1. Oye paradiso kɛ nyuma, ko nkano djɛkɔnge dj’oyɛso ladjɛ ndɔsa?

 PARADISO kɛmɔtshi kelekɔ lɔɔko kɛnɛ lá looko, kembolola kfu l’anto wanangha akambo wa wɔlɔ. Kelekɔ la miliyɔ y’anto wasasanga la vu djɛ nsɔsɔlɔ. Anto wamboshiyɛká ndjingela lá paradiso kɛsɔ wambɔsá nkano djɛ ntshikala l’eteyi lotshinda. Wangokombolake lonkina dj’anto efula ndakilika l’ɛtɔyi k’edjena ketshikitanyi kɛsɔ. Idjena yɛkɔ yɛsɔ nge? Idjena yɛkɔ nde paradiso kɛ nyuma! a

2. Nkambo djɛkɔnge djetokamoyɛ lá kɛnɛ kelendana la paradiso kɛ nyuma?

² Nkambo djɛ nkamɔ nde, Yehova ambolonghanyɛ idjena imɔtshi yɛ djingingi y’enkambi wɛnde oyɛwɔ lá vu, kaanga owikawɔ l’andja wa Satana wambolola la wayi wa lopango, l’ambalaka, ole l’anto wapokana l’anteyi kɛwɔ. (1 Dj. 5:19; Ndj. 12:12) Ndjambe kɛso kɛ ngandji ɛna eposelo wɛ nyɛtshi wɛ nkfumbo dj’akambo djɛnɛ la atɔpɛyɛ elamelo k’oyɛso la djonyi dj’iso mfula lá nyuma. Otepela wɔnde wongotepelake djɛ paradiso kɛ nyuma ete ngo ‘djisa’ la ‘bedji dj’ovutelawɔ washi wɔlɔ.’ (Iza. 4:6; 58:11) Mpeyi m’osako wɔ Yehova, waawika lá paradiso kɛsɔ walekɔ l’akoka wa mɔngha l’etsho w’ekomo wɛ wolo wɛnɛ.​—Iza. 54:14; 2 Ti. 3:1.

3. Wopo wɔkɔnge Izaya 65 yakotshama l’etsho wɛ ntondo?

³ Má mbamba k’ɔprɔfɛtɛ Izaya, Yehova atepelaka wopo w’ongoyala anto wangowika lá paradiso kɛ nyuma. Okoka nyɛna etepela wɛsɔ lá Izaya shapitrɛ 65, wekotshamisá mbala kɛ ntondo  l’ɔnɔnyi wɔ 537 N.D.D. L’ɔnɔnyi wɔsɔ, ase Juda walapɛlisá watshungɔka má lomfumbe má Babilɔnɛ la wakalɔka t’owila wɔwɔ. Yehova asakolaka enkambi wɛnde la akotshɛ́ka dj’iwɔ nkomɛ ngando kɛ Jerusalɛmɛ ketshitanisá olangala lonkina ole ndɔngɔsɔla tɛmpɛlɔ kɛnde djɛ nkoma idjena y’ɔtɛmwɛlɔ wɔ nsɔsɔlɔ l’Isariyɛlɛ.​—Iza. 51:11; Zak. 8:3.

4. Wopo wɔkɔnge Izaya 65 okotshamawɔ l’etsho wɛnɛ?

⁴ Ekotshamelo k’ape kɛ prɔfɛsi k’Izaya kewangaka lá 1919 D.D. winá w’enkambi wɛ Yehova w’etsho wɛnɛ yatshungɔ má lomfumbe lɔ Babilɔnɛ dj’Ekekete. Ko manyi paradiso kɛ nyuma kewangaka ntshanghana lá looko l’otondo. Ansakodji y’Onkfumi wakfumbaka ntshumano efula la watɔka mbambo yɛ nyuma. Ampame l’amato wayalaki ntondo ase lopango ngole la nanghedji djɛ nyɛtshi, ‘walɔtaka lonto lɔ bango lotongamisá lá nkilika ɛkɔpa kɛ Ndjambe.’ (Ɛfɛ. 4:24) Lá nsɔsɔlɔ, esako efula w’etepelisá Izaya wengokotshama l’andja wa bango wayaye. Koko kaanga winá wɔsɔ, towa esako efula wetosasangɛ. Nyɔntshɔ tokolenda wopo w’olendanaso la paradiso kɛ nyuma ole ladjikɛnge sopakoke mposa m’eteyi kaanga ndambo daambi.

