1-2. a) Lamo anto efula oyɛwɔ l’okakasano wɔ ndawɛkɛ te wanɛ walekɔ la lowandji? b) Kɛkɔnge k’ɔkɔpaso nyɛna lɔ lá djamba djɛnɛ?

 LƆƆKO kɛnɛ anto efula walekɔ l’okakasano wɔ ndawɛkɛ te ewandji enkfumɔ. Iwɔ nyɛnaka ambɔ mbala efula mbándji l’ɛlɛmbɛ wɛwɔ nsukaka ngo ase ekfudji l’anto walekɔ la lowandji, koko wapalekaka nkotshɛ ase ɛmvɔ. Bible ntepelaka ante: ‘Onto ndɔndjɛka winande onto ngo djɛ ndɔwɛnyɛ ndjolo.’ (Los. 8:9) Lonkina, nanghedji dj’ewandji wɛ ntolo ɛmɔtshi nkiyanyɛka anto, ko ɛsɔ ntshindaka anto amɔtshi djɛ ntshika ndawɛkɛ te Ndjambe. Djɛkondeke winá w’onto ɔmɔtshi awolande dj’iso ndoowekɛ Bible, tolekɔ l’odjito wɔ ndookotshɛ djɛ ndawɛkɛ te Yehova la te anto wa ndasɔnɛ lanɛ lá looko djɛ ntɔlɔndjɛ.

² Koko lá nsɔsɔlɔ, apengo ambeki wa Bible toko ndeke lolekɔ la djonyi djɛ ndjeka ndawɛkɛ te Yehova la te olonghanyelo wɔnde. Kaanga ntsha tombokambela Yehova l’ilá k’ɛnɔnyi efula, topakoke mvungɛ ente yopo yɛ Yehova yɛ nangha akambo yengoyalake winá enkfumɔ ngo wɔlɔ. Lá mbamba imɔtshi, akambo wakoka ndjila djawo djɛso l’ohemba ntokomelaka. Lá djamba djɛnɛ, tongoshishima akambo asato wakoka ndjila djawo djɛso l’ohemba: 1) winá w’owalaso ɛkɔndɔ ɛmɔtshi welá Bible, 2) winá w’owaso ɛlɔndjɛlɔ kɛmɔtshi m’olonghanyelo wɔ Yehova, la 3) winá wɔ songopomana l’ekakasano l’etsho weyaye.

3. Wopo wɔkɔnge ɛkɔndɔ ɛmɔtshi welá Bible okokawɔ ndjila djawo djɛso te Yehova l’ohemba?

 ³ Winá w’owalaso Otepela wɔ Ndjambe, tokoka ndawopola  lamo Yehova ndananghela anto amɔtshi akambo lá lɛdji lɔmɔtshi edjinge lamo ndɔsaka akano amɔtshi. Ndjɔmbɔmba, l’onkanda wɔ Ewadji, iso ntanaka ɔkɔndɔ wɛnyɛ djɛ Yehova apɛyɛka ose Isariyɛlɛ ɔmɔtshi dilanyɛ djɛ nyɔyi má wopo wɔ ndotomuna nkonyi lofu lɔ Saba. L’onkanda wɔ Samwɛlɛ k’ape, iso ndjekaka ente m’ɔkɔngɔ w’ɛnɔnyi efula, Yehova imeyɛka Nkfumi Davidɛ má ovunga wɔ ndananghe wɔ loseka la wɔ ndjaka. (Ew. 15:32, 35; 2 Sa. 12:9, 13) Tokoka ndawopola ente: ‘Lamo Yehova ndimeyɛ Davidɛ kanga lonanghisa loseka la ndjaka onto, ko ndjakaka onto w’onanghisa ovunga wɛnama etengo lako ekekete?’ Djɛ nkadjimola lá wopo wɔsɔ, tokolenda akambo asato w’oyɛso ladjɛ mvungɔka winá w’owalaso Bible.

4. Wopo wɔkɔnge Ewangelo 18:20, 21 edjinge Mvungo K’ɛlɛmbɛ 10:17 okembɛwɔ djawo djɛso tá yopo yɛ Yehova yɛ nsambola akambo?

