Mukanda wa Yuda 1:1-25
1 Ami Yuda mpika a Yesu Nkidishitu, na mukuabo na Yakobo, nafundila betaminyibue babadi bafule kui Efile Mukulu Yaya, na baadi mulame bua Yesu Nkidishitu:
2 Efile Mukulu atamishe lusa, butaale na kifulo kienuleesha.
3 Bakuetu ba kifulo, sunga biekala’shi naadi muitatshishe bua kuinufundila pabitale kipandilo kiatudi nakio boso, naadi mumone’shi bi na muulo nenufundile bua kuinunyingisha bua’shi nulue ngoshi ibukopo bua lukumiino lubaabadi bape beselele musango umune bua loso.
4 Kabingilo kande ka kuinufundila nka’shi kui bangi bantu befiinyikie munkatshi muenu, aku namu kubanga kala, Bifundue bibaadi bipue kulesha’shi abakebatshibila kiimu; nyi mbantu bashi na kanemo bua Efile Mukulu, abaluula kalolo k’Efile Mukulu bua kuibingisha ku muikelo wibuufu* na abakitshina nfumuetu umune na Muanana Yesu Nkidishitu bibubi.
5 Sunga biekala’shi, anuuku ino mianda yoso kalolo, nakumiina kuinutentekiesha’shi, kunyima kua Yehowa kupaasha muilo pa kuiutusha mu Ejipitu, baadi mubutule bantu boso bashibaadi baleshe lukumiino.
6 Na mikeyilu ishibaadi ilame mbalo yayo ya ku kibangilo, kadi yaleka kishalelo kiayo, mmuiyilame mu nkano ya loso mu mufito wibukopo bu’efuku dikata dia kiimu.
7 Mu mushindo umune, Sodome na Gomore na bibundi bibefunyishe, bibaadi dingi biipaane mu lukiebanokiebano* luibukopo; na babaadi bepaane ku nkalo yabo ya mbidi ishi ya ku kipangilo, mbebatuule kumpala kuetu bu kileshesho kia kuitudimusha nakio p’abo kuibatshibila kiimu kia kaalo* ka loso.
8 Sunga mbiabia, bano bantu namu mbepaane ku bilotua, abaluisha mbidi, ababepuula matalua, na abakula ba sha ntumbo bibubi.
9 Kadi pabaadi Mikaele mukata a mikeyilu na kilumbu na Diabulu, na abekakena pabitale kitanda kia Moyise, ta mmutompe kumutshibila kiimu na bishima bia kumukaa nabio mulomo, anka bakuile’shi: “Yehowa akunyokie.”
10 Anka bano bantu abakulaa bibubi pabitale mianda yoso yabash’abapusha kalolo. Na mu mianda yoso y’abapusha nka bu nyema ishi na binangu, abatungunukaa na kuiluisha abo banabene.
11 Malua kuabadi muanda mbalonde eshinda dia Kaina, na mbepaane muishinda dia kilubilo dia Balame bua kupeta efuto, mbalonde miisambo y’etombo ya Kora na abakashimina nka bu’ye!
12 Bano bantu mbekale bu mabue afuame muushi mua mema mu misangelo yenu ya kifulo p’abakitshi nenu yanka, na bu balami ba mikooko abedisha abo banabene kushi moo; mbekale bu makumbi ashi na mema abapapula kui lupunga aku n’aku; mmitshi ishi na bikuba ku nfudiilo kua kipungo kia mashika, ifue misango ibidi na abo nkuiyishula na mishi;
13 bano bantu be nka bu mbundambunda ya mema ayitusha buufu buabo nka bu mafulu; nyenyenyi ishi na eshinda dilulame, yabadi balamine mufito wibukopo bua loso.
14 Eyendo, Enoke muntu a musambobidi kubanga ku Adama, baadi namu mutemukie pa muanda wabo pabakuile’shi: “Talayi! Yehowa bafiki na midiyala ya beselele baye
15 bua kutshibila bantu boso kiimu, na kupiisha boso bash’abakookiela Efile Mukulu ku bikitshino biabo bioso bia kukutua kululama, bibaabadi bakite mu kipaso kishi kilulame, na pabitale mianda yoso ibubi bukile ibaadi bantu bash’abanemeka Efile Mukulu bakule pa bimutale.”
16 Bano bantu mbasha miunuuno, abeedidi pabitale nshalelo aabo, abakuminaa kusankisha nkalo yabo abo banabene, mukanua muabo amuakula mianda ikile bukata ya kuitumbisha, aku namu bakuete kulungula bangi* mianda ya bu nsesa buabadia kupeta bintu.
17 Kadi buenu’nue bakuetu ba kifulo, tentekieshayi mayi abaabapuile kuakula kala* kui batumibua ba Nfumuetu Yesu Nkidishitu,
18 babaadi abenulungula’shi: “Mu mafuku a ku nfudiilo akukekala bantu abasepanaa, abakakimbi kusankisha nkalo yabo ya mianda ish’ayisangasha Efile Mukulu.”
19 Bano bantu nyi bakuete kutuusha kuiabuula munkatshi muenu, mbantu abakitshi mianda nka bu nyema,* na bashi na buin’Efile Mukulu.*
20 Kadi’nue bakuetu ba kifulo, enyingisheyi anue banabene ku kitako kia lukumiino luenu luiselele, na tekayi mu kuipushena na kikudi kiselele,
21 buanudia kushala mu kifulo ki’Efile Mukulu, panukuete kutengiela lusa lua Nfumuetu Yesu Nkidishitu, alo alutuala ku muwa wa loso.
22 Dingi, tungunukayi na kuikala na lusa kui baaba be na mpaka;
23 ebapaasheyi pa’nue kuibatuusha mu kaalo. Anka tungunukayi na kufuila bangi lusa, nuibikite na kutshina na nushikue mpa na bilamba bibaadi bilamate pa mbidi pabo.
24 Binobino Efile Mukulu e kuinulama buanudia kupela kukokola, na kuinukuasha buanudia kuimana kushi matope kumpala kua ntumbo yaye ikata,
25 ntumbo, kinemo, bukome na matalua, bikale kui Efile Mukulu umune Mupaashi etu ku bukuashi bua Yesu Nkidishitu Nfumuetu, kubanga kala, binobino na bua loso. Amene.
Mayi e mushi mwesaki
^ Mu kina Greke aselgeia. Tala Kipatuluilo kia bishima.
^ Tala Kipatuluilo kia bishima.
^ Sunga “kabutu.”
^ Sunga “kukaanyisha bangi bantu.”
^ Sunga “mianda ibaabatemukile kala.”
^ Sunga “bantu be ku mbidi.”
^ Kish ku kish. “bashi mu kikudi.”