WOPO WƆ NDEMBETELA ANTO WELÁ PARADISO KƐ NYUMA

5. Ete ngo Izaya 65:13 olakande, esako wɛkɔnge songowa má ndjala l’eteyi kɛ paradiso kɛ nyuma?

⁵ Walɛ wɔlɔ la walekɔ la lokembo. Prɔfɛsi k’Izaya kɛnyɛ otshikitano w’ekekete efula wolekɔ l’antenyɛ lowiko l’anto welá paradiso kɛ nyuma la lowiko l’anto welá bandja djɛ paradiso kɛ nyuma. (Wala Izaya 65:13.) Yehova apɛyɛki enkambi wɛnde la lokapo lonkfumɔ ekete kenkfumɔ kɛ yayalaka la djonyi djɛ ntshikala imama la nde. Tolekɔ la nyuma k’ekina, Otepela wɔnde w’ombofunamá, la eleelo ankfuka ankfuka w’okokaso ‘ndɛ, . . . nɔ, . . . [la] nsasanga.’ (Ɛdjɛ la Ndjiso 22:17.) Lá lɛdji lotshikitanyi, anto walekɔ́ lá bandja djɛ paradiso kɛ nyuma, ‘wɛna fɛmi la ndjala . . . , wɛna fɛmi la mposɛ kɛ washi . . . , [la] wɛna fɛmi la nsɔnyi.’ Ehomba wɛwɔ wɛ nyuma wepashiyaka​—Amɔ. 8:11.

6. Kɛkɔnge kɛ Yɔwɛlɛ 2:21-24 otepelande lá nkambo dj’eleelo wɛso wɛ nyuma, ko wopo wɔkɔnge w’okokaso mba wapɔ m’eteyi?

⁶ Lá prɔfɛsi kɛnde, Yɔwɛlɛ akambaka la nkete dekɔ djonyi lá lowiko, ete ngo mbambo, waná, l’avuta w’olivɛ djɛ nyɛnyɛ ente Yehova mpɛyɛka la lokapo lonkfumɔ enkambi wɛnde ekete kenkfumɔ k’oyɛwɔ la djonyi, ndjila ole oleelo wɔ nyuma. (Yɔw. 2:21-24) Nde nanghaka nkambo djɛsɔ má mbamba kɛ Bible, k’enkanda wɛso, kɛ sitɛ kɛso k’ɛntɛrnɛtɛ, kɛ nsanghanyɛ y’otshumano, yɛ nkekete la yɛ rɛjɔ. Tokoka mba wapɔ má eleelo wɛsɔ lofu la lofu, ko eposelo wengoyala nde, alemba waso wa nyuma wangokemba.

7. Kɛkɔnge kɛtɔpɛyɛka ‘wɔlɔ l’oloko’? (Izaya 65:14)

⁷ Woka wɔlɔ la walekɔ l’osasa. Enkambi wɛ Ndjambe wafula ‘elolo w’osasa’ ladjikɛnde eloko wɛwɔ wembolola la djedjɛ. (Wala Izaya 65:14.) Akambo wa nsɔsɔlɔ, alaka wapɛyɛ lokembo welá Otepela wɔ Ndjambe, la nkongi djɛso mbopikamá l’oshinga wɔ mbendo w’olambo wɔ Kristo, ntɔpɛyɛka ‘wɔlɔ l’oloko.’ Nsawola akambo wasɔ la wananyɔ l’ankaana yɛso yɛ nyuma ntɔpɛyɛka nsɔsɔlɔ osasa!​—Yee. 34:8; 133:1-3.

8. Tolembetelo tope tɔ nkekete tɔkɔnge tɔ paradiso kɛ nyuma?

⁸ Ngandji la osanga wolekɔ́ l’anteyi k’enkambi wɛ Ndjambe oyɛwɔ nde tolembetelo tope tɔ nkekete efula tɔ paradiso kɛ nyuma. ‘Mámá’ djɛsɔ ntɔpɛyɛ ikanyi lá wopo wongoyala lowiko l’andja wa bango, l’idjena y’enkambi wɛ Yehova yongoyala la  ngandji ole l’osanga w’efula woleka wɔ winá wɔsɔ. (Kɔl. 3:14) Nkaana kɛmɔtshi k’Okristo akɔndɔla kɛnɛ kɛ ndɛnyi le Ewakɛ wɛ Yehova winá wɔ ndapomana lawɔ mbala kɛ ntondo: “Ntewaki wopo wɔ ndjala l’osasa, kaanga lá nkfumbo kɛmi. Mɛnyi ngandji lá nanghedji mbala kɛ ntondo ngo le Ewakɛ wɛ Yehova.” Onto onkfumɔ w’okombola ndjala l’osasa la ndjoka wɔlɔ, ladjɛ ndjingela lá paradiso kɛso kɛ nyuma. Ayale wopo wɔkɔnge w’andja wanɛ okanelawɔ lá nkambo dj’Ewakɛ wɛ Yehova, walekɔ la djiina ntepela ente lokumu lɔ wɔlɔ efula, edjinge la nkfumbo kel’andja w’otondo.​—Iza. 65:15.

