1. Topo tɔkɔnge tokokaso mba alako, ko lamo isankfumɔ oyɛso la djonyi djɛ mba alako?

 ISANKFUMƆ ndjalaka la djonyi djɛ mba alako winá la winá. Lá mbamba imɔtshi, isɔmɛlɛ nkoka mpona dako mé onto ɔmɔtshi wɔlɛmɛyɛkaso. Lá mbamba inkina, wɔnanyɔ woyakiyanyɛ lá nkambo djɛso nkoka nteta ko ntoshimela ante tombotateyɛ ‘mvunga mboka,’ ntepela ente tombotateyɛ nangha nkambo mɔtshi djekoka ndotokiyanyɛ m’ɔkɔngɔ. (Nga. 6:1) Lonkina, iso nkoka mba dako djelekɔ etengo dilanyɛ m’ɔkɔngɔ w’iso nangha ovunga ɔmɔtshi w’ekekete. Ayale wopo wɔkɔnge wɔ dako djɛkɔ, iso ladjɛ ndjoka. Ntsha tombonangha nghɔsɔ, tongowa wapɔ edjinge tokoka mbikɛ mbiko yɛso!—Woo. 6:23.

2. Lá nkilika Woongo 12:15 edjinge nɔtɛ, lamo oyɛso ladjɛ ndjokaka alako?

² Vɛrse dj’ɔsamisa ɔtɛ wɔso wɔ djamba ntokembɛka dj’iso ‘ndjekameyɛ etepela w’anto w’awalo.’ (Woo. 22:17) Lako onto w’ewaka akambo ankfumɔ; edjinge lá winá enkfumɔ apasambaka onto wolekɔ la balo efula kana wotoleka ndjewa akambo. (Wala Woongo 12:15 edjinge nɔtɛ.) Djɛkondeke, ndjoka alako alekɔ ilembetelo yɛnyɛ ente tolekɔ l’okitshakitshɛ. Kɛsɔ nyɛnyɛka ente iso ndjewaka elelo wɛso edjinge tolekɔ la djonyi dj’okotshɔ djɛ nkotshɛ ekoma wɛso. Salɔmɔ Nkfumi kɛ balo afunaka má lotshimbo lɔ nyuma k’ekina ante: ‘Má lotshimbo lɔ andaki efula, nkambo mbɔngaka [lenda nɔtɛ].’—Woo. 15:22.

3. Lá topo tɔkɔnge tokokaso mba alako?

³ Tokoka mba dako má lotshimbo l’ekete kɛmɔtshi kana elongi l’elongi. Ya mba dako má lotshimbo l’ekete kɛmɔtshi osakisolande nge? Tokoka mbala nkambo mɔtshi má Bible kana m’ekanda wɛso djekoka ntotshinda djɛ nyemala ndambo ko ntɔnɔla lá yopo yɛ lowiko lɔ sombotateyɛ mbika edjinge ntshikitanyɛ nanghedji djɛso. (Heb. 4:12) Ɔsɔ ndeke etaso dako dj’imá lotshimbo l’ekete kɛmɔtshi. Koo dako djɛ elongi l’elongi osakisolande nge? Ikokolo kana wɔnanyɔ ɔmɔtshi nkoka ntolaka djɛ ntshikitanyɛ  nkambo mɔtshi. Ɔsɔ ndeke etaso dako djɛ elongi l’elongi. Ntsha onto ɔmɔtshi wɔtɔkɔpaka ambɔtɔpɛyɛ dako mɔtshi dj’imá Bible, iso ladjɛ nyɛnyɛ djedjɛ djɛso má ndjekameyɛ kɛnɛ k’ɔkɔpande ntoshimela la nkamba la dako djɛkɔ.

