1. Lamo oyɛwɔ nkambo djɛ balo ndalɔngɔsɔla lá nkambo djɛ mbalaka?

 ƆLƆNGƆSWƐLƆ mbikɛka mbiko. Ndjɔmbɔmba, winá w’oposa mbalaka kɛmɔtshi, anto wayalɔngɔsɔlisá ntondo djɛ mbalaka kɛkɔ wangoyalake l’akoka wa mbika edjinge wa mbikɛ anto ankina. Olonghanyelo ɔmɔtshi welá Europe wokotshɛ́ká anto ntepelaka ante: “Ɔlɔngɔswɛlɔ wɔ wɔlɔ nkoka mbikɛ mbiko.”

2. Ladjikɛnge oyɛso ladjɛ ndalɔngɔsɔla lá nkambo djɛ ndjolo k’ekekete? (Mateo 24:44)

² ‘Ndjolo k’ekekete’ kengoyɛ l’isasimoyɛ. (Mat. 24:21) Koko, ndjolo k’ekekete ntshikitana l’ambalaka inkina efula, ladjikɛnde tewa ente kengoyɛ lofu lɔmɔtshi. Amboheta etengo ɛnɔnyi 2 000, Yeso ewolaka ambeki wande djɛ ndjala entshupa, ntepela ente ndalɔngɔsɔla lá nkambo djɛ lofu lɔsɔ. (Wala Mateo 24:44.) Ntsha tomboyalɔngɔsɔla, angoyala wɔdjɔ leso djɛ nkfulumeyɛ deko djɛ ndjolo djɛsɔ la nkotshɛ́ anto ankina djɛ nangha wopo wɔk’ɔmɔ.​—Luka 21:36.

3. Wopo wɔkɔnge okfumedji, nkɛtshi, la ngandji okokawɔ ntokotshɛ́ djɛ ndjala entshupa lá nkambo djɛ ndjolo k’ekekete?

³ Tokolenda wekeka asato wakoka ntokotshɛ́ djɛ ndalɔngɔsɔla lá nkambo djɛ ndjolo k’ekekete. Isongonangha mo ntsha wambɔtɔlɔmba djɛ mpoposanyɛ losango lɔ dombo djɛ wolo la ntsha anto wapatɛmɔla Ndjambe wambotateyɛ ntonanyɛ? (Ndj. 16:21) Tongoyala la djonyi djɛ ndjala la okfumedji djɛ nɛmɛyɛ Yehova, l’eshikikelo k’enkfumɔ ente nde angotolama. Isongonangha mo ntsha wananyɔ waso wambotshutshɛ ndambo kɛ nkete djɛwɔ mɔtshi djelá demba kana nkfumɔ djɛkɔ? (Aba. 3:17, 18) Lá mbamba kɛ nghɔsɔ nkɛtshi kawokaso kengototshinda djɛ ndakotshɛ́. Ko wopo wɔkɔnge songelola, ntsha alɔmbama ndjitansɛ l’ilá kɛ etsho ɛmɔtshi la wananyɔ l’ankaana yɛso winá wɔ osanga w’ewila yongotonanyɛ? (Ezk. 38:10-12) Angɔlɔmbama iso ndjala la ngandji dj’iso nkfulumeyɛ lá deko djɛ ndjolo djɛsɔ.

4. Wopo wɔkɔnge Bible ɔtɛnyɛnde ante iso ladjɛ ndjala la okfumedji, nkɛtshi, la ngandji?

 ⁴ Otepela wɔ Ndjambe tokembɛka djɛ ndjala l’okfumedji, nkɛtshi, la ngandji. Luka 21:19 ntepelaka ante: ‘Má okfumedji wɔnyo ndeke nyongowikɛ mbiko yɛnyo.’ Kɔlɔsɛ 3:12 ntepelaka ante: ‘Nyɔlɔtɛ . . . nkɛtshi.’ Edjinge 1 Tesalɔnikɛ 4:9, 10 ntepelaka ante: ‘Nyɔmɛlɛ nyolakanyema me Ndjambe djɛ ndjokana ngandji l’anteyi kɛnyo. . . . Wananyɔ, tombonyokembɛ djɛ nyo nkindjɛ nangha nghɔsɔ lá lɛdji l’efula.’ Yafunela avɛrse ankfumɔ wasɔ nde ambeki wamboshiyɛka nyɛnyɛ okfumedji, nkɛtshi, edjinge ngandji ma nanghedji djɛwɔ. Koko, iwɔ wayalaka ladjɛ nkindjɛ ndjala la wekeka wasɔ. Iso ladjɛ nangha wopo wɔk’ɔmɔ. Djɛ ntokotshɛ́, tongoshishima wopo wɔ Akristo wa ntondo yɛnyɛ wekeka ankfumɔ wasɔ. Masɔ, tongɛna wopo w’okokaso ndjokola ambeki wasɔ, edjinge nyɛnyɛ ente tomboyala entshupa lá nkambo djɛ ndjolo k’ekekete.

