Mbadiko 23:1-30
23 Akupu Balame nkulungula Balake’shi: “Ibaka pa ino mbalo bilambuilo musambobidi, na ondumbuluile ngombe ilume musambobidi na mikooko ilume musambobidi.”
2 Mususa umune Balake nkukita nka bibaadi Balame muakule. Balake na Balame nkulambula ngombe mulume na mukooko ulume pa kilambuilo kioso.
3 Akupu Balame nkulungula Balake’shi: “Shala pano pepi na mulambu oobe wa kushiika kaalo, ami nende. Pangi Yehowa esamba nami. Kioso kiandungula nakulungula kianka.” Biabia aye nkuenda ku nsongo kua ka muengie.
4 Akupu Efile Mukulu nkuisamba na Balame, baadi mumulungule’shi: “Nebaka bilambuilo musambobidi mu mulongo na nalambula ngombe mulume na mukooko ulume pa kilambuilo kioso.”
5 Yehowa nkuela dino eyi mukanua mua Balame’shi: “Alukiila kui Balake na bino nyi biodia kuakula.”
6 Biabia aye nkualukiila na nkumona Balake na bakulu boso ba Moabe mbemane pepi na mulambu wa kushiika kaalo wa Balake.
7 Akupu aye nkuakula luno lukindi’shi:
“Balake nfumu a Moabe mmufikie nami kukatukila ku Arame,Kukatukila ku miengie ya kutunduka nguba:
‘Fika ongielele Yakobo mulua.
Oolo, fika oponeeshe Isalele kilumbu.’
8 Mbikunyi biandi mulombene kuela mulua baba bashi bedibue mulua kui Efile mukulu?
Na mbikunyi biandi mulombene kuponeesha kilumbu baba babashi baponeeshe kilumbu kui Yehowa?
9 Nebamono kukatukila ku nsongo kua mabue,Na nebamono kukatukila ku tu miengie tupela.
Nka bu muilo mbashale paapa pa bupenka;Abemono belekene na ingi miilo.
10 Nnanyi mulombene kubadika bungi bua lufufi lua nsenga lua YakoboSunga kubadika penda kipindi kia binanka kia Isalele?
Ntadiile* nfue lufu lua bantu balulame,Na tadiila nfudiilo ande ekale bu aabo.”
11 Akupu Balake nkulungula Balame’shi: “Nkinyi kibonkitshi? Nafiki nobe bua’shi wele beshikuanyi bande mulua, anka tuemukite kingi kintu nka penda kuibelela miabi.”
12 Aye nkumualula’shi: “T’abitungu’shi ngakule kiakia kioso akiele Yehowa mukanua muande su?”
13 Balake nkumulungula’shi: “Tuende namu ingi mbalo yodi mulombene kuibamona. Tuebamono boso nya, anka webamono penda ndambo. Ebangieele mulua kukatukila yaaya mbalo.”
14 Biabia aye nkuenda naye muifuba dia Sofime, ku songo kua Pisiga, na nkuibaka bilambuilo musambobidi na aye nkulambula ngombe mulume na mukooko ulume pa kilambuilo kioso.
15 Nyi Balame nkulungula Balake’shi: “Shala paapa pepi na mulambu oobe wa kushiika kaalo pa nende mu kuisamba n’Efile Mukulu akuaa.”
16 Na Yehowa nkuisamba na Balame na nkuela dino eyi mukanua muaye’shi: “Alukiila kui Balake, na bino mbiodia kuakula.”
17 Biabia aye nkualukiila kuadi na nkumona’shi baadi nka amutengiela pepi na mulambu waye wa kushiika kaalo, na bakulu ba Moabe babaadi naye. Balake nkumuipusha’shi: “Yehowa bakula kinyi?”
18 Akupu aye nkumulungula luno lukindi’shi:
“Ebuee Balake, na opushe.
Nteemeshe muana a Zipore.
19 Efile Mukulu te bu muntu akulaa madimi,Sunga bu muana a muntu ashintuula binangu.*
P’akula muanda kampanda, teukitshi su?
P’alaa muanda kampanda, t’eukumbasha su?
20 Tala! Mbangitanyishe bua kuela miabi;Binobino bapu kuela miabi, na ntshi bia kuiyishintuula.
21 T’akumiina’shi muanda su ngumune wa malenganyi ukitshikile Yakobo,Na t’atadiila lukalakashi su ndumune lufikile Isalele.
Yehowa Efile Mukulu aaye e nabo,Na abamutumbisha ngofu bu nfumu munkatshi muabo.
22 Efile Mukulu kuete kuibatuusha mu Ejipitu.
E kuabadi nka bu mbo.
23 Muanda takui kitunduilo kia mianda i bubi su nkimune kikufikila Yakobo,Sunga lubuko lui kufikila Isalele.
Mu ino nsaa be kuakula pabitale Yakobo na Isalele’shi:
‘Tala mianda ibakitshi Efile Mukulu!’
24 Uno mmuilo aukebo nka bu nyema a ntambue,Na nka bu nyema a ntambue, aukebo unabene.
T’aukalaala mpa na p’audi nyema audi ukuateNa kutoma mase a nyema audi wipee.”
25 Akupu Balake nkulungula Balame’shi: “Su tue mulombene kuiwela mulua, biabia tuewelelanga miabi.”
26 Balame nkualula Balake’shi: “Ntangikalanga mukulungule’shi, ‘Nakitshi bioso abiakula Yehowa’?”
27 Balake nkulungula Balame’shi: “Fika namu tuende dingi ingi mbalo. Pangi abikala bi buwa ku meso ku’ Efile Mukulu a binyibinyi bua’shi webangieele mulua kukatukila yaya mbalo.”
28 Nyi Balake nkuenda na Balame ku nsongo kua Peore, mutadiile dia ku Yeshimone.*
29 Akupu Balame nkulungula Balake’shi: “Ibaka bilambuilo musambobidi pa ino mbalo, na ondumbuluile ngombe ilume musambobidi na mikooko ilume musambobidi.”
30 Balake nkukita nka bibaadi Balame muakule, na aye nkulambula ngombe mulume na mukooko ulume pa kilambuilo kioso.
