Mpekanto oyɛwɔnde enaghedji kɛmɔtshi, nsaki, kana ikanyi yepokana l’ɛlɛmbɛ wɛ Ndjambe. Ndjila edjinge otshitelo wɔ ɛlɛmbɛ wɛ má nangha kɛnɛ kelekɔ́ nyɛtshi, kana ntshamba djɛ sii, lá wiso wa Ndjambe. (1 Djɔanɛ 3:4; 5:17) Bible mpakisolaka lonkina mpekanto yemá ntepela, ntepela ente, nsamba nangha kɛnɛ kelekɔ́ sii.​—Djakɔbɔ 4:17.

 Lá otepela wɔ ntondo w’ofunamisá Bible, itepela mpekanto mpakisolaka ‘nsamba ilembetelo’ kana mpɔnyɛ ekete k’ɔkɔpɛ mboka.’ Ndjɔmbɔmba, oloyi ɔmɔtshi wɔ angala wa Isariyɛlɛ yɛ ntondo wewaki mfuna mbɔkɔ efula la yopo yɛ ‘watakokaki mpɔnyɛ.’ Ntsha itepela yɛsɔ, imbokadjimwama etengo ya funama, tokoka mbala ente ‘watakokaki nangha mpekanto.’ (Tosushi 20:16) Lasɔ, nangha mpekanto nde nsamba nkotshɛ ɛlɛmbɛ wɛ Ndjambe wɛ djɔ.

 Lá wopo woyɛnde Ontongi, Ndjambe alekɔ l’elonga kɛ ndjilela wana w’anto ɛlɛmbɛ. (Ndjiso 4:11) Tongolomboyama lá ntondo kɛnde má nanghedji djɛso.​—Ɔrɔma 14:12.

Onto nkoka ntshika nangha mpekanto lotshinda lotshinda?

 Lako. Bible ntepelaka ante ‘anto ankfumɔ wananghaká mpekanto edjinge wapakome lá lomo lɔ Ndjambe.’ (Ɔrɔma 3:23; 1 Nkfumi yɛ n’kanga 8:46; Losanghanyɛ 7:20; 1 Djɔanɛ 1:8) Lamo oyɛwɔ nghɔsɔ?

 Anto wa ntondo, Adama nya Eva, watayalaki la mpekanto ma bango. Ladjikɛnde iwɔ watongamaka l’alemba wa djɔ, lá efɔ kɛ Ndjambe. (Ewangelo 1:27) Koko, iwɔ watshutshɛka alemba wawɔ wa djɔ má mpendola ɛlɛmbɛ wɛ Ndjambe. (Ewangelo 3:5, 6, 17-19) Winá wɔ yawote wana, iwɔ wasambeyɛka mpekanto la ntshamba djɛ djɔ etengo ɔmpena wɔ nkɔmɔ. (Ɔrɔma 5:12) Etengo Nkfumi k’Isariyɛlɛ Davidɛ ndatepela ante: ‘Lemi mbotshɔka la lowo wɔ ovunga.’—Yeembo 51:5.

Mpekanto imɔtshi ilekɔ yɛ nyɛtshi efula ndeka inkina?

 Ee. Ndjɔmbɔmba, Bible ntepelaka ante ase Sɔdɔmɔ wayalaki ‘Anto wa nyɛtshi, ananghi wa mpekanto yɛ nkekete edjinge mpekanto yɛwɔ iyalaka efula.’ (Ewangelo 13:13; 18:20) Kolenda akambo asato washikikɛ ekekete kana odjito wɔ mpekanto.

1.   Mpekanto k’ekekete. Bible ntewolaka djɛ ndjewɔ mpekanto yɛ nkekete etengo wayi wa mbindo wa ntshɛngi, ɔtɛmwɔlɔ wɔ tosakandole, wibi, ovwelo wɔ waná, mpapolana nkete l’enkfukfulu, oyakanelo edjinge otɛmwɛlɔ w’ekanga. (1 Kɔrɛtɔ 6:9-11; Ndjiso 21:8) Bible ntshikitanyɛka mpekanto yɛsɔ la mpekanto yepatɔnɔla, la yɛ l’ɛkɔpa, ndjɔmbɔmba, etepela kana nanghedji djekɔta anto ankina l’elolo. (Woongo 12:18; Ɛfɛsɛ 4:31, 32) Koko, Bible ntokembɛka dj’ipa ndɔsa ente mpekanto imɔtshi ilekɔ daambi, yekoka ntɔla onto djɛ ntotshita efula k’Ɛlɛmbɛ wɛ Ndjambe.—Mateo 5:27, 28.

2.   Kɛnɛ k’etshinda onto. Mpekanto imɔtshi yengonaghemake ma nsamba ndjewa kɛnɛ kɛ Ndjambe ɔlɔmbande. (Elemo 17:30; 1 Timɔte 1:13) Má nsamba nyimeyɛ mpekanto yɛ nghɔsɔ, Bible ndatshikitanyɛka la mpekanto yɛlɔmba ngo ntshita ɛlɛmbɛ wɛ Ndjambe l’ɛkɔpa k’enkfumɔ. (Ewadji 15:30, 31) Mpekanto yɛ nangha l’ɛkɔpa ndjɛka má ‘oloko nyɛtshi.’—Jɛrɛmi 16:12.

3.   Lofulo lɔ mbala yɛ mpekanto onanghemande. Bible nsthikitanyɛka lonkina mpekanto kenanghema mbala kɛmɔ la ndjala l’ekfumbo kɛ nangha mpekanto eleko k’otale. (1 Djɔanɛ 3:4-8) Anto ‘wanangha mpekanto l’ɛkɔpa,’ kaanga m’ɔkɔngɔ wɔ ndjeka wopo wɔ nangha kɛnɛ kelekɔ́ sii, wangowa dombo djɛ nyɛtshi dj’ime Ndjambe.—Hebero 10:26, 27.

 Anto wayapɛla lá mpekanto yɛwɔ yɛ nkekete nkoka ndawoka etengo wambɔwɛmba odjito w’ekekete wɔ evunga wɛwɔ. Ndjɔmbɔmba, Nkfumi Davidɛ afunaka ante: ‘Evunga wɛmi wembondjapema l’ɔtɛ; etengo lokando lɔ odjito, lemi mpongopanga mbɛmba.’ (Yeembo 38:4) Koko Bible mpɛyɛka nkongi djɛnɛ ante: ‘Kaanga nyɛtshi atshike mboka kɛnde edjinge onto wɔ nyɛtshi atshike tokanyi tɔnde; akalɔ le Yehova ko nde angowoka nkɛtshi, ee le Ndjambe kɛso ladjikɛnde nde angowimeyɛ nsɔsɔlɔ.’​—Izaya 55:7.