5. Wopo wɔkɔnge Akristo wa ntondo iyakfulumeyɛ ehemba?

⁵ Akristo wa ntondo wayalaka la djonyi djɛ ndjala l’okfumedji. (Heb. 10:36) Lá djiko djɛ ekakasano wepomanaki l’anto ankfumɔ, iwɔ wapomanaki edjinge l’ehemba enkina. Efula l’anteyi kɛwɔ wɛnaki ndjolo, apengo me ewandji wɛ ntolo w’ase Juda la ewandji wɛ ase Ɔrɔma, koko lonkina me ankfumbo yɛwɔ yɔmɛlɛ. (Mat. 10:21) Edjinge mbala imɔtshi l’eteyi k’otshumano, iwɔ wayalaki ladjɛ mpikama lá ntondo kɛ wa apɔsta la lá ntondo kɛ elakanyelo wɛwɔ wila djatanelo. (Ele. 20:29, 30) Koko, Akristo wasɔ wakfulumeyɛka. (Ndj. 2:3) Lá wopo wɔkɔnge? Iwɔ watɔnɔlaka la nkɔmɛ nkfumɔ lá ndjɔmbɔmba yel’Afunelo yelendana l’okfumedji, etengo ndjɔmbɔmba kɛ Djɔbɔ. (Dja. 5:10, 11) Iwɔ walɔmbaka djɛ mba lokembo. (Ele. 4:29-31) La koko iwɔ wapikaka wiso lá eposelo wɛ wɔlɔ w’iyongowa má okfumedji wɔwɔ.​—Ele. 5:41.

6. Elakanyelo wɛkɔnge ngombowa má kɛnɛ kɛ Merita ndananghe djɛ nkfulumeyɛ onanyelo?

⁶ Edjinge iso tokoka nkfulumeyɛ ntsha mbala la mbala teka la tɔtɔnɔla lá ndjɔmbɔmba yelendana l’okfumedji yotepelawɔ l’Otepela wɔ Ndjambe la l’enkanda wɛso. Má nangha nghɔsɔ, Merita, nkaana kɛmɔtshi kelekɔ lá Albanie, ayalaka l’akoka wa mpikama lá ntondo k’onanyelo wɔ wolo w’ime ase nkfumbo kɛnde. Nde atepela ante: “Ɔkɔndɔ welá Bible wolendana la Djɔbɔ wonkembɛka lombombe. Nde ɛnaka ndjolo efula, ipa ndjewa kaanga onto woyalaki ikɔkɔ y’ehemba wɛnde, ko atepelaka ante: ‘Tii winá wɔ monghovɔ, mpatshikaki nkɔmano djɛmi!’ (Djɔ. 27:5) Ntɔnɔlaka lá wopo wɔ ehemba wɛmi yɔpɛlama kaanga ndambo daambi l’ehemba wɛ Djɔbɔ. Lá lɛdji lotshikitanyi la nde, lemi ndjewa onto wolekɔ́ ikɔkɔ y’ehemba wɛmi.”

7. Kaanga ntsha totapomana l’ehemba wɛ wolo winá wɔsɔ, kɛkɔnge k’oyɛso ladjɛ ndjeka djɛ nangha má winá wɔsɔ?

⁷ Iso nkoka nkembɛ okfumedji wɔso lonkina má nshimelaka Yehova ekiyano wɛso mbala la mbala. (Flp. 4:6; 1 Te. 5:17) Mbala imɔtshi opapomana l’ohemba wɔ wolo winá wɔsɔ. Kaanga oyɛwɔ nghɔsɔ, ongohonake ɛlɔndjɛlɔ kɛ Yehova winá enkfumɔ woyɛ la yɛnyi, w’otshimbɛ yimba, kana wɔ ngopewe kɛ nangha? Ntsha má winá wɔsɔ ongokadjimɔke mbala la mbala te Ndjambe djɛ mpona okotshɔ l’ekakasano wɛko wɛ lofu la lofu, opangokakanda djɛ ndonangha nghɔsɔ winá wɔ nghongopomana la ekakasano wɛ nkekete l’etsho weyaye. Masɔ ongoyala l’eshikikelo ente nde ndjewaka wɔlɔ wɔlɔ winá la wopo w’okokande nkokotshɛ́.​—Yee. 27:1, 3.

