NGƆNDƆ KƐ NTONDO 21, 2022
RÉPUBLIQUE DÉMOCRATIQUE DU CONGO
Opikelo wɔ mvulu yɛ bango yɛ Betɛlɛ djɛ République Démocratique du Congo
Opikelo wɔ amvulu yɛ bango yɛ Betɛlɛ dje lá ngando kɛ Lubumbashi lá République Démocratique du Congo wotatshu ngo tá ntondo. Wananyɔ welá Betɛlɛ etengo 260 wangowanga nsɛkɔ djɛ ntintasɛ l’amvulu yɛkɔ yɛ bango ntateyɛ má Ngɔndɔ k’atano 2022, edjinge wananyɔ ankina welá Betɛlɛ 131 wangotshikala lá Betɛlɛ djelá Kinshasa. a Opikelo wɔ amvulu edjinge abiro ankina lá lopango lolekɔ entshupa la Betɛlɛ djɛ Kinshasa womboshiyɛká mbanga. Wananyɔ welá Betɛlɛ etengo 48 wangotshɔ ntintasɛ l’amvulu yɛkɔ, mbala imɔtshi m’ɔkɔngɔ wɔ Ngɔndɔ kɛ ntondo 2024. Amvulu yɛ bango yɛsɔ ingosuka lomombe ofulelo wɔ lofulo l’ansakodji la olemo wɔ teokrasi lanɛ lá Congo.
Opikelo wɔ mvulu kɛ ntondo kɛ l’anteyi kɛ amvulu isato yengoyala abiro wotakindjɛ
L’ɔnɔnyi w’olemo wɔ 2021, wananyɔ welá République Démocratique du Congo wekaka l’anto 250 000 Bible. Anto ndekana miliyɔ kɛmɔ wingelika lá Bokfɔ djɛ nyɔyi kɛ Kristo. Winá wɔsɔ, Betɛlɛ djelá Kinshasa dekɔ l’anto 394.
Ladjikɛnde ayalaka okakasano djɛ mba ndjena djɛ mpika amvulu inkina lá Betɛlɛ djelá Kinshasa, wananyɔ wahonaki edjena kɛ mpika amvulu lá ngando inkina. Iwɔ wayɛka ndowa edjena kɛ wɔlɔ lá Lubumbashi, edjena kekokisá ndaakotshɛ́ djɛ mpika Betɛlɛ djɛ bango edjinge amvulu inkina l’etsho weyaye.
Lá wadjɛ lɔwɔ: Lako ilá, wananyɔ nsuke la 300 wangowanga nsɛkɔ djɛ ntintasɛ l’amvulu yɛkɔ yɛ bango lá Lubumbashi. Womɛ lɔwɔ: Foto k’ɛnyɛ wopo wɔ amvulu yongoyala
Lopango lelá Lubumbashi mbangɔ la Kinshasa kilɔmɛtrɛ 2 300. Lopango lɔkɔ lelá Lubumbashi lolekɔ la hɛktarɛ 12. Lá lopango lɔkɔ, wangopika amvulu yɛ ndjetama, abiro, djena djɛ mbombaka nkete, djena djɛ ndɛɛka edjinge djena dj’etombo.
Olemo wɔkɔ w’opikelo wowangaka má Ngɔndɔ kɛ djomi l’ɔmɔ 2020, koko olemo wɔkɔ wopomanaka l’ekakasano lombombe má opela wɔ COVID-19.
Wɔnanyɔ Elongo Robert, kanga lolekɔ ose kɔmite kɛ filialɛ kɛ Congo Kinshasa, apakisolaka ante: “Etengo ndelo yɛso l’ewila enkina yadjipama, ayalaka okakasano dj’iso mba mpeko dj’opikelo. Kɛsɔ ndeke kenanghisá dj’olemo ntshatshimba.”
Koko kaanga yayale nghɔsɔ, wɔnanyɔ Elongo akfɛka ante: “Ngo lá ɔnɔnyi ɔmɔ toko, pursa 40 y’etenyi kɛ ntondo k’olemo kenanghemaka.”
Nyɛnamaka ente Yehova atshɔkɔla olemo wɔkɔ. Tɔlɔmba ente amvulu yɛkɔ yɛ bango ipɛyɛ owakɛ le anto wintasɛ lá owila wɔkɔ edjinge yelumɛ djiina djɛ Yehova Ndjambe.—Mateo 24:47.
a Betɛlɛ djɛ République Démocratique du Congo (Kinshasa) ndɔndjɛka olemo wɔ teokasi lá République Démocratique du Congo edjinge lá République du Congo.