshi wotayalaki ose Isariyɛlɛ ayɛka ndɔɔwɔnda djɛ nde nkɔnɔla wɔnande ‘w’ɛnaki ndjolo me ɔdjɛngɛ.’ La nkɛtshi kenkfumɔ, Yeso akɔnɔlaka wɔna wɔsɔ ngo ngete nyɔ kɛnde ndɔɔlɔmbɛ. (Mat. 15:21-28) Tɔkɔsa ndjɔmbɔmba kenkina. Má bango dj’olemo wɔnde, Yeso atepelaka ante: ‘Onto onkfumɔ wonyanghana . . . , lemi koko langowanghana.’ (Mat. 10:33) Iya koko nde anghanaka Pɛtɛlɔ, kanga lowanghanisá mbala isato? Lako. Yeso ilaka yimba lá ndapɛla la lá djawo djɛ Pɛtɛlɔ. M’ɔkɔngɔ wɔ nde nkfundɔ, Yeso ɛnamaka le Pɛtɛlɔ edjinge mbala imɔtshi óshikikɛka ngandji kɛnde la imeyelo kɛnde.​—Luka 24:33, 34.

7. Lá nkilika Filipɛ 4:5, isokombolaka ndjala la lokumu lɔ ngete mo?

⁷ Tɔmbɛna ente Yehova Ndjambe nya Yeso Kristo walekɔ l’ekanedji kɛ wɔlɔ. Iya koko iso? Yehova ntɔlɔmbaka dj’iso ndjala l’ekanedji kɛ wɔlɔ. (Wala Filipɛ 4:5.) Ekadjimwelo kɛmɔtshi nkadjimolaka vɛrse djɛsɔ ante: ‘Nyoyale la lokumu lɔ wanɛ walekɔ́ l’ekanedji kɛ wɔlɔ.’  Iso nkoka ndawopola isɔmɛlɛ ente: ‘Anto wangɔndɔsake etengo onto wolekɔ́ l’ekanedji kɛ wɔlɔ, wawola tokanyi t’anto ankina edjinge wopalekɔ akambo wolo? Ndo koko wanghɔnyɛnake etengo onto wɔ wayi wolo kana w’ɔtɛ wolo? Langohonake djɛ anto ankina nangha akambo ngo lá wopo w’okanelami? Ndo koko langekameyɛke anto ankina edjinge langawolake tokanyi tɔwɔ ntsha akoka?’ Winá wɔ sotaleke ndjala l’ekanedji kɛ wɔlɔ ndeke sotaleke ndjokola Yehova nya Yeso. Nyontshɔ tokolenda akambo ape amɔtshi walɔmbama djɛ ndjala l’ekanedji kɛ wɔlɔ, winá wɔ akambo welá lowiko lɔso otshikitanawɔ la winá wɔ akano w’anto ankina otshikitanawɔ la waso.

8. Kɛkɔnge kekoka ntokotshɛ́ djɛ ndjala l’ikanyi yɛ wɔlɔ winá w’akambo welá lowiko lɔso otshikitanawɔ? (Lenda lonkina nɔtɛ kel’anse kɛ nkishi.)

⁸ Ndjala l’ekanedji kɛ wɔlɔ nsakisolaka lonkina, ndjala entshupa djɛ ndjekela winá w’akambo otshikitanawɔ lá lowiko lɔso. Etshikitano wɛ nghɔsɔ nkoka ntoyakala ekakasano ɛmɔtshi wɛ sotákanelaki. Tokoka mpomana l’olando w’isasimoyɛ. Etshikitano welendana la wayi wa mfalanga kana la wayi wa pɔlitikɛ welá edjena k’oyalaso nkoka ndjila lowiko lɔso l’okakasano. (Los. 9:11; 1 Kɔ. 7:31) Kaanga etshikitano w’owaso l’olemo wɔ teokrasi nkoka ntilá l’ohemba. Iso nkoka ndjekela l’etshikitano wɛ bango, ntsha iso nangha akambo anɛyi wawɔlamá wanɛ: 1) ndjawola otshikitano wombotokomelá, 2) mpika wiso t’etsho weyaye, 3) ndjila yimba l’akambo wa wɔlɔ, edjinge 4) nkotshɛ́ anto ankina. b Nyontshɔ tokolenda wopo wɔ wananyɔ yawa wapɔ má nangha akambo wasɔ.

