DJAMBA DJƐ WEKELO 15
YEEMBO 124 Toyale mfu inkfumɔ la nkɔmano (lá Otetela)
Tokembɛ wɛkamo wɔso tá olonganyelo wɔ Yehova
‘Nyovungɔ wanɛ wanyɔlɔndjɛ la wanyoshimelisá otepela wɔ Ndjambe.’—HEB. 13:7.
IKANYI YƐ DJAMBA DJƐNƐ
Wopo w’okokaso ndjala la nkembɛ wɛkamo wɔso tá olonganyelo wɔ Yehova.
1. Wopo wɔkɔnge enkambi wɛ Yehova yolalonghanyɛ l’ɛtɛndɔ kɛ ntondo?
WINÁ enkfumɔ wɛ Yehova ɔpɛyɛnde enkambi wɛnde odjito ɔmɔtshi, nde nkongelaka dj’iwɔ nkotshɛ odjito wɔkɔ lá wopo wɔ wɔlɔ. (1 Kɔ. 14:33) Ndjɔmbɔmba, ɛkɔpa kɛ Ndjambe nde losango lɔ wɔlɔ l’Onkfumi lopoposanyeme lá looko l’otondo. (Mat. 24:14) Yehova apɛyɛka Yeso odjito wɔ ndɔndjɛ olemo wɔsɔ. Ko Yeso alashikikɛka djɛ olemo wɔsɔ nkambema ipa l’ofutano kana lá lɛdji lɔ wɔlɔ. L’ɛtɛndɔ kɛ ntondo, winá wɔ ntshumano yakfumbama lá djena ntshikitanyi, tokokolo tɔsɔnamaka djɛ ndɔndjɛ la djɛ nshimela wananyɔ l’ankaana akano wɔsamaki. (Ele. 14:23) Lá Jerusalɛmɛ, ampame yɛ nkokolo l’apɔstɔlɔ wankfumbaki iloyi yɛ lɔndjɛ wɔsaki akano amɔtshi wa ntshumano nkfumɔ yayalaka ladjɛ nɛmɛyɛ. (Ele. 15:2; 16:4) Eposelo weyalaki lá ntshunamo djɛwɔ l’alako wa yawaka nde, ‘ntshumano ntetelaki nkemba lá djawo la lofulo l’anto lotafulaki.’—Ele. 16:5.
2. Ntateyɛ má 1919, wopo wɔkɔnge Yehova ɔpɛyɛnde ɛlɔndjɛlɔ l’oleelo wɔ nyuma?
2 Yehova akindjɛ nonghanyɛ enkambi wɛnde kaanga lɔɔko kɛnɛ. Ntateyɛ má 1919, Yeso akamba la iloyi y’ampame y’ankfutami w’avuta djɛ nonghanyɛ olemo w’ipoposanyɛ la djɛ mpɛyɛ ambeki wande oleelo wɔ nyuma. a (Luka 12:42) Yehova asakola nsɔsɔlɔ olemo w’iloyi yɛsɔ.—Iza. 60:22; 65:13, 14.
3-4. a) Kɔɔpɛyɛ ndjɔmbɔmba kɛ wapɔ w’owaso má wopo w’oyalonghanyɛso. b) Kɛkɔnge k’ɛnaso lɔ lá djamba djɛnɛ?
3 Ntsha topayalonghanyɛ, topangoyala l’akoka wa nkotshɛ olemo wɔ Yeso ndatɔpɛyɛ. (Mat. 28:19, 20) Ndjɔmbɔmba, kɔsa djɛ wapapɛyisa onto l’onto etatshi kɛ looko kɛ mpoposanyɛ, onto onkfumɔ nkoka mpoposanyɛ l’edjena k’ɔkɔpande. Ntatshi mɔtshi ngopoposanyema má ekomo tii ekomo me ansakodji atshikitanyi, koko ntatshi nkina mpangopoposanyema wɔlɔ. Wepo enkina wɛkɔnge w’okokaso mba wapɔ ntsha tomboyalonghanyɛ?
4 Ete ngo Yeso ndalonghanyɛ ambeki wande winá wɔ ndayalaka lanɛ lá looko, nde akindjɛ nonghanyɛ enkambi wɛ Ndjambe tii lɔɔko kɛnɛ. Lá djamba djɛnɛ, tɔngɛna ndjɔmbɔmba kɛ Yeso ndatshike, la wopo w’ɔlɔnda olonghanyelo wɔso ndjɔmbɔmba kɛnde. Tɔngɛna lonkina wopo w’okokaso nyɛnyɛ ente tilela olonghanyelo wɔ Yehova oloko.
