Kibafumbuilue kui Yowano 20:1-15
20 Na namuene muikeyilu afiki muiyilu na lufungula lua ku buina bula na mmukuate lukano* lukata muiyasa diaye.
2 Bakuatshile dragon, nyoka a ku kibangilo, muikale Diabulu na Satana, na nkumuanya bua bipua 1 000.
3 Bamusumbuile mu buina bula na ebufunga, na nkuela kitampi kunundu bua’shi tapambushanga dingi miilo mpa na apafiki bipua 1 000 ku nfudiilo. Kunyima kua biabia abitungu’shi bamuposole bua kapindi kapeela.
4 Na namuene ma nkuasa a bufumu, na Efile Mukulu bapeele baaba babaadi bashale muanka matalua a kutshiba kiimu, oolo, namuene miuwa* ya baaba babaabadi bayipee* muanda babatushishe bukamonyi pabitale Yesu, na muanda babakuile pabitale Efile Mukulu, na baaba bashibaadi balanguile nyema a bukielo na kinfuanyi kiaye na bashi bapete kitunduilo mu mapala aabo na kuiyaasa diabo, babapetele dingi muwa na abo nkukunkusha bu ba nfumu na Nkidishitu munda mua bipua 1 000.
5 (Bafue babashadile tababaadi bapetuule muwa mpa na ku nfudiilo kua bipua 1 000.) Luno nyi ndusangukilo lua kumpala.
6 Basha muloo na ba kishila mbaaba boso abapete lusangukilo lua kumpala; muanda lufu lua kabidi talui na matalua kuabadi, anka abakekala ba tshite muakuidi b’Efile Mukulu na ba Nkidishitu, na abakakunkusha naye bu ba nfumu munda mua bipua 1 000.
7 Kadi apakapu bipua 1 000, abakapoosola Satana mu lukano luaye,
8 na akatuuku bua kupambusha miilo ku mapaka ananka a nsenga, oolo, Goge na Magoge bua kuibabunga ku ngoshi. Bungi bua bano bantu bui nka bu lusenga lua ku kalunga ka mema.
9 Na babapalakene pa nsenga yoso ishima, nkuifunyisha kishalelo kia beselele na kibundi kifudiibue. Anka kaalo kabafikile muiyilu na nkuibapiisha.
10 Na Diabulu baadi ebapambusha, abamusumbuile muishiba dia kaalo na nsufule, mutamuikalanga nyema a bukielo na mutemuki a madimi na abakakiengieshibua* bufuku na kanya bua loso.
11 Na namuene nkuasa a bufumu mukata tooka na Yawa baadi mushale muanka. Na nsenga n’eyilu bibasuukile kumpala kuaye, na takubaadi dingi mbalo su ngimune buabio.
12 Na namuene bafue, bakata na bapeela bemane kumpala kua nkuasa a bufumu, na Efile Mukulu bafunguile mifungofungo. Anka ungi mufungofungo ubaadi ufunguulue; nyi mmufungofungo wa muwa. Bafue babaadi basambishibue muyile mianda ibaadi ifunde mu mifungofungo muyile bikitshino biabo.
13 Kalunga ka mema kabatuushile bafue babaadi muanka, na lufu na Mashama* bibatuushile bafue babaadi muanka, na babaadi basambishe muntu oso muyile bikitshino biaye.
14 Na babelele lufu na Mashama muishiba dia kaalo. Eshiba dia kaalo adilesha lufu lua kabidi.
15 Dingi muntu oso shibaadi n’eshina diaye difundibue mu mukanda wa muwa abamuelele muishiba dia kaalo.
Mayi e mushi mwesaki
^ Sunga “ndombo.”
^ Sunga “anyima.” Tala Kipatuluilo kia bishima na mayi e kuushi ku’esaki mu Kibafumbuilue 6:9.
^ Babaabadi bayipee na kabengiele.
^ Sunga “kuedibua mu lukano.”
^ Sunga “Hadese,” kuamba’shi mashama a bantu boso. Tala Kipatuluilo kia bishima.