⁴ Apalekɔ winá enkfumɔ ndeke Bible otepelande ikakambo inkfumɔ yelendana l’ɔkɔndɔ ɔmɔtshi. Ndjɔmbɔmba, iso ndjewaka ente Davidɛ ayapɛlaka lá lɛdji lɔ nsɔsɔlɔ m’ovunga wɔnde. (Yee. 51:2-4) Ko mpame kependolisa ɔlɛmbɛ wɔ Saba wɔsɔ ndayalaka onto wɔ ngete mo? Nde ayapɛlaka má kɛnɛ kɛ ndananghe? Nde ambópendolaká ɛlɛmbɛ wɛ Yehova ntondo? Nde ɔnyɔlaka ndjewo y’iyɔpɛyɛ ntondo? Bible apatepela. Koko, nkambo mɔ dj’oyɛso ladjɛ ndashikikɛ nkinɛ: Yehova ‘apalekɔ ntshamba djɛ sii.’ (Mvu. 32:4) Nde ndɔsaka akano wande ngo lá tolembetelo tonkfumɔ, koko ape má nkilika wa ambɔɔ ante y’anto, isɔnɔdji kana má akambo ankina ankfumɔ wakomɛka anto mbala efula djɛ ndjala l’ikanyi yepalekɔ djɔ lá nkambo mɔtshi. (Wala Ewangelo 18:20, 21; Mvungo K’ɛlɛmbɛ 10:17.) Winá wɔ sotaleke ndjeka akambo walendana la Yehova edjinge l’ɛlɛmbɛ wɛnde, ndeke isongoleka ndawɛkɛ lá yopo yɛnde yɛ nsambola akambo. Kaanga ntsha ɛkɔndɔ ɛmɔtshi wemá Bible wembotokomɛ djɛ ndjopola weepó ɛmɔtshi wɛ sopakoke mba nsakiso winá wɔsɔ, iso ndashikikɛka má kɛnɛ k’ewaso lá nkambo djɛ Ndjambe ente ‘nde alekɔ sii lá mboka yɛnde inkfumɔ.’—Yee. 145:17.

5. Wopo wɔkɔnge akambo wa ntshamba djɛ djɔ otshitawɔ ɛnɛlɔ kɛso k’akambo wa djɔ? (Lenda lonkina ipapango: “ Ntshamba djɛso djɛ djɔ mvungusanyɛka ɛnɛlɔ kɛso k’akambo.”)

⁵ Apalekɔ winá enkfumɔ ndeke okokaso nsambola akambo lá yopo yɛ wɔlɔ ladjikɛnde tolekɔ anto wa ntshamba djɛ djɔ. Ndjambe atotongaka l’ɛfɔ kɛnde djɛkondeke iso nkɔpaka  nsɔsɔlɔ nyɛna wananghela winaso akambo la sii. (Ewa. 1:26) Koko, ladjikɛnde tolekɔ anto wa ntshamba djɛ djɔ, iso nkoka ndadjimba, ko nyɛna akambo lá yopo yɛ nyɛtshi, kaanga lá winá w’okanelaso ente tolekɔ la donga nkfumɔ. Ndjɔmbɔmba, tovungɔ wopo wɔ Yɔna ndotasasanga kaanga ndambo daambi la nkano djɛ Yehova djɛ ndjoka ase Niniva nkɛtshi. (Yɔna 3:10–4:1) Koko, tokolenda eposelo weyalisa. Ase Niniva wayapɛlisá ndekana 120 000 wawikaka! L’ekomo, ɛnamaka djɛ Yɔna ndeke loyalisa ladjɛ ndɔngɔsɔla ikanyi yɛnde, koko ape Yehova.

