Efilu 15:1-27
15 Mu yaaya nsaa Moyise na bena Isalele babayimbile luno loono bua Yehowa:
“Nayimbila Yehowa, muanda mmuule ndaa na ntumbo.
Nfualasa na yawa muipakamine bebiasa mu kalunga.
2 Yah mbukome buande, muanda bafiki mupaashi ande.
Aye nyi Efile Mukulu ande, nakamutumbisha, Efile Mukulu a nshami, na nakamusamuna.
3 Yehowa nyi nkilobo kikata kia ngoshi. Yehowa nyi eshina diaye.
4 Matempu a Faraone na kiluilo kiaye kia ngoshi, bebiasa mu kalunga,Bilobo biaye bikata babebiminyi kui Kalunga Kamonga.
5 Mema e na mbunda-mbunda i bukopo abebabuikila; na babayiki muushi nka bu ebue.
6 Yehowa, mboko yobe ibalume i na bukome bua kukaanya;Oolo, mboko yobe ibalume Yehowa, ngilombene kutshiba muishikuanyi tupese-tupese.
7 Mu bukata bua ntumbo yobe we mulombene kuponesha abakuluisha;Otumu nsungu yobe i bukopo ayibataatshisha nka bu bisosua.
8 Ku muwa wa mu mpembe yobe mema ngebungie pamune;Mema abemeene nka bu kimano.Munkatshi mua kalunga, mema abemeene mbalo imune.
9 Muishikuanyi akuile’shi: ‘Nakebalondo! Nakebakuata!
Nakebanyengie bioso biankumiina mpa na pangikuta!
Napundumuna lupete luande lua ngoshi! Eyasa diande adibatuutu!’
10 Buelele muwa oobe, kalunga nkuibabuikila;Babaadi beyine muushi mua mema akata nka bu kiamo ki bushito.
11 Yehowa, nnanyi e bu’be munkatshi mua b’efile?
Nnanyi e biodi, obe eleeshaa bu mukile kishila?
Obe we a kutshina, na a kuyimbila bua kukutumbisha, obe akitaa bilengieleshi.
12 We moole mboko yobe ibalume, na nsenga nkuibamina.
13 Mu kifulo kiobe kia lulamato, we mukunkushe muilo oobe odi mukuule;Ku bukome bobe okebakunkusha ku mbalo yobe iselele yodi mushale.
14 Miilo ayikapusha uno muanda na ayikasusu;Kenyongoshi ke bukopo akakakuata bantu ba mu Filistine.
15 Mu yaaya nsaa, ba nfumu* ba Edome abakapusha moo wi bukopo,Na ba nfumu be bukome ba bena Moabe abakasusu.
Bantu boso ba mu Kanaana abekala na mashimba kuiyilu.
16 Kususa na moo wi bukopo abikebakuata.
Muanda wa bukome bua mboko yobe, abekala baume nka bu ebueMpa na apakakidi bantu bobe, Ô! Yehowa,Mpa na apakakidi muilo odi muisanguile.
17 Okafiki nabo na okebatulu ku muengie wa bupianyi bobe,Ku mbalo ibodi muilumbuluile bua kushala, Ô! Yehowa,Ku mbalo ya kishila ibaadi maasa oobe alumbule, Ô! Yehowa.
18 Yehowa akakunkusha bu nfumu bua loso.
19 Pabaadi nfualasa ya Faraone na matempu aaye a ngoshi, na basalayi baye bakaamine ku ma nfualasa batuele mu mema a kalunga,Paapa, Yehowa baadi mualushe mema a kalunga bua’shi ebabuikiile.Anka, bena Isalele babatambukile mu nsenga yume munkatshi mua kalunga.”
20 Biabia Miriame mutemuki mukashi, mukuabo na Alona, batshile katumba muiyasa, na bakashi boso babamulondele na tutumba, abend’ayimbanga na kusha.
21 Miriame baadi mualuule bana balume, ayimba’shi:
“Imbilayi Yehowa, muanda mmuule ndaa na ntumbo.
Nfualasa na yawa muipakamine bebiasa mu kalunga.”
22 Kunyima Moyise baadi mukaashe bena Isalele ku Kalunga Kamonga, benda mu kushala ku kabaaka ka Shure. Babatambukile mafuku asatu mu kabaaka, anka tababapetele mema.
23 Babafikile ku Mara,* anka tababaadi balombene kutoma mema a Mara muanda abaadi buulo. Nyi buakinyi babayitamine yaaya mbalo bu Mara.
24 Muilo ubabangile kuunauna pabitale Moyise, wamba’shi: “A paapa atutomo kinyi?”
25 Moyise baadi muidile kui Yehowa, na Yehowa nkumulesha mutshi. Pabewelele mu mema, mema abafikile ataale.
Kuakua Efile Mukulu nkuibelela muiya, na aye nkuata uno muanda bu kileshesho bua kuibalesha bibaadi akiebe’shi bakite, na kuakua aye nkuibatompa.
26 Aye nkuamba’shi: “Su boteemesha kalolo eyi dia Yehowa Efile Mukulu oobe, na kukita biabia bi buwa ku meso kuaye, na su otuulu binangu ku miiya yaye na kuiyikokiela yoso, tankakutumina maladi su ngamune angikalanga mutumine bena Ejipitu, muanda Nnami Yehowa akupaasha.”
27 Kunyima kua biabia abafikile ku Elime, kubaadi nsulo ya miela 12, na mabo 70. Babashalele paapa pepi na mema.
