Mukanda wa kabidi wa Yowano 1:1-13
1 Ami muntu mukulu,* nafundila muana mukashi musangudibue* na bana baye, bandi mufule ngofu kushi penda’mi kadi mpa na boso bafikie mu kuuka bia binyibinyi,
2 bia binyibinyi abishala muatudi na abikekala netu bua loso.
3 Atukekala na kalolo, lusa na butaale abifiki kui Efile Mukulu Yaya na kui Yesu Nkidishitu muana a Yaya, na binyibinyi na kifulo.
4 Ne na muloo ukata pa’mi kupusha’shi bangi ba ku bana bobe bakuete kutambuka muyile bia binyibinyi, nka bu bibaatudi bapete muiya wa kui Yaya.
5 Binobino obe muana mukashi musangudibue nakutekie’shi, tuifulene ku muntu na muntu. (Bino biankufundila ta muiya upia nya, kadi mmuiya ubaatudi nao kubanga ku kibangilo,)
6 Na talayi abilesha kifulo, tutungunukie na kuikala na nshalelo muipushene na miiya, na uno nyi muiya nka bu bibaatudi bapushe kubanga ku kibangilo’shi, abitungu nutungunukie na kutambukila mu kifulo.
7 Muanda ba sha madimi bebungi mbapue kutuuka pa nsenga, baaba bash’abakumina’shi Yesu Nkidishitu mmufikie ku mbidi. Uno nyi sha madimi na muishikuanyi a Nkidishitu.
8 Dimukayi anue banabene bua’shi tanushimishanga bipeta bia mufubo* wetu, anka nupete efuto dioso dishima.
9 Muntu oso asambuka mikalo na sh’ashala mu malongiesha a Nkidishitu, te mu buumune n’Efile Mukulu. Na yawa ashala mu ano malongiesha nyi e mu buumune na Yaya mpa na Muana.
10 Su muntu afika kuanudi kushi’ye kuikala na ano malongiesha, tanumutambulanga mu mashibo enu sunga kumuela moyo.
11 Muanda yawa amuele moyo amukuatshishena mu mifubo yaye ibubi.
12 Sunga biekala’shi ne na mianda ibungi ya kuinufundila, ntankiebe kuinufundila yanka kuisaki na mema a mukanda, anka ne mukulupile bua kufika kuanudi bua kuisamba nenu mpala kua mpala, bua’shi muloo wenu ukumbane.
13 Bana ba mukuenu mukashi musangudibue, abakutumina mioyo.
Mayi e mushi mwesaki
^ Sunga “mukulu mu kakongie.”
^ Uno muana mukashi musangudibue, baadi alesha pangi muana mukashi kampanda sunga kakongie ka bena Nkidishitu ka mu siekele a kumpala.
^ Sunga “mudimo.”
