1. Wopo wɔkɔnge efula k’anto elolakawɔ lɔɔko kɛnɛ má alako wa balo w’otanaso lá Bible? (Woongo 1:20, 21)

 L’EWILA efula, tɔngɛnake mbala la mbala ansakodji y’Onkfumi yelekɔ l’osasa wambemala lá djena djehetaka anto efula ko wakapela enkanda. Wɛ ombopoposanyɛka lá yopo y’olemo w’ipoposanyɛ yɛsɔ? Ntsha oyɛwɔ nde nghɔsɔ, mbɔ ape l’ehamo okanela etepela wɛ djingingi w’otanaso l’onkanda wɔ Woongo, wetepelá ambɔ balo djeta anto dj’iwɔ ndekameyɛ alako wande. (Wala Woongo 1:20, 21.) Iso ntanaka ‘balo djɛ nsɔsɔlɔ,’ ntepela ente balo djɛ Yehova lá Bible la l’enkanda wɛso. Dj’iwɔ mba lowiko l’etshinda, anto ladjɛ ndjala la balo djɛsɔ. Tongoyalake l’osasa efula winá w’onto ɔmɔtshi awolande ndɔsa enkanda wɛso. Koko ape anto ankfumɔ ndeke lonanghaka nghɔsɔ. Anto efula wapakombola ndjeka elakanyelo welá Bible. Ankina ntɔsɔkaka. Iwɔ mfɛnyɛka ambɔ Bible mbohetá lohoyi. Koko ankina nyɔnyɔlaka elakanyelo wemá Bible welendana la nanghedji má ntepela ambɔ, waakiliká elakanyelo wɛ Bible walekɔ́ eloko wolo edjinge iwɔ ndomboyɛka anto ankina. Koko, la ngandji kenkfumɔ Yehova akindjɛ mpɛyɛ anto ankfumɔ mbamba k’iwɔ mba balo djɛnde. Má topo tɔkɔnge?

2. Lámpe okokaso ntana balo djɛ nsɔsɔlɔ lɔɔko kɛnɛ, ko efula k’anto onanghakawɔ nge?

² Yopo imɔtshi yɛ Yehova okambande la yɛkɔ djɛ anto ndjekameyɛ balo djɛnde djɛ nsɔsɔlɔ nde, m’Otepela wɔnde, Bible. Anto nsuke l’ankfumɔ wakotshi onkanda wɔsɔ. Ko otepelaso nge lá nkambo dj’enkanda wɛso wesakisola Bible? Mpeyi m’okotshɔ wɔ Yehova, wengoposake l’etepela ndekana 1 000. Anto wekameyɛ balo djɛsɔ, ntepela ente waawala la waakamba la kɛnɛ k’ekawɔ, wangowa wapɔ. Koko, efula k’anto ntonaka  balo djɛ nsɔsɔlɔ djɛsɔ. Winá wɔkɔpawɔ ndɔsa akano wawɔ, iwɔ nkombolaka ndawɛkɛ ngo te iwɔ iyɔmɛlɛ kana ndjekameyɛ winawɔ anto. Iwɔ nkokaka kaanga ntɔnyɔla ladjikɛnde iso nkilikaka kɛnɛ kɛ Bible otepelande. Lá djamba djɛnɛ tongoshishima lamo anto onanghakawɔ akambo lá lɛdji lɔsɔ. Koko ntondo, nyontshɔ tokoshishima wopo w’okokaso mba balo dj’ime Yehova.

3. Kɛkɔnge kesakisola balo djɛ nsɔsɔlɔ?

³ Balo nkoka nsakisola nkoka djɛ nkamba la kɛnɛ kewaso djɛ ndɔsa akano wa wɔlɔ. Koko, balo djɛ nsɔsɔlɔ nsakisolaka akambo efula. Bible ntepelaka ante: ‘Wɔma wɔ Yehova ndeke ewangelo kɛ balo, la ndjewa Kanga-Loleka-Ekina ndeke yimba.’ (Woo. 9:10) Djɛkondeke winá w’ɔkɔpaso ndɔsa nkano djɛ djonyi, iso ladjɛ mpona ikanyi yɛ Yehova, ntepela ente balo djɛ ‘Kanga-Loleka- Ekina,’ lá nkambo djɛkɔ. Iso nkoka nangha nkambo djɛsɔ má ndjekaka Bible la enkanda wesakisola Bible. Winá w’onanghaso nghɔsɔ, tɔngɛnyɛ ente tolekɔ la balo djɛ nsɔsɔlɔ.​—Woo. 2:5-7.