9. Wopo wɔkɔnge antshukami amɔtshi walekɔ wa misiɔnɛrɛ yalongela ekakasano wakomelisá l’isasimoyɛ?

⁹ Awola otshikitano wombokokomelá. Emanuele nya Francesca wawaka odjito wɔ ntokamba etengo wa misiɔnɛrɛ l’owila w’angangɛnda. Ngo winá wɔ yawange ndjeka otepela la ndjekela l’otshumano wɔwɔ wɔ bango, opela wɔ COVID-19 wowangaka ko kɛsɔ kálɔmbaka djɛ ndawangoyɛ l’anto ankina. Nyɔ kɛ Francesca avɔka l’isasimoyɛ. Francesca akombolaka ntshɔ tá ntshaka tá nkfumbo kɛnde, koko nde atákoká nangha lɔkɛndɔ lɔsɔ m’ɔtɛ w’opela wɔsɔ. Kɛkɔnge k’okotshisá djɛ nde ndongela ekakasano enkfumɔ wɛsɔ? Ntondo ntondo, Emanuele nya Francesca walɔmbaki djɛ mba balo djɛ nkfulumeyɛ mfu inkfumɔ la dj’ipa ndakiyanyɛ efula. Yehova akadjimolaka ndɔmbɔ yɛwɔ má oleelo wɔ nyuma woyɛ lá winá wɔ wɔlɔ. Ndjɔmbɔmba, iwɔ wawaka lokembo má video mɔtshi djɛ weepó djɛ wɔnanyɔ ɔmɔtshi ndatepela ante: “Winá w’awolaso akambo wa bango wambotokomela lankeke, ndeke osasa wɔso okalɔwɔ ko nkambo djɛsɔ ntɔpɛyɛka mbamba kɛ nkamba l’akambo wa bango wambotokomela wasɔ.” c Nkambo dj’ape, nkambo djɛsɔ djatshindaka djɛ mfudjɛ akoka wawɔ wa mpoposanyɛ má telefɔnɛ la dj’iwɔ mbanga ndjeka kaanga l’onto ɔmɔ Bible. Nkambo dj’asato, iwɔ wawolaka okotshɔ wɔ ngandji wɔ wananyɔ wel’owila wɔsɔ yapɛyɛka. Nkaana kɛmɔtshi k’oloko wɔlɔ átomelaki mesajɛ w’itenyi wolekɔ́ la vɛrse djɛ Bible mfu inkfumɔ l’ilá k’ɔnɔnyi w’otondo. Wopo wɔk’ɔmɔ ndeke, winá w’awolaso akambo wa bango watokomela tongoyala l’osasa wɔ nangha kɛnɛ k’oyɛso l’akoka.

10. Wopo wɔkɔnge nkaana kɛmɔtshi ndekela l’otshikitano ɔmɔtshi w’ekekete efula wɔ ndapomana lá lowiko lɔnde?

 ¹⁰ Pika wiso t’etsho weyaye edjinge ila yimba l’akambo wa wɔlɔ. Christina, nkaana kɛmɔtshi kemá Roumanie kewikaki lá Japon, ayalaka la yɛnyi efula winá wɔ yayake otshumano w’otepela w’Anglɛ wɔ ndingelaka. Koko, nde atakindjɛ nkanela ngo kɛnɛ kokomelisá. L’edjena kɛ nangha nghɔsɔ, nde atshɔka t’otshumano w’otepela wɔ Japon edjinge ananghaka la wolo djɛ mbanga mpoposanyɛ l’otepela wɔkɔ. Nde alɔmbaka winande wokambaki nyande olemo djɛ ndookotshɛ́ djɛ ndeka ndjewa otepela wɔkɔ. Omoto wɔsɔ awolaka nkamba la Bible edjinge l’inkankanda Sasanga la lowiko lotshinda lotshinda! djɛ ndjekɛ Christina otepela wɔ Japon. Ape ngo Christina ndeke lewisá ntepela otepela w’ase Japon toko koko edjinge omoto wɔsɔ awangaka ndapɛyɛ l’akambo wa nsɔsɔlɔ. Winá w’opikaso wiso tá ntondo la wilaso yimba t’akambo wa wɔlɔ, etshikitano w’isasimoyɛ nkoka ntoyalaka ɛtshɔkɔ wɛ sotakanelaka.