OLONGHANYELO WƆSO NDƆNDAKA NDJƆMBƆMBA KƐ YESO
5. Wopo ɔmɔtshi wɔkɔnge w’okilikaso ndjɔmbɔmba kɛ Yeso? (Dj. 8:28)
5 Yeso ekaka me Papa kɛnde kɛnɛ kɛ nangha la kɛnɛ kɛ ntepela. Lá nkilika ndjɔmbɔmba kɛ Yeso, olonghanyelo wɔ Yehova ndɔsaka alako edjinge elakanyelo wɛnde welendana la nanghedji m’Otepela wɔ Ndjambe. (Wala Djɔanɛ 8:28; 2 Ti. 3:16, 17) Mbala la mbala wongotovungolake djɛ mbala la nkamba l’Otepela wɔ Ndjambe. Wapɔ wɛkɔnge sowaka má ndɔnda alako wasɔ?
6. Wopo ɔmɔtshi wɔkɔnge w’owaso wapɔ má ndjeka Bible?
6 Tongowake wapɔ efula winá w’ekaso Bible má okotshɔ w’enkanda wɛso. Ndjɔmbɔmba, tolekɔ l’akoka wa ndjɛdjɛ elakanyelo wɛ Bible la ɛlɔndjɛlɔ k’owaso má olonghanyelo. Winá w’ɛnaso ente ɛlɔndjɛlɔ kɛsɔ kɛmbɔsama má Afunelo, wɛkamo wɔso tá olonghanyelo wɔ Yehova mfulaka.—Ɔrɔ. 12:2.
7. Yeso ndapoposanyɛka losango lɔkɔnge, ko wopo wɔkɔnge olonghanyelo okolawɔ ndjɔmbɔmba kɛnde?
7 Yeso apoposanyɛka ‘losango lɔ wɔlɔ l‘Onkfumi wɔ Ndjambe.’ (Luka 4:43, 44) Yeso apɛyɛka lonkina ambeki wande ɔlɛmbɛ wɔ mpoposanyɛ lá nkambo djɛ Onkfumi. (Luka 9:1, 2; 10:8, 9) Lɔɔko kɛnɛ, anto ankfumɔ walekɔ́ lá olonghanyelo wɔ Yehova wapoposanyɛ losango l’Onkfumi ayale edjena k’owikawɔ kana efula k’edjito welekɔ́ lawɔ.
8. Mpeyi kɛkɔnge k’okotshɛso?
8 Tɔngɔsake ente alekɔ mpeyi k’ekekete efula kɛ mpoposanyɛ nsɔsɔlɔ lá nkambo djɛ Onkfumi wɔ Ndjambe le anto ankina! Ape onto onkfumɔ ndeke lolekɔ́ la mpeyi kɛsɔ. Ndjɔmbɔmba, winá wɔ Yeso ndayalaka lanɛ lá looko, atapɛyɛki ɛdjɛngɛ lotshungɔ lɔ mpoposanyɛ lá nkambo djɛnde. (Luka 4:41) Lɔɔko kɛnɛ, lá ntondo k’onto ndɔsa opiko djɛ mpoposanyɛ l’enkambi wɛ Yehova, nde ladjɛ nkotshɛ akambo walɔmbama djɛ mba mpeyi kɛsɔ. Tɔngɛnyɛke ente tolekɔ la djedjɛ efula tá mpeyi kɛ sombowa kɛ mpoposanyɛ, má mpɛyɛ owakɛ lá winá la l’edjena kenkfumɔ k’okokaso nangha nkambo djɛsɔ. Ete ngo Yeso, okoma wɔso nde nkona la mvutela washi lá nsanga y’akambo wa nsɔsɔlɔ y’Onkfumi y’okonaso l’eloko w’anto.—Mat. 13:3, 23; 1 Kɔ. 3:6.