6. Ladjikɛnge yopalɔmbama ngo Yehova ntosipisoyɛ lamo ɔsande akano wande?

⁶ Yehova apalekɔ la djonyi djɛ nsipisoyɛ anto donga dj’otshinda djɛ ndɔsa akano amɔtshi. Alekɔ nsɔsɔlɔ ente, l’etsho wɛ ntondo Yehova awolaki djɛ enkambi wɛnde mpɛyɛ tokanyi tɔwɔ lá kɛnɛ kelendana l’akano amɔtshi wa ndɔshi kana wɔkɔpande ndɔsa. (Ewa. 18:25; Yɔna 4:2, 3) Edjinge lá mbamba imɔtshi, nde asipisoyɛki akano wande. (Yɔna 4:10, 11) Koko, topalekɔ la lotshungɔ lɔ ntshinda Yehova djɛ nde ntosipisoyɛ lamo ndombonangha nkambo mɔtshi. Ladjikɛnde nde alekɔ Ontongi wɔso, nde apalekɔ la djonyi djɛ ndjawolama meso lá ntondo kana m’ɔkɔngɔ wɔ nangha nkambo mɔtshi.—Iza. 40:13, 14; 55:9.

7. Okakasano wɔkɔnge w’okoka ndjala laso, ko lamo?

⁷ Ape l’ehamo iso ndjawolaka l’oloko wɔso onkfumɔ ente Yehova anghonanghake winá enkfumɔ ngo kɛnɛ kelekɔ wɔlɔ. Koko okakasano wokoka ndjala lasonde, wɔ ndawɛkɛ te anto wakamba lande djɛ ntɔlɔndjɛ. Tokoka ndawopola ntsha kana anto wálekɔ la ndambo kɛ lowandji l’olonghanyelo wɔ Yehova wanghonanghake nsɔsɔlɔ akambo lá nkilika ɛlɔndjɛlɔ kɛ Yehova kana koko kɛwɔ yɔmɛlɛ. Ɔsɔ akoka ndjala ikanyi yeyalisa l’anto amɔtshi wawikaki l’etsho wefunamaki Bible. Tɔkɔtɔnɔla lá ndjɔmbɔmba kɛ sotepelaki  l’itenyi 3. Ewoto kɛ mpame kependolisa ɔlɛmbɛ wɔ Saba akokaka ndawopola ntsha nsɔsɔlɔ Mɔsɛ opolaka Yehova lá ntondo k’iwɔ ndjaka ewoto kɛnde. Edjinge ilongo yɛ Uriya w’ose Hiti, kanga wadji wonanghisa l’oseka nya Davidɛ, akokaka nkanela ante Davidɛ akambaka la mpipo kɛnde kɛ nkfumi djɛ ndjewɔ dilanyɛ djɛ nyɔyi dj’otakokande mba. Kɛnɛ kelekɔ nsɔsɔlɔnde, topakoke ntepela ente toyawɛkɛ te Yehova ntsha topayawɛkɛ te anto wakamba lande lanɛ lá looko djɛ ntɔlɔndjɛ, ntepela ente anto wa Yehova oyawɛkɛnde tewɔ.

8. Djokanelo djɛkɔnge djelekɔ lantenyɛ kɛnɛ k’ɔkɔndɔlawɔ lá Elemo 16:4, 5 la wopo w’akambo onanghemawɔ l’otshumano w’Akristo lɔɔko kɛnɛ?

⁸ Lɔɔko kɛnɛ Yehova alɔndjɛ etenyi k’olonghanyelo wɔnde welá looko má lotshimbo lɔ ‘mfumbe kɛ nkɔmano la nkɛsɔ.’ (Mat. 24:45) Ngo ngete iloyi yɛ lɔndjɛ yeyalaki l’ɛtɛndɔ kɛ ntondo, mfumbe kɛsɔ namaka enkambi wɛ Ndjambe wel’andja w’otondo la mpɛyɛka nkokolo djelá ntshumano ɛlɔndjɛlɔ. (Wala Elemo 16:4, 5.) Tokokolo l’onkoko wɔwɔ, nanghaka djɛ ɛlɔndjɛlɔ kɛsɔ nkilikama l’otshumano. Iso nyɛnyɛka ente toyawɛkɛ lá yopo yɛ Yehova yɛ nangha akambo má nkilika ɛlɔndjɛlɔ k’owaso má olonghanyelo la me tokokolo.