11. Kɛkɔnge kekotshisá antshukami amɔtshi wayalisá l’okakasano wɔ mfalanga?

¹¹ Kotshɛ́ anto ankina. Antshukami amɔtshi wawikaki l’owila wɔ olemo wɔso yashimbama, watshutshɛka akoka wawɔ winá w’owila w’otondo yapomana l’okakasano wɔ mfalanga. Kɛkɔnge k’akotshisá djɛ ndjekela l’okakasano wɔsɔ? Ntondo ntondo, iwɔ wɔsaka nkano djɛ ndjila lowiko lɔwɔ onghanghunya. Masɔ, l’edjena kɛ mpika wiso ngo l’ekakasano wɛwɔ yɔmɛlɛ, iwɔ wɔsaka nkano djɛ ndjila yimba lá nkotshɛ́ anto ankina má ndapɛyɛ efula l’olemo w’ipoposanyɛ. (Ele. 20:35) Wome atepela ante: “Má ndapɛyɛ efula l’olemo w’ipoposanyɛ totawaki winá wɔ nkanela ekakasano wɛso koko tawaki winá efula wɔ nangha ɛkɔpa kɛ Yehova.” Winá wɔ akambo welá lowiko lɔso otshikitanawɔ, iso ladjɛ mvungɔ wopo w’oyɛwɔ djonyi nkotshɛ́ anto ankina, pekapeka má olemo w’ipoposanyɛ.

12. Wopo wɔkɔnge ndjɔmbɔmba k’ɔpɔstɔlɔ Poolo okokawɔ ntokotshɛ́ djɛ ndjekela l’etshikitano wepomana laso l’olemo w’ipoposanyɛ?

¹² Iso ladjɛ ndjala entshupa djɛ ndjekela l’akambo wa bango l’olemo wɔso w’ipoposanyɛ. Iso mpomanaka l’anto walekɔ́ la djawo edjinge la djalelo djetshikitanyi la wayɛ́ má djena djetshikitanyi. Ɔpɔstɔlɔ Poolo ayalaki entshupa djɛ ndjekela, edjinge iso nkoka ndjeka má ndjɔmbɔmba kɛnde. Yeso asɔnaka Poolo etengo ‘ɔpɔstɔlɔ w’ewila.’ (Ɔrɔ. 11:13) L’olemo wɔnde wɔsɔ, Poolo apoposanyɛki le ase Juda, Ngirika, andjewi y’enkanda, wapewe enkanda, anto wa lomo edjinge ewandji. Djɛ nkota eloko w’anto ankfumɔ wasɔ, Poolo akomaka ‘nkete nkfumɔ le wepo w’anto ankfumɔ.’ (1 Kɔ. 9:19-23) Nde ilaki yimba lá nkfumbo dj’anto wa ndalakanyɛka, djena djɛ yaye edjinge akambo w’awolawɔ, ko kɛsɔ kokotshɛ́ka djɛ nde ndjekela l’anto wasɔ edjinge nsawola l’onto l’onto lá yopo yekoka nkato oloko wɔnde. Ngole iso tokoka mba eposelo wɛ wɔlɔ m’olemo wɔso w’ipoposanyɛ ntsha tekela l’anto ankfumɔ la tokanela lá topo tɔ wɔlɔ t’okokaso nkotshɛ́ onto l’onto.

