Etawɔ Batisimo nge?

NDJOKA LÁ

Etawɔ Batisimo nge?

Etawɔ Batisimo nge?

Nsakiso kɛ Bible

Batisimo nsakisolaka nduwa onto lá washi la ndoposɛ m’eteyi. a Nsakiso kɛsɔ ntɛnyɛka lamo Yeso ndalongola batisimo lá ndjale k’ekekete. (Mateo 3:13, 16) Wopo wɔk’ɔmɔ ndeke, mpame kɛmɔtshi k’ose Etiyopi alɔmbɔka djɛnde ndongola batisimo winá wɔ ndakome lá ‘ongunda wɔ washi.’—Elemo 8:36-40.

Nsakiso kɛ batisimo

Bible ndjɛdjɛka batisimo la okfundjelo. (Ɔrɔma 6:4; Kɔlɔsɛ 2:12) Batisimo djɛ washi oyɛwɔnde ngo ngete onto ambowɔ́ lá lowiko lɔnde lɔ ntondo ko ambowanga mbika etengo Okristo womboyalámbolá le Ndjambe. Batisimo edjinge wina ankina walɔndjɛ onto tá ntolongola, oyɛwɔ nde nonghanyi kɛ Ndjambe ndɔshi djɛ onto mba nkfum’oloko kɛ piyɔɔ kembopikama lá olambo wɔ Yeso-Kristo. (1 Pɛtɛlo 3:21) Djɛkondeke, Yeso ndalakanyɛ djɛ ambeki wande ladjɛ ndongola batisimo.—Mateo 28:19, 20.

Batisimo djɛ washi nyimɛka mpekanto?

Lako. Bible ndakanyɛka ante iso nkoka ndawadjɛ má evunga wɛso má lotshimbo lɔ ekila wɛ Yeso ndakɛdjɛ. (Ɔrɔma 5:8, 9; 1 Djɔanɛ 1:7) Koko, djɛ onto mba wapɔ má olambo wɔ Yeso, nde ladjɛ ndjala la djawo le Yeso, ntshikitanyɛ lowiko lɔnde ko ntateyɛ mbika la yopo y’okana la elakanyelo wɛ Yeso, la nde ndongola batisimo.—Elemo 2:38; 3:19.

Batisimo oyɛwɔ nge?

Totepela “ndongola batisimo” la “batisimo” topɛnamaka la Bible. Tɔngɔtɔlake ikanyi tá sɛrɛmɔnyi kɛ nkelesiya mɔtshi onanghakawɔ djɛ “ndongoyɛ” wɔna wɔ daambi batisimo (má ndovutela kana ndɔtɔngɛyɛ washi l’ɔtɛ) la ndɔɔdjɔ djiina.

Bible ndakanyɛka batisimo djɛ wana wa daambi?

Lako, apalakanyɛka. Batisimo djɛ Akristo oyɛwɔ nde le anto wambofulá djɛ iwɔ ndjoka la ndjala la djawo tá “losango lɔ wɔlɔ l’Onkfumi wɔ Ndjambe.” (Elemo 8:12) Djɛngɔlɔmbake ndjoka la ndjawola Otepela wɔ Ndjambe, edjinge ndapɛla—akambo wa wɔna wɔ daambi ndopakoke nangha.—Elemo 2:22, 38, 41.

Lá djiko djɛ lasɔ, Bible nyɛnyɛka djɛ Ndjambe ndɔsaka wana wa Akristo etengo ekina, kana piyɔɔ la wiso wande, mpeyi má djawo djɛ ambotshi wawɔ. (1 Kɔrɛtɔ 7:14) Yotayala nde batisimo djɛ wana wa daambi djengawolamake, ntshimi wana wa daambi wasɔ watasamba ndjala la djonyi djɛ onto onkina ndawawola. b

Tokanyi tɔ pɔlɔ la nkambo djɛ batisimo

Ikanyi yɛ pɔlɔ: Mvutela kana ntɔngɛyɛ onto washi l’ɔtɛ angawolamake ladjikɛnde ndjalaka witshitshi nduwa onto la washi.

Nsɔsɔlɔ: Abatisimo ankfumɔ w’otepelawɔ la Bible osakisolawɔ ngo nduwa onto lá washi. Ndjɔmbɔmba, winá wɔ Filipɛ ndalongoyɛ ose Etiyopi, iwɔ ‘wakitaka tá washi’ djɛ ndolongoyɛ. M’ɔkɔngɔ wɔ lasɔ, ‘iwɔ waposaka má washi.’—Elemo 8:36-39. c

Ikanyi yɛ pɔlɔ: Bible nyɛnyɛka ante edjinge wana wa daambi wangowalemake winá wɔ nkfumbo k’otondo olongolawɔ batisimo. Ndjɔmbɔmba, nde ntepelaka djɛ onami wɔ lokando ɔmɔtshi welá Filipɛ ante: ‘Nde nya nkfumbo kɛnde walongolaka batisimo.’—Elemo 16:31-34.

Nsɔsɔlɔ: Ɔkɔndɔ wɔ onami wɔ lokando wɔsɔ ndakamola oloko nyɛnyɛka djɛ anto walongolisá batisimo wokaka ‘Otepela wɔ Yehova’ ko iwɔ ‘wasasangaka efula.’ (Elemo 16:32, 34) Etepela wɛsɔ watoshikikɛ ambɔ wana wa daambi wayalaki la mvulu kɛ onami wɔ lokando watalongola batisimo, ladjikɛnde iwɔ watakoká ndjoka Otepela wɔ Yehova.

Ikanyi yɛ pɔlɔ: Yeso alakanyɛka djɛ batisimo djɛ wana wa daambi má ntepela ante Onkfumi wɔ Ndjambe oyɛwɔ nde wɔ wana wa daambi.—Mateo 19:13-15; Marko 10:13-16.

Nsɔsɔlɔ: Yeso atatepelaki djɛ batisimo winá wɔ ndatepela etepela wɛsɔ. Koko, ndɛnyɛka nde ante anto wakoka ndjingela la Onkfumi wɔ Ndjambe ladjɛ ndjala etengo wana wa daambi—ndjala vu la ndjala anto wa lɛmɛyɛ.—Mateo 18:4; Luka 18:16, 17.

a Itepela yeyɛ má Grɛkɛ yekadjimwamá “batisimo” nsakisolaka “nduwa lá.” Lenda Dictionnaire théologique du Nouveau Testament, Vɔlimɛ I, nkishi 529.

b Lá nkilika L’Encyclopedie Internationale de la Bible Standard, “lako idjena itanemá batisimo djɛ wana wa daambi lá enkanda wɛ N[ovo] T[ɛstama].” Angotepelake lonkina ante ekfumbo kɛsɔ yapose nde má “yopo yɛ yɛtshi yɛ ndɔsaka batisimo l’edjito w’indeko,” ntepela ente batisimo nyimɛka evunga.—Vɔlimɛ 1, nkishi 416-417.

c L’anse kɛ ipapango yɛ yombofuna ambɔ “Batisimo (lá Bible),” Onkanda w’etawɔ ambɔ Nouvelle encyclopédie catholique ntepelaka ante: “alekɔ nsɔsɔlɔ ente batisimo djɛ Nkelesiya djɛ ntondo ntondo iyayalaka nde djɛ nduwa onto lá washi.”—Vɔlimɛ 2, nkishi 59.