Mbadiko 13:1-33
13 Yehowa nkulungula Moyise’shi:
2 “Tuma bantu mu kupuupa nsenga ya Kanaana, yampa bena Isalele. Abitungu otume muana mulume umune a mu kisamba kioso kia bamashaye kulu, oso muikale nfumu munkatshi muabo”
3 Biabia Moyise nkuibatuma kukatukila mu kabaaka ka Parane ku eyi dia Yehowa. Baba bana balume boso babaadi ba nfumu ba bena Isalele.
4 Mashina aabo nyi ngano: Mu kisamba kia Rubene, Shamua muana a Zakure;
5 mu kisamba kia Simeone, Shafate muana a Ori;
6 mu kisamba kia Yunda, Kalebe muana a Yefune;
7 mu kisamba kia Isakare, Igale muana a Yosefe;
8 mu kisamba kia Efraime, Oshea muana a Nune;
9 mu kisamba kia Benyamine, Paleti muana a Rafu;
10 mu kisamba kia Zabulone, Ngadiele muana a Sodi;
11 mu kisamba kia Yosefe, bua kisamba kia Manasee, Ngadi muana a Susi;
12 mu kisamba kia Dane, Amiele muana a Gemali;
13 mu kisamba kia Ashere, Seture muana a Mikaele;
14 mu kisamba kia Neftali, Nabi muana a Vofesi;
15 mu kisamba kia Gade, Gewele muana a Maki.
16 Ano nyi mashina a bana balume babaadi Moyise mutume mu kupuupa nsenga. Na Moyise nkuudika Oshea muana a Nune bu Yoshua.*
17 Pabaadi Moyise ebatumu mu kupuupa nsenga ya Kanaana, bebalunguile’shi: “Kaaminayi ku Negebe, akupu nukaamine ku miengie.
18 Abitungu nutale bi nsenga na su bantu be mushale be bukome sunga’shi mbabofule, mbapela sunga’shi be bungi,
19 na su nsenga i buwa sunga’shi i bubi, na su bibundi biabadi bashale bi na midimba i bukopo sunga’shi tabi na midimba i bukopo.
20 Na nutale su nsenga i na bupeta* sunga’shi ngilanda* na su mui mitshi sunga’shi ta mui mitshi. Abitungu nuikale n’eshimba dinyingie na nuate ndambo ya bikuba bia mu yaaya nsenga.” Bibaadi kipungo kia tukuba tua nfinyo tua kumpala tumongie.
21 Biabia babayile na bapuupa nsenga kubangila ku kabaaka ka Sine mpa na ku Rehobe pepi na ku Lebohamate.*
22 P’ababakaamine ku Negebe, babafikile ku Ebrone kubaadi kushale Ahimane, Sheshayi, na Talmayi bena Anake. Babaadi bebakie Ebrone bipua musambobidi kumpala kua Soane a mu Ejipitu.
23 P’ababafikile muibanda* dia Eshekole, babatshibile lutabi lui na kisaasa kia tukuba tua nfinyo, kibaabadi na kia kusemuna kui bantu babidi ku mushiyo, abo nkutuala dingi mpa na ndambo ya bikuba bia grenade na tukuba tua nfigiye.
24 Babaadi baudikie yaaya mbalo bu ebanda* dia Eshekole* pa muanda wa kisaasa kibaadi bena Isalele batshibe kuakua.
25 Ku nfudiilo kua mafuku 40, babalukiile kunyima ku’abo kupuupa nsenga.
26 Biabia abo nkualukiila kui Moyise na Alona na kui kakongie koso ka bena Isalele mu kabaaka ka Parane ku Kadeshe. Babaadi balungule kakongie koso mianda ibaabadi bakamone na bebalesha bikuba bia mu yaaya nsenga.
27 Bino nyi bibaabadi balungule Moyise: “Tutuelele mu nsenga yuekele muitutume, na mbinyibinyi ayalala mabeele na buuki, bikuba bia muanka biabidi’bi.
28 Anka bantu ba mu yaaya nsenga be bukome, na bibundi bi na midimba i bukopo, mbikile bukata. Tubemumono dingi bena Anake.
29 Bena Amaleke mbashale mu nsenga ya Negebe, na bena Ite, bena Yebuse, na bena Amore mbashale mu miengie, bena Kanaana mbashale pepi na kalunga ka mema na ku bukunkula bua muela wa Yordane.”
30 Kalebe batompele kuuminyisha* bantu babaadi bemane kumpala kua Moyise pa kuakula’shi: “Tukaamineyi nka binobino, na tuibashinkamishe’shi atuata yaaya nsenga, muanda tui kutshokola binyibinyi bantu be muanka.”
31 Anka bantu babayile naye nkuakula’shi: “Tatui balombene kulua na baba bantu, muanda be bukome kuitukila.”
32 Na babatungunukile na kulungula bena Isalele mianda i bubi pabitale nsenga ibaabadi bakapuupe, bambanga’shi: “Nsenga yatudi bakapuupe nyi nsenga ayidiya bantu bashale muanka, na bantu boso batumuene muanka bekeele bipambe.
33 Na tuibamone muanka ba Nefilime, bana ba Anake, bekulu ba ba Nefilime; p’atuipuandikishanga nabo atuimonanga nka bu mpasu, nabo namu abetumonanga nka biabia.”
Mayi e mushi mwesaki
^ Sunga “Yehoshua,” adipushisha’shi “Yehowa nyi nkipandilo.”
^ Sunga “i muimu.”
^ Sunga “tayi muimu.”
^ Sunga “kituelelo kia Amate.”
^ Sunga “kibandabanda.”
^ Sunga “kibandabanda.”
^ Adipushisha “kisaasa kia tukuba tua nfinyo.”
^ Sunga “kupoosha.”