9. Lá winá wɔkɔnge w’okokaso ndjala l’okakasano wɔ nsuka akano wɔsa tokokolo, ko lamo?

⁹ Lá winá ɛmɔtshi, tokoka ndjala l’okakasano wɔ nsuka akano w’ɔsa tokokolo. Ndjɔmbɔmba, l’ɛnɔnyi emangha wemboheta wɛnɛ ntshumano efula la djingadjinga djelonghanyemaka lonkina. Lá mbamba imɔtshi, tokokolo walɔmbaka ansakodji djɛ ntósuká ntshumano nkina l’ikanyi yɛ nama Amvulu yɛso y’Onkfumi wɔlɔ. Ntsha watɔlɔmbaka djɛ ntshɔ t’otshumano wɔ bango, tokokaka ndjala l’okakasano wɔ ntshika ankfumbo yɛso la tolongo  tɔso. Tokokolo wangowake ɛlɔndjɛlɔ kɛmɔtshi me Ndjambe k’ashimela lampe okokawɔ ntoma nsakodji la nsakodji? Lako. Edjinge nsɔsɔlɔ kɛsɔ nkoka ntokomɛ djɛ ndjala l’okakasano wɔ nkilika ɛlɔndjɛlɔ k’owaso. Koko Yehova ndawɛkɛka te tokokolo winá w’ɔsawɔ akano wa nghɔsɔ, edjinge iso ladjɛ ndawɛkɛ tewɔ. *

10. Lá nkilika Hebero 13:17, lamo oyɛso ladjɛ nsuka akano wɔsa tokokolo?

¹⁰ Lamo oyɛso ladjɛ nsuka akano wɔsa tokokolo kaanga ntsha topasasanga l’akano wakɔ? Ladjikɛnde ma nangha nghɔsɔ, iso nkotshɛka djɛ osanga ndjala l’anteyi k’enkambi wɛ Ndjambe. (Ɛfɛ. 4:2, 3) Ntshumano mfulaka winá w’onto onkfumɔ osukande l’okitshakitshɛ onkfumɔ akano w’ɔsama me oloyi wɔ tokokolo. (Wala Hebero 13:17.) Nkambo djeleka djonyinde, má nkamba esanga l’anto wa ndapɛyɛ odjito djɛ ntolama, iso nyɛnyɛka Yehova ente iso ndawɛkɛka tende.—Ele. 20:28.

11. Kɛkɔnge kekoka ntokotshɛ djɛ nkembɛ djawo djɛso tá ɛlɔndjɛlɔ k’owaso me tokokolo?

¹¹ Iso nkoka nkembɛ djawo djɛso tá ɛlɔndjɛlɔ k’owaso me tokokolo má mvungɔka ente winá w’ɔsawɔ akano walendana l’otshumano iwɔ ndɔmbaka djɛ mba nyuma k’ekina. Lonkina iwɔ nshishimaka la nkɔmɛ nkfumɔ tɔkfɔ t’imá Bible la nkilikaka ɛlɔndjɛlɔ k’owawɔ má olonghanyelo wɔ Yehova. Nsaki kɛ m’anse k’oloko kelekɔ lawɔnde, nsasangɛ Yehova la nangha kenkfumɔ k’okokawɔ nangha djɛ nama enkambi wɛnde. Ampame yɛ nkɔmano yɛsɔ ndjewaka ambɔ Ndjambe angooseyɛ lawɔ lá wopo wokotshɛwɔ edjito wɛwɔ. (1 Pɛ. 5:2, 3) Tokokanela nkambo djɛnɛ: L’andja wanɛ wambatɔna má wayi wa mposo y’alemba, wa ntolo, la wa pɔlitikɛ, enkambi wɛ Yehova walekɔ l’osanga l’etolo kɛmɔ kɛ Ndjambe kɛ nsɔsɔlɔ. Nkambo djɛsɔ nkoka nanghema ngo mande Yehova atshɔkɔla olonghanyelo wɔnde!