4. Lá nkilika Losanghanyɛ 7:9, akambo wakɔnge w’okokaso ndjewɔ winá wɔtɔpɛyɛwɔ alako?

⁴ Lá nsɔsɔlɔ, iso nkoka ndjala l’okakasano pekapeka wɔ ndjawola dako djɛ elongi l’elongi. Tokoka kaanga nyomala. Lamo? Kaanga oyalakaso entshupa djɛ ndjawola ente tolekɔ anto wa ntshamba djɛ djɔ, tokoka ndjala l’okakasano wɔ ndjawola dako winá wɔ onto ɔmɔtshi ɔtɛnyɛnde nkambo mɔtshi djɛ pɔlɔ dj’onanghakaso. (Wala Losanghanyɛ 7:9.) Tokoka ndahonela elonga. Tokoka nkanela onto wɔtɔpɛyisa dako nyɛtshi kana nyomala má wopo wɔ ndɔtɔpɛyɛki. Tokoka kaanga nyɔnyɔla kanga lɔtɔpɛyisa dako djɛkɔ má ndawopola isɔmɛlɛ ente: ‘Oyɛnde na djɛ ndɔmpɛyɛ lemi dako? Lasɔ nde ndeke lopananghaka ovunga!’ L’ekomo, iso nkoka nyɔnyɔla dako djɛkɔ, kana ntohona ikanyi le onto w’ewaso ente angotoshimela kɛnɛ k’ɔkɔpaso ndjoka.

5. Kɛkɔnge k’ɔkɔpaso nyɛna lá djamba djɛnɛ?

⁵ Lá djamba djɛnɛ, tongoshishima ndjɔmbɔmba y’emá Afunelo yɛ wanɛ watonisá la yɛ wanɛ wawolisá alako. Tɔngɛna lonkina kɛnɛ kengotokotshɛ djɛ ndjawola alako la mba wapɔ m’eteyi.

6. Olakanyelo wɔkɔnge w’owaso má wopo wɔ Nkfumi Rɛhɔbɔama ndelola lá alako w’iyɔpɛyɛ?

⁶ Tokoshishima ndjɔmbɔmba kɛ Rɛhɔbɔama. Winá wɔ ndakome nkfumi k’Isariyɛlɛ, anto wande wayɛka ndɔɔlɔmba nkambo mɔtshi. Iwɔ wɔɔlɔmbaka djɛ ndaakitshakitshɛ odjito wɔ ise kɛnde Salɔmɔ ndawɛmbɛka. Nkambo djɛ wɔlɔnde, Rɛhɔbɔama ahonaka alako mé nkokolo dj’Isariyɛlɛ djɛ ndjewa wopo wokokande nkandjimola anto wasɔ. Nkokolo djɛsɔ washimelaka nkfumi ambɔ ntsha wɛ nanghela owila kɛnɛ k’ɔkɔlɔmbawɔ, iwɔ wangokosukaka winá enkfumɔ. (1 Nk. 12:3-7) Ɛnamaka etengo, Rɛhɔbɔama atasasanga la dako djɛsɔ, djɛkondeke ndatshu ntohona dako nkina le dangala djɛ isɔkɛ yɛnde. Dangala djɛsɔ wakoka ndjala l’ɛnɔnyi 40 l’ɛmɔtshi, djɛkondeke wakokaka ndjala ampame yembopakisɔ. (2 Ɛk. 12:13) Koko lá mbamba kɛnɛ, iwɔ wapɛyɛka Rɛhɔbɔama dako djɛ pɔlɔ. Iwɔ woshimelaka djɛ nde nkalɔ ndjakfeyɛ anto edjito enkina. (1 Nk. 12:8-11) Ladjikɛnde awaka tokanyi tope, Rɛhɔbɔama akokaka ndjopola Yehova má lɔlɔmbɔ dako dj’okokande nkilika. L’edjena kɛ nangha nghɔsɔ, nde asɔnaka dako dj’indɛnyi wɔlɔ edjinge ananghaka kɛnɛ k’oshimelisa dangala. Eposelo weposisa weyalaka nyɛtshi efula te Rɛhɔbɔama la te oloyi w’otondo w’ase Isariyɛlɛ. L’onkoko wɔso, topangowaka winá enkfumɔ ngo alako watosasangɛ. Koko, ntsha yomboposande má Otepela wɔ Ndjambe iso ladjɛ ndjawola.