4. Lamo ngo Yehova ndeke lokoka ntɔpɛyɛ balo djɛ nsɔsɔlɔ?

⁴ Ngo Yehova toko ndeke lokoka ntɔpɛyɛ balo djɛ nsɔsɔlɔ. (Ɔrɔ. 16:27) Lamo Yehova oyɛnde Ikɔkɔ yɛ balo? Ntondontondo, etengo oyɛnde Ontongi, nde alekɔ la balo djepalekɔ l’elelo la nde ndembetelaka ntongami djɛnde wɔlɔwɔlɔ. (Yee. 104:24) Nkambo dj’epe nde, Balo djɛnde nyɛnamaka má kenkfumɔ k’onanghande. (Ɔrɔ. 11:33) Nkambo dj’asato nde, alako wa balo wa Yehova ndjakalaka anto wakamba la wakɔ wapɔ winá enkfumɔ. (Woo. 2:10-12) Ntsha iso nkɔpaka ndjala la balo djɛ nsɔsɔlɔ, iso ladjɛ ndjawola akambo wa nsɔsɔlɔ wasɔ la ndjawola dj’akambo wakɔ ndɔndjɛ akano la nanghedji djɛso.

5. Eposelo wɛkɔnge weyalaka winá w’anto otonawɔ ndjawola Yehova etengo Ikɔkɔ yɛ balo djɛ nsɔsɔlɔ?

⁵ Efula k’anto w’opomanakaso lawɔ l’olemo w’ipoposanyɛ ndjawolaka ambɔ nkete djetodjingi djenanghemaka wɔlɔ efula, koko, wapawola ambɔ Ontongi alekɔ edjinge iwɔ ndjawolaka ambɔ nkete yapose nde eposaposa. Ankina w’opomanakaso lawɔ ntepelaka ambɔ walekɔ la djawo te Ndjambe, koko wangokanelake ambɔ Bible mboheta lohoyi la wangɔsɔnake djɛ nkilika ngo tokanyi tɔwɔ iyɔmɛlɛ. Eposelo wɛkɔnge weyalaka má nkambo djɛsɔ? Andja wamboleka ndjala wɔlɔ má wopo w’anto oyawɛkɛwɔ tá balo djɛwɔ l’edjena kɛ ndawɛkɛ tá balo djɛ Ndjambe? Walekɔ l’osasa wɔ nsɔsɔlɔ kana nkongi djɛ wɔlɔ djelendana l’etsho weyaye? Akambo w’ɛnaso lá djena dj’intasɛso ntoshikikɛka nsɔsɔlɔ k’etepela wɛnɛ: ‘Lako balo, lako ntɔnɔ, edjinge lako dako djeyalaka má nanyɛ Yehova.’ (Woo. 21:30) Nkambo djɛsɔ ntokembɛka dj’iso nkindjɛ mpona balo djɛ nsɔsɔlɔ me Yehova! Nkambo djɛ yɛnyi nde, anto efula wapananghaka nkambo djɛsɔ. Lamo?

6. Lá nkilika Woongo 1:22-25, anto wakɔna wadjipaka atoyi lá leeta lɔ balo djɛ nsɔsɔlɔ?

⁶ Anto efula ndjipaka atoyi winá wɔ balo djɛ nsɔsɔlɔ ‘oweelande la djoyi djɛ wolo lá mboka.’ Lá nkilika Bible, alekɔ eloyi esato w’anto waatonaka balo: ‘Waapalekɔ́ la balo,’ ‘anyɔnyɔdji,’ la ‘nkesa.’ (Wala Woongo 1:22-25.) Nyontshɔ tokoshishima la nkɔmɛ nkfumɔ akambo watshinda anto wasɔ djɛ ntona balo djɛ Ndjambe la wopo w’okokaso ndjewɔ dj’ipa ndjala la djalelo djɛ nghɔsɔ.

