1. Wopo wɔkɔnge ansakodji amɔtshi yokaka lá kɛnɛ kelendana la nsawola l’anto ankina l’olemo w’iposasanyɛ? (Lenda edjinge ntshango.)

 ETE ngo oyɛso enkambi wɛ Yehova, iso mpoposanyɛka le anto ankina ladjikɛnde iso nkɔpaka Papa kɛso kɛ l’olongo la nkɔpaka nkotshɛ́ winaso anto dj’iwɔ ndowewa. Ansakodji efula wangosasangake l’olemo w’ipoposanyɛ. Koko amɔtshi wangoyalake l’okakasano djɛ nsasanga l’olemo wɔsɔ. Lamo? Amɔtshi wakoka ndjala ɛnsɔnyi la wangoyawɛnake ete ngo wapalekɔ wetsha wɛ wɔlɔ. Ankina wangɛnake nyɛtshi ntopoposanyɛ l’amvulu y’anto ipa la iwɔ ndaweta. Amɔtshi lonkina wangokake wɔma ambɔ wakoka ntakilika. Ankina wangewɔke dj’ipa ntofutanyɛ anto ankina. Kaanga ɔkɔpawɔ Yehova efula, wananyɔ l’ankaana yɛsɔ wangɛnake ambɔ alekɔ nkambo djɛ wolo efula mpoposanyɛ losango lɔ wɔlɔ le anto wayopewe. Koko, wangosipisoyɛke ambɔ olemo wɔsɔ wolekɔ djonyi efula, edjinge wangopoposanyɛke mbala la mbala. Ɔsɔ ngo Yehova oyɛnde ladjɛ ndjoka osasa lá nkambo djɛwɔ!

2. Ntsha olekɔ l’okakasano djɛ mba osasa l’olemo w’ipoposanyɛ, lamo ngopakoke ndɛmba?

² Ongoyalake winá ɛmɔtshi l’okakasano djɛ mba osasa m’olemo w’ipoposanyɛ m’ɔtɛ wɔ tokanyi tɔ nghɔsɔ? Ntsha nghɔsɔ, tɔlɛmbake. Wopo wɔ ngopoyawilelá oloko nkoka nyɛnyɛ ente, l’okitshakitshɛ onkfumɔ opakɔpɛ nsepa ikanyi y’anto te wɛ la opakɔpɛ mvwana l’anto. Edjinge lako onto wokombolaká iwɔ ndokilika, pekapeka winá w’ɔsɛsande nanghela anto ankina wɔlɔ. Papa kɛko kɛ l’olongo ewa ekakasano wepomana lawɛ la  akombola nkɔpɛyɛ okotshɔ w’oyɛ la djonyi. (Iza. 41:13) Lá djamba djɛnɛ, tongoshishima alako atano wa wopo w’okokɛ nana la tokanyi tɔ nghɔsɔ la ndjala l’osasa l’olemo w’ipoposanyɛ.

TSHIKA OTEPELA WƆ NDJAMBE W’OKOKEMBƐ

3. Kɛkɔnge kekotshisá ɔprɔfɛtɛ Jɛrɛmi djɛ mpoposanyɛ anto ankina?

³ Kaanga l’etsho wɛ ntondo, losango l’ime Ndjambe lakembɛki enkambi wɛ Ndjambe winá wɔ yawaka edjito wɛ wolo nkotshɛ. Tɔkɔsa ndjɔmbɔmba kɛ ɔprɔfɛtɛ Jɛrɛmi. Nde akakanyɛka winá wɔ Yehova ndɔpɛyɛ odjito wɔ mpoposanyɛ. Jɛrɛmi atepelaka ante: ‘Lemi mpewe ntepela ladjikɛnde ndekɔ ngo ilɛngɛ.’ (Jɛr. 1:6) Iya kɛkɔnge k’okotshisá djɛ mba oloko wolo? Nde awaka wolo m’otepela wɔ Ndjambe. Nde atepelaka ante: ‘Woyalaka l’oloko wɔmi ete ngo iyɛ yelangalanga, ko mpekɔka mbomba l’eteyi.’ (Jɛr. 20:8, 9) Kaanga Jɛrɛmi ndayalaka l’etatshi kɛ looko k’okakasano efula, losango lɔ yɔpɛyɛ djɛ mpoposanyɛ lɔpɛyɛka wolo wɔ ndayalaka la djonyi djɛ nkamba olemo wɔkɔ.

