Lá Bible, itepela ‘ekfundwelo’ oyɛwɔnde má Grɛkɛ “ana’stasis, yesakisola “ngandjola” kana “nyemala lonkina.” Onto wombokfundɔ anghongandjɔke má nyɔyi edjinge angokalɔke lá lowiko ngo wopo wɔ ndayalaka ntondo.​—1 Kɔrɛtɔ 15:12, 13.

 Kaanga itepela “ekfundwelo” yopalekɔ́ la Afunelo welá Hebero, wetakawɔ mbala efula ambɔ Daka djɛ Ntondo, elakanyelo welekɔ l’eteyi. Ndjɔmbɔmba má lotshimbo lɔ ɔprɔfɛtɛ Ozeya, Ndjambe alakaka ante: “Lemi langatshungola má nkfulu kɛ nketa; lemi langaposɛ má nyɔyi.”—Ozeya 13:14; Djɔbɔ 14:13-15; Izaya 26:19; Danyɛlɛ 12:2, 13.

 Anto wangokfundɔ́ yongowika lampe? Anto amɔtshi wangokfundɔ́ wangotowika l’olongo djɛ ntɔlɔndjɛ etengo ankfumi esanga la Kristo. (2 Kɔrɛtɔ 5:1; Ndjiso 5:9, 10) Bible ndjetaka ekfundwelo kɛsɔ ante ‘ekfundwelo kɛ ntondo’ edjinge ‘ekfundwelo kɛ ewangelo’, totepela tope tɔnɛ nyɛnyɛka ente ekfundwelo kenkina kɛngɔwɔlama. (Ndjiso 20:6; Filipɛ 3:11) Ekfunwelo kɛmá ɔkɔngɔ kɛsɔ kengoyalande djɛ ndowika lá looko, djɛ efula k’anto kengokalɔ lá lowiko ndosasanga.—Yeembo 37:29.

 Lá wopo wɔkɔnge anto yongokfundɔ? Ndjambe angɔpɛyɛ Yeso nkfulu kɛ nkfundola edjo. (Djɔanɛ 11:25) Yeso angokawoyɛ ‘anto ankfumɔ welá anketa yevungɔma’ lá lowiko, onto l’onto lá wopo wɔ ndayalaka, la lonto lɔnde, edjinge la wɔngɔ wɔnde. (Djɔanɛ 5:28, 29) Anto wangokfundɔ djɛ ntshɔ tolongo wangowa alemba wa nyuma, ko wanɛ wangokfundɔ djɛ ndowika lá looko wangowa alemba w’ɛnama, w’ipa kaanga ikɔkɔmɔ.—Izaya 33:24; 35:5, 6; 1 Kɔrɛtɔ 15:42-44, 50.

 Anto akɔna w’angokfundɔ? Bible ntepelaka ante: ‘Ekfundwelo k’anto wa wɔlɔ l’anto wa nyɛtshi k’engoyala.’ (Elemo 24:15) Lá anto wa wɔlɔ wangokfundɔ ndjila edjinge anto walekɔ́ la djawo, etengo Nɔa, Sara, edjinge Abrahama. (Ewangelo 6:9; Hebero 11:11; Djakɔbɔ 2:21) Lá anto wa nyɛtshi ndjila edjinge anto watalɛmɛyɛki ɛlɛmbɛ wɛ Ndjambe ladjikɛnde watawa mbamba kɛ ndjeka la nkilika ɛlɛmbɛ wɛkɔ.

 Koko, wanɛ wakoma anto wa nyɛtshi efula la lɛdji lɔ wapakokaki ntshikitana lonkina, wapangokfundɔ. Winá wɔ anto wanghɔsɔ ovɔwɔ, wangovɔke lotshinda ipa la nkongi dj’ekfundwelo djɛ nkalɔ lá lowiko.​—Mateo 23:33; Hebero 10:26, 27.

 Ekfundwelo k’engoyala winá wɔkɔnge? Bible ewoyɛka ante ekfundwelo kɛ anto wangotshɔ t’olongo k’engoyala lá ɛnamelo kɛ Yeso, k’ewangisa má 1914. (1 Kɔrɛtɔ 15:21-23) Ekfundwelo kɛ ndowika lá looko kengonanghema lá Ɛnɔnyi Kinunu wɛ Onkfumi wɔ Yeso, winá wɔ looko yongokadjimɔ paradiso.​—Luka 23:43; Ndjiso 20:6, 12, 13.