9. Kɛkɔnge kelaka Izaya 65:16, 17 lá nkambo dj’ekakasano wɛ lowiko?

⁹ Walekɔ la lotshungɔ ole la vu. Izaya 65:14 atepela ante anto wangɔsɔná djɛ ntshikala lá bandja djɛ paradiso kɛ nyuma ‘wangɔtɔ tɛndjɛ m’ɔtɛ wɔ djodjo l’oloko la wangokfuma akfumo m’ɔtɛ wɔ yimba imbotshimbá.’ Iya otepelaso mo djɛ akambo wapɛyɛ enkambi wɛ Ndjambe djodjo l’oloko la yɛnyi? Ekomo ekomo akambo wasɔ ‘wangovungama la wapangɛnyɛ lá wiso wa [Ndjambe].’ (Wala Izaya 65:16, 17.) Yehova angimɛ ekakasano wɛso, ko lá winá wɔkɔ wɔsɔ, djodjo djeyɛ m’ekakasano wɛkɔ ngoshila.

10. Lamo ɛnɛ ente oyɛwɔ nde mpeyi k’ekekete efula kɛ nsanghana la wananyɔ l’ankaana y’Akristo? (Lenda edjinge ntshango.)

¹⁰ Kaanga winá wɔsɔ, tongoyalake la vu dj’efula winá w’oyɛso lá nsanghanyɛ y’otshumano, idjena y’okokaso ndjala vu la ndjila wayi watotshimbɛ yimba w’andja wa lopango wanɛ l’ɔkɔngɔ. Tongokotshɛke djɛ vu ndjala lá paradiso kɛso kɛ nyuma má ndjala la ngandji, osasa, vu, oloko wɔlɔ la ndákota, ntepela ente wekeka wa nyuma kɛ Ndjambe. (Nga. 5:22, 23) Ɔsɔ ngo osako w’okotshɛso wɔ ndjala l’eteyi k’olonghanyelo wɔ Ndjambe! Anto walekɔ́ l’eteyi kɛ paradiso kɛ nyuma wanghɛna ekotshamelo kɛ daka djɛ Ndjambe djɛ ‘olongo wɔ bango la looko lɔ bango.’

11. Lá nkilika Izaya 65:18, 19, lá wopo wɔkɔnge paradiso kɛ nyuma kɛ Yehova ndombokfumbá olendanawɔ laso?

¹¹ Walekɔ la djedjɛ ole l’osasalo. Izaya akindjɛ ntisola ladjikɛnge oyɛso la donga djɛ ‘ndjoka wɔlɔ la nsasanga’ lá paradiso kɛ nyuma. Yehova ndeke l’olonghanyisá idjena yɛsɔ. (Wala Izaya 65:18, 19.) Djɛko ndeke nkambo djɛsɔ mpatokamoyɛ má nyɛna wopo wɔ Yehova okambande laso djɛ ndɔndjɛ anto má elonghanyelo wɛ ndjala w’andja wanɛ tá paradiso kɛso kɛ nyuma k’olangala efula! Tolekɔ l’osasalo efula lá nkambo dj’esako w’owaso mande tolekɔ lá nsɔsɔlɔ edjinge tolekɔ la mposɛ  k’efula kɛ nshimela anto ankina kɛnɛ kelendana l’akambo wasɔ.​—Jɛr. 31:12.

12. Olawokɛ ngete mo lá nkambo dj’alaka welá Izaya 65:20-24, ko lamo?

¹² Tolekɔ lonkina la djedjɛ ole l’osasalo lá nkambo djɛ nkongi dj’okotshɛso m’ɔtɛ wɔ djokanelo djɛso djɛ wɔlɔ la Yehova. Kokanela nkete nkfumɔ djɛ sɔngɛna la djɛ songonangha l’andja wa bango wa Ndjambe! Bible ntolakaka ante: ‘Lako wɔna . . . wongowika ngo mfu imangha toko, la lako ekokolo kepangokotshɛ mfu yɛnde. Tongopika amvulu ko tongowikaka l’eteyi [la] tongokamba awedji wa vinyɔ ko tɔngɔlɛ mbambo yɛ m’eteyi.’ ‘Topangɛna ndjolo k’ɛnɛna’ ladjikɛnde ‘tongosakolama me Yehova.’ Nde atolaka lotoyi pɔlɔ, la lowiko l’osasa lolekɔ́ l’okoma wɔ nsɔsɔlɔ. ‘Kaanga lá ntondo k’iwɔ ndoweta,’ nde angewa djonyi djɛ onto l’onto edjinge ‘angokotshɛ mposɛ k’ekete kenkfumɔ kewika.’​—Iza. 65:20-24; Yee. 145:16.