8. Wopo wɔkɔnge ndjɔmbɔmba kɛ Mira ɛnyɛwɔ ente nkfulumeyɛ ehemba lɔɔko kɛnɛ nkoka ntokotshɛ́ l’etsho weyaye? (Djakɔbɔ 1:2-4) (Lenda edjinge ntshango.)

⁸ Akoka ndjala wɔdju djɛ iso ndokfulumeyɛ ndjolo k’ekekete ntsha tokfulumeyɛ ehemba má winá wɔsɔ. (Ɔrɔ. 5:3) Lamo okokaso ntepela nghɔsɔ? Efula kɛ wananyɔ wangɛnake ambɔ ohemba onkfumɔ okfulumeyɛwɔ ndakotshɛ́ka  djɛ ndokfulumeyɛ ehemba enkina weyaye weleka nkekete. Okfumedji ndakotshɛ́ka djɛ iwɔ ndjala anto wa wɔlɔ, nkembɛka djawo djɛwɔ djɛ ente Yehova alekɔ winá enkfumɔ entshupa la nkɔpaka ndakotshɛ́. L’onkoko onkina, djawo ndakotshɛ́ djɛ nkfulumeyɛ ehemba enkina. (Wala Djakɔbɔ 1:2-4.) Mira, yat’ekalo imɔtshi yelá Albanie, ɛnaka ante wopo wɔ ndakfumeyɛ ekakasano l’etsho wemboheta okotshɛ́ka djɛ nde nkindjɛ nkfulumeyɛ ekakasano wepomana la nde winá wɔsɔ. Nde ndjawolaka ante la winá ɛmɔtshi angoyawokake ngo ngete nde toko ndeke lopomanaka l’ekakasano efula. Koko masɔ, nde avungɔka wopo wɔ Yehova ndokotshɛ́ l’ɛnɔnyi 20 wemboheta, ko nde ntepelaka nyɔmɛlɛ ante: ‘Tshikala la nkɔmano. Tawolake djɛ efula k’ɛnɔnyi la mbandji inkfumɔ yɛ ngombolonga m’okotshɔ wɔ Yehova yɛnɛ nkfɔ lá washi.’ Edjinge wɛ okoka ntɔnɔla lá wopo wɔ Yehova ndomboshiyɛka nkokotshɛ́ djɛ nkfulumeyɛ. Yala l’eshikikelo ente nde nyɛnaka winá onkfumɔ w’okfulumeyɛ ohemba edjinge angokofuta. (Mat. 5:10-12) Masɔ winá wɔ ndjolo k’ekekete yongowanga, wɛ ɔngɔsa nkano djɛ nkfulumeyɛ ladjikɛnde omboshiyɛká ndjeka wopo wɔ nkfulumeyɛ.

9. Wopo wɔkɔnge otshumano wɔ Atiyɔka lá Siri yɛnyɛ nkɛtshi?

⁹ Kolenda kɛnɛ kehetisá winá wɔ Akristo welá Judeya yapomana la ndjala kɛ nkasa. M’ɔkɔngɔ wɔ otshumano welá Atiyɔka lá Siri ndjoka losango lolendana la ndjala kɛsɔ, ape l’ehamo iwɔ wokaka wananyɔ wawɔ wela Judeya nkɛtshi. Koko masɔ iwɔ wɛnyɛka nkɛtshi kɛwɔ má nanghedji. Iwɔ ‘wɔsaka nkano, djɛ ntomela wananyɔ wintasɛki lá Judeya okotshɔ, onto l’onto lá nkilika akoka wande.’ (Ele. 11:27-30) Kaanga wananyɔ wɛnaki ndjolo wasɔ yayalaka otale efula lawɔ, Akristo welá Atiyɔka wɔsaka nkano djɛ ndakotshɛ́.​—1 Dj. 3:17, 18.