4. Kɛkɔnge ketokomelaká winá w’owalaso la w’ɔtɔnɔlaso l’Otepela wɔ Ndjambe? (Kɔlɔsɛ 1:9, 10)

⁴ Akristo wangowake wolo má losango lolekɔ́ l’Otepela wɔ Ndjambe. Winá wɔ ndafunelaka otshumano wɔ Kɔlɔsɛ, ɔpɔstɔlɔ Poolo atepelaka ante mba balo djɛ djɔ nkoka ntshinda wananyɔ wande djɛ ‘nkɛnda lá wopo wɔ Yehova ɔkɔpande’ winá w’okindjɛwɔ ‘ntɔ mbambo l’elemo wɛ wɔlɔ enkfumɔ.’ (Wala Kɔlɔsɛ 1:9, 10.) L’eteyi kɛ elemo wɛ wɔlɔ wɛsɔ totana edjinge mpoposanyɛ losango lɔ wɔlɔ. Djɛko ndeke, winá w’owalaso la w’ɔtɔnɔlaso l’Otepela wɔ Ndjambe, djawo djɛso te Yehova nkembaka la tongosipisoyɛke wɔlɔ wɔlɔ lamo oyɛwɔ djonyi mpoposanyɛ losango lɔ wɔlɔ l’Onkfumi.

5. Wopo wɔkɔnge w’okokaso ndeka mba wapɔ má badji la wekelo wɔso wɔ Bible?

⁵ Djɛ ndeka mba wapɔ m’Otepela wɔ Ndjambe, iso ladjɛ ndjewɔ mbala, ndjeka, la ntɔnɔla lá djiko lá djiko. Ɔsa winá wɔlɔmbamá djɛ nangha akambo wasɔ. Ntsha ombowala vɛrse mɔtshi djɛ ngopasipisoyɛ kɔɔ, totambake. Koko, kamba la Ɛndɛksɛ w’enkanda wɛ Watch Tower kana Dibuku d’eyangelo d’Ɛmɛnyi wa Jehowa djɛ ndjoka vɛrse djɛkɔ wɔlɔ wɔlɔ. Ntsha ɔmbɔsa winá efula djɛ ndjeka, ongoleka ndjala l’eshikikelo ente Otepela wɔ Ndjambe wolekɔ nsɔsɔlɔ. (1 Te. 5:21) Winá wɔ ngotaleke ndjala l’eshikikelo ente Otepela wɔ Ndjambe  wolekɔ nsɔsɔlɔ, ndeke nghongoleka nsasanga djɛ nshimela anto ankina akambo w’ekɛ.

YALƆNGƆSƆLA WƆLƆ LÁ NTONDO KƐ NTOPOPOSANYƐ

6. Lamo oyɛso ladjɛ ndalɔngɔsɔlaka wɔlɔ lá ntondo kɛ ntshɔ ntopoposanyɛ?

⁶ Ntsha omboyalɔngɔsɔla wɔlɔ lá ntondo kɛ ntopoposanyɛ, opangotshimba yimba winá w’osawolɛ l’anto ankina. Yeso akotshɛka ambeki wande dj’iwɔ ndalɔngɔsɔla ntondo kɛ nde ndaatomá t’olemo w’ipoposanyɛ. (Luka 10:1-11) Ladjikɛnde wakambaka la kɛnɛ kɛ Yeso ndalakanyɛ, ambeki w’okaka osasa efula má kɛnɛ kɛ yayale l’akoka wa nangha.​—Luka 10:17.

7. Wopo wɔkɔnge w’okokaso ndalɔngɔsɔla lá ntondo kɛ ntshɔ topoposanyɛ? (Lenda edjinge ntshango.)

⁷ Wopo wɔkɔnge w’okokaso ndalɔngɔsɔla t’olemo w’ipoposanyɛ? Iso ladjɛ nkanela kɛnɛ k’ɔkɔpaso ntotepela, edjinge masɔ ntepela ete ngo sotepelaka, la totepela tɔso sɔmɛlɛ. Alekɔ lonkina djonyi ntɔnɔla lá enkeka kana weepó epe kana esato wɛ anto wa l’etatshi kɛko kɛ looko yolekaka ndjopola la ndjewa wopo wɔ songokadjimola lá weepó wɛkɔ enkfumɔ. Masɔ winá w’osawolaso l’anto, tokoka ndjala l’osasango, la omonghamonghɔ, edjinge la djokanelo djɛ wɔlɔ l’anto.