7. Olakanyelo wɔkɔnge w’owaso má ndjɔmbɔmba kɛ Nkfumi Uziya?

⁷ Nkfumi Uziya atonaka dako. Nde ingelaka lá tɛmpɛlɔ kɛ Yehova l’edjena kɛ ngo ankfundji toko ndeke lolekɔ la lotshungɔ lɔ ndjingela, ko atateyɛka ntshumba mbele. Ankfundji yɛ Yehova woshimelaka ambɔ: ‘Uziya, olemo wɔ ntshumbela Yehova mbele wopalekɔ wɔko! Ngo ankfundji toko ndeke lokoka ntshumba mbele.’ Iya Uziya ndananghe mo? Otayalawɔnde nde awolaka dako djɛsɔ l’okitshakitshɛ onkfumɔ edjinge mposa mbala kɛkɔ kɛmɔ má tɛmpɛlɔ, Yehova atakoka ndowimeyɛ. Koko l’edjena kɛ nde nangha nghɔsɔ, ‘Uziya . . . omalaka.’ Lamo ndatone dako djɛsɔ? Mbala imɔtshi nde akanelaka ante etengo oyɛnde nkfumi, nde alekɔ la lotshungɔ lɔ nangha kenkfumɔ k’ɔkɔpande. Koko Yehova atɛna akambo lá yopo yɛsɔ. Eposelo weposisa má enanghedji kɛnde k’otako kɛsɔnde, Uziya atataka  olando w’angɛnyi edjinge ‘atshikalaka l’olando w’angɛnyi tii tá nyɔyi kɛnde.’ (2 Ɛk. 26:16-21) Ndjɔmbɔmba kɛ Uziya kɛmbɔtɔpɛyɛ olakanyelo ente, ayale wopo wɔkɔnge w’onto w’oyɛso, ntsha iso ntona alako waposa má Bible, Yehova apangotawola lonkina.

8. Djɔbɔ ndelola ngetemo winá w’iyɔpɛyɛ alako?

⁸ Má djiko djɛ ndjɔmbɔmba yɛ nyɛtshi yɛ somboshishima bango, Bible ntɔpɛyɛka ndjɔmbɔmba yɛ wɔlɔ y’anto watshɔkwamisa m’ɔtɛ wɔ yawola alako. Tokoshishima ndjɔmbɔmba kɛ Djɔbɔ. Kaanga ndokaka Ndjambe wɔma, nde atayalaki onto wɔ djɔ. Lá ntondo kɛ okakasano w’ekekete woyalisa lande, nde ayalaka la ntokanyi tɔmɔtshi tɔ nyɛtshi. Eposelo weyalisa la nkambo djɛsɔnde, nde awaka alako wa wolo mé Elihu la me Yehova. Ko Djɔbɔ ndelola ngete mo? Nde awolaka alako wasɔ l’okitshakitshɛ onkfumɔ. Nde atepelaka ante: ‘Ntepelaka, koko ipa la nsipisoyɛ . . . Lambɔlɔmba imeyelo lá kɛnɛ kɛ matepela, la lamboyapɛla l’ovutu la l’otoko.’ Yehova atshɔkɔlaka Djɔbɔ má okitshakitshɛ wɔnde.—Djɔ. 42:3-6, 12-17.

9. Wopo wɔkɔnge Mɔsɛ ndelola winá wɔ yɔpɛyɛ dako, ko lamo oyɛnde ndjɔmbɔmba kɛ wɔlɔ leso?

⁹ Mɔsɛ alekɔ ndjɔmbɔmba kɛ wɔlɔ k’onto wawolisá nsembolama m’ɔkɔngɔ wɔ nangha ovunga w’ekekete. Lá mbamba kɛmɔtshi, nde asambaka ndakota ko atapɛyɛ Yehova lomo. Má nkambo djɛsɔ, Mɔsɛ atshutshɛka mpeyi keyalaki lande kɛ ndjingela lá looko lɔ daka. (Ew. 20:1-13) Winá wɔ Mɔsɛ ndɔɔlɔmbɛ djɛ nde nkalɔ ndenda nkano djɛnde, Yehova oshimelaka ante: ‘Tonshimelake nkambo djɛsɔ lonkina lotshinda lotshinda.’ (Mvu. 3:23-27) Mɔsɛ atomala. Koko, nde awolaka nkano djɛ Yehova, edjinge Yehova akindjɛka nkamba lande djɛ ndɔndjɛ ase Isariyɛlɛ. (Mvu. 4:1) Djɔbɔ la Mɔsɛ walekɔ ndjɔmbɔmba yɛ wɔlɔ y’okokaso ndjokola lá kɛnɛ kelendana la ndjawola alako. Djɔbɔ atshikitanyɛka ikanyi yɛnde, nde atayahonela elonga. Mɔsɛ ɛnyɛka djɛ nde awolaka dako djɛ Yehova má ntshikala la nkɔmano kaanga m’ɔkɔngɔ wɔ nde ntshutshɛ mpeyi k’indakɔpaka efula.