7. Lamo anto amɔtshi ɔsɔnakawɔ ntshikala etengo anto ‘wapewe djoyi’?

⁷ ‘Waapalekɔ́ la balo,’ oyɛwɔnde anto  w’awolaka nkenkfumɔ k’okawɔ, la wadjimbamaka lankeke. (Woo. 14:15, nɔtɛ.) Tongopomanake l’anto wa nghɔsɔ mbala la mbala l’olemo w’ipoposanyɛ. Ndjɔmbɔmba, kokanela miliyɔ y’anto yembodjimbamaka má ntolo dj’engolo kana me ewandji wɛ pɔlitikɛ. Wamɔtshi wangokiyanake efula winá w’osipisoyɛwɔ ambɔ wadjimbamaka me ewandji wɛsɔ. Koko anto w’otepelawɔ lá Woongo 1:22 nsɔnaka djɛ nkindjɛ nsamba balo ladjikɛnde iwɔ iyɔmɛlɛ nkɔpaka yopo yɛ lowiko lɔsɔ. (Jɛr. 5:31) Iwɔ nkombolaka nkilika tokanyi tɔwɔ iyɔmɛlɛ la wapakɔpɛ ndjeka kɛnɛ kɛ Bible otepelande kana nɛmɛyɛ ɛlɛmbɛ wɛ nde. Efula wangotepelake etengo omoto ɔmɔtshi womboyapɛyɛ l’etolo kɛ Québec, lá Canada, woshimelisá Owakɛ wɔ Yehova ɔmɔtshi woyisá ndowembola ante: “Ntsha w’abe wangotodjimbake, ɔsɔ oyɛwɔnde ovunga wɔwɔ, koko ape wɔso!” Lá nsɔsɔlɔ topakombola ndjokola waakɔpa ntshikala nkesa!​—Woo. 1:32; 27:12.

8. Kɛkɔnge kekoka ntokotshɛ́ djɛ mba balo djɛ wɔlɔ?

⁸ M’ɔtɛ wɔ donga djɛ wɔlɔ, Bible ntokembɛka dj’ipa ntshikala anto wapewe djoyi koko djɛ ndjala anto wambotshunda lá looka’ lɔso. (1 Kɔ. 14:20) Iso mbaka balo djɛ nsɔsɔlɔ má nkambaka la tɔkfɔ tɔ Bible lá lowiko lɔso. Ndambo ndambo, iso ndjekaka wopo wɔ tɔkfɔ tɔsɔ otokotshɛwɔ djɛ ndjewɔ ekakasano la ndɔsa akano wa balo. Angoyala nkambo djɛ wɔlɔ ntsha iso ntɔnɔlaka lá akano w’ɔsaso. Ntsha teeka Bible la t’ingela la nsanghanyɛ imɔtshi, mbɔ iso nkoka ndawopola lamo tii winá wɔsɔ tɔpɔshi nkano djɛ ndalambola te Yehova la ndongola batisimo? Ntsha tombolongolaka batisimo, tonangha la wolo djɛ mfudjɛ akoka waso wa mpoposanyɛ la wa ndakanyɛ losango lɔ wɔlɔ? Akano waso wangɛnyɛke ente iso nkambaka la kɛnɛ k’ekaso má Bible? Tongonanghelake anto ankina akambo lá lɛdji lɔ Yeso otakokande ndananghela? Ntsha tɛna ente iso ladjɛ nangha etshikitano lá akambo amɔtshi, iso ladjɛ ntɔnɔla efula lá mvungo yɛ Yehova, yɛpɛyɛka ‘onto wotakɔmɛ akambo balo.’​—Woo. 19:7.

9. Wopo wɔkɔnge ‘ansɔki’ ɛnyɛwɔ ambɔ iwɔ ntonaka balo djɛ nsɔsɔlɔ?

⁹ Iloyi y’ape y’anto watonaka balo djɛ Ndjambe nde ‘anyɔnyɔdji.’ Mbala efula, iso mpomanaka la wepo w’anto wa nghɔsɔ l’olemo w’ipoposanyɛ. Iwɔ nkɔpaka nsɔka anto ankina. (Yee. 123:4) Bible djewoyɛka ante l’etsho w’ekomo ansɔki wangoyala efula. (2 Pɛ. 3:3, 4) Ngo ngete akilo wa Lɔta mpame kɛ sii, anto wa lɔɔko kɛnɛ wapile yimba lá ndjewo yɛ Ndjambe. (Ewa. 19:14) Efula k’anto nsɔkaka waawikaka lá nkilika tɔkfɔ telá Bible. Ansɔki wasɔ ntshindamaka ‘má mposɛ yɛwɔ yɛ nyɛtshi.’ (Yuda 7, 17, 18) Wopo wɔ Bible otepelande lá nkambo dj’ansɔki wasɔ nyɛnyɛka nanghedji djelekɔ la w’apɔsta la anto ankina wambotonaká Yehova!