13. Wopo wɔkɔnge Izaya 65:25 ɛnyɛnde etshikitano wenangha anto lá mbiko yɛwɔ winá w’owangawɔ nkambela Yehova?

¹³ Vu la lotoyi pɔlɔ. Mpeyi má okotshɔ wɔ Ndjambe anto efula wayalaki lopango, la nanghedji djɛ nyɛtshi wambonanghá etshikitano wɛ nkekete lá mbiko yɛwɔ. (Wala Izaya 65:25.) Iwɔ wananghaka la wolo djɛ ntshika nanghedji djɛwɔ djɛ nyɛtshi. (Ɔrɔ. 12:2; Ɛfɛ. 4:22-24) Lá nsɔsɔlɔ, enkambi wɛ Ndjambe walekɔ ngo ase ntshamba djɛ djɔ, djɛko ndeke okindjɛso nangha evunga. Koko, Yehova ambilá ‘nkopo y’anto inkfumɔ’ iwoke imɔ má mámá djɛ djɔ djɛ ngandji la djɛ vu. (Tito 2:11) Ɔsɔ alekɔ nsese djɛ ngo Ndjambe kanga Nkfulu-inkfumɔ ndeke lokoka nangha!

14. Wopo wɔkɔnge kɛnɛ ketepela Izaya 65:25 yakotshama lá nkambo djɛ wɔnanyɔ ɔmɔtshi?

¹⁴ Anto nkoka ntshikitanyɛ lonto lɔwɔ? Tokolenda ndjɔmbɔmba kɛnɛ. Olangala ɔmɔtshi wingelisá la woposisá má lokando la ɛnɔnyi 20 ayapɛyɛka efula lá wayi wa mbindo la wa lopango. Ingelaka lá lokando ladjikɛnde ɔngɔlaki etuka, awolaki amvulu, la m’ɔtɛ wɔ ndjowo inkina yɛ nkekete. Nde ayalaki entshupa djɛ nana l’onto onkfumɔ. Mbala kɛ ntondo kɛ ndoke akambo wa nsɔsɔlɔ wa Bible la kɛ ndawange ndjingela lá nsanghanyɛ y’Ewakɛ wɛ Yehova, nde ayalaka l’eshikikelo ante ambisola lowiko lolekɔ́ l’okoma, ntepela ente ntɛmɔla Yehova lá paradiso kɛ nyuma. M’ɔkɔngɔ wɔ nde ndongola batisimo, nde atɔnɔlaki mbala efula lá wopo wɔ Izaya 65:25 yakotshamaka lá lowiko lɔnde. Nde atshikitanaka má wopo wɔ ndayalaka ntondo, onto wɔ lopango ete ngo kimbwe, ko ambokomá onto wɔ vu, ete ngo wɔna mpanga

15. Ladjikɛnge okombolaso dj’anto ankina ntokilika lá paradiso kɛ nyuma, ko okokaso nangha nkambo djɛsɔ ngete mo?

¹⁵ Izaya 65:13 awanga l’etepela wɛnɛ: ‘Nkfumi olongo Nkfumi Yehova ndeke lotepela ante.’ Vɛrse 25 djekoma l’etepela wɛnɛ: ‘Ndeke Yehova otepelande.’ Etepela wɛnde wengokotshamake winá enkfumɔ. (Iza. 55:10, 11) Paradiso kɛ nyuma kemboshiyɛka ndjala nkambo djɛ nsɔsɔlɔ. Yehova ambonkfumbá ɛtɔyi kɛ nkfumbo ketshikitanyi k’antɛmɔdji wande. L’anteyi k’enkambi wɛnde wɛsɔ tokoka ndjala la ndambo kɛ vu ole ndjala l’elamelo l’andja wa lopango wanɛ. (Yee. 72:7) M’ɔtɛ wɔ donga djɛsɔ, tokombola nkotshɛ́ anto efula dj’iwɔ ntokilika lá nkfumbo kɛso k’Akristo kel’andja w’otondo. Tokoka nangha nkambo djɛsɔ má ndápɛyɛ l’olemo wɔ nkfumba anto ambeki.​—Mat. 28:19, 20.