10. a) Kɛkɔnge kɛ Woongo 4:10-13 otepelande lá kɛnɛ kelendana la wapɔ wayɛ má ndjawola alako? b) Eyalelo kɛkɔnge kɛ wɔlɔ kelekɔ l’anto amɔtshi lá kɛnɛ kelendana la alako?

¹⁰ Iso mbaka wapɔ winá w’okolaso ndjɔmbɔmba y’anto wa nkɔmano walekɔ etengo Djɔbɔ la Mɔsɛ. (Wala Woongo 4:10-13.) Efula kɛ wananyɔ l’ankaana yɛso waokolaka edjinge wawolaka alako. Tokolenda kɛnɛ kɛ wɔnanyɔ Emmanuel, kanga l’intasɛ lá Congo, ndatepela lá kɛnɛ kelendana la ndjewo kɛ ndawa ante: “Wananyɔ wambotshunda lá nyuma wel’otshumano wɔmi wɛnaka ambɔ ntatshike mboka k’akambo wa nsɔsɔlɔ, ko wandjetaka djɛ nkotshɛ lemi. Nkambaka l’alako wawɔ, ko kɛsɔ kenkotshɛka djɛ ndjewɔ ekakasano efula.” * Megan, nkaana kɛmɔtshi kɛ yat’ekalo kelá Canada atepelaka lá kɛnɛ kelendana la alako ante: “Alako wɔmpɛyɛkawɔ wapayalaka winá enkfumɔ kɛnɛ kokombolami ndjoka, koko wangoyalake kɛnɛ k’oyɛmi la djonyi djɛ ndjoka.” Edjinge wɔnanyɔ wemá Croatie wetawɔ Marko atepelaka ante: “Ntshutshɛka odjito wɔmi, koko winá wɔ mokanelaka l’ɔkɔngɔ, nsipisoyɛka ente dako djɛkɔ djenkotshɛka djɛ ndjala la djokanelo djɛ wɔlɔ isa Yehova lonkina.”

11. Kɛkɔnge kɛ wɔnanyɔ Karl Klein ndasipisoyɛ lá kɛnɛ kelendana la dako?

¹¹ Ndjɔmbɔmba kenkina k’onto ɔmɔtshi wowisa wapɔ má ndjawola dakonde wɔnanyɔ Karl Klein, kanga loyalaki ose Iloyi yɛ lɔndjɛ. L’ɔkɔndɔ wɔ lowiko lɔnde, wɔnanyɔ Klein atepelaka ante lá mbamba kɛmɔtshi nde awaka dako djɛ wolo me Joseph F. Rutherford, kanga loyalaki ilongo yɛnde yɛ ma ma. Wɔnanyɔ Klein awolaka ante má bango nde atasasanga la dako djɛsɔ.  Nde atepelaka ante: “Lofu lɔwɔlamisa m’ɔkɔngɔ wɔ nde mpɛyɛ dako, [wɔnanyɔ Rutherford] anyɛnaka, ko anyemoyɛka l’osasalo onkfumɔ ante, ‘Obwetshɔ Karl!’ Koko ladjikɛnde ndjalaka la nkɛlɛ, ntawola djemo djɛnde l’osasa. Ko nde anshimelaka ante: ‘Karl, wadjɛ! Djabolo ahona nkovunda!’ Ladjikɛnde ndjokaka nsɔnyi winá wɔ ndanshimela nghɔsɔ, ndokadjimolaka ente: ‘Wɔnanyɔ Rutherford, isape topalekɔ la djoyi.’ Koko etengo ndasipisoyɛ ante ndokiyanelaka, nde ahetolaka ndjewo kɛnde lonkina ante: ‘Ee, isape topalekɔ la djoyi. Koko, wadjɛ. Djabolo akɔpa nkovunda.’ Nde ayalaka nsɔsɔlɔ l’elonga! Winá wowombelaso wɔnanyɔ ɔmɔtshi nkɛlɛ l’oloko, pekapeka ladjikɛnde ambotoshimela nkambo mɔtshi djɛlɔmbamisa ntoshimela, . . . atelasonde Djabolo mboka isɔmɛlɛ djɛ ntovunda lá tolonga tɔnde.” * (Ɛfɛ. 4:25-27) Wɔnanyɔ Klein awolaka dako djɛ wɔnanyɔ Rutherford, ko watshikalaka tolongo tɔ ma ma.

