Olambo wɔ Yeso alekɔ lɛdji lɔmɔtshi lɔ Ndjambe tshungola kana ndawikɛ anto má mpekanto la nyɔyi. Bible mvungɔka nkambo djɛ ekila wɛ Yeso wetshanghanisá, etengo olembo w’oshinga wɔ mbendo. (Ɛfɛsɛ 1:7; 1 Pɛtɛlɔ 1:18, 19) Edjinge, Yeso atepelaka ante ndaye nde ‘djɛ ndɔpɛyɛ lowiko lɔnde etengo olambo w’oshinga wɔ mbendo la wapɔ w’anto efula.’ —Mateo 20:28, King James Version.

Lamo isayale la djonyi djɛ ‘oshinga wɔ mbendo la wapɔ w’anto efula’?

 Mpame kɛ ntondo, Adama, atongamaka onto wɔ djɔ, kana wapalekɔ́ l’ovunga. Nde atakoka ndjala la lowiko lotshinda lotshinda koko asɔnaka djɛ nde mpendola Ndjambe. (Ewangelo 3:17-19) Winá wɔ ndoowaka wana, nde asambeyɛka enanghedji kɛpɔlɔ kɛ mpekanto. (Ɔrɔma 5:12) M’elonga kɛsɔ ndeke Bible ɛnyɛnde ante, Adama ‘ayasadjɛka’ nyɔmɛlɛ edjinge asadjɛka wana wande lá mpakanto la nyɔyi. (Ɔrɔma 7:14) Etengo wana wande oyɛwɔ ntshamba djɔ, lako onto l’anteyi kɛwɔ w’okoka ntshungola kɛnɛ kɛ Adama ndatshutshɛ.​—Yeembo 49:7, 8.

 Ndjambe ɛnyɛka nkɛtshi te tonkana la tonkanola tɔ Adama má ndaapɛyɛ nkongi lá nkambo djɛsɔ. (Djɔanɛ 3:16) Djɛkondeke, ɛlɛmbɛ wɛ Ndjambe welendana la sii nyɛnyɛka djɛ nde apadjipe wiso kana ntshitaka ananghi yɛ mpekanto ipa la elonga kɛ wɔlɔ. (Yeembo 89:14; Ɔrɔma 3:23-26) Ndjambe nkɔpaka anto, djɛkondeke apɛyɛka kɛnɛ kelekɔ́ djɔ djɛ evunga w’anto mba apengo emeyelo toko, koko lonkina edjipisanyelo. (Ɔrɔma 5:6-8) Oshinga wɔ mbendo alekɔ elonga kɛ djɔ.

Wopo wɔkɔnge olambo w’oshinga wɔ mbendo yapɛyama?

 Lá Bible, itepela ‘oshinga wɔ mbendo’ nsakisolaka akambo asato:

1.   Oyɛwɔnde oshinga ɔmɔtshi w’ofutama.—Ewadji 3:46, 47.

2.   Oyɛwɔnde etshungwelo kɛmɔtshi, kana mbikɛ.—Eposelo 21:30.

3.   Oyɛwɔnde ekete k’ɛdje l’oshinga wɔpɛyamisá kana ndjipa. a

 Tokoshishima wopo wɔ akambo wasɔ onanghemawɔ lá kɛnɛ kelendana l’olambo w’oshinga wɔ mbendo wɔ Yeso Kristo.

1.   Oshinga. Bible ntepelaka ante Akristo ‘wasombamaka m’oshinga ɔmɔtshi.’ (1 Kɔrɛtɔ 6:20; 7:23) Oshinga wɔsɔnde ekila wɛ Yeso, m’ekila wɛkɔ nde ‘asombaka anto wa tɔkɔlɛ tonkfumɔ, etepela, anto ankfumɔ edjinge ewila enkfumɔ te Ndjambe.’​—Ndjiso 5:8, 9.

2.   Etshungwelo. Olambo wɔ Yeso w’ɛnyɛka ‘etshungwelo kemá olambo w’oshinga wɔ mbendo’ má mpakanto.—1 Kɔrɛtɔ 1:30; Kɔlɔsɛ 1:14; Hebero 9:15.

3.   Ɛdje. Olambo wɔ Yeso w’ɛlamaka la kɛnɛ kɛ Adama ndatshitshɛ, lowiko l’onto wɔ djɔ. (1 Kɔrɛtɔ 15:21, 22, 45, 46) Bible ntepelaka ante: ‘Etengo ma opedjɛ w’onto ɔmɔ [Adama], anto efula wɔsamaka etengo ananghi y’evunga, wopo wɔk’ɔmɔ ndeke má okitshakitshɛ w’onto ɔmɔ [Yeso Kristo], anto efula wangɔsama etengo anto wa wɔlɔ.’ (Ɔrɔma 5:19) Nsakiso yɛsɔ yɛnyɛ wopo wɔ nyɔyi k’onto ɔmɔ okokawɔ mfuta oshinga wɔ mbendo la wapɔ w’anto wanangha evunga. Lá nsɔsɔlɔ, Olambo wɔ Yeso w’oshinga wɔ mbendo ‘w’ɛdje le anto ankfumɔ’ le wanɛ wɔsa akano wa djonyi djɛ mba wapɔ.—1 Timɔte 2:5, 6.