WOPO WƆ NSEPA ANTO LÁ PARADISO KƐ NYUMA

16. Wopo wɔkɔnge anto osepamakawɔ lá paradiso kɛ nyuma?

¹⁶ Onto onkfumɔ wɔ l’anteyi kɛso alekɔ l’odjito wɔ djonyi efula wɔ ndɔngɔsɔla  paradiso kɛ nyuma djɛ anto nsepama l’eteyi. Tongokotshɛ odjito wɔsɔ ntsha tokola Yehova. Nde apasepaka onto la wolo l’olonghanyelo wɔnde. Koko ‘angosepake’ anto le nde la ngandji kenkfumɔ. (Dj. 6:44; Jɛr. 31:3) Anto w’eloko wɔlɔ weka wekeka wa Yehova wa ngandji la lonto lɔnde losepá, wangosepamake te nde ipa la ndaatshinda la wolo. Wopo wɔkɔnge w’okokaso nsepa anto lá paradiso kɛso kɛ nyuma má wekeka l’eyalelo kɛso kɛ wɔlɔ?

17. Wopo wɔkɔnge w’okokaso nsepa anto ankina lá paradiso kɛ nyuma?

¹⁷ Yopo yɛ wɔlɔ yɛ nsepa anto ankina lá paradiso kɛ nyuma nde má nanghela winaso andjawodji akambo la ngandji ole l’oloko wɔlɔ. Winá wɔ anto wa bango ingelawɔ lá nsanghanyɛ, iso nkɔpaka iwɔ ndjala l’ikanyi yɛkɔ imɔ ete ngo y’anto w’ɛtɛndɔ kɛ ntondo watayalaki andjawodji, wingelisá nsanghanyɛ lá Kɔrɛtɔ. Iwɔ watepelaka ambɔ: ‘Ndjambe alekɔ nsɔsɔlɔ l’anteyi kɛnyo.’ (1 Kɔ. 14:24, 25; Zak. 8:23) Djɛko ndeke, iso ladjɛ nkidjɛ nkamba la dako djɛtɔlɔmba djɛ ‘ndjala vu l’anteyi kɛso.’​—1 Te. 5:13.

18. Kɛkɔnge kekoka nsepa anto l’olonghanyelo wɔso?

¹⁸ Iso ladjɛ nangha la wolo djɛ nyɛna winá enkfumɔ wananyɔ l’ankaana yɛso y’Akristo ete ngo Yehova awɛnande. Tongonangha nghɔsɔ má mpika wiso lá wekeka wawɔ, koko ape l’evunga wɛwɔ, wengoyɛ ndoshila. Tokoka nkandola ekakasano enkfumɔ l’anteyi kɛso la yimba yɛ ngandji má ndjala winá enkfumɔ ‘l’oloko wɔlɔ, ndjala la djandji dj’efula, la nyimeyana l’oloko ɔmɔ.’ (Ɛfɛ. 4:32) Makɔ, paradiso kɛ nyuma kengosepa anto wakɔpa ndananghela akambo lá topo tɔsɔ. b

 TOTSHIKALE L’ETEYI KƐ PARADISO KƐ NYUMA

19. a) Ete ngo ipapango “ Iwɔ waposaka edjinge wakalɔka” ɛnyɛnde, kɛkɔnge k’anto amɔtshi yatepela m’ɔkɔngɔ w’iwɔ nkalɔ lá paradiso kɛ nyuma? b) Nkano djɛkɔnge dj’oyɛso ladjɛ ndɔsa? (Lenda edjinge ntshango.)

¹⁹ Ɔsɔ ngo oyɛso la djedjɛ tá paradiso kɛso kɛ nyuma! Kembetela ndjala wɔlɔ ndeka wopo wɔ yayalaka ntondo edjinge anto efula walumɛ Yehova wambetela ndjingela l’eteyi ndeka wopo wɔ yayalaka ntondo. Toyale lotshinda lotshinda la djedjɛ tá paradiso kɛ nyuma kɛ Yehova ndatotongela. Anto ankfumɔ wakɔpa mba lokembo, ndjala l’osasa, ndjala lá vu, ole lá elamelo ladjɛ ndjingela lá paradiso kɛ nyuma la ntshikala lotshinda l’eteyi! Koko, towadjɛ ladjikɛnde Satana anangha la wolo djɛ ntoposɛ m’eteyi. (1 Pɛ. 5:8; Ndj. 12:9) Tɔtɔpɛyɛke mbamba kɛ nde ntolonga. Nyontshɔ tonanghe la wolo djɛ nama olangala, piyɔɔ la vu djɛ paradiso kɛso kɛ nyuma.