Ndjambe akambaka la opilwelo djɛ ntonga nkopo yɛ mbiko yetshikitanyi?

NDJOKA LÁ

Nsakiso kɛ Bible

Lako. Bible ntoshimelaka papoo ante Ndjambe atongaka anto la efula kɛ ‘wopo’ wɛ mbiko yetshikitanyi la yɛ anyama edjinge etamba. a (Ewangelo 1:12, 21, 25, 27; Ndjiso 4:11) Djetoshimela ante ankfumbo inkfumɔ yɛ wana w’anto yaye nde me ambotshi waso wa ntondo, Adama la Eva. (Ewangelo 3:20; 4:1) Bible apasuke ikanyi yɛ ante Ndjambe akambaka la opilwelo djɛ ntonga nkopo yɛ mbiko yetshikitanyi, etengo etakawɔ ambɔ isambo y’opilwelo. Koko, lako kanga edjena kɛmɔ kɛ Bible ndopokana la siansɛ lá kɛnɛ kelendana l’otshikitano wonangema lá yopo yɛ lowiko lonkfumɔ. b

Ndjambe akambaka l’opilwelo?

Itepela ‘ikanyi y’opilwelo’ ntɛnyɛka djɛ anto wakanela ambɔ Ndjambe akambaka l’opilwelo djɛ ntonga lowiko, walekɔ la tokanyi totshikitanyi lá kɛnɛ kɛ ndananye. Lá nkilika Encyclopædia Britannica, anto amɔtshi ntepelaka ambɔ, “Ndjambe angombakengo la nkete djelekɔ́ lá looko djɛ mposɛ nkete nkina.”

Ikanyi y’opilwelo nkoka ndjingela lonkina lá tokanyi tɔnɛ:

Nkete nkfumɔ djelekɔ́ la lowiko yaye nde me andoyi yɛso yel’etsho wɛ ntondo.
Onto ɔmɔtshi wolekɔ́ la lowiko nkoka mposɛ nyɔmɛlɛ wopo onkina wɔ lowiko wɔ lɛdji lonkina.
Nkoka ndala ente Ndjambe ndeke lotshikaka djɛ akambo wakɔ nanghema.

Bible ndjawolaka ikanyi y’opilwelo?

Wakilika ikanyi y’opilwelo ntepelaka ambɔ akambo wa Bible otepelande lá nkambo dj’etongelo má Ewangelo mpalekɔ nsɔsɔlɔ. Koko, Yeso ɛnyɛka papoo ante wamba walekɔ́ má Ewangelo walekɔ ngo akambo wa ongolo. (Ewangelo 1:26, 27; 2:18-24; Mateo 19:4-6) Bible ntepelaka ante lá ntondo kɛnde ndjɛ lanɛ lá looko, Yeso awikaki l’olongo nya Ndjambe edjinge Ndjambe ananghaka ‘nkete nkfumɔ’ má lotshimbo lɔ Yeso. (Djɔanɛ 1:3) Djɛkondeke, ikanyi yɛ ente Ndjambe akambaka l’opilwelo djɛ ntonga nkopo yɛ nkete djetshikitanyi ipokana la elakanyelo wemá Bible.

Ya otepelaso mo lá nkambo djɛ nkoka djelekɔ́ l’anyama l’etamba djɛ mpilɔ djɛ ndjekela djena mɔtshi?

Bible djɛpɛnyɛ kaanga mbala kɛmɔ ante lokopo lɔmɔtshi longotshikitana. Koko djepato ikanyi y’ente nkopo wepo la wepo w’anyama kana y’etamba yɛ Ndjambe ndatonge nkoka ntshikitana má nkilika edjena k’oyalawɔ. Kaanga anto amɔtshi nkanelaka ambɔ otshikitano wonyi oyɛwɔ nde opilwelo, koko lako kaanga lokopo lɔmɔtshi lɔ bango loposisá yɔmɛlɛ losambisá ntongama.

a Bible nkambaka l’otepela ‘wopo,’ wolekɔ́ la loka l’otale lotshikitana efula l’itepela ‘topo’ tokamba ase siansɛ. Mbala efula, wina w’ase siansɛ ɔsɔnawɔ djɛ nkamba la opilwelo w’etongelo kɛmɔtshi kɛ bango, oyɛwɔ ngo otshikitano wɔ dambi wolekɔ́ l’anteyi lokopo lɔmɔtshi, etengo yombokamba l’itepela yɛkɔ l’Ewangelo.

b Tokanyi tɔsɔ ndjetamaka mbala efula ambɔ microévolution.