12. Wopo wɔkɔnge okitshakitsha okokawɔ ntokotshɛ djɛ ndjawola alako? (Yeembo 141:5)

¹² Kɛkɔnge kekoka ntokotshɛ djɛ ndjawola alako? Iso ladjɛ ndjala l’okitshakitshɛ la mvungɔka ente tolekɔ ase ntshamba djɛ djɔ edjinge lá winá ɛmɔtshi iso nkoka nangha akambo etengo ase nkesa. Etengo sɛnaki ndambo má djiko, Djɔbɔ ayalaka l’ikanyi yɛ nyɛtshi. Koko l’ɔkɔngɔ nde atshikitanyɛka ikanyi yɛnde, edjinge Yehova ɔtshɔkɔlaka. Lamo? Ladjikɛnde Djɔbɔ ayalaka l’okitshakitshɛ. Nde ɛnyɛka okitshakitshɛ wɔnde má ndjawola dako djɛ Elihu ndɔpɛyɛ, kaanga Elihu ndayalaka ilɛnge yɛnde. (Djɔ. 32:6, 7) Wopo wɔk’ɔmɔndeke, okitshakitshɛ wongotokotshɛ djɛ ndjawola dako kaanga winá wɛnaso ente dako dj’iyɔtɔpɛyɛki djepalendana laso kana kanga lɔtɔpɛyisa dako djɛkɔ alekɔ ilɛngɛ yɛso. Ikokolo imɔtshi yemá Canada atepelaka ante: “Ladjikɛnde topoyawɛnaka isɔmɛlɛ etengo anto ankina ɔtɛnawɔ, wopo wɔkɔnge w’okokaso mfula lá nyuma ntsha lako onto wotolaka?” Onto wɔkɔnge wel’anteyi kɛso wopakombola mfula má ndjala la wekeka wa lowambo lɔ nyuma edjinge ndjala nsakodji la wetsha wɔ nsɔsɔlɔ wɔ losango lɔ wɔlɔ?—Wala Yeembo 141:5.

13. Wopo wɔkɔnge w’oyɛso ladjɛ ndɔsa alako w’ɔtɔpɛyɛwɔ?

¹³ Ɔsa alako etengo ilembetelo yɛ ngandji kɛ Ndjambe. Yehova ntokombolaka ngo kɛnɛ kelekɔ wɔlɔ. (Woo. 4:20-22) Winá wotolakande má lotshimbo l’Otepela wɔnde, lɔ enkanda wesakisola Bible, kana lɔ winaso ondjawodji, ɔtɛnyɛnde nde ngandji kɛnde. Hebero 12:9, 10 ntepelaka ante: ‘Nde nanghaka nkambo djɛsɔ lá wapɔ wɔso.’