10. Lá topo tɔkɔnge tokokaso nyɛnyɛ kɛtshi winá wɔ winaso antɛmɔdji opomanawɔ la mbalaka? (Lenda edjinge ntshango.)

¹⁰ Edjinge iso tokoka nyɛnyɛ nkɛtshi kɛso lɔɔko kɛnɛ winá w’ewaso ente winaso antɛmɔdji wambopomana la mbalaka kɛmɔtshi. Tongakotshɛ́ ipa la ntshatshimba, mbala imɔtshi má ndjopola tokokolo ntsha tokoka ntokotshɛ́ l’olemo ɔmɔtshi, má mpɛyɛ epapɛyɛ wɛ l’ɛkɔpa djɛ nsuka olemo wel’andja w’otondo, kana má ndɔmbɛla waambopomana la ndjolo kɛkɔ. b (Woo. 17:17) Ndjɔmbɔmba, lá 2020, wakfumbaka Kɔmite yɛ mpɛyɛ Okotshɔ ndekana 950 l’andja w’otondjo djɛ nkotshɛ́ wanɛ wɛnisá ndjolo má opela wɔ COVID-19. Tolekɔ la djedjɛ dj’efula te wananyɔ wakambisá lá kɔmite yɛpɛyɛ okotshɔ yɛsɔ. Má nkɛtshi k’okawɔ wananyɔ l’ankaana yɛwɔ, iwɔ waakapanyɛka nkete djelá demba djɛ yayalaka la djonyi, waakotshɛka lá nyuma, la lá mbamba imɔtshi walɔngɔsɔlaka kana wakalɔka ndapikela amvulu yɛwɔ la djena dj’ɔtɛmwɛlɔ.​—Ɛdjɛ la 2 Kɔrɛtɔ 8:1-4.

11. Wopo wɔkɔnge w’ɔpɛyɛkaso Papa kɛso kel’olongo lomo winá w’ɛnyɛso nkɛtshi má nanghedji djɛso?

¹¹ Winá w’ɛnyɛso nkɛtshi kɛso m’ɔkɔngɔ wɔ mbalaka kɛmɔtshi mposa, anto ankina nyɛnaka welo wilaso. Ndjɔmbɔmba, lá 2019, lompopo lɔmɔtshi l’ekekete l’etawɔ Hurricane Dorian lotshitaka Mvulu kɛmɔtshi k’Onkfumi lá Bahamas. Winá wɔ wananyɔ waso yalɔngɔsɔlaka Mvulu kɛsɔ, iwɔ wopolaka owandji ɔmɔtshi wɔ kɔmpanyi k’epikaka amvulu lofulo lɔ mfalanga lɔlɔmbama djɛ nde ndonangha olemo wɔkɔ. Nde ashimelaka ante: “Langɔpɛyɛ mpeko dj’olemo la anto wangokambá olemo wɔkɔ. . . . Ɔkɔpami nangha nkambo djɛsɔ ngo l’ɔtɛ wɔ olonghanyelo wɔnyo. Ngandji k’efula k’okanyo wananyɔ wanyo kembokota oloko wɔmi.” Efula  k’anto wel’andja wanɛ wapewe Yehova. Koko efula l’anteyi kɛwɔ nkɔmɛka Ewakɛ wɛ Yehova. Ɔsɔngo osasa wolekɔ́ laso má ndjewa ente nkɛtshi k’okanaso nsepaka anto te Kanga lokana ‘nkɛtshi k’efula’!​—Ɛfɛ. 2:4.

12. Wopo wɔkɔnge ndjala la nkɛtshi lɔɔko kɛnɛ ɔtɔlɔngɔsɔlawɔ tá ndjolo k’ekekete? (Ndjiso 13:16, 17)

¹² Lamo songoyala la djonyi djɛ ndjokana nkɛtshi lá winá wɔ ndjolo k’ekekete? Bible ɛnyɛ ante wanɛ wangotona nsuka nkfumbo dj’akambo djɛ politikɛ wangopomana l’ekakasano, má winá wɔsɔ edjinge lá ndjolo k’ekekete. (Wala Ndjiso 13:16, 17.) Wananyɔ l’ankaana yɛso nkoka ndjala la djonyi dj’okotshɔ djɛ mba nkete mɔtshi djoyɛwɔ la djonyi djɛ mbika. Winá wɔ Nkfumi kɛso, Kristo Yeso, ndongoyɛ ndolomboyɛ anto, iso nkombolaka nde ndototana tokana nkɛtshi ko nde ndoteta djɛ ‘ntokita Onkfumi.’​—Mat. 25:34-40.