12. L’akambo wakɔnge tokokolo oyɛwɔ ladjɛ ntɔnɔla la nkɔmɛ nkfumɔ winá w’ohonawɔ ndjewa ntsha onto alekɔ la ndapɛla kɛ nsɔsɔlɔ?

¹² Yehova ámbɔpɛyɛ tokokolo odjito wɔ djonyi wɔ ndjilaka piyɔɔ l’otshumano. Ntsha Okristo ɔmɔtshi amonangha ovunga w’ekekete, Yehova ndɔmbaka tokokolo djɛ ndenda ntsha nde nkokaka ntshikala l’otshumano kana lako. L’anteyi k’akambo w’oyɛwɔ ladjɛ ndjewa, wangohona djɛ ndjewa lonkina ntsha onto wɔkɔ alekɔ la ndapɛla kɛ nsɔsɔlɔ lá kɛnɛ kɛ ndananghe. Nde nkoka nyɛnyɛ etengo alekɔ la ndapɛla, koo nde ntonaka nsɔsɔlɔ kɛnɛ kɛ ndombonangha? Nde ambɔsa nkano dj’ipa nkalɔ l’ovunga wɔnde lonkina? Ntsha ntombe yɛ nyɛtshi ndeke l’otshindisa djɛ nangha ovunga wɔsɔ, lasɔ nde amboyala entshupa djɛ ndjopa losambi nya ntombe yɛnde yɛsɔ? Tokokolo ndɔmbaka efula djɛ nsipisoyɛ tolembetelo m’okotshɔ w’Afunelo edjinge ndendaka wopo wɔ onanghi w’ovunga oyawokande lá kɛnɛ kɛ ndananghe. Masɔ iwɔ ndɔsaka nkano djɛ kana onanghi w’ovunga nkoka ntshikala l’otshumano. Lá mbamba imɔtshi, nde ladjɛ mposa m’otshumano.—1 Kɔ. 5:11-13.

13. Okiyano wɔkɔnge w’okoka ndjala laso ntsha ilongo yɛso kana ewoto kɛso amboposa m’otshumano?

¹³ Wopo wɔkɔnge wɛkamo wɔso te tokokolo okokawɔ ndjingela l’ohemba? Ntsha onto wɔ yomboposɛ m’otshumano apalekɔ ilongo yɛso yɛ ma ma, kana ose nkfumbo kɛso, tokoka ndjawola mbala kɛkɔ kɛmɔ nkano djɛ tokokolo. Koko tɔkɔsa djɛ onto wɔ yomboposɛ oyɛndende ilongo yɛso yɛ ma ma. Tokoka ndakiyanyɛ ente tokokolo wapilisa yimba l’akambo ankfumɔ, kana tokoka ndawopola ntsha wambosambolaka nkambo lá wopo wɔ Yehova otakokande nangha. Kɛkɔnge kekoka ntokotshɛ djɛ ndjala l’ikanyi yɛ wɔlɔ lá nkano dj’iyɔmbɔsa?

14. Kɛkɔnge k’okokaso nangha ntsha nkano djɛ tokokolo yɔsɛlá onanghi w’ovunga mbotokiyanyɛ?

 ¹⁴ Angoyala wɔlɔ iso mvungɔka ente oposelo w’onto m’otshumano oyɛwɔnde nonghanyi kɛ Yehova edjinge ente nonghanyi kɛkɔ kekoka ndjakala wapɔ l’otshumano la te onanghi w’ovunga. Ntsha onanghi w’ovunga wopayapɛlɛ ambawolama ntshikala l’otshumano, nde nkoka ndjimbola anto ankina djɛ nangha evunga. (Nga. 5:9) Lonkina, nde apangosipisoyɛ ekekete k’ovunga wɔ ndananghe edjinge mbala imɔtshi apangɛna djonyi djɛ ntshikitanyɛ ikanyi yɛnde la nanghedji djɛnde djɛ nkalɔ ndjawolama me Yehova. (Los. 8:11) Toyashikikɛ ente winá w’ɔsawɔ nkano djɛ mposɛ onto ɔmɔtshi m’otshumano, tokokolo ndɔsaka odjito wɔwɔ la ntshina. Iwɔ nsipisoyɛka ambɔ, ngo ngete tosushi telá Isariyɛlɛ yɛ ntondo, ‘iwɔ wapalomboyɛ lá nkambo dj’onto koko djɛ Yehova.’—2 Ɛk. 19:6, 7.