9. Wopo wɔkɔnge olonghanyelo ewanyɛnde djiina djɛ Ndjambe?
9 Yeso ewanyɛka djiina djɛ Ndjambe. Lá lɔlɔmbɔ lɔ ndalɔmbɛ Papa kɛnde kɛ l’olongo, Yeso atepelaka ante: ‘Lemi ndjewanyɛka djiina djɛko.’ (Dj. 17:26) Lá nkilika ndjɔmbɔmba kɛ Yeso, olonghanyelo wɔ Yehova wongonanghake ekete kenkfumɔ k’okokande nangha djɛ nkotshɛ́ anto ankina dj’iwɔ ndjewa djiina djɛ Ndjambe. Bible ekadimwelo k’andja w’oyoyo nkambaka olemo w’ekete efula lá nkambo djɛsɔ má nkawoyɛ djiina djɛ Ndjambe lá todjena tonkfumɔ tɔ yayalaka ntondo. Bible djɛkɔ mbokadjimolamá otondo kana etatshi l’etepela ndekana 270. Lá Apandisɛ A4 la A5 wa ekadjimwelo kɛsɔ, ɔngɛna akambo efula walendana la wopo wɔ yakawoyɛ djiina djɛ Ndjambe lá Bible. Apandisɛ C, walekɔ́ lá Bible djɛ wekelo walekɔ la tolembetelo efula tɛnyɛ ente djiina djɛ Ndjambe ladjɛ nyɛnama lá Afunelo w’Akristo wa Grɛkɛ mbala 237.
10. Olakanyelo wɔkɔnge wɔ ngombowa má kɛnɛ k’ekomelisá omoto ɔmɔtshi w’owika lá Myanmar?
10 Ete ngo Yeso, iso nkombolaka nkotshɛ́ anto efula djɛ ndjewa djiina djɛ Ndjambe. Winá wɔ ndeke djiina djɛ Ndjambe, omoto ɔmɔtshi w’ɛnɔnyi 67 w’owika lá Myanmar awangaka nkɛdjɛ wisɔyi, ko atepelaka ante: “Ɔnɛ ndeke mbala kɛ ntondo lá lowiko lɔmi kɛ momoka ente djiina djɛ Ndjambe nde Yehova. . . . Omondjekɛ ekete kɛ djonyi efula kɛ motasamba ndjewa kawo.” Etengo nkambo djekomelisá omoto wɔsɔ ɛnyɛwɔ, ndjewa djiina djɛ Ndjambe nkoka ndjala la ndjimbo kɛ nkfulu efula l’anto w’eloko wɔlɔ.
KINDJƐ NDJILELA OLONGHANYELO WƆSO OLOKO
11. Wopo wɔkɔnge tokokolo okokawɔ nyɛnyɛ djedjɛ tá olonghanyelo wɔ Yehova? (Lenda edjinge ntshango.)
11 Wopo ɔmɔtshi wɔkɔnge tokokolo okokawɔ nyɛnyɛ ambɔ wangilelake olonghanyelo wɔ Ndjambe oloko? Winá w’olongolawɔ alako, tokokolo ladjɛ mbala la nkɔmɛ nkfumɔ, ko manyi nangha kenkfumɔ k’okokawɔ nangha djɛ nkamba l’alako wakɔ lá lɛdji lɔ wɔlɔ. Ndjɔmbɔmba, wangowake ɛlɔndjɛlɔ lá wopo w’okokawɔ ndɔndjɛ ntenyi ntshikitanyi djɛ nsanghanyɛ, wopo w’okokawɔ ndɔmbɛla otshumano, la wopo w’okokawɔ nama ɛnkɔkɔ wɛ Kristo. Tokokolo tokiliká alako wa olonghayelo, wangokotshɛ́ke anto walekɔ́ l’anse k’ɛlɔndjɛlɔ kɛwɔ dj’iwɔ ndáwoka ambɔ wangɔkɔpamake la walekɔ l’elamelo.
Tokokolo ntokotshɛ́ka djɛ ndjala la djedjɛ tá ɛlɔndjɛlɔ k’owaso má olonghanyelo wɔ Yehova (Lenda itenyi 11) b
12. a) Lamo oyɛso ladjɛ nkamba mpɛka la mpɛka l’anto watɔlɔndjɛ? (Hebero 13:7, 17) b) Lamo oyɛso ladjɛ mpika wiso lá wekeka wa wɔlo w’anto watɔlɔndjɛ?
