Bible ndjetaka Yeso mbala efula ante ‘Wɔna Ndjambe.’ (Djɔanɛ 1:49) Itepela ‘Wɔna Ndjambe’ yɛnyɛ djɛ, Ndjambe ndeke Ontongi, Ikɔkɔ yɛ lowiko edjinge lɔ Yeso. (Yeembo 36:9; Ndjiso 4:11) Bible mpalakanyɛ djɛ Ndjambe awotaka, ngete anto owotawɔ wana.

 Lonkina, Bible ndjetaka andjelo ante ‘Wana wa Ndjambe kɛ nsɔsɔlɔ.’ (Djɔbɔ 1:6) Edjinge, Bible ndjetaka onto wɔ ntondo Adama ante ‘Wɔna Ndjambe.’ (Luka 3:38) Bible ndjetaka Yeso ante Wɔna w’otango wɔ Ndjambe ladjikɛnde, nde alekɔ etongami kɛ ntondo ketongamisá me Ndjambe edjinge onto wɔ ntondo wotongamisá me Ndjambe nyɔmɛlɛ.

•  Oyɛwɔ mo, Yeso ayalaki la lowiko l’olongo lá ntondo kɛnde ndjɛ lanɛ lá lookob

•  Kɛkɔnge kenanghaki Yeso lá ntondo kɛnde ndjɛ lanɛ lá looko?

 Ee. Lá ntondo kɛnde ndjɛ lanɛ lá looko djɛ ndowotshɔ ngete onto, Yeso ayalaka etongami kelá nyuma l’olongo. Yeso atepelaka nyɔmɛlɛ ante: ‘‘Lemi ndjɛka m’olongo.”​—Djɔanɛ 6:38; 8:23.

 Ndjambe atongaka Yeso lá ntondo kɛnde ntonga nkete nkfumɔ. Bible ntepela lá nkambo djɛ Yeso ante:

•   ‘Nde alekɔ. . . otango wɔ nkete nkfumɔ ntongamisá.’​—Kɔlɔsɛ 1:15.

•   Nde alekɔ ‘ewangelo k’etongelo kɛ Ndjambe.’​—Ndjiso 3:14.

 Yeso akotshɛka prɔfɛsi kelendana ‘l’onto woyalisá ilá efula lá ntondo, l’etsho wemboheta.’—Mika 5:2; Mateo 2:4-6.

 Nde ayalaka l’edjena kelá djiko efula l’olongo. Yeso atepelaka lá lɔlɔmbɔ lɔnde ante: ‘Papa onumɛ . . . la wumu wɔ mayalaka la wɔkɔ entshupa la wɛ lá ntondo k’andja ntongama.’​—Djɔanɛ 17:5.

 Nde akotshɛka Papa kɛnde djɛ ntonga nkete nkina nkfumɔ. Nde akamba la Ndjambe ngete ‘ose olemo wɔ wɔlɔ.’ (Woongo 8:30) Bible ntepelaka lá nkambo djɛ Yeso ante: ‘Má mbamba kɛnde ndeke nkete nkina nkfumɔ djɛ l’olongo kana lá looko yatongama.’​—Kɔlɔsɛ 1 :16.

 Ndjambe akambaka la Yeso djɛ ntonga nkete nkina nkfumɔ, l’anteyi kɛ nkete djɛsɔ ndeke, ntonghami djelá nyuma, olongo la looko. (Ndjiso 5:11) Lá akambo amɔtshi, Ndjambe akambaka la Yeso ngo ngete Arshitɛctɛ okambande esanga la masɔ. Arshitɛctɛ nsangaka ntshango ko mpiki kɛ mvulu nkilikaka ntshango djɛkɔ djɛ mpika mvulu.

 Nde ayalaka Otepela. Bible eta Yeso ‘Otepela,’ winá wotepelande nkambo djɛ lowiko lɔ Yeso lá ntondo kɛnde ndjɛ lanɛ lá looko. (Djɔanɛ 1:1) Nkambo djɛsɔ nyɛnyɛka djɛ Ndjambe akambaka la Wɔnande djɛ mpɛyɛ ntonghami nkina djelá nyuma ɛlɔndjɛlɔ la tɔkfɔ.

 Ndjokamaka djɛ, Yeso akambaka ngete itshɔ antomɔ yɛ Ndjambe te anto wa lanɛ lá looko. Mbala imɔtshi Ndjambe akambaka la Yeso ngete Otepela winá wɔ ndapɛyɛka Adama la Eva ɛlɛmbɛ lá bedji djɛ Ɛdɛna. (Ewangelo 2:16, 17) Nkokaka ndjalá Yeso ndeke lotalɔndjɛki owila w’Isariyɛlɛ l’osowe edjinge djoyi djɛnde ndeke ase Isariyɛlɛ yayale ladjɛ nkilika.​—Eposelo 23:20-23. a