Ee, Bible mpɛyɛka eshikikelo ante Ndjambe alekɔ. Nde tokembɛka dj’iso nkembɛ djawo djɛso te Ndjambe, apalekɔ má ndjawola etengo anto wambowodjɛ wiso lá kɛnɛ kɛ ntolo olakanyɛwɔ, koko má nkamba la ‘akoka waso w’ekanelo kɛ yimba’ edjinge la ‘balo.’ (Ɔrɔma 12:1; 1 Djɔanɛ 5:20, nɔtɛ kel’anse kɛ nkishi) Tokolenda ekanelo kɛ yimba kɛlonda kɛnɛ keposa má Bible:

•   Nkete djelekɔ́ l’olongo la looko djelekɔ́ la lowiko nyɛnyɛka ambɔ Ontongi ɔmɔtshi alekɔ. Bible ntepelaka ante: ‘Lá nsɔslɔ, mvulu k’enkfumɔ yopikamakande me onto ɔmɔtshi, koko ontongi wɔ nkete nkfumɔ nde Ndjambe.’ (Hebero 3:4) Kaanga ekanedji kɛ yimba kɛsɔ oyɛwɔ wɔdju, andjewi yɛ wayi efula wangɛnake ambɔ kelekɔ wolo. a

•   Etengo oyɛso anto, tongoyalake la mposɛ kɛ ndjewa ntshina edjinge okoma wolekɔ́ lá lowiko, yopo imɔtshi yɛ ndjala yekoka ntshikala m’ɔkɔngɔ w’iso nkotshɛ ehomba wɛso wɛ demba. Oyɛwɔnde itenyi imɔtshi yɛ kɛnɛ kɛ Bible etande ante, ‘ehomba wɛso welá nyuma’ ndjila edjinge mposɛ kɛ ndjewa la kɛ ntɛmɔla Ndjambe. (Mateo 5:3; Ndjiso 4:11) Ehomba welá nyuma wɛsɔ wepatɔpɛyɛ ngo eshikikelo toko kɛ ente Ndjambe alekɔ koko lonkina ntɛnyɛka ente nde alekɔ Ontongi wɔ ngandji wɔkɔpa iso nshiyɛ mposɛ kɛsɔ.​—Mateo 4:4.

•   Prɔfɛsi yɛkɔndɔlamá lá Bible yefunamaka ɛnɔnyi nkama lá ntondo edjinge yembokotshama djɔ ngo wopo wɔ yewoyama. Wopo w’ɔkɔndɔlama lá djɔ tokakambo tonkfumɔ tɔ ndjewo yɛsɔ nshikikɛka la wolo onkfumɔ ente oyɛwɔnde me ikɔkɔ imɔtshi yeleka wana w’anto.—2 Pɛtɛlɔ 1:21.

•   Anfunyi wa Bible wayalaki la yimba yɛ nkalasa yeleka wopo wɔ anto wawikaki l’etsho wɛwɔ yokaka akambo. Ndjɔmbɔmba, l’etsho wɛ ntondo anto efula w’awolaki ambɔ nyama kɛmɔtshi ambɔwɛmba looko, etengo ndjɔku, nsombo, kana ngɔmbɛ. Lá onkoko onkina, Bible ntepelaka ante ‘Ndjambe ndɛndjɛlɛndjɛka looko lá oholo.’ (Djɔbɔ 26:7) Lá wopo wɔk’ɔmɔ, Bible akɔndɔla lá djɔ wopo w’olekɔ́ looko etengo ‘okeka,’ kana ‘ombolonga.’ (Izaya 40:22, nɔtɛ kel’anse kɛ nkishi; Douay Version) Anto efula wangotepelake ambɔ ɔsɔ alekɔ ekanedji kɛ wɔlɔ kɛ yimba lá nsakiso kɛ looka l’akambo lɔ nghɔsɔ ladjikɛnde anfunyi wa Bible yawaka akambo wa mfuna nde me Ndjambe.

•   Bible nkadjimolaka weepó wɛ wolo efula, wepo wɛ weepó wɛ nghɔsɔ nkoka ntɔla onto djɛ nsamba ndjawola ante Ndjambe alekɔ ntsha wepakadjimolamisa la lɛdji lɔ wɔlɔ. Ndjɔmbɔmba: Ntsha Ndjambe alekɔ ngandji edjinge la nkfulu-inkfumɔ, lamo ndjolo l’akambo wa nyɛtshi oyalawɔ lá looko? Lamo mbala efula ntolo yotshindaka anto ta nyɛtshi l’edjena kɛ ntshinda tá wɔlɔ?—Tito 1:16.