12 Winá w’owaso ɛlɔndjɛlɔ me tokokolo, iso ladjɛ ndjala entshupa djɛ nkilika. Má nangha nghɔsɔ, tongokotshɛ́ anto walɔndjɛ́ dj’iwɔ nkamba olemo wɔwɔ ipa l’okakasano. Bible ntokembɛka dj’iso ndjala la dilɛmɛlɔ ole la ntshunamo t’anto watɔlɔndjɛ. (Wala Hebero 13:7, 17.) Nkambo djɛsɔ nkoka ndjala okakasano winá ɛmɔtshi. Lamo? Ladjikɛnde ampame isɔ oyɛwɔ nde anto wa ntshamba djɛ djɔ. Ntsha tombopika wiso lá nkɔmɔ djɛwɔ l’edjena kɛ mpika wiso lá wekeka wawɔ, lá nsɔsɔlɔ, tongokotshɛ́ antonyi waso. Lá wopo wɔkɔnge? Antonyi waso okombolawɔ nde iso ndjila ehamo ente Ndjambe apakambe l’olonghanyelo wɔnde djɛ ntɔlɔndjɛ. Djɛko ndeke, ntsha tombotateyɛ ndjala la tokanyi tɔ nyɛtshi te tokokolo, tongoyala koko la tokanyi tɔ nyɛtshi tá olonghanyelo wɔ Yehova, ko topangowilela lonkina oloko. Kɛkɔnge k’okokaso nangha djɛ ndjewa la ntona engolo w’antonyi waso?
TƆPƐYƐKE ANTO ANKINA MBAMBA K’IWƆ MPƆDJƐ DJEDJƐ DJƐKO
13. Wopo wɔkɔnge antonyi wa Ndjambe owandawɔ olonghayelo wɔnde akambo?
13 Antonyi wa Ndjambe wangɔsɛsake nyɛnyɛ ambɔ akambo wa wɔlɔ waheta lá olonghanyelo wɔ Yehova walekɔ nyɛtshi. Ndjɔmbɔmba, tombeka má Afunelo ente Yehova nkongelaka djɛ enkambi wɛnde ndjala piyɔɔ lá demba, lá nanghedji la lá nyuma. Nde ndɔmbaka djɛ onto onkfumɔ wopolapɛlɛ wolekɔ́ la lowiko lɔ mbindo, mposa má otshumano. (1 Kɔ. 5:11-13; 6:9, 10) Iso nɛmɛyɛka ɔlɛmbɛ w’Afunelo wɔsɔ. Koko antonyi waso wangɔsɛsake nkamba l’ɔlɛmbɛ wɔsɔ djɛ ntowanda ambɔ iso tolekɔ akambo wolo, tongolomboyɛke la topakɔpaka anto.
14. Kanga lolekɔ́ ikɔkɔ y’engolo lá nkambo dj’olonghanyelo na?
14 Isola ikɔkɔ y’onanyelo. Satana Djabolo ndeke lolekɔ́ l’ɔkɔngɔ w’engolo wɛsɔ. Nde ndeke ‘papa k’ongolo.’ (Dj. 8:44; Ewa. 3:1-5) Djɛko ndeke, iso ladjɛ ndjewa ente Satana angokamba l’antonyi waso djɛ ntshanghanyɛ engolo lá nkambo djɛ olonghanyelo wɔ Yehova. Nsɔsɔlɔ kɛ nkambo djɛsɔ kɛnamaka l’ɛtɛndɔ kɛ ntondo.
15. Kɛkɔnge k’ewandji wɛ ntolo yananghela Yeso l’ambeki wande?
15 L’ɛtɛndɔ kɛ ntondo, anto wasukaki Satana watepelaki ongolo, má wɔnɛ wɔnɛ, lá nkambo dj’ansese wa Wɔna Ndjambe wɔ djɔ. Ndjɔmbɔmba, ewandji wɛ ntolo washimelaki anto ambɔ ‘owandji w’ɛdjɛngɛ’ ndeke lɔpɛyɛki Yeso nkfulu kɛ mposɛ ɛdjɛngɛ. (Mar. 3:22) Winá wɔ yamboleyɛka Yeso, ewandji wɛ ntolo wowandaka ambɔ ambotola Ndjambe la watshindaka anto djɛ ndɔmba djɛ ndoyaka. (Mat. 27:20) M’ɔkɔngɔ, winá wɔ ambeki wa Kristo yapoposanyɛka losango lɔ wɔlɔ, waananyɛki ‘watshindaki anto’ djɛ nyɔkɔla Akristo. (Ele. 14:2, 19) Lá kɛnɛ kelendana lá Elemo 14:2, Etange k’Olami kɛ Ngɔndɔ kɛ djomi 1, 1998, kepakisola ante: “Ase Juda wayalaki antonyi watatona ngo losango toko, koko wananghaka la wolo djɛ ntshinda ase ewila djɛ ntona Akristo má ntshita lokumu lɔwɔ.”