14. Lá nkambo djɛkɔnge dj’oyɛso ladjɛ ndjilaka yimba winá w’ɔtɔpɛyɛwɔ alako?

¹⁴ Ila yimba lá dako, koko ape lá wopo wɔkɔpɛyɛwɔ.  Lá mbamba imɔtshi, iso nkoka nyɛna etengo wapatɔpɛyisa dako lá yopo yɛ wɔlɔ. Lá nsɔsɔlɔ, kanga lɔpɛyɛ dako ladjɛ nangha la wolo djɛ dako djɛnde ndjawolama ipa l’okakasano. * (Nga. 6:1) Koko ntsha oyɛsonde onto wɔpɛyɛwɔ dako, iso ladjɛ ndjila yimba lá olakanyelo w’okokaso mba m’eteyi, kaanga ntsha tokanela ente onto wɔtɔpɛyisa ayalaka ladjɛ ntɔpɛyɛ lá wopo woleka wɔlɔ. Iso nkoka ndawopola isɔmɛlɛ ente: ‘Kaanga mopasasanga la wopo wɔ yɔmbɔmpɛyɛ dako djɛnɛ, lako wapɔ ɔmɔtshi w’okokami mba m’eteyi? Mpakoke nyimɛ yimba má wopo wɔnde wɔ ntepela ko ndjila yimba lá wapɔ w’okokami mba má dako djɛnde?’ Angoyala nkambo djɛ balo leso djɛ mponaka wopo w’okokaso mba wapɔ má alako ankfumɔ w’ɔtɔpɛyɛwɔ.—Woo. 15:31.

15. Lamo oyɛso ladjɛ ndɔmbaka alako?

¹⁵ Bible ntokembɛka djɛ ndɔmba alako. Woongo 13:10 ntepelaka ante: ‘Balo dekɔ le wanɛ wahonaka alako.’ Etepela wɛsɔ welekɔ nsɔsɔlɔ! Wanɛ wahonaka iyɔmɛlɛ alako l’edjena kɛ nkonga ngo onto ndoweta djɛ ndolaka, mfulaka mbala efula lá nyuma ndeka wanɛ wapahonaka alako. Djɛkondeke, ɔsaka nonghanyi kɛ ndɔmbaka alako.

16. L’akambo amɔtshi wakɔnge w’okokaso ndɔmba alako?

¹⁶ Lá akambo amɔtshi wakɔnge w’okokaso ndɔmba alako me winaso Akristo? Tokoshishima amɔtshi. 1) Nkaana kɛmɔtshi ambeta nsakodji kɛmɔtshi kembopakisɔ djɛ ndotshindjeyɛ djɛ nteka l’ombeki wɔnde, ko m’ɔkɔngɔ ndowopola wopo w’okokande mbɔngɛ yopo yɛnde yɛ ndakanyɛ. 2) Nkaana k’epolo akɔpa nsomba ntshendja, ko ambopola nkaana kɛmɔtshi kembotshunda lá nyuma ikanyi yɛnde lá kɛnɛ kelendana l’ɛsɔnɛlɔ wɛnde wɛ ntshendja. 3) Wɔnanyɔ ɔmɔtshi akɔpa mpɛyɛ djamba djɛnde djɛ ntondo. Nde ambɔlɔmba ontepedji ɔmɔtshi wɔ balo djɛ ndowekameyɛ la nkɔmɛ nkfumɔ, ko m’ɔkɔngɔ nde ndɔpɛyɛ alako walendana la wopo w’okokande ndalɔngɔsɔla. Kaanga wɔnanyɔ wɔmbɔpɛyɛka wamba ɛnɔnyi efula nkoka ndɔmba alako me antepedji walekɔ l’awalo, ko m’asɔ nde nkamba l’alako w’ɔpɛyɛwɔ.

17. Wopo wɔkɔnge w’okokaso mba wapɔ má alako?

¹⁷ Lá mbengo kana angɔndɔ yeyaye, isankfumɔ tongowa alako ayale elongi l’elongi kana má lotshimbo l’ekete kɛmɔtshi. Ntsha kɛsɔ kembotokomela, tovungɔ elakanyelo wɛ sombeka. Toyale l’okitshakitshɛ. Tile yimbande l’olakanyelo w’okokaso mba, koko ape má yopo yɔtɔpɛyɛwɔ dako djɛkɔ. Edjinge tokambe l’alako wɔtɔpɛyɛwɔ. Lako onto l’anteyi kɛso wowotshwisá la balo. Koko ntsha iso ‘ndjoka alako la ndjawola dilanyɛ,’ Otepela wɔ Ndjambe ntolakaka ante ‘tongoyala la balo.’—Woo. 19:20.