Ufundibue kui Luka 3:1-38
3 Mu kipua kia 15 kia bufumu bua Tibere Kezare, pabaadi Ponse Pilato bu guvernere a Yudeya, Erode* baadi bu mukunkushi* a distrike dia Ngalileya, mukuabo mulume Fidipe baadi mukunkushi a distrike dia kibundi kia Itureya na Trakonitise, na Lisaniase baadi mukunkushi a distrike dia Abilene,
2 mu mafuku a tshite muakuidi mukata Ane na Kaifase, eyi di’Efile Mukulu dibafikile kui Yowano muana a Zakari mu kabaaka.
3 Biabia, bayile mu bibundi bioso bi pepi na muela wa Yordane, alambukishanga lubatshisho alulesha kuilanga bua kulekieelua kua miluisho,
4 nka bu biabidi bifundibue mu mukanda wa mayi a mutemuki Yeshaya’shi: “Eyi dia muntu kuete eele musaase mu kabaaka’shi: ‘Lumbuulayi eshinda dia Yehowa! Lulamishayi mashinda aaye.
5 Abitungu ebanda dioso diushibue, na muengie oso, na tu miengie tupeela toso; abitungu bebiyishe; mashinda e na bikonyo abitungu bealulamishe; mashinda e na bipoko abitungu beabaate;
6 na bantu boso abakamono kipandilo* ki’Efile Mukulu’”
7 Biabia babangile kulungula kibumbu kia bantu kibaadi akifiki kuadi bua kubatshishibua’shi: “Anue bana ba nyoka, nanyi benudimusha buanudia kusuuka nsungu y’Efile Mukulu ayifiki?
8 Biabia, paayi bikuba abilesha’shi nubelanga. Tanubanganga kuakula’shi: ‘Tui na nkambua eetu Abalahama.’ Muanda nenulungula’shi, Efile Mukulu mulombene kutushiisha Abalahama bana ku ano mabue.
9 Binyibinyi, kabengiele nkapue kutudibua ku mushi wa mitshi. Mutshi oso ush’aupa bikuba bibuwa abakeutshibi na kuiwela mu kaalo.”
10 Na kibumbu kia bantu kibaadi akimuipusha’shi: “Biabia, nkinyi akitungu’shi tukite?”
11 Bebaluluile’shi: “Muntu e na bilamba bibidi* ape shi nakio, na yawa e na kia kudia akite nka biabia.”
12 Mpa na bafutshishi ba bitadi abafikile buabadia kubatshishibua, na abamuipuishe’shi: “Mulongieshi, nkinyi akitungu’shi tukite?”
13 Bebaluluile’shi: “Tanutekanga* kintu kikile muulo wa kitadi.”
14 Dingi, baaba abaadi mu mufubo wa busalayi abaadi abamuipusha’shi: “Nkinyi akitungu’shi tukite?” Na bebaluluile’shi: “Tanunyenganga muntu su ngumune kintu, sunga kudimbiila muntu muanda, kadi sankayi na bintu* bi’abenupa.”
15 Biabia bantu abaadi abatengiela, na boso buabo abaadi abeele binangu mu mashimba aabo pabitale Yowano’shi: “Mmulombene pangi kuikala Nkidishitu?”
16 Yowano bebaluluile, ebalungula boso’shi: “Ami nkuete kuinubatshisha na mema, kadi muntu e na bukome kunkila kuete kufika, ntshi mulombene kuangula mioshi ya sandale yaye. Aye akenubatshisha na kikudi kiselele na kaalo.
17 E na lubeshi luaye lua kupepula nalo mu maasa, bua kulumbuula kalolo mbalo yaye ya kupepuila na kubunga ntete mu nshibo yaye ya kulamina bintu, anka bipusu akebishiiki mu kaalo kashi bia kushimibua.”
18 Baadi dingi mulungule bantu mianda ibungi ya kuibanyingisha na kutungunuka na kuibalungula mukandu wibuwa.
19 Kadi, bu bibaadi Yowano mutopekie Erode mukunkushi a distrike dia Ngalileya pabitale Erodiade, mukashi a mukuabo mulume na pabitale mianda yoso ibubi ibaadi Erode mukite,
20 baadi dingi mulombashe uno muanda ku ino mianda yoso ibaadi mukite: Baadi mufungile Yowano mu lukano.
21 Pabapuile bantu boso kubatshishibua, Yesu namu baadi mubatshishibue. Pabaadi kuete kuteka, eyilu dibabuulukile,*
22 na kikudi kiselele kibaadi kimuikile pa mbidi mu mushindo wa mbidi bu konyi k’ekutshi, na eyi dibatuukile muiyilu’shi: “We Muana ande andi mufule; ne mukukumiine.”
23 Pababangile Yesu mudimo waye, baadi na bipua bifikie ku 30, muyile bibaadi abipuandikisha bantu baadi muanaa Yosefe,muana a Eli,
24 muana a Matate,muana a Levi,muana a Melki,muana a Yanayi,muana a Yosefe,
25 muana a Matatiase,muana a Amose,muana a Naume,muana a Eseli,muana a Nagayi,
26 muana a Maate,muana a Matatiase,muana a Semeine,muana a Yoseke,muana a Yoda,
27 muana a Yoanane,muana a Resa,muana a Zorobabele,muana a Salatiele,muana a Neri,
28 muana a Melki,muana a Adi,muana a Kosame,muana a Elemadame,muana a Ere,
29 muana a Yesu,muana a Eliezere,muana a Yorime,muana a Matate,muana a Levi,
30 muana a Simeone,muana a Yundase,muana a Yosefe,muana a Yoname,muana a Eliyakime,
31 muana a Meleya,muana a Meena,muana a Matata,muana a Natane,muana a Davide,
32 muana a Yesee,muana a Obede,muana a Boaze,muana a Salomone,muana a Nasone,
33 muana a Aminadabe,muana a Areni,muana a Esrone,muana a Pereze,muana a Yunda,
34 muana a Yakobo,muana a Isaake,muana a Abalahama,muana a Tera,muana a Naore,
35 muana a Seluku,muana a Ragao,muana a Pelege,muana a Ebere,muana a Shela,
36 muana a Kainame,muana a Arpaksade,muana a Seme,muana a Nowa,muana a Lameke,
37 muana a Metushela,muana a Enoke,muana a Yarede,muana a Maleleyele,muana a Kainame,
38 muana a Enoshe,muana a Sete,muana a Adama,muana a Efile Mukulu.
Mayi e mushi mwesaki
^ Nkuamba’shi, Erode Antipase. Tala Kipatuluilo kia bishima.
^ Kish ku kish. “tetrake.”
^ Sunga “mushindo wa kupaasha w’Efile Mukulu.”
^ Sunga “kingi kilamba.”
^ Sunga “kukongola.”
^ Sunga “efuto.”
^ Sunga “dibashitukile.”