16. Kɛkɔnge k’oyɛso ladjɛ mvungɔ ntsha tomboka ɛkɔndɔ w’engolo?
16 Satana atakoma ndjimba ngo l’ɛtɛndɔ kɛ ntondo. Lɔɔko kɛnɛ, nde akindjɛ ‘ndjimbola looko l’otondo.’ (Ndj. 12:9) Ntsha omboka watepela nkambo dj’ongolo lá nkambo dj’olonghanyelo kana djɛ wananyɔ walɔndjɛ, vungɔ wopo wɔ antonyi wa Ndjambe yawandaka Yeso l’ambeki wande wa l’ɛtɛndɔ kɛ ntondo. Lɔɔko kɛnɛ, wawanda enkambi wɛ Yehova akambo la wanyɔkɔla ete ngo Bible ndewoyɛ. (Mat. 5:11, 12) Akambo w‘engolo wasɔ wapatodjimbolaki ntsha tombewa ikɔkɔ yɛwɔ la ntsha tombonangha nkambo mɔtshi mbala kɛkɔ kɛmɔ djɛ ndálama. Oyɛso ladjɛ nangha nkambo djɛkɔnge?
17. Wopo wɔkɔnge w’okokaso ndjewɔ dj’ipa akambo w’engolo ntonanghela nyɛtshi? (2 Timɔte 1:13) (Lenda ipapango “Wopo wɔ ndjelola ntsha tomboka akambo w’engolo.”)
17 Tona ɛkɔndɔ w’engolo. Ɔpɔstɔlɔ Poolo apɛyɛka alako wokama papoo lá kɛnɛ k’okokaso nangha ntsha tomboka akambo w’engolo. Nde ashimelaka Timɔte djɛ ‘mpɛyɛ anto amɔtshi ɔlɛmbɛ . . . dj’ipa iwɔ ndjila yimba l’ɛkɔndɔ w’engolo’ la dj’iwɔ ‘ntona ɛkɔndɔ w’engolo.’ (1 Ti. 1:3, 4; 4:7) Kookanela nkambo djɛnɛ, wɔna wɔ daambi nkoka ntɔnghɔna ekete kɛ mbindo má looko ko ndjila l’ɔlɔmɔ, koko ekokolo apakokaki nangha nghɔsɔ, ladjikɛnde ewa ante kekoka ndonanghela nyɛtshi. Tongotonake ɛkɛndɔ w’engolo ladjikɛnde tewa ikɔkɔ y’akambo wasɔ. Tongekameyɛke ngo ‘etepela wɛ wɔlɔ’ wɛ nsɔsɔlɔ.—Wala 2 Timɔte 1:13.
18. Wopo wɔkɔnge w’okokaso nyɛnyɛ ente tolekɔ la djedjɛ tá olonghanyelo wɔ Yehova?
18 Isɔmɛna lanɛ ngo topo tosato toko tɔ olonghanyelo wɔ Ndjambe okolawɔ Yeso. Winá w’ekɛ Bible, shishima topo tonkina tɔ olonghanyelo okolawɔ ndjɔmbɔmba kɛ Yeso. Kotshɛ́ anto ankina w’otshumano wɔko dj’iwɔ nkembɛ wɛkamo wɔwɔ tá olonghanyelo. La kindjɛ nyɛnyɛ djedjɛ djɛko má nkambela Yehova la nkɔmano la má ntshikala imama la olonghanyelo w’okambande la wɔkɔ djɛ nkotshɛ ɛkɔpa kɛnde. (Yee. 37:28) Nyontshɔ tokindjɛ ndɔsa la ntshina mpeyi k’okotshɛso kɛ nsanghana la enkambi wɛ ngandji la wɛ nkɔmano wɛ Yehova.
OKADJIMOLƐ LƆ ENTE MO?
-
Lá topo tɔkɔnge enkambi wɛ Ndjambe okolakawɔ Yeso?
-
Wopo wɔkɔnge w’okindjɛso nyɛnyɛ djedjɛ tá olonghanyelo wɔ Yehova?
-
Kɛkɔnge k’oyɛso ladjɛ nangha ntsha tomboka akambo w’engolo?
YEEMBO 103 Elami w’ɛnkɔkɔ—Ampame ilekɔ́ ete ngo epapɛyɛ (lá Otetela)
a Lenda ipapango “Lamo 1919?” lá onkanda Ɔtɛmwɛlɔ wa pudipudi wa Jehowa—wambokaloyama! nki. 102-103.
b NSAKISO KƐ NTSHANGO: M’ɔkɔngɔ wɔ tokokolo nsawola lá nkambo djɛ nonghanyi k’olemo w’ipoposanyɛ wɔ ntshandjawala, olami w’iloyi apɛyɛ ansakodji alako lá wopo w’okokawɔ nyemala má mpɛyɛ epele ɔkɔngɔ.
