Kibangilo 4:1-26
4 Adama nkulala na mukashi aaye Eva, na Eva nkuimita. Pabatandile Kayina bakuile’shi: “Natanda muana mulume na bukuashi bua Yehowa.”
2 Kunyima baadi dingi mutande mukuabo mulume Abele.
Abele nkufika mulami a nyema, kadi Kayina nkufika kidime.
3 Kunyima kua mafuku, Kayina nkutuala ndambo ya biumbuluanga bu mulambu kui Yehowa.
4 Anka Abele nkutuala ndambo ya bana ba kuibedi ba nyema yaye, mpa na muimu wabo. Yehowa nkukumiina Abele na mulambu waye.
5 Anka tabaadi mukumiine Kayina na mulambu waye nya. Biabia Kayina bafiitshile munda ngofu na aye nkuinyongola.*
6 Akupu Yehowa nkulungula Kayina’shi: “Buakinyi we mufiite munda biabia na we muinyongole?
7 Su obanga kukita bi buwa, t’okakuminyibua su? Kadi su okutua kubanga kukita bibuwa, muluisho ngukubelamine pa kibelo, na lukalo luao ndua kukumuna; anka abitungu weukambile.”
8 Kunyima kua biabia, Kayina nkulungula mukuabo Abele’shi: “Tuende ku mafuba.” Pabaabadi ku mafuba, Kayina nkuitumbila mukuabo Abele, na nkumuipaa.
9 Kunyima Yehowa nkuipusha Kayina’shi: “Mukuenu Abele e kunyi?” aye nkualuula’shi: “Tanguuku’mi. Ami ne mulami a mukuetu su?”
10 Bua biabia aye nkumuipusha’shi: “A nkinyi kibokitshi?” Pusha! Mase a mukuenu akuete kuela musaase kuandi kukatukila pa nsenga.
11 Na binobino buedibua mulua na kubingibua pa nsenga ibabuula mukanua muayo bua kutambula mase a mukuenu abapongoola eyasa diobe.
12 P’odimi nsenga, tayikakutuushisha biumbuluanga.* Okekala muntu aumbakana na asuuku aku n’aku pa nsenga.”
13 Bua biabia Kayina nkulungula Yehowa’shi: “Dinyoka bua kilubilo kiande ndikile bukopo kunyingiila.
14 Lelo uno bombingi pa ino nsenga,* nakekala kula nobe; na nakekala muntu aumbakana na asuuku aku n’aku pa nsenga, na muntu oso ampete angipaa binyibinyi.”
15 Biabia Yehowa nkumulungula’shi: “Bua biabia, muntu oso ayipaa Kayina, akanyookibua misusa musambo.”
Na Yehowa nkutuula kitunduilo bua Kayina, bua’shi muntu oso amupete tamuipanga.
16 Akupu Kayina bakatukile kumpala kua Yehowa enda mu kushala mu nsenga ya Node,* dia kutunduka nguba kua Edene.
17 Kunyima Kayina nkulala na mukashi aye, na aye nkuimita, nkutanda Enoke. Akupu aye nkubanga kuibaka kibundi na nkuikiudika eshina dia muan’aye Enoke.
18 Kunyima Enoke nkutanda Irade. Irade nkutanda Mekuyaele, Mekuyaele nkutanda Metushaele na Metushaele nkutanda Lameke.
19 Lameke nkuibakila bakashi babidi. Eshina dia a kumpala dibaadi Ada, na eshina dia a kabidi dibaadi Sila.
20 Ada nkutanda Yabale. Aye nyi baadi nshaye na baba bashale mu tushibo tua mapema na be na bimunuanga.
21 Eshina dia mukuabo mulume dibaadi Yubale. Aye nyi baadi nshaye na baba boso abayimbaa na lusese na milengie.*
22 Dingi Sila nkutanda Tubale-kayina, baadi nsendue afushaa bina mufubo bia mishindo yoso bia kiamo kia munyinga* na bia biamo. Na mukuabo mukashi na Tubale-kayina baadi Naama.
23 Akupu Lameke baadi alungula bakashi baye Ada na Sila ano mayi’shi:
“Pushayi eyi diande, bakashi ba Lameke;Teeyi matui ku biangakula:
Nemuipee muntu muanda ekeele muntape,Oolo, nsongualume, muanda ekeele munkupile.
24 Su Kayina abamoobuela misusa musambo,Lameke namu abamoobuela misusa 77.”
25 Adama baadi dingi mulale na mukashi aaye, na aye nkutanda muana mulume. Eva nkumuudika bu Sete* muanda baadi amba’shi: “Efile Mukulu bampa* lungi lutandua* pa mbalo ya Abele, muanda Kayina baadi mumuipee.”
26 Sete namu batandile muana mulume, na amuudika bu Enoshe. Mu aa mafuku bantu bababangile kuitanyina eshina dia Yehowa.
Mayi e mushi mwesaki
^ Kish ku kish. “mpala yaye nkupona.”
^ Kish ku kish. “bukome.”
^ Kish ku kish. “ku meso kua nsenga.”
^ Nkuamba’shi, “nsenga ya kusuukila.”
^ Sunga “tushiba.”
^ Sunga “kuivre.”
^ Nkuamba’shi, “mutudiibue, kutuula.”
^ Sunga “batuulu.”
^ Kish ku kish. “emiino.”