13. Etengo ɛnyɛwɔ lá Ɔrɔma 15:7, wopo wɔkɔnge Akristo wa ntondo yakembɛ ngandji keyalaki l’anteyi kɛwɔ?

¹³ Ngandji ayalaki ilembetelo yɛ Akristo wa ntondo. Ko ayalaki wɔdju lewɔ djɛ ndjokana ngandji? Tokolenda wepo w’anto wayalaki l’otshumano wɔ Ɔrɔma. L’anteyi kɛwɔ, watayala ngo ase Juda walakanyemisá djɛ nɛmɛyɛ Ɛlɛmbɛ wɛ Mɔsɛ toko, koko wayalaka lonkina l’Ase ewila enkina wayalaki la nkfumbo djetshikitanyi. Akristo amɔtshi wayalaki amfumbe koko ankina wayalaki la lotshungɔ, edjinge amɔtshi wakokaka ndjala l’amfumbe yɛwɔ yɔmɛlɛ. Wopo wɔkɔnge Akristo wasɔ yakoke ndongela etshikitano wɛsɔ edjinge nkembɛ ngandji kɛwɔ? Ɔpɔstɔlɔ Poolo ákembɛka dj’iwɔ ‘ndongolana l’anteyi kɛwɔ.’ (Wala Ɔrɔma 15:7.) Ndakɔpɛ ntepela lasɔ ante mo? Itepela yekadjimwama ‘ndongola’ nsakisolaka nyɛnyɛ onto ɔmɔtshi ngandji kana lokapo lɔso, ndjɔmbɔmba ndolongola lá mvulu kɛso kana lá iloyi yɛso yɛ tolongo. Ndjɔmbɔmba Poolo ashimelaka Filɛmɔ wopo wɔ ndongola Ɔnɛzimɛ, loyalaki ose olemo w’olotisá ante: ‘Longolande wɔlɔ.’ (Flm. 17) Edjinge Priskila la Akula walongolaka Apolo, kanga lotewaki wayi efula walendana la Kristo, má ‘ndɔwɔsa esanga lawɔ.’ (Ele. 18:26) L’edjena kɛ ntshika etshikitano wɛwɔ ndakapola, Akristo wasɔ walongelaka etshikitano wɛwɔ edjinge walongolanaka l’anteyi kɛwɔ.

14. Wopo wɔkɔnge Anna nya womɛnde iyɛnyɛ ngandji kɛwɔ?

¹⁴ Edjinge iso tokoka nyɛnyɛ ngandji kɛso te wananyɔ l’ankaana yɛso má ndjala tolongo tɔwɔ la má mpetshɛka winá esanga lawɔ. Kɛsɔ kengaatshinda djɛ ntɛnyɛ ngandji kɛwɔ edjinge iwɔ. (2 Kɔ. 6:11-13) Tokolenda kɛnɛ kɛ Anna nya womɛnde yananghe. Ndambo daambi m’ɔkɔngɔ w’iwɔ nsɛkɔ tá Owɛstɛ wɔ Afrikɛ, opela wɔ COVID-19 wowangaka. M’ɔtɛ w’opela wɔsɔ iwɔ watayala l’akoka wa mpomana l’elongi l’elongi l’ase otshumano wɔwɔ, edjinge ayalaka okakasano djɛ ndjewana la wananyɔ l’ankaana. Wopo wɔkɔnge antshukami yɛsɔ yɛnyɛ ngandji kɛwɔ? Iwɔ wasawoki la wananyɔ l’ankaana má zumɛ edjinge washimelaki wopo wiyakombolaka ndalembetela wɔlɔ. Ankfumbo yɛsɔ wayalaka la djedjɛ dj’efula tá ngandji kɛ wa misiɔnɛrɛ yɛsɔ yawɛnyɛ ko watateyɛka ndaweta mbala la mbala la ndatomela wa mesajɛ. Ladjikɛnge wa misiɔnɛrɛ yɛsɔ yananghe la wolo djɛ nsawola la ase otshumano wɔwɔ wɔ bango wɔsɔ? Anna atepela ante: “Ngandji kɛ wananyɔ l’ankaana yanyɛnyɛ lemi la nkfumbo kɛmi lá deko djɛ ndjolo la djɛ wɔlɔ kekonamaka l’oloko la lá yimba yɛmi ko kɛsɔ kentshindaka djɛ nyɛnyɛ anto ankina ngandji.”

15. Olakanyelo wɔkɔnge ngombowa má ndjɔmbɔmba kɛ Vanessa lá kɛnɛ kelendana la nkɔpa wananyɔ l’ankaana yɛso inkfumɔ? (Lenda edjinge ntshango.)

