Lako, nkɛlɛsiya nkfumɔ mpalekɔ wopo ɔmɔ. Ndjɔmbɔmba efula ilekɔ lá Bible yɛnyɛ nkɛlɛsiya djepasasangɛ Ndjambe. Dekɔ wepo epe.

Wopo 1: Ntɛmɔlaka tondjandjambe t’engolo

 Bible nkɔndɔlaka ɔtɛmwɛlɔ wɔ tondjandjambe t’engolo má nkamba la totepela tɔnɛ ‘ongolo,’ ‘nkete djɛ totoko,’ edjinge ‘djɛ lako ntshina.’ (Jɛrɛmi 10:3-5; 16:19, 20) Yehova a Ndjambe apɛyɛka ase Isariyɛlɛ yɛ ntondo ɔlɛmbɛ ante: ‘Toyalake la Ndjambe nkenkina lá djiko djɛmi.’ (Eposelo 20:3, 23; 23:24) Winá wɔ ase Isariyɛlɛ yatɛmɔlaka tondjandjambe tonkina t’engolo ‘Yehobava omalakí.’—Ewadji 25:3; Ase lewi 20:2; Tosushi 2:13, 14.

 Ndjambe okaka ngo wopo wɔk’ɔmɔ ta ɛtɛmwɛlɔ wɛ ‘wanɛ wayaweta andjambe.’ (1 Kɔrɛtɔ 8:5, 6; Ngalatiya 4:8) Nde apɛyɛka anto wakɔpa ndɔɔtɛmɔla ɔlɛmbɛ wɔ iwɔ ntshika nsanghana l’anto welá ntolo dj’ongolo, ashimelaka ante: ‘Nyopose m’anteyi kɛwɔ, edjinge nyowangɔ me wɔ.’ (2 Kɔrɛtɔ 6:14-17) Ntsha nkɛlɛsiya nkfumɔ dekɔ ngo wopo ɔmɔ edjinge ndɔndjɛka anto ngo te Ndjambe, lamo Ndjambe ndakoke mpɛyɛ ɔlɛmbɛ wɔ nghɔsɔ?

Wopo 2: Ntɛmɔlaka Ndjambe kɛ nsɔsɔlɔ lá yopo yɛ ndopawola

 Mbala imɔtshi, ase Isariyɛlɛ watɛmɔlaki Ndjambe má nkamba la elakanyelo edjinge la nanghedji djɛ yawolaka l’ɛtɛmwɛlɔ wɛ tondjandjambe t’engolo, koko Yehova atonaki wopo wɔ yasɛsaka nsanghanyɛ ɔtɛmwɛlɔ wɔ nsɔsɔlɔ la w’ongolo. (Eposelo 32:8; Mvungo k’ɛlɛmbɛ 12:2-4) Yeso apangolaka ewandji w’ɛtɛmwɛlɔ weyalaki lá etsho wɛnde l’ɔtɛ wɔ yopo yɛ yatɛmɔlaka Ndjambe; iwɔ wananghaki djɛ nyɛnama etengo antɛmɔdji, koko yayalakande ase dongi mpe lá wopo wɔ ‘yimɛka yimba má akambo waleka djonyi welá Ɛlɛmbɛ, ntepela ente sii, djandji la nkɔmano.’—Mateo 23:23.

 Wopo wɔk’ɔmɔ lɔɔko kɛnɛ, ngo ɔtɛmwɛlɔ wombopikama lá nsɔsɔlɔ ndeke lɔlɔndjɛka anto te Ndjambe. Nsɔsɔlɔ kɛsɔ ntanemaka la Bible. (Djɔanɛ 4:24; 17:17; 2 Timɔte 3:16, 17) Elakanyelo wɛ ntolo wepokana la Bible mbangolaka anto mé Ndjambe. Anto mfɛnyɛka ambɔ elekanyelo efula ndjɛka má Bible—ndjila edjinge olakanyelo wɔ Ndjambe oyɛnde nde losato l’osato, anima wapavu, la ifɛnɔ—wawolamá me antɛmɔdji yɛ tondjandjambe t’etengolo. Ɔtɛmwɛlɔ wonangha djɛ elakanyelo wɛ nghɔsɔ mfula wolekɔ ngo ‘totoko,’ kana ‘lako ntshina,’ ladjikɛnde wangɔhɛnyɛke ɛlɛmbɛ wɛ Ndjambe la nkfumbo dj’ɛtɛmwɛlɔ.—Marko 7:7, 8.

 Ndjambe ntonaka ɛtɛmwɛlɔ wɛ dongi mpe. (Tito 1:16) Djɛ nkotshɛ́ anto dj’iwɔ nsukana la Ndjambe, ase ɔtɛmwɛlɔ ladjɛ ndjokanyɛ mbiko yɛwɔ l’ɛlɛmbɛ wɛ Ndjambe koko apalekɔ ngo nkfumbo kana efanelo toko. Ndjɔmbɔmba, Bible ntepelaka ante: ‘Ntsha onto ndɔsaka ante atɛmɔla Ndjambe koko apalame ɔlɔmɔ wɔnde, nde alekɔ ndadjimba l’oloko wɔnde, edjinge ɔtɛmwɛlɔ wɔnde wolekɔ totoko. Ɔtɛmwɛlɔ wɔ piyɔɔ edjinge w’ipa la badji la wiso wa Ndjambe la Papa kɛso wokinɛ: Nkotshɛ́ wana wa ntshike la wadji wa edjo lá ndjolo yɛwɔ edjinge ndaalama dj’ipa ndjala la badji djɛ l’andja wanɛ.’ (Djakɔbɔ 1:26, 27; nɔtɛ kel’anse kɛ nkishi) Ekadjimwelo kɛ Roi Jacques nkambaka la itepela ‘ɔtɛmwɛlɔ wɔ piyɔɔ’ djɛ ntepela djɛ ɔtɛmwɛlɔ w’opakotshi mbindo edjinge dongi mpe.