10. Etengo Yeembo 1:1 ɛnyɛwɔ, wopo wɔkɔnge w’okokaso ndalama dj’ipa ndoyala ansɔkanyi?

¹⁰ Wopo wɔkɔnge w’okokaso ndalama dj’ipa ndokilika mboka k’ansɔkanyi? Yopo imɔtshi nde ntona ndjala l’ɔnɔngɔ w’anto walekɔ́ l’eyalelo kɛ nyɔnyɔla anto ankina. (Wala Yeembo 1:1.) Kɛsɔ nsakisolaka ente topakoke mbala kana ndjekameyɛ nkete nkfumɔ dj’ime w’apɔsta. Ombosipisoyɛ ente ntsha topawadjisa, tokoka mbala kɛkɔ kɛmɔ ndjala l’ikanyi yɛ nyɔnyɔla anto ankina la mbanga ndjala l’ehamo lá nkambo djɛ Yehova la djɛ ɛlɔndjɛlɔ k’owaso m’olonghanyelo wɔnde. Djɛ ndjewɔ nkambo djɛsɔ, iso ladjɛ ndawopola ente: ‘Langoyalake l’ekfumbo kɛ ntepela nyɛtshi winá w’owaso ɛlɔndjɛlɔ kɛ bango kana etshikitano ɛmɔtshi? Langoyalake l’ekfumbo kɛ mvunda waatɔlɔndjɛ nkɔmɔ?’ Ntsha tombonangha la nkeke djɛ ntshika nangha akambo wa nghɔsɔ, Yehova angosasanga laso.​—Woo. 3:34, 35.

11. Wopo wɔkɔnge ‘nkesa’ ɔsakawɔ ɛlɛmbɛ wɛ Yehova?

 ¹¹ Oloyi w’asato w’anto w’otonaka balo nde ‘nkesa.’ Walekɔ nkesa ladjikɛnde iwɔ ntonaka nkamba l’ɛlɛmbɛ wɛ Ndjambe lá mbiko yɛwɔ. Iwɔ nanghaka kɛnɛ kɛ wiso wawɔ ɛnawɔ ambɔ kelekɔ wɔlɔ. (Woo. 12:15) Anto wasɔ ntonaka Yehova, kanga lolekɔ́ Ikɔkɔ yɛ balo. (Yee. 53:1) Winá w’opomanaso lawɔ l’olemo w’ipoposanyɛ, mbala efula iwɔ ntɔnyɔlaka má wopo w’ɔlɛmɛyɛso ɛlɛmbɛ welá Bible. Koko wapalekɔ l’akoka wa ntɔpɛyɛ lowiko lɔ wɔlɔ. Bible ntepelaka ante: ‘Balo djɛ nsɔsɔlɔ mpakoke ntanema le kanga enkesa, nde lako la djoyi djɛ ntepela lá ingeelo kɛ ngando.’ (Woo. 24:7) Kanga enkesa lako kaanga l’etepela kana l’alako wa wɔlɔ wa mpɛyɛ. Djɛkondeke Yehova otewolande ante: ‘Wangɔ kanga enkesa’!​—Woo. 14:7.

12. Kɛkɔnge kekoka ntokotshɛ́ dj’ipa nangha akambo etengo anto wa nkesa?

¹² Lá lɛdji lotshikitanyi l’anto watonaka alako wa Ndjambe, iso nkɔpaka mboka yɛ Ndjambe ndjila edjinge ɛlɛmbɛ wɛnde welendana la nanghedji. Iso nkoka mfudjɛ ngandji kɛsɔ má ndjɛdjɛka eposelo wewaká waalɛmɛyɛ la waapalɛmɛyɛ tɔkfɔ tɔ Ndjambe. Kanela wopo w’ekakasano w’anto oyayakalawɔ iyɔmɛlɛ má wopo wotonawɔ alako wa wa balo watɔpɛyɛ Yehova. Masɔ, shishima wɛlɔ w’owɛ lá lowiko lɔɔko má wopo w’okambɛ l’ɛlɛmbɛ wɛ Ndjambe.​—Yee. 32:8, 10.