 Lamo ndjalá la djawo tá ekfundwelo oyɛwɔ ekanedji kɛ wɔlɔ kɛ yimba? Bible akɔndɔla akambo wahetaki lá nkfundwelo djuwa, ewakɛ wɛnaki washikikɛ nkfundwelo nkfumɔ djɛkɔ. (1 Nkfumi yɛ Nkanga 17:17-24; 2 Nkfumi yɛ Nkanga 4:32-37; 13:20, 21; Luka 7:11-17; 8:40-56; Djɔanɛ 11:38-44; Elemo 9:36-42; Elemo 20:7-12; 1 Kɔrɛtɔ 15:3-6) Wopo wɔ Yeso ndakfundola Lazaro wokamoyɛka efula, etsho ɛnɛyi wehetaka má Lazaro ndavu tii lá winá wɔ Yeso ndoonanghaka nsese lá ntondo k’oloyi w’anto. (Djɔanɛ 11:39, 42) Kaanga anto watonaki Yeso watakoká nyanghana nsɔsɔlɔ kɛ nkambo djɛsɔ, djɛkondeke yatshwela Yeso nya Lazaro nkfuko djɛ ndayaka.​—Djɔanɛ 11:47, 53; 12:9-11.

 Bible nyɛnyɛka ante Ndjambe alekɔ l’akoka edjinge la mposɛ kɛ nkfundola edjo. Nde awomba la wɔngɔ wɔnde wopavungɛka listɛ l’ekekete lɔ onto onkfumɔ wɔ ndongokfundola má lotshimbo lɔ nkfulu kɛnde. (Djɔbɔ 37:23; Mateo 10:30; Luka 20:37, 38) Ndjambe alekɔ l’akoka wa nkawoyɛ anto wambovɔ lá lowiko, edjinge nde nkɔpaka! Má nkɔndɔla ekfundwelo kɛ l’etsho w’eyaye, Bible ntepelaka lá nkambo djɛ Ndjambe ante: ‘Wɛ ongokombola lá nkambo djɛ olemo wɔ ɛwɔ wɛko’.​—Djɔbɔ 14:15.

Tokanyi tɔ nyetshi lá nkambo djɛ ekfundwelo

 Kɛnɛ k’anto otepelawɔ: Ekfundwelo oyɛwɔ nde osanghanelo wɔ anima la demba.

 Nsɔsɔlɔ: Bible ndakanyɛka ante anima oyɛwɔ nde otondo w’onto, apalekɔ etenyi kɛmɔtshi kɛ demba k’ewikaka m’ɔkɔngɔ wɔ nyɔyi. (Ewangelo 2:7, nɔtɛ kel’anse kɛ nkishi; Ezekiyɛlɛ 18:4) Winá wɔ onto ɔmɔtshi okfundɔnde apasanghana lá anima wande, okalɔnde nde tongama etengo anima wa wiká.

 Kɛnɛ k’anto otepelawɔ: anto amɔtshi wakfundɔka ko lako ndjala ilá yombokalɔ mvɔ.

 Nsɔsɔlɔ: Bible ntepelaka ante ‘wanɛ wananghaki akambo wa nyɛtshi’ wangotshɔ tá ‘ekfundwelo kɛ dombo.’ (Djɔanɛ 5:29) Koko, dombo djɛsɔ olendanawɔnde la kɛnɛ kɛ yongonangha w’ɔkɔngɔ wɔ ekfundwelo, apalekɔ lá ntondo k’ekfundwelo. Yeso atepelaka ante: ‘edjo wangoka djoyi djɛ Wɔna Ndjambe, edjinge anto wananghaki wɔlɔ wangowika.’ (Djɔanɛ 5:25) Anto ‘wananghaki wɔlɔ’, kana wangɔlɛmɛyɛ akambo wa yongeka m’ɔkɔmgɔ w’iwɔ nkfundɔ ndeke wiina wawɔ yongofunama lá ‘ɔwɔmbɔ wɔ lowiko.’​—Ndjiso 20:12, 13.

 Kɛnɛ k’anto otepelawɔ: Winá w’okfundɔnde, onto angowa ngo demba djɛ ndayalaka la djɛkɔ la ntondo kɛnde mvɔ.

 Nsɔsɔlɔ: M’ɔkɔngɔ wɔ nyɔyi, demba dj’onto ngosolongɔke edjinge ntshitanaka.​—Losanghanyɛ 3:19, 20.