¹⁵ Efula l’anteyi kɛso tolekɔ lá ntshumano djembokfumbama la wananyɔ l’ankaana yemá djena ntshikitanyi la yelekɔ́ la lonto lotshikitanyi la lɔso. Iso nkoka nkembɛ ngandji kɛso tewɔ yankfumɔ má mpika wiso lá wekeka wawɔ wa wɔlɔ.  Nkaana kɛmɔtshi ketawɔ Vanessa, kanga lokamba lá Nouvelle Zélande, ayalaki l’okakasano wɔ ndjala la djokanelo djɛ wɔlɔ l’anto amɔtshi welá otshumano wɔnde. Ko masɔ nde ɔsaka nkano ante l’edjena kɛ ndota anto walekɔ la nanghedji dj’owomadjɛki, nde ladjɛ mpetshɛka winá efula lawɔ. Nangha nghɔsɔ okotshɛ́ka djɛ nyɛna kɛnɛ kɛ Yehova ɔkɔpande lewɔ. Nde atepela ante: “Ngo má womɛmi ndakome onami w’edjingadjinga, tongohetshɛke winá la efula kɛ wananyɔ l’ankaana yelekɔ la lonto lotshikitanyi, ko lambɛna ente alekɔ wɔdju ndjokana lawɔ. Winá wɔsɔ lambotateyɛ nkɔpa wananyɔ l’ankaana yetshikitanyi. Nyɛnamaka papoo ente kaanga Yehova nkɔpaka nkambo djɛsɔ ladjikɛnde nde ambotosepá l’anteyi k’oloyi w’anto watshikitanyi.” Winá wonanghaso la wolo djɛ nyɛna anto ankina etengo Yehova awɛnande, iso nyɛnyɛka ente iso ndakɔpaka.​—2 Kɔ. 8:24.

16. Lamo ngandji ndongoyala djonyi lá winá wɔ ndjolo k’ekekete? (Lenda edjinge ntshango.)

¹⁶ Ngandji kengoyala djonyi efula lá winá wɔ ndjolo k’ekekete. Winá wɔ ndjolo k’ekekete yongowanga, wopo wɔkɔnge Yehova ndongotolama? Kolenda kɛnɛ kɛ Yehova ndashimela enkambi wɛnde djɛ nangha winá wɔ yaye ndonanyɛ Babilɔnɛ djɛ ntondo: ‘Anto wami, nyotshu nyingele l’amvulu yel’eteyi, nyodjipe nkfuke yɛnyo. Nyoyawise l’ilá k’etsho daambi tii winá wɔ nkɛlɛ yongoheta.’ (Iza. 26:20) Nyɛnamaka etengo etepela wɛsɔ welendana edjinge laso, wanɛ wangopomana la ndjolo k’ekekete. ‘Amvulu yɛl’eteyi’ nkoka nsakisola ntshumano djɛso. Lá winá wɔ ndjolo k’ekekete tongolamema me Yehova etengo otolakande, ntsha tokindjɛ nsanghana la wananyɔ waso. Djɛkondeke iso ladjɛ nangha la wolo apengo djɛ nyimɛ yimba má evunga wɛ wananyɔ l’ankaana yɛso toko, koko lonkina djɛ ndakɔpa. Okokaso mba ewiko ngo má nangha nkambo djɛsɔ!

17. Ntsha tomboyalɔngɔsɔla má winá wɔsɔ, kɛkɔnge kɛ songoyala l’akoka wa nangha lá winá wɔ ndjolo k’ekekete?

¹⁷ ‘Lofu l’ekekete lɔ Yehova’ longoyakala anto ndjolo. (Sef. 1:14, 15) Kaanga enkambi wɛ Yehova wangopomana l’ekakasano. Koko ntsha tomboyalɔngɔsɔla má winá wɔsɔ, tongoyala l’akoka wa ntshikala vu la nkotshɛ́ anto ankina. Tongokfulumeyɛ ekakasano enkfumɔ wengopomana laso. Winá wɔ winaso andjawodji yɔngɛnaka ndjolo, tongonangha la wolo djɛ ndapɛyɛ osukɔ má ndawɛnyɛ nkɛtshi kawokaso la má ndaseyɛ ehomba wɛwɔ. Edjinge tongotshikala entshupa la wananyɔ l’ankaana yɛso ntsha tekaka ndawɛnyɛ ngandji ntondo. Masɔ, Yehova ongotofuta má ntɔpɛyɛ lowiko l’etshinda l’andja wa ndjolo la mbalaka inkfumɔ ipavungwamaki lonkina.​—Iza. 65:17.