13. Yehova angototshindake djɛ nɛmɛyɛ alako wande wa balo?

¹³ Yehova mpɛyɛka anto ankfumɔ balo djɛnde, koko Nde apatshinde kaanga djɛ ndjawola onto la wolo. Koko, nde nyɛnyɛka eposelo wengokomela anto watona ndjekameyɛ balo djɛnde. (Woo. 1:29-32) Waasɔna dj’ipa nɛmɛyɛ Yehova ‘wanghɛna ndjolo l’eposelo wemá mboka yɛwɔ.’ L’ɔkɔngɔ, yopo yɛwɔ yɛ lowiko yepangaayakala kaanga ekete koko ngo ekiyano, ndjolo edjinge l’ekomo, etshitanelo. L’onkoko onkina, Yehova ndakaka weekameyɛ la waakamba l’alako wande wa balo ante: ‘Onto wóndjekameyɛ angintansɛ lá lotoyi ntshitshi, nde apangotshimba yiimba la wɔma wɔ mbalaka.’​—Woo. 1:33.

14-15. Olakanyelo wɔkɔnge w’owaso má Woongo 4:23?

¹⁴ Winá w’okambaso la balo djɛ Ndjambe tongowake wapɔ winá enkfumɔ. Etengo sɔmbɛna, Yehova nanghaka djɛ alako wande wa balo ndjala wɔdju djɛ ntanema. Ndjɔmbɔmba, l’onkanda wɔ Woongo, nde ntɔpɛyɛka alako wakoo mbɔngɛ lowiko lɔso ntsha iso nkamba la wakɔ. Nyontshɔ tokoshishima ngo ndjɔmbɔmba inɛyi yɛ wepo w’alako wa balo wasɔ.

¹⁵ Lama oloko wɔko wɔ djingingi. Bible ntepelaka ante: ‘Lá nkete nkfumɔ djoyɛ ladjɛ nama, lama oloko wɔko, ladjikɛnde m’eteyi ndeke tɔkɔkɔ tɔ lowiko.’ (Woo. 4:23) Tokolenda akambo walɔmbama djɛ nama oloko wɔso wɔ nsɔsɔlɔ. Iso ladjɛ ndɛka nkete  djɛ wɔlɔ, nsasokɛka demba, la ntona nkfumbo djɛ nyɛtshi. Ngo akambo etengo wasɔ ndeke onanghakaso djɛ nama oloko wɔso wɔ djingingi. Iso ndɛɛka, ntepela ente mbalaka Otepela wɔ Ndjambe mfu inkfumɔ. Iso ndɔngɔsɔlaka, nsanghanaka la mpɛyɛka kɔmantɛrɛ lá nsanghanyɛ yɛso y’Akristo. Iso ntshikalaka ndii lá nyuma má mposaka mbala la mbala t’olemo wɔso w’ipoposanyɛ. Edjinge iso ndjewɔka ndjala la nkfumbo djɛ nyɛtshi má ntona kenkfumɔ kekoka ntshita yimba yɛso, ndjɔmbɔmba etombo wɛ nyɛtshi la lotombe lɔ nyɛtshi.

16. Lamo Woongo 23:4, 5 oyɛwɔ djonyi efula leso lɔɔko kɛnɛ?

¹⁶ Saasangaka la kɛnɛ k’okotshɛ. Bible ndakaka ante: ‘Toyawɛnyɛke ndjolo djɛ mpona okfudji. . . . Winá wɔ ngongopika wiso wako t’eteyi, wopangoyala lonkina ladjikɛnde ape l’ehamo wongoyala l’apafu etengo mpongo edjinge wongofumbɔ t’olongo.’ (Woo. 23:4, 5) Okfudji welá demba wopatshikalaka lotshinda. Ee, ayale ase onkfudji kana ase ɔmvɔ, wangoyakiyanyɛke djɛ mba mfalanga efula. Nkambo djɛsɔ ndaatshindaka mbala efula djɛ ndjɛ ndonangha akambo wakoka ntshita lokumu lɔwɔ, djokanelo djɛwɔ l’anto ankina edjinge kaanga demba djɛwɔ. (Woo. 28:20; 1 Ti. 6:9, 10) L’onkoko onkina, balo ntokotshɛka djɛ ndjala l’ikanyi yɛlama lá nkambo djɛ mfalanga. Ikanyi yɛ nghɔsɔ ntokotshɛka dj’ipa ndjala la lolemba koko djɛ nsasanga la nkete dj’okotshɛso la nama osasa wɔso.​—Los. 7:12.