15. Lamo oyɛso ladjɛ ndeka ndawɛkɛ tá ɛlɔndjɛlɔ kɛ Yehova má winá wɔsɔ ndeka l’etsho wɛ ntondo?

¹⁵ Ngo ngete ekomo kɛ nkfumbo dj’akambo wanɛ yotaleke nsukana, iso ladjɛ ndeka ndawɛkɛ tá yopo yɛ Yehova yɛ nangha akambo ndeka l’etsho wɛ ntondo. Lamo? Lá winá wɔ ndjolo k’ekekete, tokoka ndowa ɛlɔndjɛlɔ ɛmɔtshi w’ekoká nyɛnama etengo welekɔ wolo nsipisoyɛ kana nkilika. Lá nsɔsɔlɔ, Yehova apangosawola laso elongi l’elongi. Nde nkoka mpɛyɛ ɛlɔndjɛlɔ má lotshimbo lɔ anto wa ndasɔnɛ djɛ ntɔlɔndjɛ. Ɔsɔ apangoyala winá wɔ ndjila ehamo lá ɛlɔndjɛlɔ k’ɔtɔpɛyɛwɔ, kana wɔ ndawopolá ente: ‘Ɛlɔndjɛlɔ kɛnɛ yomboyɛ nsɔsɔlɔnde me Yehova, ndo koko wananyɔ walekɔ l’edjito ndeke l’ɔsa akano wawɔ iyɔmɛlɛ?’ Wɛ ongoyawɛkɛ te Yehova la tá olonghanyelo wɔnde lá eleko kɛ djonyi kel’ɔkɔndɔ wɔ wana w’anto kɛsɔ? Wopo w’ɔsɛ ɛlɔndjɛlɔ kɛ teokrasi k’owaso má winá wɔsɔ nkoka nkokotshɛ djɛ wɛ mba nsakiso. Ntsha wɛ ongoyawɛkɛke tá ɛlɔndjɛlɔ k’owaso winá wɔsɔ la ongoyalake entshupa djɛ nɛmɛyɛ, mbɔ okoka ndonangha wopo wɔk’ɔmɔ lá winá wɔ ndjolo k’ekekete.—Luka 16:10.

16. Wopo wɔkɔnge djawo djɛso t’akano w’ɔsa Yehova iyongilama l’ohemba lak’ilá l’etsho weyaye?

¹⁶ Lonkina iso ladjɛ ntɔnɔla la nkɔmɛ nkfumɔ lá wopo wɔ songoyelola l’akano wa Yehova ndɔngɔsa l’ekomo k’andja wa nyɛtshi wanɛ. Tii winá wɔsɔ, tolekɔ la nkongi ente efula k’anto wapakambela Yehova lɔɔko kɛnɛ, ndjila edjinge boto djɛso djepalekɔ Ewakɛ wangɔɔsa nkano djɛ ndookambela lá ntondo k’ekomo ndjɛ. Koko lá Aramagɛdɔna, Yehova angɔsa nkano dj’ekomo má lotshimbo lɔ Yeso lá kɛnɛ kelendana l’etsho wɛwɔ weyaye. (Mat. 25:31-33; 2 Te. 1:7-9) Apalekɔ iso ndeke lɔngɔsɔna wanɛ wakoka ndjokama nkɛtshi me Yehova  kana wanɛ wapakoke ndjokama nkɛtshi. (Mat. 25:34, 41, 46) Lá mbamba kɛsɔ, tongoyawɛkɛ t’akano wa Yehova, ndokoko tongotshika ndookambela ladjikɛnde topasasangisa l’akano wande? Nyɛnamaka papoo ente, iso ladjɛ nkembɛ djawo djɛso te Yehova má winá wɔsɔ dj’iso ndoyala l’akoka wa ndoyawɛkɛ tshɛ tshɛ tende l’etsho weyaye.

