Mbadiko 4:1-49
4 Yehowa nkulungula Moyise na Alona’shi:
2 “Abitungu kubadika bana balume ba Kehate munkatshi mua bana balume ba Levi muyile bifuko biabo, na muyile mashina a ba mashabo kulu,
3 baba boso be na bipua kubanga ku 30 mpa na ku 50 be mu kisaka kiabadi bape mufubo wa kufuba mu kashibo k’epema ka kufumankena.
4 “Uno nyi mufubo wa bana ba Kehate mu kashibo k’epema ka kufumankena. Nyi nkintu kikile kishila:
5 Apakatuka bena Isalele bua kuenda mu ingi mbalo, Alona na bana baye abatuele bakaashe kilamba kia kutshibuula nakio na bekipuute ku mushete wa Bukamonyi.
6 Abatuulu panundu pao kibuikilo kia musokia wa nkongie na kuadisha panka kilamba ki bukopo kia bulese na kutuula mitandalo ya kusemuna nayo pa mbalo yayo.
7 “Abakaadisha dingi kilamba kia bulese pa mesa a mikate ya kulesha na abatuulu panka malonga, makopo, bibakudi, na mbidika ya mulambu wa kitomuanga; mulambu wa pa kiubishi wa mikate abitungu ushale panka.
8 Abakaadisha pa bianka kilamba kimonga pididii na kupuuta mesa na kibuikilo kia musokia wa nkongie na kutuula mitandalo ya kusemuna nayo pa mbalo yayo.
9 Akupu baate kilamba kia bulese bapuute kitudilo kia bimunyi bu’etaata pamune na bimunyi biakio, tumano tuakio, bintu biakio bia kuatshila kaalo, na bintu biakio bioso bi’abafubishaa bua kulamina muimu wa kuela mu bimunyi.
10 Abekipombeela na bintu biakio bioso mu kibuikilo kia musokia wa nkongie na kuikituula pa mutandalo bua kuikituala.
11 Na abaadisha kilamba kia bulese pa kilambuilo kia ôlo, bekipuute na kibuikilo kia musokia wa nkongie na kutuula mitandalo ya kusemuna nayo pa mbalo yayo.
12 Abaata bintu bioso bia mufubo bi’abafubaa nabio mu mbalo ya kishila, bebiele mu kilamba kia bulese bebipuute na kibuikilo kia musokia wa nkongie na kuibituula pa mutandalo bua kuibituala.
13 “Abakatusha buto* pa kilambuilo na baadishe kilamba kimongolokie kia lin panka.
14 Abatuulu panka bintu biakio bioso bi’abafubisha nsaa y’abafubu ku kilambuilo: bintu bia kuatshila kaalo, nkanya, bipao, na bibakudi, bintu bioso bia ku kilambuilo; baadishe panka kibuikilo kia musokia wa nkongie na kutuula mitandalo ya kusemuna nayo pa mbalo yayo.
15 “Apakatuka bena Isalele bua kuenda mu ingi mbalo, Alona na bana baye abitungu bapudishe kupuuta mbalo ya kishila na bintu bia mu mbalo ya kishila bioso. Akupu bana ba Kehate abatuele bua kuibituala, anka t’abakumanga ku mbalo ya kishila bisumanga abafu. Bino bintu nyi bushito* bua bana ba Kehate butale kashibo k’epema ka kufumankena.
16 “Eleazare muana a tshite muakuidi Alona nyi e na bushito bua kutala muimu wa kuela mu bimunyi, kabanda ke mapembue, mulambu wa ntete wa pa kiubishi na muimu wa kishila.* Atala tabernakele oso na bioso bi muanka mpa na mbalo ya kishila na bintu biayo.”
17 Yehowa balunguile dingi Moyise na Alona’shi:
18 “Tanutadilanga’shi kisamba kia bifuko bia bena Kehate kikatushibue munkatshi mua bena Levi.
19 Anka ebakitshineyi biabia bua’shi bashale na muwa na tabafuanga muanda wa’shi abefubuila pepi na bintu bikile kishila. Alona na bana baye abatuele na bape oso a kuabadi mufubo waye na akitungu’shi asemune.
20 T’abitungu’shi batuele bua kumona bintu bia kishila sunga bua kapindi kapeela.”
21 Akupu Yehowa nkulungula Moyise’shi:
22 “Abitungu kubadika bana ba Gershone muyile mashina a ba mashabo kulu na muyile bifuko biabo.
23 Abitungu ofunde baba boso be na bipua kubanga ku 30 mpa na ku 50 be mu kisaka kiabadi bape mufubo wa kufuba mu kashibo k’epema ka kufumankena.