17. Wopo wɔkɔnge w’okokaso ndjala la ‘lolemi lɔ kanga balo’ l’otepelawɔ lá Woongo 12:18?

¹⁷ Tɔnɔlaka lá ntondo kɛ ntepela. Ntsha topawadjisa iso nkoka nkiyanyɛ anto efula m’etepela wɛso. Bible ntepelaka ante: ‘Etepela wɛ tomitomi wengohotadjɛke etengo lokfula, koko lolemi lɔ kanga balo lolekɔ ɛkɔnwɛlɔ.’ (Woo. 12:18) Iso namaka djokanelo djɛso l’anto ankina winá w’owadjɛso dj’ipa ntshanghanyɛ evunga w’anto ankina. (Woo. 20:19) Djɛ etepela wɛso ndjala wɛkɔnɔla koko ape wehotadjɛ, iso ladjɛ ndodjɛ eloko wɛso la balo djɛ m’Otepela wɔ Ndjambe. (Luka 6:45) Winá w’ɔtɔnɔlaso lá kɛnɛ kɛ Bible otepelande, etepela wɛso nkoka ndjala etengo ‘ɛtɛkɔ kɛ  balo’ ketshitshimadjɛka awale w’anto ankina.​—Woo. 18:4.

18. Wopo wɔkɔnge nkamba la Woongo 24:6 otokotshɛwɔ djɛ ndjala ansakodji la wetsha wɛ wɔlɔ?

¹⁸ Kilika ɛlɔndjɛlɔ kɛtɔpɛyɛ olonghanyelo. Bible mpɛyɛka dako djɛ djonyi efula djɛnɛ: ‘Má ɛlɔndjɛlɔ kɛ balo, ongonanyɛ mbandji kɛko, edjinge otshumba ndjilamaká l’anteyi k’andaki efula.’ (Woo. 24:6, nɔtɛ.) Tolende wopo wɔ nkamba l’ikfɔ yɛsɔ otokotshɛ́wɔ djɛ nkoma ansakodji la wetsha wɛ wɔlɔ. L’edjena kɛ mpoposanyɛka la ndakanyɛka ngo lá yopo yɛso, iso nanghaka la wolo djɛ nkilika alako w’ɔtɔpɛyɛwɔ. Iso mbaka ɛlɔndjɛlɔ kɛ balo lá nsanghanyɛ yɛso y’Akristo, lá sɛnaka andaki walekɔ́ l’awalo wapɛyɛ wamba wemá Bible la asawo djɛ ntokfumba. Má djiko djɛ lasɔ, olonghanyelo wɔ Yehova ntoposeyɛka mpeko dj’olemo djɛ wɔlɔ efula, ntepela ente enkanda la wa video tokoka nkotshɛ́ anto djɛ nsipisoyɛ Bible. Ongekake djɛ nkambaka la mpeko djɛsɔ wɔlɔwɔlɔ?

19. Oyawokɛ ngete mo lá kɛnɛ kelendana la balo djɛ Yehova ɔtɔpɛyɛnde? (Woongo 3:13-18)

¹⁹ Wala Woongo 3:13-18. Tolekɔ la djedjɛ efula má alako wa wɔlɔ lombombe w’otanaso l’Otepela wɔ Ndjambe! Ngo má alako wasɔ ndeke okokaso ndjala la lowiko edjinge l’osasa. Lá djamba djɛnɛ, tomboshishima ngo ndjɔmbɔmba imangha yɛ balo djɛ nsɔsɔlɔ dj’otanaso l’onkanda wɔ Woongo. Lá nsɔsɔlɔ, Bible dj’otondo ndola kfu l’alako wa balo w’ime Yehova. Nyontshɔ tɔshi nkano djɛ nanghaka akambo lá yopo y’okaná la balo djɛ Yehova ɔtɔpɛyɛnde. Wopo wɔ andja wanɛ ɔsawɔ balo djɛsɔ apalekɔ djonyi leso, ladjikɛnde tolekɔ l’eshikikelo ente ‘waavunda [balo] djɛsɔ mpidji wangaaweta ambɔ anto w’osasa.’