13. Ilonga yɛkɔnge y’otepelawɔ lá 1 Kɔrɛtɔ 8:9 y’okokaso ndjewɔ ntsha tɔlɛmɛyɛ tokanyi t’anto ankina?

¹³ Ekanedji kɛ wɔlɔ ntokotshɛka djɛ nɛmɛyɛ tokanyi t’anto ankina. Ndjɔmbɔmba, ankaana yɛso imɔtshi nkɔpaka nkfuta nkete djɛ lɔwɔlɛ koko inkina wapakɔpaká. Akristo amɔtshi nkɔpaka nnɔ ndambo kɛ waná koko ankina wɔsaka nkano dj’ipa ndɛta kaanga ilɔyi. Akristo ankfumɔ nkombolaka ndjala la demba djɛ wɔlɔ djɛkondeke wangɔsɔnake topo tɔ bɔki totshikitanyi. Ntsha tongokanelake ente ngo akano waso ndeke wa wɔlɔ, ko tongohonake djɛ  ntshinda wananyɔ djɛ ndjawola akano waso, tokoka ntakanyɛ anto ankina edjinge ndjila djatɔnelo. Lá nsɔsɔlɔ topakombola djɛ nkambo djɛ nghɔsɔ ntokomela! (Wala 1 Kɔrɛtɔ 8:9; 10:23, 24) Nyontshɔ tokoshishima ndjɔmbɔmba ipe yɛnyɛ wopo wɔ nkamba la tɔkfɔ tel’Afunelo okokawɔ ntokotshɛ́ djɛ ndjala l’ikanyi yɛdje la nama vu.

14. Tɔkfɔ tɔkɔnge temá Bible toyɛso ladjɛ mvungɔka winá w’ɔsaso akano walendana l’ɔlɔtɔ wɔso edjinge nkfo djɛso?

¹⁴ Ɔlɔtɔ edjinge nkfo. L’edjena kɛ ntɔpɛyɛ ɛlɛmbɛ kɔɔ welendana la ntshendja djɛ ndɔta, Yehova atɔpɛyɛka tɔkfɔ t’oyɛso ladjɛ nkilika. Iso ladjɛ ndɔtaka lá yopo yɛfɔna l’enkambi wɛ Ndjambe, yɛnyɛ ente tolekɔ la ‘wɛdjimo edjinge l’ekanedji kɛ wɔlɔ.’ (1 Ti. 2:9, 10; 1 Pɛ. 3:3) Djɛkondeke, totasepake tokanyi t’anto leso má yopo yɛso yɛ ndɔta. Tɔkfɔ tɔ Bible tongokotshɛ́ edjinge tokokolo dj’iwɔ ndjewɔ ndjila ɛlɛmbɛ wɛwɔ yɔmɛlɛ lá kɛnɛ kelendana l’ɔlɔtɔ edjinge nkfo. Ndjɔmbɔmba, tokokolo tel’otshumano ɔmɔtshi wakɔpaka nkotshɛ́ wananyɔ w’elangala wokolisá winawɔ má nyimɛ nkfo djɛ totenyi koko ansandjaka ansandjaka. Wopo wɔkɔnge w’iyakoke ndakotshɛ́ ipa la ndawilela ɔlɛmbɛ? Onami w’edjingadjinga ɔmɔtshi alakaka tokokolo dj’iwɔ nshimela wananyɔ ente: “Ntsha olekɔ lá ɛstradɛ ko anto wakekameyɛ wila yimba lá ɛnamelo kɛko koko ape lá kɛnɛ k’otepelɛ, mbɔ koko nkambo mɔtshi dekɔ l’ɔlɔtɔ kana lá nkfo djɛko.” Dako dj’itenyi djɛsɔ djeshiyɛka okakasano wɔsɔ ipa la ndawilela ɔlɛmbɛ. d

15. Ɛlɛmbɛ la tɔkfɔ tɔkɔnge temá Bible totokotshɛ́ ndjɛ ndɔsa akano walendana la bɔki? (Ɔrɔma 14:5)