24 Bino nyi bintu biabadi bape bifuko bia bena Gershone bua kutala na bua kusemuna:
25 Abakasemuna bilamba bia tabernakele, kashibo k’epema ka kufumankena, kibuikilo kiako, na kibuikilo kia musokia wa nkongie ki kunundu kuako, kilamba kia lushiko ki ku kituelelo kua kashibo k’epema ka kufumankena,
26 bilamba biembeele bia lupango, kilamba kia lushiko ki ku kituelelo kua lupango kifunyishe tabernakele na kilambuilo, mioshi yako na bintu bioso bi’abafubisha mu mufubo wa tabernakele. Uno nyi wabo mufubo.
27 Alona na bana baye nyi abakunkusha mufubo oso na mashito a bena Gershone; nuibape ano mashito oso bu mufubo wabo.
28 Uno nyi mufubo autungu’shi bifuko bia bena Gershone bifube mu kashibo k’epema ka kufumankena, na Itamare muana mulume a tshite muakuidi Alona nyi akunkusha mifubo yabo.
29 “Pabitale bana balume ba Merari, w’ebafunde muyile bifuko biabo na muyile nshibo ya ba mashabo.
30 W’ebafunde kubanga ku bipua 30 mpa na ku 50, baba boso be mu kisaka kiabadi bape mufubo wa kufuba ku kashibo k’epema ka kufumankena.
31 Bino nyi bintu abitungu’shi basemune pabitale mufubo wabo wa ku kashibo k’epema ka kufumankena: ma kadre a tabernakele, mitandalo, bibayi biaye, bitako biaye bitubule:
32 bibayi bifunyishe lupango, bitako bialo bitubule, bilu bialo, na mioshi yabio pamune na bintu bialo bioso na mifubo yoso itale bino bintu. W’ebape bintu abitungu’shi basemune muyile mashina aabo.
33 Uno nyi mufubo wa bifuko bia bana ba Merari ku kashibo k’epema ka kufumankena, ku bukunkushi bua Itamare muana mulume a tshite muakuidi Alona.”
34 Nyi Moyise na Alona na ba nfumu ba kakongie nkufunda bana ba bena Kehate muyile bifuko biabo na muyile mashibo a ba mashabo,
35 baba boso be na bipua kubanga ku 30 mpa na ku 50 babaadi mu kisaka kiabadi bape mufubo wa kufuba ku kashibo k’epema ka kufumankena.
36 Bungi bua baba boso babaabadi bafunde muyile bifuko biabo bubaadi 2 750.
37 Bano nyi babaabadi bafunde mu bifuko bia bena Kehate, baba boso abaadi abafubu ku kashibo k’epema ka kufumankena. Moyise na Alona abaadi bebafunde ku eyi dia Yehowa kukiila kui Moyise.
38 Bana balume ba Gershone abaadi bafundibue muyile bifuko biabo na muyile nshibo ya ba mashabo,
39 baba boso be na bipua kubanga ku 30 mpa na ku 50 babaadi mu kisaka kiabadi bape mufubo wa kufuba ku kashibo k’epema ka kufumankena.
40 Bungi bua baba boso babaabadi bafunde muyile bifuko biabo na muyile nshibo ya ba mashabo bubaadi 2 630.
41 Kuno nyi kufundibua kua bifuko bia bana ba Gershone, baba boso babaadi abafubu ku kashibo k’epema ka kufumankena. Moyise na Alona babaadi bebafunde ku eyi dia Yehowa.
42 Bana balume ba Merari babaadi bafundibue muyile bifuko biabo na muyile nshibo ya ba mashabo,
43 baba boso be na bipua kubanga ku 30 mpa na ku 50 abaadi mu kisaka kiabadi bape mufubo wa kufuba ku kashibo k’epema ka kufumankena.
44 Bungi bua baba boso babaabadi bafunde kuabadi muyile bifuko biabo bubaadi 3 200.
45 Kuno nyi kufundibua kua bifuko bia bana ba Merari, babaadi Moyise na Alona bafunde ku eyi dia Yehowa kukiila kui Moyise.
46 Moyise na Alona na ba nfumu ba Isalele nkufunda bano bena Levi boso muyile bifuko biabo na muyile mashibo a ba mashabo;
47 babaadi na bipua kubanga ku 30 mpa na ku 50, na boso babaadi bebape mufubo wa kufuba na kusemuna mashito atale kashibo k’epema ka kufumankena.
48 Bungi bua baba babaabadi bafunde bubaadi 8 580.
49 Babaadi bafundibue ku eyi dia Yehowa kukiila kui Moyise, oso a kuabadi muyile mufubo ubaabadi bamupe na bushito buaye; babaadi bafundibue nka bu bibaadi Yehowa mutumine Moyise eyi.
Mayi e mushi mwesaki
^ Sunga “buto bui na muimu,” kuamba’shi, buto busangie na muimu wa milambu.
^ Sunga “mufubo.”
^ Nkuamba’shi, “muimu ubaabadi abafubisha bua kuela muntu abasangula bua kumupa mufubo kampanda.”
