Lako, looko lopatshitanaki lotshinda, lopatshumbamaki, kana mpɛnama. Bible ndakanyɛka ante Ndjambe atongaka looko djɛ anto mbika l’eteyi lotshinda lotshinda.

•   ‘Anto wa wɔlɔ wangokita looko, ko wangowika l’eteyi lotshinda lotshinda.’—Yeembo 37:29.

•   ‘[Ndjambe] ashikimadjɛka looko lá mpikamelo djɛnde; nde apimaki má idjena yɛnde lotshinda lotshinda.’—Yeembo 104:5.

•   ‘Looko ntshikalaka lotshinda lotshinda.’—Losanghanyɛ 1:4.

•   ‘kanga lonanghisá looko, ontongi wɔ nde woshikimadjisá ndii, . . . atatonga ngo etatonga, koko nde okfumbaka djɛ anto ndjnitasɛ l’eteyi.’—Izaya 45:18.

 Ndjambe apangawola anto ntshita looko má nkete djonanghawɔ djetshita looko, ambandji, kana ma lotshimbo lɔ nkete nkina. Koko, nde ‘angotshita anto wa tshita looko.’ (Ndjiso 11:18) Wopo wɔkɔnge ndongonangha nkambo djɛsɔ?

 Ndjambe angohenghanyɛ wa guvɛrnɛma yɛ wana w’anto, watayala l’akoka wa nama looko, la Onkfumi wel’olongo wɔ djɔ. (Danyɛlɛ 2:44; Mateo 6:9, 10) Yeso Kristo, wɔna Ndjambe, ndeke lɔngɔlɔndjɛ Onkfumi wɔsɔ. (Izaya 9:6, 7) Winá wɔ ndayalaka lanɛ lá looko, Yeso ɛnyɛka ante alekɔ la nkfulu kɛ nkamɔ lá djiko djɛ nkete djetongamisá. (Marko 4:35-41) Etengo Nkfumi kɛ Onkfumi wɔ Ndjambe, Yeso angolama looko la nkete djɛnde djel’eteyi. Nde angokalɔ ntonga, kana angokalɔ ndɔngɔsɔla, nkete djelá looko, ndakomɛ ngo ngete iyayalaka lá jardɛ djɛ Ɛdɛna.—Mateo 19:28; Luka 23:43.

 Lako, apalakanyɛ nghɔsɔ. Ikanyi yɛ pɔlɔ yɛsɔ ndjɛka mbala efula má yopo yɛ nyɛtshi yɛ anto okakawɔ vɛrse djɛ 2 Pɛtɛlɔ 3:7, djetepela ante: ‘Olongo la looko lɔ etsho wɛso wɛnɛ wembowombama djɛ ndotshumbama lá tɔyɛ.’ Tokolenda akambo ape wa djonyi wa tokotshɛ́ djɛ ndjoka nsakiso kɛ etepela wɛsɔ:

1.   Bible nkambaka la totepela “olongo,” “looko” la “tɔyɛ” ape ngo djɛ ntepela ekete kɛmɔ. Ndjɔmbɔmba, Ewangelo 11:1 ntepelaka ante: ‘Looko l’otondo lotepelaki otepela ɔmɔ.” Lanɛ, “looko” osakisolawɔ nde anto.

2.   Wopo wɔ yakambe la 2 Pɛtɛlɔ 3:7 nyɛnyɛka nsakiso kɛ olongo, looko, la tɔyɛ tɔ yombotepela lanɛ. Vɛrsɛ 5 la 6 ntɔlaka ikanyi tá Elola kɛ Noe. Lá mbamba kɛsɔ, andja wa ntondo wasɔ watshitanaka, koko looko lɔso lɔnɛ lotatshitana. Koko, Elola kɔmbaka anto wa lopango, kana ‘looko.’ (Ewangelo 6:11) Ɔmbaka lonkina yopo imɔtshi yɛ “olongo,” ntepela ente wanɛ walɔndjɛki anto wayalaki lá looko. Lasɔ, anto wa nyɛtshi ndeke lovwisá, koko ape looko. Noe nya nkfumbo kɛnde wawikaka má otshitanelo wɔ andja wasɔ ko walowikaka lá looko m’ɔkɔngɔ wɔ Elola.​—Ewangelo 8:15-18.

 Ngo wopo wɔk’ɔmɔ la washi w’Elola, otshitanelo, kana “tɔyɛ” t’otepelawɔ lá 2 Pɛtɛlɔ 3:7 ntongoyakala ekomo l’andja wa anto wa pɔlɔ, koko ape ekomo kɛ looko. Ndjambe ndakaka ‘olongo la looko lɔ bango’ lá ‘anto wa sii yongowika.’ (2 Pɛtɛlɔ 3:13) ‘Looko lɔ bango’ kana anto wa bango, wangɔlɔndjama me ‘olongo wɔ bango,’ kana ewandji wɛ bango, ntepela ente Onkfumi wɔ Ndjambe. L’anse kɛ ɛlɔndjɛlɔ kɛ Onkfumi wɔsɔ, looko longokoma paradiso kɛ vu.—Ndjiso 21:1-4.