Wɛ ongewake?
Wopo wɔkɔnge abrikɛ la wopo wɔ yabɛtaka abrikɛ wɔ yombisola lá boko djɛ Babilɔnɛ osukawɔ kɛnɛ kɛ Bible otepelande?
ASE Arkioloji wisolaka abrikɛ efula wa lotshumba w’iyakambaka la wakɔ djɛ mpika ngando kɛ Babilɔnɛ djɛ ntondo. Lá nkilika Robert Koldewey, ose arkioloji ɔmɔtshi, wananghaki la watshumbaki abrikɛ lá folo yeyalaki lá “bandja djɛ ngando l’edjena kɛ nkɛtɛ y’ɔmɔma la nkete djɛ ntshumba abrikɛ yayalaka efula.”
Enkanda wɛnyɛ lonkina ente ewandji wɛ Babilɔnɛ wakambaki la folo yɛsɔ djɛ nangha akambo amɔtshi wa nyɛtshi. Paul-Alain Beaulieu, prɔfɛsɛrɛ kelá Inivɛrsite yɛ Toronto, kewa wayi efula walendana l’ɔkɔndɔ edjinge otepela w’ase Asiri wa ntondo, atepela ante: “Afunelo efula w’ase Babilɔnɛ wɛnyɛ ambɔ nkfumi apɛyɛki ɔlɛmbɛ wɔ mbokela lá folo kana ntshumba anto wapendola kana wapalɛmɛyɛ nkete dj’ekina.” Afunelo amɔtshi wemá etsho wɛ Nkfumi Nebukadenezara welekɔ l’etepela wɛwɔlama wɛnɛ: “Nyatshite, nyatshumbe, nyahɔɔlɛ, . . . lá folo yɛ tɔyɛ. . . . nyofumboyɛ edjinga wɛwɔ tá djiko, nyile ekomo lá mbiko yɛwɔ lá lombe l’iyɛ.”
Etepela wɛsɔ mvungolaka antengi yɛ Bible akambo wafunamisá lá Danyɛlɛ shapitrɛ 3. L’ɔkɔndɔ wɔsɔ wɛnyɛ ambɔ, Nkfumi Nebukadenezara apikaka isakandole yɛ mpaonyi lá looko lombalema papoo lɔ Dura, lá bandja djɛ ngando kɛ Babilɔnɛ. Winá wɔ elengala 3 w’ase Hebero w’iyetaka Shadrakɛ, Meshakɛ la Abɛdɛnego yatone nkfusamela isakandole y’ekekete yɛsɔ, Nebukadenezara omalaka efula, ko apɛyɛka lotshungɔ lɔ mpɛtshɛ folo ‘mbala 7 ndeka wopo wɔ yapɛtshɛka ntondo,’ dj’iwɔ ‘mbokela ampame 3 yɛsɔ tá folo k’iyɛ.’ Ondjelo ɔmɔtshi wɔ nkfulu efula áwikɛka má nyɔyi kɛsɔ.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Brikɛ djɛ lotshumba djelekɔ la itshapa yɛ djiina djɛ Nebukadenezara
Kaanga abrikɛ wa Babilɔnɛ wasuka kɛnɛ kefunamisá lá Bible. Abrikɛ efula wayalaki l’itshapa yɛ afunelo amɔtshi walumɛki nkfumi. Afunelo amɔtshi watepelaki ante: “Nebukadenezara, Nkfumi kɛ Babilɔnɛ. . . . Mvulu kɛ nkfumi, idjena yɛ momboyapikela, lemi Nkfumi k’Ekekete . . . Tonkanola tɔmi wangɔlɔndjɛ l’eteyi lotshinda lotshinda.” Afunelo wasɔ wafɛna efula la etepela wotanaso lá Danyɛlɛ 4:30, etepela wɛ Nebukadenezara ndafunaka ante: ‘Ape ɔnɛ ndeke Babilɔnɛ dj’Ekekete djɛ momboyapikela mɔmɛlɛ ngɛndjɔ lá nkambo djɛ mvulu kɛ nkfumi má wolo la nkfulu kɛmi mɔmɛlɛ la lá nkambo djɛ lomo la lonkfunda lɔmi?’