¹⁵ Bɔki. Okristo onkfumɔ ladjɛ ndɔsa nkano lá wopo wɔ ndɔngɔsa bɔki djɛnde. (Nga.  6:5) Ngo ɛlɛmbɛ emangha toko welá Bible, ndjɔmbɔmba ɔlɛmbɛ wɔ ntona ekila la wɔ ipa ndjala la djokanelo l’ɛdjɛngɛ, ndeke lokoka ndɔndjɛ nkano djɛ Okristo djelendana la bɔki. (Ele. 15:20; Nga. 5:19, 20) L’akambo amɔtshi oyɛwɔ ngo nkano dj’onto nyɔmɛlɛ. Anto amɔtshi mponaka okotshɔ ngo me tofulume djɛ nsakela alemba wawɔ, koko ankina nkɔpaka ndɔsa wepo enkina wɛ bɔki. Ayale eshikikelo kɛkɔnge kelekɔ́ laso lá kɛnɛ kelendana la bɔki mɔtshi, iso ladjɛ nɛmɛyɛ nkano djɛ wananyɔ ɔsawɔ lá kɛnɛ kelendana bɔki. Lá kɛnɛ kelendana la nkambo djɛsɔ, iso ladjɛ nama akambo wawɔlamá wanɛ lá yimba: 1) Ngo Onkfumi wɔ Ndjambe ndeke longosadjɛ elando enkfumɔ lotshinda lotshinda. (Iza. 33:24) 2) Okristo onkfumɔ ladjɛ ndjala ‘l’eshikikelo’ ante nkano dj’ɔsande lá nkambo djelendana la bɔki dekɔ wɔlɔ lende. (Wala Ɔrɔma 14:5.) 3) Topakoke ndomboyɛ anto ankina kana ndawilela otamba wɔ ntakanyɛ lá ntondo kɛwɔ. (Ɔrɔ. 14:13) 4) Akristo ndjokanaka ngandji edjinge nsipisoyɛka ambɔ osanga w’otshumano ndeka lotshungɔ lolekɔ lawɔ lɔ ndɔsa akano djonyi. (Ɔrɔ. 14:15, 19, 20) Ntsha tongovungɔka akambo wasɔ, tongoyala la djokanelo djɛ ma ma la wananyɔ l’ankaana yɛso edjinge tongokotshɛ́ djɛ vu ndjala l’otshumano.

16. Wopo wɔkɔnge ikokolo okokande nyɛnyɛ ante alekɔ l’ekanedji kɛ wɔlɔ lá djokanelo djɛnde la winande tokokolo? (Lenda edjinge ntshango.)

¹⁶ Tokolo ladjɛ mpɛyɛ ndjɔmbɔmba kɛ wɔlɔ lá kɛnɛ kelendana la ndjala l’ekanedji kɛ wɔlɔ. (1 Ti. 3:2, 3) Ndjɔmbɔmba, ikokolo apakoke nkanelaka ante wangawolaka tokanyi tɔnde winá enkfumɔ. Nde nsipisoyɛka ante nyuma kɛ Yehova nkoka ntshinda onto onkfumɔ welá iloyi yɛ tokokolo djɛ ntepela itepela imɔtshi yekoka nkotshɛ́ djɛ ndɔsa nkano djɛ balo. Edjinge ntsha ikfɔ yɛ Bible itatshitana, ikokolo yelekɔ́ l’ekanedji kɛ wɔlɔ ndjalaka entshupa djɛ ndjawola nkano djɛ anto efula welá iloyi yɛ tokokolo, ntsha nkano djɛ yɔmbɔsa ntshikitana la kɛnɛ k’okombolande.

17. Akristo wayalaka l’ekanedji kɛ wɔlɔ owakawɔ ɛtshɔkɔ wɛkɔnge?

¹⁷ Akristo mbaka ɛtshɔkɔ lombombe má ndjala l’ekanedji kɛ wɔlɔ. Iso ndjalaka la djokanelo djɛ wɔlɔ la wananyɔ l’ankaana yɛso edjinge vu ndjalaka l’otshumano. Iso nsasangaka l’otshikitano wɔ anto edjinge nkfumbo djelekɔ l’anteyi k’enkambi wɛ Yehova. Má djiko dj’akambo ankfumɔ wasɔ, iso ndjalaka l’osasa má ndjewa ente tokola Yehova Ndjambe kɛso, kelekɔ́ l’ekanedji kɛ wɔlɔ.