17. Wapɔ wɛkɔnge songowa má akano wa Yehova ndɔngɔsa l’ekomo kɛ nkfumbo dj’akambo djɛnɛ?

¹⁷ Kokanela wopo wɔ songoyawoka l’andja wa bango wa Ndjambe winá wɔ sɔngɛna eposelo wengoposa má akano wa Yehova ɔsande. Ntolo dj’engolo, eloyi wɛ nonghanyi y’epoto wɛ lokaki kana wayi wa pɔlitikɛ wɛnyɛ anto ndjolo edjinge wamboyakala wepo wɛ ndjolo yepewama mbala l’ilá k’ɔkɔndɔ wɔ wana w’anto wangotshitanyema. Elando, lotshundo, la nyɔyi y’anto waso wa ngandji yepangoyala lonkina. Satana nya ɛdjɛngɛ wɛnde wangingela lá lokando ɛnɔnyi kinunu. Akambo ankfumɔ wa nyɛtshi waposisá m’ɔtɔmbɔkwɛlɔ wɔwɔ wangoshila. (Ndj. 20:2, 3) Ɔsɔngo djedjɛ djengoyala laso lá wopo wɔ songoyawɛkɛ tá yopo yɛ Yehova yɛ nangha akambo!

18. Elakanyelo wɛkɔnge w’okokaso mba má ndjɔmbɔmba k’ase Isariyɛlɛ k’ɔkɔndɔlawɔ lá Ewadji 11:4-6 la 21:5?

¹⁸ Lowiko l’andja wa bango wa Ndjambe nkoka ntoyala l’ekakasano ɛmɔtshi wekoka ntilá djawo djɛso te Yehova l’ohemba? Ndjɔmbɔmba, tokolenda kɛnɛ kekomelisa ase Isariyɛlɛ ndambo daambi m’ɔkɔngɔ w’iwɔ mposa má lonfumbe m’Edjipito. Amɔtshi wawangaka nunghanungha mande wakanelaki nkete djɛ wɔlɔ dj’iyalɛka l’eteyi edjinge wɔsaka mana yɛ Yehova ndapɛyɛka etengo nkete dj’anyanya. (Wala Ewadji 11:4-6; 21:5.) Topangotoyala la tokanyi tɔ nghɔsɔ m’ɔkɔngɔ wɔ ndjolo k’ekekete? Topewe ekekete k’olemo w’ongotoyalá laso wɔ ndjɔmbɛla looko edjinge ndambondambo ndookadjimola paradiso. Nyɛnamaka etengo, tongotoyala l’olemo efula, edjinge mbala imɔtshi lowiko lopangotoyala wɔdju má bango. Tongotonunghanungha lá kɛnɛ kɛ Yehova ndɔngɔtɔtɔpɛyɛka lá mbamba kɛsɔ? Nkambo mɔ ndjelekɔ nsɔsɔlɔnde: Ntsha tolekɔ la djedjɛ má kɛnɛ kɛ Yehova ɔtɔpɛyɛnde má winá wɔsɔ, tongotoleka ndjala la djedjɛ l’onkina efula lá kɛnɛ kɛ Yehova ndɔngɔtɔtɔpɛyɛ.

19. Kotepela lá yopasɛ elakanyelo wɛ djonyi w’isombowa má djamba djɛnɛ?

¹⁹ Yehova angonanghake akambo winá enkfumɔ ngo lá lɛdji lɔ wɔlɔ. Iso ladjɛ ndjala l’eshikikelo lá nkambo djɛsɔ. Lonkina iso ladjɛ ndawɛkɛ te anto wa Yehova oyawɛkɛnde tewɔ djɛ ntɔlɔndjɛ. Totavungɛke kaanga ndambo daambi etepela wɛ Yehova ndatepela má lotshimbo lɔ ɔprɔfɛtɛ wɔnde Izaya ante: ‘Wolo wɔnyo w’ongoyala má ntshikala vu la nyɛnyɛ wɛkamo wɔnyo.’—Iza. 30:15.