8. Lá wopo wɔkɔnge Akristo ɛlɛmawɔ l’ampoke y’awomba yotepelawɔ lá ndjɔmbɔmba kɛ ɔpɔstɔlɔ Poolo?

⁸ Ɔpɔstɔlɔ Poolo atepelaka djɛ olemo wɔso w’ipoposanyɛ winá wɔ ndatepela ante: ‘Tolekɔ la nkete djɛ ntsho djɛsɔ lá mpoke y’awomba.’ (2 Kɔ. 4:7) Ya nkete djɛ ntsho djɛsɔ nge? Oyɛwɔ nde olemo w’owikɛ mbiko wɔ mpoposanyɛ losango l’Onkfumi. (2 Kɔ. 4:1) Ko mpoke y’awomba nge? Oyɛwɔ nde djingingi djɛ enkambi wɛ Ndjambe wepoposanyɛ losango lɔ wɔlɔ le anto ankina. L’etsho wɛ Poolo, ananghi y’opoto wakambaki l’ampoke y’awomba djɛ mbɛmba nkete djɛ ntshina, ndjɔmbɔmba oleelo, waaná la mfalanga. Lá wopo wɔkɔ ɔmɔ ndeke, Yehova ambɔtɔpɛyɛ odjito wɔ ntsho efula, wɔ mpoponsanyɛ losango lɔ wɔlɔ. Má okotshɔ wɔ Yehova, tongowa wolo w’oyɛso la djonyi djɛ mpoposanyɛ losango lɔso la nkɔmano nkfumɔ.

LƆMBA DJƐ MBA OLOKO WOLO

9. Wopo wɔkɔnge w’okokaso mfumboyɛ wɔma w’onto la wɔma w’ente wangototokilika? (Lenda edjinge ntshango.)

⁹ Lá winá ɛmɔtshi, tokoka ndjala la wɔma w’onto kana wɔma w’ente wangototokilika.  Iya wopo wɔkɔnge w’okokaso mfumboyɛ wɔma wɔsɔ? Tokoshishima lɔlɔmbɔ l’apɔstɔlɔ yananghe winá wɔ yawilela ɔlɛmbɛ w’ipa mpoposanyɛ. L’edjena k’iwɔ ndjoka wɔma, iwɔ walɔmbaka Yehova djɛ ndaakotshɛ́ dj’iwɔ ‘nkindjɛ mpoposanyɛ otepela [wɔnde] l’oloko wolo onkfumɔ.’ Yehova akadjimolaka lɔlɔmbɔ lɔwɔ mbala kɛkɔ kɛmɔ. (Ele. 4:18, 29, 31) Ntsha winá ɛmɔtshi tomboyala la wɔma w’onto, iso ladjɛ ndɔmba Yehova okotshɔ. Lɔmba Yehova akokotshɛ́ djɛ mfumboyɛ wɔma w’onto la djɛ mfudjɛ ngandji kɛko te anto.

10. Wopo wɔkɔnge Yehova otokotshɛ́nde djɛ nkotshɛ olemo wɔso wɔ mpɛyɛ owakɛ lá nkambo djɛnde? (Izaya 43:10-12)

¹⁰ Yehova ambɔtɔsɔná dj’iso ndjala Ewakɛ wɛnde, edjinge nde ntolakaka djɛ ntokotshɛ́ dj’iso ndjala l’eloko wolo. (Wala Izaya 43:10-12.) Tokolenda ngo topo tɔnɛyi tonanghakande nkambo djɛso. Yopo yɛ ntondo, Yeso alekɔ esanga laso winá enkfumɔ w’opoposanyɛso losango lɔ wɔlɔ. (Mat. 28:18-20) Yopo y’ape, Yehova angokambake l’andjelo djɛ ntokotshɛ́. (Ndj. 14:6) Yopo y’asato, Yehova ambɔtɔpɛyɛ nyuma k’ekina ete ngo okotshɔ djɛ ntovungolaka akambo ankfumɔ wa sombeká. (Dj. 14:25, 26) Yopo y’anɛyi, Yehova ambɔtɔpɛyɛ wananyɔ l’ankaana djɛ ntoshindjeyɛ l’olemo wɔsɔ. Má okotshɔ wɔ Yehova la wɔ wananyɔ l’ankaana y’andja w’otondo, tolekɔ la kenkfumɔ k’oyɛso la djonyi djɛ ndonga l’olemo wɔsɔ.

EKELA L’ANTO W’ETATSHI KƐKO KƐ LOOKO LA YALA L’IKANYI YƐ WƆLƆ

11. Winá w’oyɛ l’olemo w’ipoposanyɛ, wopo wɔkɔnge w’okokɛ ntana anto efula? (Lenda edjinge ntshango.)

¹¹ Ɔngɔlɛmbake ntsha opatane anto lakawɔ? Lamo ngopakoke ndawopola ente: ‘Anto w’etatshi kɛmi kɛ looko oyɛwɔ winá wɔsɔ lá mpe?’ (Ele. 16:13) ‘Walekɔ l’elemo ndo lá lobengo?’ Ntsha nghɔsɔ, opakoke mpoposanyɛ l’ipoma mboka djɛ mpomana l’anto efula? Wɔnanyɔ w’etawɔ Joshua atepela ante: “Mbaka mbamba efula yɛ mpoposanyɛ winá wɔ motaheetaka lá ndjena dj’osadjɛwɔ nkete la djena nkina dekɔ anto efula.” Nde nya wadjɛnde Bridget, watanaki lonkina anto efula lá kawɔ winá wɔ yatshɔka ntalenda la nkɔlɔ ole lofu lɔ lobengo m’ɔkɔngɔ wɔ midi.​—Ɛfɛ. 5:15, 16.

12. Wopo wɔkɔnge w’okokɛ ndjisola kɛnɛ k’anto awolawɔ kana olekawɔ ndápɛyɛ?

¹² Ntsha anto wapaleke ndapɛyɛ lá losango  lɔso, nangha la wolo djɛ ndjewa akambo w’awolawɔ kana wolekawɔ ndjila yimba. Joshua nya Bridget nkambaka la woopó wɔ loposo lɔ traktɛ winá w’owangawɔ djamba l’anto. Ndjɔmbɔmba, winá w’okambawɔ la traktɛ Okanelɛ ente Bible ewɔ nke? iwɔ ntepelaka ambɔ: “Anto amɔtshi wangɔsake Bible ete ngo onkanda w’ime Ndjambe, ankina ambɔ ape nghɔsɔ. Ko wɛ okanelɛ ente mo?” Weepó wɛ nghɔsɔ wapɛyɛki mbamba kɛ nkindjɛ djamba.

13. Lamo okokaso ntepela ente tombolonga l’olemo w’ipoposanyɛ kaanga ntsha anto wapawola losango lɔso? (Woongo 27:11)

¹³ Kaanga ntsha anto w’opoposanyɛso wapotekameyɛ, iso nkotshɛka okoma wɔso. Lamo? Mande tombonangha kɛnɛ kɛ Yehova la Wɔnande ɔkɔpawɔ iso nangha, ntepela ente tɔmbɔpɛyɛ owakɛ. (Ele. 10:42) Kaanga ntsha topawisa onto wɔ nsawola lande kana anto wambotona losanga lɔso, tokoka ndjala l’osasa ladjikɛnde tewa ente tosasangɛ Papa kɛso kɛ l’olongo.​—Wala Woongo 27:11.

14. Lamo okokaso nsasanga winá wɔ nsakodji kenkina owande onto wawola losango lɔso?

¹⁴ Tokoka lonkina nsasanga winá wɔ ansakodji ankina otanawɔ anto wayapɛyɛ lá losango lɔso l’etashi kɛso kɛ looko. Etange k’Olami kɛdjɛka olemo wɔso w’ipoposanyɛ la ohonelo wɔ ilɛngɛ imbovunga. Anto efula wangotshɔke ntoohona lá djena ntshikitanyi. Winá w’isolawɔ ilɛngɛ yɛkɔ, onto onkfumɔ ndeke losasanga koko ape ngo onto w’owisolisa. Wopo wɔkɔ ɔmɔ ndeke, olemo wɔ nkfumba ambeki oyɛwɔ nde olemo wɔlɔmba anto efula ndjila welo. Angɔlɔmbamake anto ankfumɔ ndjila welo djɛ mpoposanyɛ le onto onkfumɔ w’etatshi kɛ looko, edjinge anto ankfumɔ wangosasangake winá wɔ onto wɔ bango owangande ndjingela nsanghanyɛ.

PIKA WISO LÁ NGANDJI K’OKƐ YEHOVA LA WINAKO ANTO

15. Wopo wɔkɔnge nkamba la Mateo 22:37-39 otokotshɛwɔ djɛ mfudjɛ osasalo wɔso l’olemo w’ipoposanyɛ? (Lenda edjinge djɛ loposo.)

¹⁵ Tokoka mfudjɛ osasa wɔso l’olemo w’ipoposanyɛ má mpika wiso tá ngandji k’okaso Yehova la winaso anto. (Wala Mateo 22:37-39.) Kokanela wopo wɔ Yehova okande osasa winá w’ɔtɛnande tonangha olemo wɔsɔ, la wopo wɔ anto yongoyala l’osasa winá wɔ yongowanga ndjeka Bible! Vungɔ lonkina ente, anto wawola losango lɔso wangowa ewiko.​—Dj. 6:40; 1 Ti. 4:16.

16. Wopo wɔkɔnge w’okokaso mba osasa m’olemo w’ipoposanyɛ winá wɔ sopalekɔ l’akoka wa mposa má mvulu. Pɛyɛ ndjɔmbɔmba

 ¹⁶ Ombodjipamá lá mvulu kɛko m’ɔtɛ wɔ donga mɔtshi? Ntsha nghɔsɔ, pika wiso lá kɛnɛ k’oyɛ l’akoka wa nangha djɛ nyɛnyɛ Yehova la winako anto ngandji. Lá winá w’opela wɔ COVID-19, Samuel nya Dania wadjipamaki ngo lá mvulu kɛwɔ. L’etsho wɛ ndjolo wɛsɔ, iwɔ wapoposanyɛki mbala la mbala ngo lá telefɔnɛ, wafunelaki anto enkanda, la wekaki l’anto Bible má Zumɛ. Samuel apoposanyɛki anto wapomanaki lande l’opitalo wɔ ndɔsaka bɔki djɛ olando wɔ kansɛrɛ. Nde atepela ante: “Ekakasano ntɔtɛkɛka lá yimba, lá demba, la lá nyuma. Iso ladjɛ mba osasa m’olemo w’okambelaso Yehova.” L’anteyi k’ekakasano wɛsɔ, Dania akfɔka olando edjinge atangandjɔki má mbeto l’ilá kɛ ngɔndɔ isato. Masɔ nde atshikalaka lá nkosa k’ekato l’ilá kɛ ngɔndɔ isamalo. Nde atepela ante: “Lananghaki la wolo djɛ nangha k’enkfumɔ kɛ makokaka nangha lá nkilika akoka wami. Lapoposanyɛki ifulume yeyɛki ndombembola, la nsawolaki l’anto wayɛki ndototshikela nkete lá mvulu. Tambaki lonkina wɔlɔ efula lá telefɔnɛ isa omoto ɔmɔtshi wokambaki lá kɔpanyi kɛ tofulume.” Samuel nya Dania watayalá lonkina l’akoka wa nangha akambo efula ete ngo yananghaka ntondo, koko wananghaka kɛnɛ kɛ yakoke nangha edjinge wawaka osasa má nangha nghɔsɔ.

17. Wopo wɔkɔnge w’okokɛ ndeka mba wapɔ má alako wa djamba djɛnɛ?

¹⁷ Alako wambɔpɛyama lá djamba djɛnɛ wangolekake ndjala l’eposelo wɛ wɔlɔ ntsha wambokambema esanga. Dako nkfumɔ oyɛwɔ ngo ngete ekete k’opongolawɔ dambo. Winá w’okambɛ la nkete nkfumɔ dj’opongolawɔ dambo, dambo djɛko ngoyala mpimbo efula. Má nkamba l’alako ankfumɔ wa djamba djɛnɛ, tongoyala la nkete nkfumɔ dj’oyɛso la djonyi djɛ ndongela tokanyi tɔ nyɛtshi la tongoyala l’osasa l’olemo w’ipoposanyɛ.